Matiyu 20

Ok Pononggiꞌ pasal song mga Tow Miginang sog Gumahan

Dadi ok mopononggiꞌ mamaꞌ nini. Ongon ok solokotow gapuꞌ lupaꞌ nog linumuwas nong mosolom pa bu minangoy tumindan nong mga moginang sog gumahanin nog . 2 Tubus inisunin ong mga mogoginang kituꞌ nok tindananin ilon nok kolayaman gadjihon sok sondow moginang bangka nin ilon pangoyoy sog gumahanin.

3 Pogluwasin puliꞌ nong mga lisag siyam, mitongowin og duma nok tow migindog sok tabuan nog daꞌdun og ginang nilon. 4 Na tinaluanin ilon, ‘Amu sooy, angoy amu sog gumahan ku. Tindanan ku da amu nong mologdong.’ 5 Dadi minangoy ilon dituꞌ.

Pogluwas nog gapuꞌ lupaꞌ nog lotu-ondow bu lisag tolu na nog lolabung, maꞌ nituꞌ da sop og ininangin. 6 Na song mga lisag lima nog lolabung, linumuwas na sop yanin bu mitongowin og duma tow nong migindog tibuwa diyon, taluꞌ in dinilon, ‘Manu migindog amu ma tibuwa dini sumondow?’ 7 Simambung ilon, ‘Poꞌ da dun pa ong mikpinang dinami.’ Taluꞌ in dinilon, ‘Angoy amu da sop moginang sog gumahan ku.’

8 Dangan gobi na, tinaluan nog gapuꞌ nog guma koyon ok pingandolanin, ‘Tawag nu ong mga mogoginang bangka nu ilon gadjihoy. Tagnaan nu song mibinayaꞌ moginang mangoy song mikuna.’ 9 Na ong mga mogoginang kituꞌ nok piinang song mga lisag lima nog lolabung, mikotolimaꞌ ilon bug andun ok kolayaman gadjihon sok sondow moginang. 10 Saan na pogdatong nong mga mikuna kituꞌ moginang, migniyat ilon nong mosolag-solag ok tindan dinilon, sugaid batuk da sop ong mitabuk nilon. 11 Poktolimaꞌ nilon dun, mikkumong-umong ilon sog gapuꞌ guma koyon. 12 Taluꞌ nilon, ‘Ong mga tow nong mibinayaꞌ, sooras da ilon miginang, sugaid pigbatuk nu dinami nok sumondow na miktiggol sok kopodosan.’ 13 Tibuwa tinabalin ok solokotow dinilon, ‘Pali, daꞌ u ika akkaloy. Kanaꞌ taꞌ nong migisun ita nok tindanan ku amu nok kolayaman gadjihon sok sondow moginang? 14 Dadi alap nu og dinika, bangka amu na uliꞌ. Tibuwa og legu nog bogoyan ku ong mga mibinayaꞌ kituꞌ mamaꞌ nog binogoyu diniyu. 15 Ondiꞌ u taꞌ buwan mogdadi inangon ok kolegan ku sok sin ku? Atawa migdalu amu taꞌ poꞌ mahatulu?’ ” 16 Na taluꞌ pa ni Isa, “Ong mibinayaꞌ, mokuna da, bu ong mikuna, mobinayaꞌ da.”

Og Ikotolu Poglabit ni pasal sok Kopatoyin

17 Dangan mikposunguꞌ na siloꞌ Isa sog , piselenin ok sopuluꞌ bu duwaꞌ kotow mulidin nog ilon-ilon da bangka nin ilon posunoy sog dalan bug olo ong mokobiyan diyanin, taluꞌ in, 18 “Poginongog amu! Posunguꞌ ita niyu na sog Jerusalem bu wakilon og song mga kounutan nok koimaman bug mga guru agama, bu hukumon nilon akon nok patoyon. 19 Puwas niyon wakilon nilon akon song mga tow nok kanaꞌ bangsa Yahudi bagun pogunda-undahon, lakposon bangka lansangoy sok , sugaid sog ikotolu ondow motubuꞌ u da mokpuliꞌ.”

Ok Pongoni nog Libun ni Sebede

20 Na minangoy diyon ni Isa og libun ni Sebede dunut duwaꞌ kotow bataꞌ in nog laki siloꞌ Yaꞌkub bu Yahiya. Simudjud yanin sog gadapan ni Isa bu ongon ok pingoni nin dun. 21 Dadi tinaluan yanin ni Isa, “Olo ok pongonihon nu?” Tinumabal og libun, “Bilaꞌ ika na ong momarinta song mga manusiyaꞌ, pingkud nu og duwaꞌ kotow nog bataꞌ u diyon sok kilidan nu, ok solokotow sog dapit lintu nu bu ok solokotow sog dapit bibang nu.”

22 Tibuwa ok tabal ni Isa, “Daꞌ niyu kosunoy bug olo ok pingoni niyu koyon. Kotatasan niyu taꞌ ok kobinsanaan nok posunguꞌ matong dinakon?” Ok tabal nog duwaꞌ kotow koyon, “Oo, kotatasan nami.” 23 Taluꞌ ni Isa dinilon, “Tantu kotatasan niyu ok kobinsanaan, sugaid ok pogingkud sog dapit lintu bug bibangu, kanaꞌ akon og dumuhul dun. Ong mokingkud dun, ong mga tinogamahan da nog u.”

24 Dangan midongog nok sopuluꞌ kotow nog duma mulid pasal sok pingoni nilon, milingit ilon sog duwaꞌ kotow mogilug koyon. 25 Tibuwa tinawag ilon ni Isa, bangka nin taluoy, “Kiosunan niyu nog ongon ok kowasa nong mga sultan dini sog dunya moksuguꞌ song mga pigbayaan nilon. Bu ong mga kounutanan nilon, mokpopotongow nok kotas nilon song mga piktowan nilon. 26 Na ondiꞌ koyon mogdadi diniyu, tibuwa sima-sima diniyu ong meleg motas, sumboy yanin mokpobabaꞌ moimung nok sosuguon niyu. 27 Bu sima-sima diniyu ong meleg moimung nok kounutan, na sumboy mokpoulipon yanin diniyu. 28 Poꞌ bisan akon og , minangoy dini kanaꞌ para tolagadon, tibuwa bagun moktolagad bu moglillaꞌ nong nyawa u gantaꞌ poglokat sok kodusahan nong mga manusiyaꞌ bagun modakol ong moawon.”

Pikuliꞌ ni Panghuꞌ Isa og Duwaꞌ Kotow Buta

29 Dangan ginumonat na siloꞌ Isa sog bonuwa Ariha, modakol ong mga tow nong migunut dinilon. 30 Na ongon og duwaꞌ kotow buta migingkud sok kilid dalan. Dangan midongog nilon nong miniyan si Isa diyon, migekes ilon, “Tuwan, ponupuꞌ ni Sultan , kololatoy nu ami!” 31 Tibuwa pigbinaan ilon nok kodakolan nok tow nog diꞌ moglimut. Sugaid pipagas pa tokodoy nilon ok taluꞌ nilon, “Tuwan, ok ponupuꞌ ni Sultan Daud, kololatoy nu ami.”

32 Dadi linumotaꞌ si Isa bangka nin tawagoy og duwaꞌ kotow nog buta, taluꞌ in, “Olo ok kolegan niyu nog inangon ku diniyu?” 33 Taluꞌ nilon, “Tuwan, meleg ami nong mobukaꞌ ong mga mata nami.” 34 Na limolat si Isa dinilon, bangka nin doponoy ong mata nilon, bu sododuun mikotongow na ilon bangka pogunut diyanin.