Tɛ́ngɛfɔlilɔ pe mìɛni piyē cetinnɛ nigbe
4
1 Kire nɛ̄,
mi nɛ yeli fiɛn wī,
mi ŋáà wī kasuulewe wè Kàfɔli wi kɛnmɛ nɛ̄ bè,
yeri tári yeri yɛligi nɛ́ kayerile ní lè nàa nɛ̄ Kulocɛliɛ wi 'yeli yeri bèle.
2 Yeri yìye cɛ́rigi feliye yi mìɛni,
ye- puu funnyigefɔlilɔ,
ye puu nɛ́ kpàricogo ní,
yeri yìye kpàrí yeri cògí ye mìɛni nigbe nigbe bèle wìyedɛnigɛ nī gè.
3 Bɛ̀ Kulocɛliɛ Pìle ni 'yeli kpíʔile a yeli 'bìɛ wè,
yeri ki cìrá ki pínɛnyɛnigɛ gáà ki- kò yeli sunʔɔmɔ nī nɛ́ yanyige gáà ní ki 'yeli puɔ yìye nɛ̄ bèle.
4 Cetinnɛ niī nigbe,
Kulocɛliɛ Pìle niī nigbe nɛ̀ pínɛ.
Bɛ̀ míɛni ki yē,
Kulocɛliɛ wi 'yeli yeri nɛ̀ nyɔ́gɔ sɔ̀ngirɔ taʔadiʔɛ nigbe nī wī.
5 Kàfɔli wiī nigbe,
tɛ́ngɛlɛ niī nigbe,
batɛmi wiī nigbe,
6 Kulocɛliɛ wiī nigbe nɛ ní siɛnnɛ pe mìɛni Tuu,
wire wī pe mìɛni Kàfɔli wè,
níɛ baara nɛ́ pe mìɛni ní,
nɛ́ ní pe mìɛni nī bèle.
7 Nɛ̀ sí ki taa we mìɛni nigbe nigbe bèle,
we 'kpuʔɔrɔ taa nɛ̀ yɛli nɛ́ Kirisi wi yakɛngɛ ní gè.
8 Kire nɛ̄ Kulocɛliɛ siɛnsɛbɛrɛ ti 'ki juu nɛ́ joa:
Bà wi 'yɛ̀ baa naamɛ gè,
a wi 'nìʔɛnɛ jáa nɛ̀ pe cò nɛ̀ kɛ́,
nɛ́ sí kpuʔɔrɔ kpíʔile siɛnnɛ mɛ́ bèleb.
9 A ki sí jo wi 'yɛ̀ naamɛ gè,
kire kɔri wire 'jo gáa wī,
a ki 'laa kiì nyaaʔ wi cé kíni nɛ̀ tìgi náʔa táanmɛ gè dàala nɛ̄ lè ?
10 Ŋàa wi 'tìgi wè,
wire míɛni wī wi 'yɛ̀ nɛ̀ kɛ́ naamɛ gè nɛ̀ tóri nyìʔɛnɛ tiɛliiliye yi mìɛni nɛ̄ yè,
a kire tí a wi 'duniya powo wi mìɛni nyì !
11 Nɛ̀ pínɛ wire wi 'pàli kpíʔile Zezi tundunminɔ,
nɛ̀ pàli kpíʔile Kulocɛliɛ siɛnjuulo,
nɛ̀ pàli kpíʔile Kataanna Siɛnrɛ jáarifɔlilɔ,
nɛ̀ pàli kpíʔile tɛ́ngɛfɔlilɔ gbuʔulo nàʔavɔlilɔ,
nɛ̀ pàli kpíʔile tɛnmɛfɔlilɔ.
12 Wi 'kire gáà kpíʔile gè gìi ki bé tí pe- Kulocɛliɛ wuulo gbòbori bèle pe yaʔa Kulocɛliɛ baara ti kɛnmɛ nɛ̄ bè,
dí Kirisi wi cetinnɛ ni sí ŋɔri taa,
13 fúɔ bè taa weli we mìɛni we- pa we sɔ̀ngirɔ pínɛ dè nigbe tɛ́ngɛlɛ nī lè,
nɛ́ Kulocɛliɛ Jaa wi cɛ́nnɛ nī lè,
we- liɛ we lìri,
we- nɔ̀ Kirisi larigɛ nī gè bɛ̀ wire 'fori nɛ̀ paʔa wè.
14 A kire 'kpíʔile gè,
weli sǐ ní puu bɛ̀ pìile tíɛlɛʔ,
bèri wáa de yiʔi de mári majo bɛ̀ lakuruyo cî nɛ fílagi yèʔ,
siɛnnɛ pe káfinɛrɛ tɛnmɛgɛlɛ feliye yi mìɛni yi de we líi de we yiʔi de máriʔ.
Ki siɛnnɛ felile pe 'cìlige,
pe 'kpìlikpili cɛ́n wè bè siɛn fáanni bè pùunni.
15 Nɛ̀ sí ki taa a weli nɛ kányiʔɛ nyu gè siɛnnɛ mɛ́ bèle nɛ́ wìyedɛnigɛ ní gè,
weli béri liʔi de waa yiʔɛmɛ kele ke mìɛni nī gèle bè puu pínɛnɛ nɛ́ Kirisi ní wè.
Wire wī tɛ́ngɛfɔlilɔ gboli ni nyùgo gè.
16 Wire kɛnmɛ nɛ̄ cetinnɛ ni mìɛni ni nyɛ́nì suʔulo nɛ̀ pínɛ nɛ̀ nìi cò suʔudiɛyɛ yi mìɛni nī yè,
níɛ pínɛ nɛ kele kúu gèle,
gìi ó gìi nɛ̀ yɛli nɛ́ ki ŋɔri kɛnmɛ ní bè.
Kire kɛnmɛ báà nɛ̄ bè,
cetinnɛ ni mìɛni ni béri liʔi de waa yiʔɛmɛ wìyedɛnigɛ nī gè.
Tɛ́ngɛfɔlilɔ pe tánʔagɛnnɛ fɔnnɔ lè
17 Kire kɛnmɛ nɛ̄,
gìi m'bé juu bè gbɛ̀ngɛ Kàfɔli wi míʔɛ nɛ̄ gè,
n'gɛ:
ye fǎga ní de yeli sìi tári wèʔ majo mɛni sìndɛngɛlɛ piyē nɛ tári wèʔ,
nɛ́ pe sɔ̀ngiwaara ní dèʔ.
18 Piyē yebilige nī pe sɔ̀ngirɔ ti kiyɛ nī yè;
sìi ŋáà Kulocɛliɛ wiī nɛ kanʔa wè,
pe liɛlɛ wè baa wi nīʔ pe katiire tire kɛnmɛ nɛ̄ bè nɛ́ pe fungbɛnyɛ ní yè.
19 Pe 'kò fìɛrɛ fùn,
nɛ̀ pìye kɛn kanuʔɔrɔ kele mɛ́ gèle,
nɛ karimɛ baara felide ti mìɛni kúu dè,
pe wè tíngi ti nɛ̄ʔ.
20 Yeli sí bèle,
kire tɛnmɛnɛ lire bɛ̀ʔ yeli 'taa Kirisi wori nī dèʔ.
21 Kiī cɛ́ngɛ,
yeli 'wi wori lúʔu dè,
nɛ̀ pínɛ yeli 'tɛnmɛnɛ taa wi wori nɛ̄ dè nɛ̀ yɛli nɛ́ kányiʔɛ ní gè Zezi nī wè.
22 Kire nɛ̄ ye- láʔa yeli kaliɛmɛ kakpiʔiligele nɛ̄ gèle,
tire ti nyɛ́ni pínɛ nɛ tári céri kanɛdanʔana nɛ̀ siɛn pùunni wè.
23 Ye- tí yeli funyɔ yè nɛ́ yeli funzɔngirɔ ní dè,
ti- yiʔɛ ti kò fɔnrɔ,
24 yé sí kpíʔilegɛnvɔnmɔc líɛ,
kire ki 'yɛli nɛ́ Kulocɛliɛ kɛnmɛ ní bè.
Siɛn wi de tári sínmɛ koligo nī gè,
nɛ́ cìilimɛ nī bè kányiʔɛ wobo bè.
25 Kire nɛ̄,
ye- láʔa káfinɛrɛ nɛ̄ dè.
Yeri kányiʔɛ nyu yìye mɛ́ ye mìɛni bèled,
nɛ̀ taʔa gíi nɛ̄,
we mìɛni wiyē we yaliiye wī.
26 A yeli funyɔ yi 'yɛ̀,
ye fǎga kapiile kpíʔileʔe.
Cɛngɛ kiì yɛli bè jíin bè yeli funyɔ yaʔa yè yi de tíin yɛ̀riyɛʔ.
27 Ye fǎga larigɛ yaʔa gbòdolilo kàfɔli mɛ́ wè púloʔ !
28 Siɛn ŋíì wi nyɛ́ni yúu wè,
siɛn wi- kàyuugo yaʔa gè.
Gìi ki 'pɔ́ri gè,
siɛn wi- yiʔɛ le wiri baara wire tíimɛ wè nɛ́ wi kiyɛ ní yè,
gìi ki bé tí wi yakaa taa wi- gbɛ̀ wàa kɛn ŋàa nɛ̄ ki màakuu yē wè.
29 Siɛncuʔɔrɔ táà fáala fǎga de yigi yeli nyuɔyɔ nī yèʔ;
gìi ki 'pɔ́ri gè,
siɛnrɛ díì dī cɛ̀nrɛ dè bè gbɛ̀ jáa bè siɛn sáʔa bè wi woli nyuɔ lè,
bé sí kpuʔɔrɔ taʔa siɛnrɛ ti lúʔufɔlilɔ nɛ̄ bèle,
yeri tire nyu.
30 Nɛ̀ pínɛ,
ye fǎga de laamɛ pinʔɛ Kulocɛliɛ Tiɛlɛfun Pìle nī lèʔ;
lire nī Kulocɛliɛ fìɛ wè,
fìɛ ŋáà wi 'tɛ́ngɛ yeli nɛ̄ bèle níɛ yeli suɔjɛngɛ siri gè.
31 Funbiɛnrɛ dè,
nɛ́ fundanʔanigɛ ní gè,
nɛ́ funyɛrigɛ ní gè,
nɛ́ bèri nyu de kpɛ̀ní wè,
nɛ́ míɛcuʔɔgɔ siɛnrɛ ní dè,
tire dáà ti mìɛni dè nɛ́ sìpiire felide ti mìɛni ní dè,
ye- ti yaʔaf !
32 Ye- puu yeri kacɛ̀ngɛ kpínʔini yìye nɛ̄,
yeri nyinimɛ tari yìye nɛ̄,
yeri ki yɛri yìye nɛ̄,
majo mɛni Kulocɛliɛ wi 'ki yaʔa yeli nɛ̄ bèle Kirisi kɛnmɛ nɛ̄ bè.