Sɛbɛ ŋáà Pɔli 'tórigo Galasiyé mɛ́ bèle
Galasiyé
Sɛbɛ wi tìɛdiʔɛ gè
Zezi Kirisi tundunwɔ ŋáà pe 'puu nɛ ye Pɔli wè, wire wi 'Galasi siɛnrɛ sɛbɛ dè nɛ̀ tórigo Galasi tɛ́nimɛ tɛ́ngɛfɔlilɔ mɛ́ bèle. Pɔli wi cé tɛ́ngɛfɔlilɔ gbuʔulo sáa tɛ́ngɛ tɛ́ngɛ nɛ̀ màʔa kàaya sáa nī baa Galasi tɛ́nimɛ nī bè. Pàngɛ gè Galasi tɛ́nimɛ pire pi 'kò Turuki kùlo lè.
Ki 'nyaa, bà Pɔli wiì yé ní nɛ̀ puu nɛ tíin baa nɛ́ Galasi wuulo ní bèle, a Zuufulo pálì 'kɛ́ nɛ̀ sɛ́ni tɛnmɛnɛ láà kanʔa tɛ́ngɛfɔlilɔ mɛ́ bèle, pe siɛnrɛ tiì 'puu nuro nɛ́ Pɔli wori ní dèʔ. Pe 'puu nɛ ki nyu nɛ́ jo dí Pɔli wi wè Zezi tundunwɔ kányiʔɛʔ, dí Kulocɛliɛ siɛnjuuliɛwɛ ŋáà pe 'puu nɛ ye Misa wè, dí Pɔli wi wè nɛ wi fànʔa kajuudiʔɛlɛ wori kpóri dèʔ, nɛ̀ pínɛ dí Pɔli wi wè Zuufulo kaliʔɛlɛ kpóri gèleʔ. Ki Zuufulo tɛnmɛfɔlilɔ bálì pe 'puu nɛ siɛnnɛ tɛnmɛ bèle nɛ́ jo dí a siɛn 'tɛ́ngɛ Zezi nɛ̄ wè, wi 'yɛli bè kɛnɛkɛnɛ kpíʔile wè bé nɛ́ sa suɔ wè.
A ki siɛnrɛ ti 'nɔ̀ Pɔli nɛ̄ wè. A wi sí sɛbɛ ŋáà tórigo wè baa pe mɛ́ bè juu tìɛ Galasi tɛ́ngɛfɔlilɔ nɛ̄ bèle wire tundungoligo ki wori nɛ̄ dè, nɛ́ sí siɛngbɛnrɛ juu nɛ̀ kɛn Zuufulo jànvaafɔlilɔ mɛ́ bèle, jànvaa ŋáà pe 'juu nɛ̀ taʔa wire Pɔli nɛ̄ wè nɛ́ Zezi Kataanna koligo ní gè. Zezi Kataanna Siɛnrɛ ti sí wè katiɛyɛ siinʔ.
Nɛ̀ pínɛ, Pɔli wi 'puu nɛ ki caa bè juu tìɛ tɛ́ngɛfɔlilɔ nɛ̄ bèle, pe- ki cɛ́n dí piyē pìyemɛ. Galasi Sɛbɛ ŋáà nī wè, Pɔli wiī nɛ nyu Kirisi tiiparigɛ wori nɛ̄ dè, kire tiiparigɛ gáà kire sí gī ŋɔ́daala taadiʔɛ gè. Kire kɛnmɛ nɛ̄ Pɔli wiī nɛ sìi fɔnwɔ wori nyu dè nɛ gbɛ̀ngí baa sɛbɛ wi siɛnrɛ nī dè, sìi fɔnwɔ ŋáà Kulocɛliɛ pìile pe 'taa bèle.
A we je sɛbɛ láʔala wè yasɛyɛ yasɛyɛ wè, wi láʔagɛlɛ n'gɛlɛ: nyùbelige nɛ́ nyùgo siinwuʔu nī gè (wéli baa 1–2), Pɔli wi 'juu nɛ̀ tìɛ mɛni wire yē Zezi Kirisi tundunwɔ kányiʔɛ wè. Zezi wire tíimɛ wi 'wi yeri. Nyùyɔ taanriwuʔu nɛ́ sicɛriwuʔu (wéli baa 3–4) kiī nɛ nyu Misa Fànʔa Siɛnrɛ wori nɛ̄ dè. Pɔli wi 'jo fànʔa kajuudiʔɛlɛ keli bɛ̀ʔ ke nyɛ́ni siɛn suuʔ, nɛ̀ yiri tɛ́ngɛlɛ lire nī Kàfɔli Zezi Kirisi nī wèʔ. Nyùyɔ kogunɔwuʔu nɛ́ kɔliniwuʔu (wéli baa 5–6) kiī nɛ nyu nɛ tìí tɛ́ngɛfɔlilɔ nɛ̄ bèle: Pɔli wi 'jo pe fǎri Zuufulo jànvaafɔlilɔ pe tɛnmɛnɛ lúru lèʔ. Wi 'pe yɛ pe- kò pe nyayerigele nī gèle tɛ́ngɛlɛ nī lè Zezi Kirisi nī wè. Pe- ki yaʔa Kulocɛliɛ Pìle lire de pe tìí. Siɛnrɛ ti kúɔmɔ mɛ́ bè a Pɔli wi 'siɛngbɛnrɛ juu nɛ̀ kɛn bìli mɛ́ pe nyɛ́ni kɛnɛkɛnɛ wori kpóri dè nɛ tòrí wè.
Sɛbɛ wi nyùgboliyo yè
Pɔli wi siɛnpelide dè (1.1-5)
Pɔli wi 'ki juu dí Kulocɛliɛ wire wi 'wire kpíʔile Zezi tundunwɔ wè (1.6–2.21)
Tɛ́ngɛfɔlilɔ peli Kulocɛliɛ wiī nɛ tɔ́ri siɛnsinminɛ bèle (3–4)
Tɛ́ngɛfɔli wi ní wè tíin Fànʔa Siɛnrɛ sùkulomɔ nī bèʔ, Kulocɛliɛ nyɛ́ni kaala wi 'kò nɛ kúu (5–6).