Mitubuꞌ Puliꞌ si Panghuꞌ Isa
28
Na mipuwas na og Gondow Pogogulali.
Pogdoliꞌ-ondow nog Gahad,
minangoy si Mariam,
ok tow Magdala bug sangoyin nok si Mariam tumibow sok kubul ni Isa.
2 Na sunoy pa,
miglinug na nong mopagas poꞌ minonog tidu sok surgaꞌ ong malaikat nok Tuhan,
bangka nin ligidoy ok tambol nog batu nok kubul kituꞌ,
doksuꞌ iningkudanin.
3 Og bayuꞌ-bayuꞌ in,
miksahaya mamaꞌ nok kilat bu ok ponapotin,
landuꞌ koputiꞌ.
4 Na ong mga migipat kituꞌ,
mingongkog ilon nog gondok bangka kopunung.
5 Tibuwa ok taluꞌ nong malaikat song mga libun koyon,
“Diꞌ amu mondok!
Kiosunan ku nok pinontong niyu si Isa nog linansang sok kayu.
6 Daꞌ na yanin dini.
Mitubuꞌ na yanin mokpuliꞌ mamaꞌ na nok tinaluꞌ in.
Sung,
tontong niyu ok pigbotangan dun.
7 Na podalian niyu suksugoy ong mga mulidin nong mitubuꞌ yanin mokpuliꞌ tidu sok kopatoy.
Tontong niyu ba,
moguna yanin diniyu dituꞌ sog Jalil,
dituꞌ niyu yanin kotongow.
Diꞌ niyu kolingowan ok tinaluꞌ u diniyu.”
8 Dadi ginumonat ilon mogdayun tidu sok kubulanin dunut gondok bu mosolag nog loliyag.
Ginumobok ilon bagun posunan ong mga mulidin.
9 Na sunoy pa linumpak ilon ni Isa bangka poktaluꞌ,
“Salam.”
Pokpolani nong mga kolibunan koyon dituꞌ ni Isa,
dinoponan nilon og botisin,
bangka nilon yanin sudjudoy.
10 Tinaluan ilon ni Isa,
“Diꞌ amu mondok,
angoy niyu taluoy ong mga pigilugan ku nong mangoy ilon sog Jalil bu dituꞌ nilon akon kotongow.”
Ok Suksugan nok Pisampoy nong mga Sundalu
11 Na soliyan nong mga kolibunan koyon sok pokpuliꞌ nilon,
minangoy og duma nong mga migipat kituꞌ nok kubul dituꞌ sok siyudad.
Sinuksug nilon song mga kounutan nok koimaman og lam nong mikobiyan kituꞌ.
12 Pokpuwas nituꞌ miglimud ong mga kounutan nok koimaman dunut nong mga migmokogulang.
Migisun ilon,
bu binogoyan nilon nong modakol nok sin ong mga migipat kituꞌ nok kubul ni Isa.
13 Taluꞌ nilon song mga migipat kituꞌ,
“Taluoy niyu ong mga tow nong minangoy dituꞌ ong mga mulidin sog gobi bangka nilon dakowoy og bangkoyin soliyan niyu totulug.
14 Bilaꞌ modongog nog gubernur ok taluꞌ koyon,
ami ong mokosun mogabit-abit diyanin bagun diꞌ amu moolo.”
15 Dadi inalap nilon ok sin koyon bangka nilon unutoy ok suguan dinilon,
bu ok suksugan kini mikanat sog bangsa Yahudi sampoy sog waktu kini.
Ok Suguan ni Panghuꞌ Isa song mga Mulidin
16 Na ok sopuluꞌ bu sala mulid ni Isa koyon,
minangoy na sog Jalil,
dituꞌ sog bontud nok tinaluꞌ ni Isa dinilon.
17 Dangan mitongow nilon si Isa,
sinumba nilon yanin,
sugaid og duma migduwaꞌ-duwaꞌ.
18 Tubus mikpolani si Isa dinilon bangka nin ilon taluoy,
“Og lam nok kowasa bug kopatut sok surgaꞌ bug dunya inuwakil dinakon.
19 Dadi panow amu sog lam nok kobangsa-bangsahan.
Imung niyu ilon nong mga mulidu,
bu liguꞌ niyu ilon song ngalan nog Gommaꞌ,
Bataꞌ bug Ruh Mahasutsi.
20 Tonduoy niyu ilon nog unuton og lam nok suguan ku diniyu.
Bu pondom niyu,
lolayun ku diyon diniyu sampoy sok kodoksuan nog dunya.”
Wassalam