Og Duma nok Pokpotampal
Pasal sok Pogbogbad bu ong mga Bahasa Pigtiduhan nok Kitab Sutsi
Ok Kitab Sutsi kini, ok pogbogbad nong maana nok Kitab Tawrat (Ponognaan bu Pogawaꞌ), Kitab Nabi Yunus bu Kitab Injil sog bahasa Kolibugan. Sok tabang nok Tuhan, pigmuhut-muhut nami gamiton ong mga taluꞌ nong modakol ong mokosabut dun. Sok pogbogbad nami, pingadjian nami ong maana nok Kitab Sutsi song mga bahasa piktiduhanin (Ibrani bug Grik). Pingadjian nami da sop ong mga pokpotampal nong maana nin (tafsir) bu ginis-ginisan nok pogbogbad.
Ok Kitab Tawrat bug Kitab Nabi Yunus asal sinulat sog bahasa Ibrani. Og bahasa Ibrani sumboy bastahon ta mamaꞌ nog bahasa Arab tidu sog lintu mangoy sog bibang. Maꞌ nini og upamahan nog bahasa Ibrani:
בְּרֵאשִׁ֖ית בָּרָ֣א אֱלֹהִ֑ים אֵ֥ת הַשָּׁמַ֖יִם וְאֵ֥ת הָאָֽרֶץ׃
Ong maana nin: Sok tolipunan tokodoy piongon nok Tuhan og langit bug lupaꞌ. (Kitab Tawrat, Ponognaan 1:1)
Ok Kitab Injil asal sinulat sog bahasa Grik. Poꞌ sog waktu ni Isa Al-Masih, og bahasa Grik og ginamit sog liwag nong mga bonuwa sakup nog bangsa Rum mamaꞌ nok pigonongan ni Isa Al-Masih. Maꞌ nini og upamahan nog bahasa Grik:
γὰρ εὐαγγελίζομαι ὑμῖν χαρὰν μεγάλην ἥτις ἔσται παντὶ τῷ λαῷ, ὅτι ἐτέχθη ὑμῖν σήμερον σωτὴρ ὅς ἐστιν Χριστὸς κύριος ἐν πόλει Δαυίδ.
Ong maana nin: Poꞌ mokposampoyu diniyu nong Mobais nok Suksugan nong mokobogoy nong mosolag nog loliyag sog lam nok tow. Poꞌ sog gobi kini binataꞌ ong Mogogawon diniyu sog bonuwa ni Daud, yonin na ok Panghuꞌ Al-Masih. (Kitab Injil, Lukas 2:10-11).
Sok pogbogbad nami, modakol ok sinakan nami nong mga tow bug poynoy ok ponabut nilon nong maana nong mga ayat bagun motampal ok pogbogbad nami dun bu mosugat song maana nin.
Pokpotampal nong mga Taluꞌ
Bilaꞌ mokotongow amu nok taluꞌ soupamaꞌ mamaꞌ nini kotubuꞌ solama-lama atawa Al-Masih, lumuwas ok pokpotampal pasal niyon bilaꞌ posolon niyu. Og lam nog Pokpotampal nong mga Talu, mibotang da sop sok silung nok TABANG sog listahan nog gungod nog app.
Pokposabut nog Hurup Mobeteꞌ
Bilaꞌ mokotongow amu sok pogbasta niyu nog hurup atawa litra mobeteꞌ sok kilid nok taluꞌ mamaꞌ nini a soupama sok Kitab Injil sok kodoksuan nog Lukas 24:7, mogdadi posolon niyu bagun lumuwas ok pokposabut sok silung nong mamaꞌ nini: “24:7 Basta niyu Kitab Injil, Matiyu 20:18-19.” Ong maana nin nong mobais bastahon sura 20, ayat 18 bu 19 sok Kitab Injil, Matiyu.
Ok Poksulat nog Bahasa Kolibugan
Modakol ok pobiyan moksulat nok solobuk bahasa. Kini solobuk pobiyan, sugaid daꞌdun ong mojukup nog pobiyan dun. Soupama og duma nok Kolibugan moktaluꞌ lolayun og, nog, sog, sugaid ong mga duma pindahon nilon sog ok, nok, sok, atawa sog ong, nong, song depende bug olo taluoy nong mogunut sok taluꞌ nilon. Olo-olo na ong mobais diniyu, yonin na og bastahon niyu bisan olo ong misulat.