Ok Pokposun
pasal song Mobais nok Suksugan pasal ni Isa Al-Masih nok Sinulat ni Markus
Mga pigilugan,
Salam diniyu kotanan.
Og bahagiꞌ nok Kitab Injil nok posunguꞌ niyu bastahon kini, sinulat ni Markus pasal ni Panghuꞌ Isa nok tinawag nog duma nong Nabi Isa. Sinulatin kini mokkulang-moglabi 25 tahun tidu sok kotubuꞌ puliꞌ ni Isa Al-Masih bangka uliꞌ sok surgaꞌ.
Si Markus kini, mounut sok pikilan nok kodakolan, yanin da sop si Yahiya Markus bu goguapuꞌ yanin ni Barnabas.a
Sinulat ni Markus pasal song Mobais nok Suksugan, yonin nok piangoy nok Tuhan si Isa Al-Masih dini sog dunya bagun sima-sima ok tumombaꞌ diyanin moawon bu moampun ong mga dusa nin. Tinawag da sop si Isa nog Bataꞌ nok Tuhan, tibuwa sumboy mosabut ta nok kini og gollalin, pagga misolobuk yanin sok Tuhan. Pitongow sop ni Markus dinita niyu nok si Panghuꞌ Isa motud nong manusiyaꞌ sog waktu dini pa yanin sog dunya, koboloyan yanin, migutom, kinowow, bu mikkosusahan da sop yanin.
Modakol ok sinulat ni Markus dini bagun mosabut ta nok si Isa og Al-Masih, ok piniliꞌ bu piangoy nok Tuhan dini sog dunya. Yanin ok pigbinaan nok tinawag ni Nabi Danyel nog Bataꞌ nong Manusiyaꞌ nog daꞌdun ok kodoksuan nok pomarinta nin. Saan na tinawag da sop ni Panghuꞌ Isa og ginawa nin nog Bataꞌ nong Manusiyaꞌ. Mitongow ta ok kowasa nin biyan sog binulungin ong mga misaki, piluwasin ong mga soytan sog lawas nong mga tow, pitubuꞌ in ong mga minatoy, inampunin ong mga baldusa bu pisampoyin song mga tow ok taluꞌ nok Tuhan mamaꞌ nog daꞌ pa sibon posampoyoy.
Sok kodoksuanin, minatoy yanin mamaꞌ nok pidinsamaꞌ in tumaluꞌ, bu pimotud ok tinaluꞌ in nong motubuꞌ yanin puliꞌ. Tubus inoyit yanin sok surgaꞌ bangka ingkud sog lintu nok Tuhan.
Bung mayan tonduan ita niyu nok Tuhan bu podolagonin ok pikilan ta niyu sok kopogbasta ta nini. Bung mayan modiyon diniyu ok kolasa-kololat bug kosannangan nok Tuhan.
Wassalam