Pɔli wi 'kɛ́ Zerizalɛmi kàʔa mɛ́ Kataanna Siɛnrɛ ti jáaridiʔɛ nī
2
1 Yiʔɛlɛ kiɛ nɛ́ sicɛri 'tóri kire kàduʔumɛ gè,
a mi 'koli nɛ̀ kɛ́ cígini Zerizalɛmi kàʔa mɛ́ gè nɛ́ Barinabasi ní;
we cé Tiiti míɛni kɔ́ri nɛ̀ kɛ́.
2 Ki 'nyaa Kulocɛliɛ wire wi cé mi kárilɛ wori tìɛ dè.
A mi sɛ́nì Kataanna Siɛnrɛ juu dè nɛ̀ tìɛ ki tiʔɛ wuulo nɛ̄ bèle,
majo bɛ̀ mi dàli nɛ ti nyu kùlogolo kálì siɛnnɛ mɛ́ bèle.
Mi cé ti sɔ́migɔ nɛ̀ juu nɛ̀ tìɛ yiɛgininɛ nɛ̄ bèle nɛ̀ pínɛ piyeyɛ,
bìli siɛnnɛ piyē nɛ tɔ́ri kpuʔɔ gè,
ki fǎa ga nyaa baawaara mi nɛ kúuʔ.
3 Mi kobinɛnyɛni wè Tiiti wè,
Girɛkilɛ wuua wi 'puu,
piyè sí cé wi cɔ̀ri wi- kɛnɛkɛnɛ kpíʔile wè fànʔaʔ.
4 Ki 'nyaa jànvaa tɛ́ngɛfɔlilɔ pálì pe cé pìye kpíʔile peli yē nɛ́ weli ní tɛ́ngɛlɛ nī lèb,
nɛ̀ pɛ́nì jíin weli sunʔɔmɔ nī,
nɛ weli ciʔige nɛ wéli,
nɛ kɛnmɛ páà caa bèri weli kàrigí weli ní koli buu sùkulomɔ nī,
bɛ̀ weli yē wìyemɛ Zezi Kirisi nī wè.
5 Ki siɛnnɛ bálì bèle,
weli sì kɛ́nì wìye yaʔa nɛ̀ kɛn pe mɛ́ lɛ̀lɛ láà fáala nīʔ,
gìi ki bé tí Kataanna Siɛnrɛ ti kányiʔɛ ki- puu yeli mɛ́ súuri.
Tundunminɔ bílì pe 'fɔ̀li Pɔli siɛnjuuro nɛ̄ dè
6 Gìi ki 'yiɛgininɛ kɛnmɛ kúɔ bè bìli siɛnnɛ piyē nɛ tɔ́ri kpuʔɔ gè,
ma nɛ́ yē felige ó felige yo mi wè ki cuɔnriʔ,
nɛ̀ taʔa gíi nɛ̄,
Kulocɛliɛ wire mɛ́ wè wi wè siɛn yigi siɛn nīʔ.
Siɛnnɛ pe yiɛgininɛ bálì piyè kɛ́nì mi cɔ̀ri kaala láà nīʔ.
7 Ki 'nyaa pe yé cɛ́nì ki cɛ́n nɛ̀ cɛ́n dí Kulocɛliɛ wi 'mi tun mi- sari Kataanna Siɛnrɛ jáari dè kɛnɛkɛnɛ sìngbiʔilefɔlilɔ mɛ́ bèle,
majo bɛ̀ Kulocɛliɛ wi cé Piɛri tun a wi 'kɛ́ nɛ̀ sɛ́ni ti jáari bìli mɛ́ pe nyɛ́ni kɛnɛkɛnɛ wori kpóri dè nɛ tòrí wè,
Zuufulo bèle.
8 Ki 'nyaa Kulocɛliɛ ŋáà wi 'tunduro kɛn Piɛri mɛ́ wè wi- sari Kataanna Siɛnrɛ jáari dè kɛnɛkɛnɛfɔlilɔ mɛ́ bèle,
wire wi 'baara mi sìi nī wè nɛ̀ pínɛ,
gìi ki bé tí mi- sari ti jáari kùlogolo kálì siɛnnɛ mɛ́ bèle.
9 A ki 'nyaa Zaki nɛ́ Piɛri,
nɛ́ Zan,
bà peli ki 'cɛ́n nɛ̀ cɛ́n dí mi nyɛ́nì kpuʔɔrɔ taa Kulocɛliɛ mɛ́ wè,
peli sí siɛnnɛ piyē nɛ nyaʔa saʔa gèdingele gèle,
a pe 'tɔ̀ni nɛ̀ kiyɛ le weli mɛ́ mi nɛ́ Barinabasi ní wè,
nɛ̀ tɔ̀ni nɛ̀ ki tìɛ wiyē pínɛnyɛnigɛ nɛ̄.
Weli bèle,
a weli 'kɛ́ bàa de baara kùlogolo kálì siɛnnɛ sunʔɔmɔ nī,
á peli bèle,
a peli 'kɛ́ kɛnɛkɛnɛfɔlilɔ tiʔɛ nī.
10 Kaala nigbe pe 'juu weli mɛ́,
nɛ́ jo we- sari sɔ̀ngí de tari nɛ́ fuunmɔfɔlilɔ ní bèle.
Ki tiɛlɛ náà ni sɔ̀ngirɔ míɛni 'tɔ̀ni nɛ̀ puu mi nī nɛ̀ pínɛ,
bè ki kpíʔile gè.
Pɔli wi 'juu gbɛ̀ngɛ Piɛri nɛ̄ wè Antiyɔsi kàʔa mɛ́ gè
11 Bà Piɛri cé kɛ́nì pɛn Antiyɔsi kàʔa mɛ́ gèc,
a mi 'tɔ̀ni nɛ̀ juu wi nɛ̄ gbɛ̀ngɛ,
ki 'nyaa wi cé kapuunninɔ kpíʔile.
12 Ki 'nyaa náʔanɛ Zuufulo tɛ́ngɛfɔlilɔ pálì cé kɔ́n baa Zaki tiʔɛ nī gè bè kɛ́ baa Antiyɔsi kàʔa mɛ́ gè,
Piɛri wi 'puu nɛ wúu nɛ líi nɛ́ kùlogolo kálì siɛnnɛ ní bèle.
Bà sí Zuufulo tɛ́ngɛfɔlilɔ bálì pe sɛ́nì yiri baa bèle,
a Piɛri wi séli nɛ wìi wàlí nɛ yigi kùlo láà wuulo nī bèle,
nɛ̀ kò wiiyɛ.
Ki 'nyaa Zuufulo tɛ́ngɛfɔlilɔ bálì peli 'puu nɛ kɛnɛkɛnɛ wori kpóri dè.
A Piɛri wi sí nɛ fìʔɛ́ gìi pe bága juu wè.
13 A wi funyɔ siin tánʔana náà ni 'Zuufulo bílì sɛnminɛ pùunni bèle.
A Barinabasi míɛni wi 'wìi taʔa ki jànvaa tánʔana náà nɛ̄ lè.
14 Bà sí mi kɛ́nì ki 'nyaa pe wè tári nɛ síngi Kataanna Siɛnrɛ ti kányiʔɛ nɛ̄ gèʔ,
a mi 'juu nɛ́ Piɛri ní wè pe mìɛni nyɛni nɛ̄,
nɛ́ wi yɛ:
«Muɔ ŋáà wī Zuufuwo wè,
a muɔ nɛ kùlogolo kálì siɛnnɛ tánʔana tári,
nɛ́ Zuufulo tánʔagɛnmɛ yaʔa bè,
mɛni nɛ̀ síɛ muɔ bé sí de kùlogolo kálì siɛnnɛ cɔ̀rí bèle bé jo peri tári Zuufulo tánʔagɛnmɛ nɛ̄ bè ?»
Tɛ́ngɛlɛ ni nyɛ́ni siɛn suu
15 Weli bèle,
Zuufulo tìrige wuulo bīɛlɛ weli yē,
kiì nyaa majo weli 'yiri kùlogolo kálì siɛnnɛ tùlugo nī wīʔ,
kapiigbiʔilile tùlugoʔ.
16 Weli 'tɛ́ngɛ ki nɛ̄,
nɛ̀ ki cɛ́n dí siɛn sǐ gbɛ̀ wìi juu bè yige Kulocɛliɛ yiʔɛ mɛ́ gè nɛ́ Fànʔa Siɛnrɛ kakpiʔiligele ní gèleʔ,
fúɔ macɛn muɔ 'tɛ́ngɛ Zezi Kirisi nɛ̄ʔ.
Kire nɛ̄ weli 'wìye taʔa Zezi Kirisi nɛ̄ wè,
gìi ki bé tí weli gbɛ̀ juu yiri tɛ́ngɛlɛ lire kɛnmɛ nɛ̄ bè Kirisi nī wè,
ki fǎga nyaa Fànʔa Siɛnrɛ kakpiʔiligele ke 'weli juu nɛ̀ yigeʔ.
Nɛ̀ taʔa gíi nɛ̄,
Fànʔa Siɛnrɛ kakpiʔiligele kiyě gbɛ̀ siɛn juu bè yigeʔ.
17 A ki sí yē bà weli nɛ ki caa bè wìye juu bè yige Kirisi wire nyúmɔ nī bè,
a pàli nɛ ki nyaʔa nɛ̀ jo dùʔɔ weli míɛni yē kapiigbiʔilile bɛ̀ bìli tíɛlɛ bèle wè,
kire 'jo lé píra ŋáà nī wè Kirisi wiī kapiile baakuɔwɔ wī lé ?
ʔéʔe díɛʔ!
18 Ye- ki wéli kìɛ,
a ki 'nyaa kele gílì mi 'jo mi 'wáa kàduʔumɛ gè,
a mi 'koli nɛ ki kele ke koliyo tári yè,
kiì nyaa píra ŋáà nī wè mi mi 'kò siɛnkoliwo wè lé ?
19 A ki 'yéri mi nɛ̄ wè,
mi ní wè mi sìi tári wè Fànʔa Siɛnrɛ kakpiʔiligele nɛ̄ʔ,
mi nɛ mi sìi tári wè Kulocɛliɛ mɛ́ wī.
M'bé gbɛ̀ ki juu bè jo pe 'mi pínɛ nɛ̀ kóri nɛ́ Kirisi ní wè wī.
20 Mi yē sìi nɛ̄;
kiì sí kò majo mi tíimɛ sìi wīʔ.
Kirisi wī nyɛ́ni wi sìi tári wè mi nī.
Sìi ŋáà mi nɛ tári píra ŋáà nī wè,
tɛ́ngɛlɛ fànʔa nɛ̄ mi nɛ ki sìi ŋáà tári wè,
Kulocɛliɛ Jaa wire fànʔa nɛ̄.
Wire mɛ́ ki 'yɛ̀,
á mi woli ni 'kpúʔɔ wi mɛ́,
a wi 'wìi kɛn nɛ̀ mi kùu suɔ nɛ̀ kùu.
21 Miǐ gbɛ̀ Kulocɛliɛ wi kacɛ̀ngɛ cíi gèʔ.
Á kire 'laa wè,
a ki yē Fànʔa Siɛnrɛ ti bé gbɛ̀ siɛn juu bè yige Kulocɛliɛ yiʔɛ mɛ́ gè,
ki bé nyaa píra ŋáà nī wè Kirisi wi 'kùu nyùgo fùn wī.