Ok Sulat tidu ni
YAHUD
Ok Salam-duwaa
1
Salam diniyu,
mga kolasahan nong mikotolimaꞌ sok pogonggat nok Tuhan,
og Gommaꞌ ta bu pigayadan ni Isa Al-Masih.
Akon kini si Yahuda,
og gulipon ni Isa Al-Masih,
bu og gilug ni Yaꞌkub.
2 Bung mayan moglabi-labi og lolat,
lasa bug kosannangan diyon diniyu.
Pokpodinsamaꞌ pasal song mga Mokponintuluꞌ nog Loput
3 Mga kolasahan,
migmuhut-muhutu bosiya moksulat diniyu pasal sok pogawon nok piksolobukan ta.
Sugaid ningkomun mipikilu nok kitogolan ku sumulat diniyu,
bagun pongonihon ku tokodoy diniyu nog bologbogan niyu ong mosobonnal nok kotombaꞌ ta niyu,
nog ininsan da pogbogoy dinita,
mga sinutsi nok sukuꞌ nok Tuhan.
4 Tinaluan ku amu nini poꞌ ongon ong mga tow nong mikosoklok diniyu nok kanaꞌ molituhanoy.
Pilikoꞌ nilon ok taluꞌ nok Tuhan poꞌ miktaluꞌ ilon nong mogdadi ita da monginang nok kolaatan pasal molasa bu mololat da ok Tuhan.
Tinolikudan nilon da sop ok solobuk-lobuk Panghuꞌ ta Isa Al-Masih nong mogbobayaꞌ dinita.
Miobon na ginantaꞌ mokinam nok siksaꞌ ok tow nong mamaꞌ niyon.
5 Na melegu mokpopondom diniyu bisan kiosunan niyu na:
Migawon ok Tuhan nong mga tow Israel tidu sok koulipon nilon sog bonuwa Misir song masa ni Nabi Musab.
Sugaid puwas nituꞌ pinapasin da sop ong mga tow nog ondaꞌ tombaꞌ.
6 Bu popondomon ku sop diniyu ong mikobiyan tagnaꞌ song mga malaikat kituꞌ nog daꞌ pomologbog sok kopatut nog winakil dinilon,
sugaid ginonatan nilon ok pigonongan nilon.
Kinodinahan ilon bu pibagak ilon nok Tuhan sok kodoloman sampoy hukumon ilon sog Gondow Poghukum.
7 Na mamaꞌ niyon da sop ok Sodomc bug Gomora bug mga lungsud sog lumibut nog duwaꞌ buk siyudad koyon.
Og ginang nong mga tow diyon mogjina bu mokpoduhul nog landuꞌ nong molikoꞌ nok konapsuhan nilon.
Dadi linaat ong mga bonuwa nilon nog gapuy,
bu inimung ilon nok suntuan biyan sok koponiksaꞌ dinilon sog gapuy nog daꞌdun ok kodoksuanin.
8 Maꞌ nituꞌ da sop ong mga tow kituꞌ nong mikampuꞌ diniyu nok kanaꞌ molituhanoy.
Ongon dow ok pitoginop dinilon,
saan na misimoy ilon.
Mioyit nilon og lawas nilon sok koliksokan,
tolikudan nilon ong migbayaꞌ dinilon,
bu ponaluꞌ-naluan nilon nong molaat ong mga malaikat nok Tuhan.
9 Na bisan ok kounutan nong mga malaikat nok si Mikael,
daꞌ da poghukum sog Iblis dangan pigdaawahan nilon ok pasal sog bangkoy ni Musa,
tinaluꞌ in hadja,
“Ok Tuhan dona og humukum dinika.”d
10 Tibuwa ong mga tow nong milabit kituꞌ,
ponaluꞌ-naluan nilon nong molaat og diꞌ nilon mosabut.
Mamaꞌ ilon nong mga binatang nog bisan olo ok sinumolod sok pikilan nilon,
unuton nilon mogdayun,
bu yonin ong mokopoglaat dinilon.
11 Mokondok-ondok ok koposunguan nilon,
poꞌ migdogiling ilon ni Kabile.
Pasal sok sin piduhulan nilon og ginawa-baran nilon mogunut sok kolaatan ni Balaam song masa tagnaꞌ.
Yanin ong migoyit song mga tow sumimoy sog dalan mologdong posunguꞌ sok Tuhan pasal song napsu nin sok sin.f
Mosiksaꞌ da ilon mamaꞌ ni Korahg pasal sok pongatu nin sok Tuhan.
12 Ong mga tow kituꞌ mokotamak song mga pokoradjaan niyu nok poglasa-linasahoy.
Poꞌ migjamu-jamu ilon dunut diniyu nog daꞌdun ok sipog nilon,
bu daꞌdun og gondok nilon sok Tuhan.
Og ginawa-baran nilon da ok pokpikilon nilon.
Mamaꞌ ilon nong mga gandom inoyit nog galuꞌ nog daꞌdun og dupiꞌ in.
Mamaꞌ ilon da sop nong mga kayu nog diꞌ mogbunga bisan timpu pomunga na,
minatoy na tokodoy,
milungad.
13 Mamaꞌ ilon da sop nong mokoluksang nong nabok nog diꞌ kosaggaan,
bu motongow og bulaꞌ in mamaꞌ kotampal nok kohinangan nilon kituꞌ nok kosipog-sipog.
Atawa mamaꞌ ilon nog bitun nog diya-diya kotongow nok sinimpanan nog bonuwa nog landuꞌ kodolom solama-lama.
14 Na si Idris,
ok solobuk tupuꞌ ni Adam sog ikopitu pangkat nok ponupuꞌ inh,
mikpodinsamaꞌ na asal pasal song mga tow koyon,
longin,
“Ponginongog amu,
matong ok Panghuꞌi dunut landuꞌ kodakol nong mga malaikatin
15 bagun hukumon og lam nong manusiyaꞌ.
Hukumonin ong mga kanaꞌ molituhanoy,
pasal sog ginang nilon nog daꞌ kosugat sok pogammal.
Hukumonin ong mga baldusa nog daꞌdun og gondok nilon sok Tuhan pasal sog lam nong mobingis nok tinaluꞌ nilon diyanin.”
16 Ong mga tow kini mopagas mokkumong-umong,
bu lolayun ilon diꞌ kosuatan.
Mokpoduhul ilon song napsu nilon.
Og ginang nilon mogabbu,
bu pogulug-ulugan nilon ong mga tow bagun ongon ong malap nilon dun.
Mga Popondom bug Pomilin
17 Tibuwa amu,
mga kolasahan,
sumboy pondomon niyu ok tinaluꞌ dinsamaꞌ nong mga mokpoposampoy nok Panghuꞌ ta Isa Al-Masih.
18 Miktaluꞌ ilon diniyu,
“Sog waktu nong molani na ok kodoksuan nog dunya,
ongon ong mga mogunda-unda.
Og unuton nilon ong napsu nilon nog daꞌ kosugat sok poktuhan.”
19 Na ilon koyon ong mikposuwoy-suwoy nok tumpukan niyu moktotombaꞌ.
Pilabi nilon ok kolegan nilon,
bu daꞌ diyon dinilon og Ruh nok Tuhan.
20 Sugaid amu mga kolasahan ku,
popagon niyu og ginawa-baran niyu sog landuꞌ kosutsi nok pononduꞌ nok tinombaan niyu,
bu pongoni-ngoni amu biyan sog Ruh nok Tuhan.
21 Potattap niyu og ginawa-baran niyu sog lasa nok Tuhan,
soliyan niyu mogbagad nog bogoyon diniyu nok Panghuꞌ ta niyu Isa Al-Masih ok kotubuꞌ solama-lama sok surgaꞌ poꞌ kolasa-kololatanin amu.
22 Kololatoy bu tabangoy niyu ok sosuku migduwaꞌ-duwaꞌ.
23 Awon niyu og duma sok kosiksaan,
mamaꞌ nog dangguton niyu ilon sog gapuy.
Kololatoy niyu dunut gondok ong mga migdusa,
bu pokpotubud amu bagun diꞌ amu kopalitan song mga dusa nilon.
Kololatoy niyu ilon,
sugaid mompok amu song mga ginang nilon nong molaat.
Ok Pokpudji sok Tuhan
24-25 Na ok pokpudji ta posunguꞌ sok solobuk-lobuk Tuhan,
ong Mogogawon dinita biyan ni Isa Al-Masih,
ok Panghuꞌ ta niyu.
Yanin ong mikopogipat diniyu bagun diꞌ amu mokosimoy atawa kotuntutan,
sugaid mokpoadap diniyu song mokowasa bu mosahaya nog bonuwa nin dunut loliyag.
Diyon diyanin ok sahaya,
ok kotas,
ok kowasa bug pogbayaꞌ tidu sok tolipunan mangoy song ningkomun,
sampoy sok solama-lama.
Amin.
Wassalam