Tɛ́ngɛfɔlilɔ pe 'yɛli peri tari kpìɛnmɛ nɛ̄
5
1 Ye sí puu yeri yeli kakpiʔiligele kpínʔini gèle bɛ̀ Kulocɛliɛ tíɛlɛ wè,
bɛ̀ yeli yē wi pìdɛninɛ bèle.
2 Yeri tári dɛ́nigɛ nī gè majo mɛni weli 'Kirisi dɛ́ni wè,
á wi 'wìi kɛn Kulocɛliɛ mɛ́ wè kakuɔrɔ yakɛngɛ nùdaanna wuʔua weli kɛnmɛ nɛ̄ bè.
3 Kire nɛ̄,
gìi ki 'kanuʔɔrɔ kúɔ dè,
nɛ́ núʔɔmɔ kakpiʔiligele feliye yi mìɛni ní yè,
nɛ́ fungbuʔɔ ní gè,
ye fǎga tí tire tàa fáala gá nyaa yeli sunʔɔmɔ nī bèʔ,
nɛ̀ yɛli nɛ́ gìi ki 'Kulocɛliɛ wuulo kɛnmɛ kúɔ bè.
4 Nɛ̀ pínɛ,
fìɛrɛfun siɛnjuuro dè,
nɛ́ ledobilo siɛnrɛ ní dè,
nɛ́ siɛnkarirɛ ní dè dàa tiì yɛli juʔu nɛ̄ gèʔ,
ti fǎri yigi yeli nyuɔyɔ nī yèʔ.
Gìi ki 'pɔ́ri gè,
yeri Kulocɛliɛ síɛri wè.
5 Á kire 'laa wè,
ye- ki sɔ́migɔ ye lúʔu cɛ̀ngɛ:
kanuʔɔrɔfɔli wáà fáala,
á kire 'laa siɛnkariwɛ,
á kire 'laa fungbuʔɔfɔli;
kire siɛn wiī nuwɔ nɛ́ ŋàa ní wi yasunro sungu dè.
Pe wàa fáala sì je ga kɔrigɔ taa baa Kirisi wi kùlofɔligɔ nī gèʔ wire nɛ́ Kulocɛliɛ ní wèʔ.
6 Ye fǎga tí siɛn yeli fáanni nɛ́ nyatanʔa siɛnjuuro níʔ.
Ye- ki cɛ́n tire dáà tire ti nyɛ́ni báan nɛ́ Kulocɛliɛ funyɛrigɛ ní gè siɛnsinluʔulo kúrugu bèle.
7 Kire nɛ̄,
ye fǎri nyaʔami ki siɛnnɛ bálì nī bèleʔ.
8 Kiī cɛ́ngɛ,
lɛ̀lɛ láà 'puu baa,
yeli 'puu yebilige nī;
nɛ̀ sí ki taa píra ŋáà nī wè,
yeli yē kpìɛnmɛ nī bɛ̀ yeli yē fàrilɛ nɛ́ Kàfɔli ní wè.
Yeri tári bɛ̀ kpìɛnmɛ pìile tíɛlɛ.
9 Nɛ́ ki cɛ́n bìli bīɛlɛ kpìɛnmɛ nī bè,
peli nàa kacɛ̀ngɛ,
nɛ́ sínmɛ,
nɛ́ kányiʔɛ koligo tári.
10 Yeri ki caa ye- ki cɛ́n gìi ki 'Kàfɔli dɛ́ni wè.
11 Ye fǎri nyaʔami pe nīʔ,
bàli pe kanyaʔamirɛ kúu dèʔ,
tɔ̀nifun wori dè,
yebilige wori dè.
Ye- cɛ yeri ti nyu de yigi kpànʔanɛ wī.
12 Ki 'nyaa pe kakpiʔiligele gálì pe kpínʔini làrimɛ nī bè,
tiī fìɛrɛ wori bè ti juu dè.
13 Nɛ̀ sí ki taa kele gílì ke mìɛni gīɛlɛ ke sî yiri kpìɛnmɛ nɛ̄ bè,
ke kɛnmɛ pi nɛ̂ yiri kpànʔanɛ.
14 Nɛ̀ taʔa gíi nɛ̄,
a kaala ó kaala 'yiri kpànʔanɛ gè,
ni nɛ̂ kò kpìɛnmɛ.
Kire nɛ̄ pe sî ki juu níɛ̀ jo:
Yɛ̀,
muɔ ŋáà ma ŋɔ́ni wè !
Nyɛ́ ma yiri kúbilo nī bèle,
bɛ̀ Kirisi wè,
Kulocɛliɛ Siɛnnyiɛnɛgɔnwɔ wè,
wi bé kpìɛnmɛ cáan muɔ nɛ̄b.
15 Ye sí de ciʔige yeli tánʔagɛnmɛ nɛ̄ bè díɛʔ !
Ye fǎga puu bɛ̀ sìnjiligefunfɔlilɔ tíɛlɛʔ,
ye- puu bɛ̀ siɛnsicilile tíɛlɛ.
16 Ye- lɛ̀lɛ ni cògɛnmɛ cɛ́n,
á kire 'laa wè,
pàngɛ cɛnyɛ nyáà nī we yē ŋɔ̀ wè,
yi wè cɛ̀nyɛʔ.
Weri weli sìi tári wè Kulocɛliɛ Pìle tánʔagɛnmɛ nɛ̄ bè
17 Kire kɛnmɛ nɛ̄,
ye fǎga yìye yaʔa bè puu ledoroʔ;
gìi ki 'pɔ́ri gè,
ye- puu ye kaala yiʔɛ cɛ́n ye ki cɛ́n gìi gī Kàfɔli wi nyɛ́ni kaala lè.
18 Ye fǎri sunmɔ gbun de tunʔ;
sunmɔ piī nɛ siɛn nii kanyaʔamirɛ nī.
Gìi ki 'pɔ́ri gè,
ye- puu ye nyì Kulocɛliɛ Pìle lire nɛ̄.
19 Yeri lèbaanna nyɔ́gi yìye nī nɛ́ ŋúnudaanya ní,
nɛ̀ pínɛ yeri Kulocɛliɛ gbùʔɔrigɔ ŋúnuyɔ ŋú yìye mɛ́,
nɛ́ ŋúnudo dáà Kulocɛliɛ Pìle ni sî sɔ̀ngi nɛ̀ tìrige siɛn mɛ́ wè fungo nī gè.
Yeri ŋú yeri Kàfɔli gbùʔɔrɔ́ wè nɛ́ yeli fungo ki mìɛni ní.
20 Yeri síɛrigɛ kanʔa Kulocɛliɛ mɛ́ wè,
weli Tuu wè,
lɛ̀gɛlɛ ke mìɛni nī,
kele ke mìɛni nɛ̄ gèle,
we Kàfɔli Zezi Kirisi wire míʔɛ nɛ̄ gè.
21 Yeri yìye cɛ́rigi yìye mɛ́ Kirisi wire yiʔɛ fíɛrɛ nɛ̄ dè.
22 Cɛlilɛ,
yeri yìye cɛ́rigi yeli pɔlilɔ mɛ́ bèle,
majo Kàfɔli wire mɛ́ yeli nɛ ki kpínʔini.
23 Ki 'nyaa labɔli wire wī cɛliwɛ wi nyùgo gè,
majo bɛ̀ Kirisi wiī tɛ́ngɛfɔlilɔ gboli ni nyùgo gè,
lire náà nī wi cetinnɛ lè.
Wire wī ki gboli ni suɔfɔli wè.
24 Bɛ̀ sí tɛ́ngɛfɔlilɔ gboli wuulo pe 'pìye cɛ́rigɛ Kirisi mɛ́ wè,
cɛlilɛ bèle,
peri pìye cɛ́rigi bɛ̀ kire felige pe pɔlilɔ mɛ́ bèle kele ke mìɛni nī gèle.
25 Yeli bèle labɔlilɔ bèle,
ye- tí yeli cɛlilɛ pe- yeli dɛ́ni majo bɛ̀ tɛ́ngɛfɔlilɔ gboli ni 'Kirisi dɛ́ni wè,
á wi 'wìi kɛn pe kɛnmɛ nɛ̄ bè.
26 Wi 'kire kpíʔile nɛ̀ pe jíge nɛ̀ mùnu nɛ́ luʔɔ ní Kataanna Siɛnrɛ tire fànʔa nɛ̄ gè,
bè tɛ́ngɛfɔlilɔ gboli wàli lè bè tɛ́ngɛ Kulocɛliɛ mɛ́.
27 Gìi ki bé tí wi- tɛ́ngɛfɔlilɔ gboli yige lè ni- yéri wire yiʔɛ mɛ́ gè nɛ́ kpuɔmɔ ní,
tiɛlɛ fǎga puu ni nɛ̄ʔ,
á kire 'laa ni fǎga puu fɛ́ninɛʔ,
bé nɛ́ ga jo kire kàa feligeʔ,
fúɔ macɛn ki gboli ni- puu wàlidɛngɛlɛ niiyɛ Kulocɛliɛ mɛ́ tiɛlɛ fùn.
28 Kire tiʔɛ gáà nī gè,
labɔlilɔ pe 'yɛli bè tí pe cɛlilɛ pe 'pe dɛ́ni majo peli tíimɛ cetinnɛ lire nī.
A siɛn ŋíì cuɔ 'wi dɛ́ni wè,
siɛn wire wi 'wìi dɛ́ni.
29 Siɛn céri fìɛ wi biɛn nɛ̀ nyaaʔ;
gìi cɛ gī baa gè,
siɛn wi nàa ti kanʔa ti nìɛ líi,
nɛ ti gbòborí majo mɛni Kirisi wiī nɛ tɛ́ngɛfɔlilɔ gboli kpínʔini lè.
30 Ki 'nyaa weli yē wi cetinnɛ ni yaliiye wī.
31 Kire nɛ̄,
a nàguɔ 'cɛliwɛ líɛ wè,
wi bé láʔa wi tuu nɛ́ wi yàa nɛ̄ wè,
bé sí wìi puɔ wi cuɔ nɛ̄ wè;
pe siin pe bé kò cetinnɛ nigbec.
32 Siɛnlaridɛ yē baa siɛnrɛ dáà nī dè,
ti kɔri wiī kpuɔwɔ.
Mi wè,
pínɛnyɛnigɛ gáà gī baa Kirisi nɛ́ tɛ́ngɛfɔlilɔ gboli ni sunʔɔmɔ nī bè kire mi nɛ pun.
33 Gìi sí gī baa gè,
ye mìɛni nigbe nigbe bèle,
nàguɔ ó nàguɔ,
wi- wi cuɔ woli yaʔa lè ni- wi dɛ́ni bɛ̀ wire tíimɛ wi 'wìi dɛ́ni wè,
dí cɛliwɛ míɛni wè,
wi sí de wi pɔli kpóri wè.