Galasiyé 1

Sɛbɛ ŋáà Pɔli 'tórigo Galasiyé mɛ́ bèle

Galasiyé

Pɔli wi 'wi tundungoligo ki wori juu dè

1 Mi wè, Zezi Kirisi tundunwɔ wè, mi mi nyɛ́ni sɛbɛ ŋáà tórigi wè baa yeli mɛ́. Kiì sí kò majo siɛn wi 'mi tunʔ, bé nɛ́ ga jo siɛn fànʔa nɛ̄ mi yē tundunwɔ wèʔ. Ki 'nyaa mi tundungoligo ki 'kɔ́n Zezi mɛ́, nɛ́ weli Tuu Kulocɛliɛ ní wè, wire ŋáà wi 'Zezi nyɛ́ wè nɛ̀ yige kúbilo nī bèle. 2 Mi nɛ́ we siinyɛninɛ bílì míɛ bīɛlɛ náʔa nɛ́ mi ní bèle, weli 'siɛnrɛ dáà sɛbɛ dè bè tórigo Galasi tɛ́nimɛ mɛ́ gèle. 3 Weli Tuu Kulocɛliɛ wè, nɛ́ we Kàfɔli Zezi Kirisi ní wè, pe dè nɛ́ pe yanyige ki- puu ye nɛ̄.

4 Zezi wi 'wìi kɛn nɛ̀ kùu weli kapiʔile kɛnmɛ nɛ̄, a kire 'tí a wi 'weli píle nɛ̀ suɔ yiribiile náà mɛ́ lè. Kire 'kpíʔile nɛ̀ yɛli nɛ́ weli Tuu Kulocɛliɛ nyɛ́ni kaala ní lè. 5  tiī wi wori lɛ̀gɛlɛ ke mìɛni. .

Kataanna Siɛnrɛ ti wè tiɛyɛ siinʔ

6 Ki 'mi fungo wúɔ bɛ̀ ki 'nyaa yeli 'caanri nɛ̀ láʔa Kulocɛliɛ nɛ̄ wè, nɛ̀ taʔa táà nɛ̄ tiiyɛ, dìi pe nyu dè. Kulocɛliɛ wire sí wi 'yeli yeri nɛ̀ pɛn wìi mɛ́ nyúmɔ nī bè. 7 Kiì sí kò majo Kataanna Siɛnrɛ táà dī baa tiiyɛʔ, ka laa siɛnnɛ pálì pe 'ki caa bè káaliyɛ nyɔ́gɔ yeli funyɔ nī yè bé sí Kirisi Kataanna Siɛnrɛ yiʔɛ dè. 8 A ki nɛ́ cɛ́nì nyaa weli wáà sɛ́nì kataanna láà juu yeli mɛ́, á kire 'laa ki cɛ buu wáà wi 'tìgi nɛ̀ pɛ́nì kataanna siɛnrɛ táà juu yeli mɛ́, dìi ti wè nuro nɛ́ dìi ní weli kíni nɛ̀ juu dèʔ, -dɛ́ngɛ de cáan nɛ́ ki siɛn ní wè.

9 Majo bɛ̀ mi 'kíni nɛ̀ ki juu gè, m'bé ní koli bè ki juu fùgu píra ŋáà nī wè: a siɛn pɛ́nì kataanna siɛnrɛ táà juu yeli mɛ́ dìi ti wè nuro nɛ́ dìi ní yeli kíni nɛ̀ lúʔu nɛ̀ kúɔ dèʔ, -dɛ́ngɛ de cáan nɛ́ ki siɛn ní wè.

10 Gíi yeli nɛ sɔ̀ngí, Kulocɛliɛ yiʔɛ mɛ́ mi nɛ míɛtanʔa caa gè lé, dí siɛnnɛ nyapigele nɛ̄ mi nɛ ki caa ? A ki yē siɛnnɛ nyaamɛ nɛ̄ mi nɛ tíin nɛ míɛtanʔa caa gè, miǐ sí ní gbɛ̀ puu Kirisi baakuɔwɔʔ.

Mɛni Pɔli wi 'kò nɛ̀ síɛ Zezi tundunwɔ wè

11 M'bé ki juu yeli mɛ́ mi siinyɛninɛ, ye- ki cɛ́n díì mi 'juu yeli mɛ́ bèle, siɛn mɛ́ bɛ̀ ti kɔ́nʔ. 12 Nɛ̀ taʔa gíi nɛ̄, mi sì ki siɛnrɛ lúʔu dè siɛn mɛ́ wīʔ. Siɛn bɛ̀ʔ wi 'mi tɛnmɛ ti nɛ̄ʔ. Ki 'nyaa Zezi wi 'mi yiʔɛ múgu gè a mi 'ki nyaa.

13 Yeli 'mi sìi kɛnmɛ cɛ́n bè, nɛ̀ ki cɛ́n tánʔana níì mi 'puu nɛ tári faʔa gè Zuufulo Kulocɛliɛ caagoligo nī gè. Ki 'nyaa mi 'puu nɛ Kulocɛliɛ túngu lè nɛ́ fungbɛngɛ ní, nɛ ní ki mɛ́ bè Kulocɛliɛ tɛ́ngɛfɔlilɔ gboli cúʔɔ lè bè yige baa péwu. 14 Mi 'tɔ̀ni nɛ̀ puu nɛ waa yiʔɛmɛ Zuufulo pe Kulocɛliɛ caagoligo nī gè, nɛ̀ mi liɛnyɛninɛ pe nìʔɛnɛ jáa mi kùlo wuulo nī bèle. Mi cé tɔ̀ni nɛ̀ jíin nɛ̀ cùru liɛlɛ pe kaliʔɛlɛ nī gèle nyapitɔn.

15 Nɛ̀ ki yaʔa bà ki kɛ́nì yɛ̀ Kulocɛliɛ fungo nī gè, ki 'nyaa wi kacɛ̀ngɛ kɛnmɛ nɛ̄ bè, wire tíimɛ wi cé mi wàli nɛ̀ tɛ́ngɛ wìi wuu nɛ̀ ki yaʔa miì cé fìɛ siiʔ, nɛ̀ mi yéri. 16 Bà sí ki 'yɛ̀ Kulocɛliɛ fungo nī gè wi- wi Jaa tìɛ wè mi nɛ̄ lɛ̀lɛ níì nī lè, dí mi sí sari wi Kataanna Siɛnrɛ jáari dè siɛnnɛ mɛ́ bèle, fáari fáari sɛni, mi sì ní nɛ̀ siɛn yúgo ti wori nɛ̄ dèʔ. 17 Nɛ̀ pínɛ, mi sì kɛ́ kàʔa mɛ́ʔ nɛ̀ sɛ́nì Zezi tundunminɔ bílì yúgo bèleʔ, bàli pe cé kíni nɛ̀ puu wi tundunminɔ mi yiʔɛ mɛ́ gèʔ. Ki 'nyaa mi 'fali nɛ̀ taʔa nɛ̀ fali sɛni Arabuulo kùlo mɛ́, nɛ́ nɛ́ kɛ́nì koli nɛ̀ pɛn Damasi kàʔa mɛ́ gè. 18 Yiʔɛlɛ taanri 'kúɔ kire kàduʔumɛ gè, a mi 'koli nɛ̀ pɛn Zerizalɛmi kàʔa mɛ́ gè, we- pa wìye cɛ́n mi nɛ́ ní wè, nɛ̀ sɛ́nì cɛnyɛ kiɛ nɛ́ kogunɔ kúɔ baa nɛ́ wi ní. 19 Tundunminɔ sɛnminɛ bèle mi sì cé peli nyaaʔ, nɛ̀ yiri Zaki nigbe nīʔ, we wi cɔni wè. 20 Siɛnrɛ dáà mi nɛ sɛbɛ yeli mɛ́ dàa dè, Kulocɛliɛ wiī nɛ mi nyaʔa, káfinɛrɛ bɛ̀ʔ.

21 Kire kàduʔumɛ gè a mi 'tóri nɛ̀ màʔa Siirii kùlo tɛ́nimɛ tiɛrɛ nɛ́ Silisii kùlo tɛ́nimɛ tiɛrɛ ní dè. 22 Ki 'nyaa tɛ́ngɛfɔlilɔ gbuʔulo gílì gīɛlɛ Kirisi wuʔulo gèle tɛ́nimɛ nī bè, ki gbuʔulo siɛnnɛ piyè yé fìɛ mi cɛ́nʔ. 23 Peli 'puu nɛ mi wori lúru dè yákuɔ wī, dí, «ŋàa wi 'puu nɛ we wuʔɔ faʔa gè, píra ŋáà nī wè wire wi nyɛ́ni tɛ́ngɛlɛ ni wori jáari dè, nàa wi 'puu nɛ caa ni- tɔ́n ni yiri baa lè.» 24 A pe díɛ nɛ nyu nɛ Kulocɛliɛ wè mi sìi kɛnmɛ nɛ̄ bè.