Ok Pokposun
pasal sok Pitongow ni Panghuꞌ Isa Al-Masih diyon ni Yahiya
Mga pigilugan,
Salam diniyu kotanan.
Og bahagiꞌ nok Kitab Injil nok posunguꞌ niyu bastahon kini tinawag nok Pitongow. Ong miksulat nini, yonin na si Yahiya, bu sok ponabut nok kodakolan nong mga mokokosun yanin kini ok solokotow song mga mokpoposampoy ni Isa Al-Masih. Sok ponabut nilon yanin da sop ong miksulat nog bahagiꞌ nok Kitab Injil nok tinawag nog Yahiya sampoy ok tolu buk sulat ni Yahiya song mga moktotombaꞌ.
Sok ponabut nong mga mokokosun sinulat kini dangan miniyan mga nompuluꞌ bu lima tahun na tidu sok poguliꞌ ni Panghuꞌ Isa sok surgaꞌ.
Sog diyalom nok Kitab kini, mikpotongow si Isa Al-Masih diyon ni Yahiya, bangka nin suguoy mokpoyit nok pitu buk sulat sok pitu buk tumpukan nog jomaa. Ong mga sulat kini mokpolasig bu mokpologdong dinilon bagun diꞌ ilon kobolongan nok kotombaꞌ. Ong mga bonuwa nong mga jomaa kini, ok sakup ningkomun nog bonuwa Turki.
Puwas nituꞌ mitongow ni Yahiya ok Tuhan diyon sok trunu nin dunut mga malaikat ginis-ginisan, mga migmokogulang bug Bataꞌ Bilibili, ok solobuk song mga ngalan ni Isa Al-Masih.
Pitongow diyon ni Yahiya og ginis-ginisan nok pokpotongow. Song mikuna nok pokpotongow ongon ok kitab linulun nok taga tatak pitu buk. Dangan miawaꞌ ong mga tatakin, mikobiyan ok pogbunuꞌ, ponggutom bug kopatoy. Tubus moktagnaꞌ na ok kodoksuan nog dunya.
Sog ikoduwaꞌ nok pokpotongow ongon ok pitu buk nong malaikat nong migoyup nok tombuliꞌ nilon bangka pokobiyan og ginis-ginisan nog balaꞌ sog dunya. Tubus moktagnaꞌ na ok kodoksuan nog dunya.
Og ikotolu nok pokpotongow, yonin na ok pitu buk ponaksan taga gungod nong mibunag sog ginlupaan gantaꞌ mulkaꞌ nok Tuhan song mga manusiyaꞌ. Tubus moktagnaꞌ na ok kodoksuan nog dunya.
Na ok tolubuk pokpotongow kini mokpotampal dinita bug olo ong mokobiyan sog diꞌ pa ok kodoksuan nog dunya, bu og gindanan nog diꞌ na mobon og Gondow Poghukum.
Pitongow sop diyon ni Yahiya nok tinumuwaꞌ sog dunya ok tinawag nok sottuwa, yonin na ong mokondok-ondok nog binatang. Bu linumuwas pa og len nok sottuwa nong moksolobuk song muna nok sottuwa dunut nog dragun, nog yonin na og Iblis. Og ikoduwaꞌ nok sottuwa kini kiwakilan nok kowasa nong mikuna nok sottuwa bangka ponginang-inang bagun koakkalan ong mga manusiyaꞌ mogunut dinilon. Dadi ong mga mogogunut dinilon kini, tatakan og buna atawa komot nilon, bu daꞌdun ong mokosaluy atawa mokodagang bilaꞌ daꞌdun ok tatak koyon. Na ong mga manusiyaꞌ nog diꞌ meleg tatakan, patoyon. Pogobon-obon og duwaꞌ buk sottuwa kini sampoy og Iblis miksolobuk mogbunuꞌ sok Tuhan bug Bataꞌ in, sugaid midinag ong mga sottuwa kituꞌ bug Iblis bangka pilakoy sog linow nog gapuy taga asupri.
Doksuꞌ nituꞌ og Gondow Poghukum na, bangka hukumoy ok kotanan nong manusiyaꞌ tidu song mga ginang nilon nong misulat song mga kitab. Sugaid ongon pa og len nok kitab nok tinawag Kitab Kotubuꞌ. Dadi ong mga tow nog daꞌ kosulat ong mga ngalan nilon sok Kitab Kotubuꞌ kini, pilakon na ilon sog linow nog gapuy kituꞌ. Sugaid ong mga mogunut sok Tuhan bug Bataꞌ in, sinulat ong mga ngalan nilon sok Kitab Kotubuꞌ, bu mosannang na ok kotubuꞌ nilon solama-lama.
Saan da, sumboy poogoton ta niyu ok kotombaꞌ ta, poꞌ diꞌ na mobon, mokpuliꞌ si Panghuꞌ Isa dini sog dunya. Tubus nituꞌ motubuꞌ na solama-lama dunut diyanin ong mga mipapas na ong mga dusa nilon biyan sok pongandol nilon diyanin.
Bung mayan tonduan ita niyu nok Tuhan sok pogbasta ta nini, bu potontulonin ita niyu bagun mosannang ita solama-lama.
Wassalam
PITONGOW
ni Panghuꞌ Isa Al-Masih diyon ni Yahiya