Galasiyé 3

Fànʔa Siɛnrɛ lé dí tɛ́ngɛlɛ

1 Câto ledoro yeli, Galasiyé! Ŋáasiɛn wi 'yeli mùrugo kɛnmɛ báà nɛ̄ bè! Yeli yiʔɛ mɛ́ túʔu bɛ̀ʔ mi 'kíni nɛ̀ ti nɛ̀ juu nɛ̀ tìɛ, majo yeli 'ki nyaa nɛ́ yeli tíimɛ nyapigele ní wī, dí Zezi wi kùu taa wè lé ? 2 Ye- sí tí mi 'yeli yúgo kaala nigbe ní wêli: lè, yeli 'ni taa kakpiʔiligele nī wī lé, dí yeli 'ni taa bà yeli 'Kataanna Siɛnrɛ lúʔu dè nɛ́ tɛ́ngɛ wè, kire lé ? 3 Á gáa sí nɛ̄ yeli 'mùrugo mmɛ gè ? Yeli séli nɛ tári Kulocɛliɛ Pìle tánʔagɛnmɛ nɛ̄, bága pa ki kúɔ píra ŋáà nī wè nɛ́ yeli tíimɛ céri fànʔa ní lé ? 4 Kele gílì ke mìɛni ke 'yiri yeli nɛ̄ gèle, yeli ki mìɛni kpíʔile waʔanɛ wī lé ? Miì yéri tire nɛ̄ dèʔ. 5 Á kire 'laa wè, bà Kulocɛliɛ wi 'wi Pìle kɛn lè yeli mɛ́ bèle, níɛ kakpoliyo kele gílì kúu yeli sunʔɔmɔ nī bè, wiī nɛ kire kpínʔini lé nɛ̀ taʔa bɛ̀ yeli yē nɛ Fànʔa Siɛnrɛ tári dè nɛ láʔala dè lé, dí bɛ̀ yeli 'Kataanna Siɛnrɛ lúʔu dè nɛ́ tɛ́ngɛ wè, kire lé ?

Birayima wi 'puu tɛ́ngɛlɛfɔli

6 Ye- sɔ̀ngi kɛnmɛ nɛ̄ bè: Birayima wi cé tɛ́ngɛ Kulocɛliɛ nɛ̄ wè, a Kulocɛliɛ wi 'wi tɔ́ri siɛnsinwɛ wi tɛ́ngɛlɛ kɛnmɛ nɛ̄ bè. 7 Kire kɛnmɛ nɛ̄ ye sí ki cɛ́n, siɛnnɛ bílì bīɛlɛ nɛ́ tɛ́ngɛlɛ ní lè, peli bīɛlɛ Birayima pìile bèle. 8 Kire sí nɛ̄ ti 'ki juu nɛ̀ yaʔa nɛ́ jo, dí Kulocɛliɛ wi bága pa siɛnnɛ juu bèle bè yige tɛ́ngɛlɛ kɛnmɛ nɛ̄ bè, a Kulocɛliɛ wi 'ki juu nɛ̀ yaʔa Birayima mɛ́ wè nɛ́ wi yɛ: Muɔ nyúmɔ nī kùlogolo siɛnnɛ pe mìɛni bága pa diba taa. 9 Bɛ̀ sí ki yē, siɛnnɛ bílì pe 'tɛ́ngɛ bèle, pe bága diba taa bɛ̀ tɛ́ngɛlɛfɔli Birayima tíɛlɛ wè.

10 Bìli pe mìɛni sí pe 'pe funyɔ taʔa yè pe kakpiʔiligele keli nɛ̄, níɛ sɔ̀ngí peli yē nɛ tári dè nɛ láʔala wè, dɛ́ngɛ nyɛ́nì pe cò. Nɛ̀ taʔa gíi nɛ̄, Kulocɛliɛ siɛnsɛbɛrɛ ti 'jo: Siɛn ó siɛn wi wè sìɛnwɛ lɛ̀gɛlɛ ke mìɛni nī, nɛ Fànʔa Siɛnrɛ ti mìɛni tári nɛ láʔala dèʔ, dàa dī baa Fànʔa Siɛnrɛ nī dè, dɛ́ngɛ nyɛ́nì ki siɛn cò wè.

11 Kiī cɛ́ngɛ, siɛn sǐ gbɛ̀ wìi juu bè yige Kulocɛliɛ yiʔɛ mɛ́ gè nɛ́ Fànʔa Siɛnrɛ ní dèʔ. Nɛ̀ taʔa gíi nɛ̄, Kulocɛliɛ siɛnsɛbɛrɛ ti 'ki juu nɛ́ jo: Siɛn ŋíì Kulocɛliɛ wi 'kpíʔile sínwɛ tɛ́ngɛlɛ lire kɛnmɛ nɛ̄ bè, kire siɛn wi bé puu sìi nɛ̄. 12 Fànʔa Siɛnrɛ tiì pínɛ nɛ́ tɛ́ngɛlɛ ní lèʔ. Dàa ti 'juu baa dè nɛ́ jo: A siɛn ŋíì sí nɛ mi Fànʔa Siɛnrɛ cògí dè, wi bé sìi taa tire kɛnmɛ nɛ̄.

13 Kirisi wi 'weli suɔ nɛ̀ yige Fànʔa Siɛnrɛ dɛ́ngɛ nī wè, bɛ̀ ki 'nyaa wi 'ki kpàri nɛ̀ cò wìi nī, nɛ̀ dɛ́ngɛ suɔ wè nɛ̀ taa weli nyùgo nī gè.

Nɛ́ ki cɛ́n Kulocɛliɛ siɛnsɛbɛrɛ ti 'ki juu nɛ́ jo: «Siɛn ó siɛn pe 'kóri nɛ̄ gè, siɛn wi 'dɛ́ngɛ taa.» 14 Zezi Kirisi wi sí nyɛ́nì kire dɛ́ngɛ suɔ wè nɛ̀ taa weli nyùgo nī, gìi ki bé tí wire fànʔa nɛ̄ gè kùlogolo kálì siɛnnɛ pe- gbɛ̀ diba taa Birayima nyúmɔ nī bè, dí weli míɛni sí taa tɛ́ngɛlɛ nī lè, kpuʔɔrɔ díì nɛ̄ Kulocɛliɛ cé gè; kire kpuʔɔrɔ tire dī lè.

Fànʔa Siɛnrɛ nɛ́ nyakungɛngɛ ki siɛnrɛ ti n'dɛ

15 Mi siinyɛninɛ, ye tí mi kaala nigbe tɔ́nminɔ yeli mɛ́ nɛ́ weli siɛnnɛ kakpiʔilile láà ní. Kiī cɛ́ngɛ, a siɛn 'nyuɔ kún nɛ̀ kɛn kaala láà nī, á siɛnrɛ ti 'juu nɛ̀ cìile dè, siɛn sǐ gbɛ̀ ti wáa kàduʔu mɛ́ʔ, siɛn míɛni sǐ gbɛ̀ tàa taʔa ti nɛ̄ʔ. 16 Kulocɛliɛ wi cé sí nyuɔ kún nɛ̀ kɛn mɛ́ wè wire nɛ́ wi cesiʔi tùlugo wuu ní wè. Kiì sí joʔ, «nɛ́ wi cesiʔi tùlugo wuulo ní díɛ !», majo dùʔɔ siɛnniʔɛnɛ kaala nīʔ. Ki 'nyaa siɛn nigbe wori nɛ̄ ti 'juu, nɛ́ jo: «nɛ́ muɔ cesiʔi tùlugo wuu ní wè.» Kire siɛn wire sí wī wè. 17 A mi sí jo, a ki yē Kulocɛliɛ wire tíimɛ sí wi 'ŋɔri kɛn nyakungɛngɛ ki siɛnrɛ mɛ́ dè, tire dáà ti kɛ́nì pɛn kàduʔumɛ gè yiʔɛlɛ sirasiin togo nɛ́ kpɔrigɔ (430) kàduʔumɛ gè, keli bé ní gbɛ̀ nyakungɛngɛ ki siɛnrɛ jáa dè lé, bè ti tɔ́n lé ? 18 A ki yē Fànʔa Siɛnrɛ nɛ̄ kɔrigɔ kiī nɛ líi wè, kiǐ sí ní gbɛ̀ líɛ nyakungɛngɛ siɛnrɛ nɛ̄ʔ. Nɛ̀ sí ki taa Kulocɛliɛ wi 'nyuɔ fɛ̀ni Birayima mɛ́ wè nɛ̀ kpíʔile wi mɛ́.

Gáa kɛnmɛ nɛ̄ Fànʔa Siɛnrɛ ti 'kɛn

19 A ki sí yē bɛ̀, nyùgo kire sí yē gíi píra ŋáà nī wè ? Ki 'nyaa siɛnnɛ pe kolimɔ pire kɛnmɛ nɛ̄ fànʔa kajuudiʔɛlɛ ke 'juu nɛ̀ taʔa baa, náʔanɛ Birayima cesiʔi tùlugo wuu ŋáà wi ga pɛn wè, ŋàa kɛnmɛ nɛ̄ Kulocɛliɛ wi cé nyuɔ kún nɛ̀ kɛn wè. bīɛlɛ pe 'Fànʔa Siɛnrɛ tìɛ dè, nɛ́ sí ti le kàsuluwo kiyɛ nī; kire siɛn wire nyaa . 20 Bɛ̀ Kulocɛliɛ wi cé nyuɔ kún nɛ̀ kɛn Birayima mɛ́ wè, wi màakuu sì puu kàsuluwo nɛ̄ʔ, Kulocɛliɛ wi 'puu wìi nigbe nɛ́ kire kpíʔile.

21 Kire sí jo lé Fànʔa Siɛnrɛ tiī nɛ Kulocɛliɛ nyafɛnidɛ túngu dè wī lé ? ʔéʔe díɛ! A ki cé puu majo Fànʔa Siɛnrɛ ti yé je gbɛ̀ sìi kɛn siɛn mɛ́ wè, je siɛn cî gbɛ̀ jáa bè wìi juu bè yige nɛ́ Fànʔa Siɛnrɛ ní dè! 22 Nɛ̀ sí ki taa ti 'ki juu nɛ́ jo, dí siɛnnɛ pe mìɛni yē kapiile fànʔa láara wī, tiì wàa kɔ̀n wàa nīʔ, gìi ki bé tí bɛ̀ Kulocɛliɛ wi cé nyuɔ kún nɛ̀ kɛn tɛ́ngɛlɛ ni wori nɛ̄ dè, ki nyakungɛngɛ sìɛrɛ ti- fori tɛ́ngɛfɔlilɔ mɛ́ bèle Zezi nī wè.

Weli 'kò Kulocɛliɛ pìile nɛ ní wi kɔrigɔ ki lìifɔlilɔ

23 Sɛ́ni sí tɛ́ngɛlɛ lɛ̀lɛ ni- jíin lè, we 'puu láara dè, nɛ ní còdɔnminɔ, níɛ tɛ́ngɛlɛ ni tìɛlɛ lɛ̀lɛ siri lè. 24 A ki 'kpíʔile majo Fànʔa Siɛnrɛ tire ti 'puu weli nàʔavɔli wè, nɛ̀ pɛ́nì taa pɛn lɛ̀lɛ nī lè. Píra ŋáà nī wè á Kulocɛliɛ wi nɛ́ we juu nɛ̀ yige nɛ̀ we kpíʔile siɛnsinminɛ tɛ́ngɛlɛ fànʔa nɛ̄ gè. 25 Bà sí tɛ́ngɛlɛ ni 'jíin lè, we ní wè tíin nàʔavɔli wi fànʔa láara gèʔ.

26 Ki 'nyaa, yeli ye mìɛni yē Kulocɛliɛ pìile tɛ́ngɛlɛ fànʔa nɛ̄ gè Kirisi Zezi nī wè. 27 Kányiʔɛ nɛ̄ yeli bálì ye mìɛni ye wè nɛ̀ yìye taʔa Kirisi nɛ̄ wè, ki 'kpíʔile majo yeli 'Kirisi le wè burugo wī.

28 Zuufuwo wori ní wè baaʔ, kùlo láà wuu wori míɛni ní wè baaʔ. Nɛ̀ pínɛ sùkulowo ní wè baaʔ, mi yē mìɛmɛ wori míɛni ní wè baaʔ. Nàguɔ wori wè baaʔ, cɛliwɛ wori míɛni wè baaʔ. Ki 'nyaa píra ŋáà nī wè ye mìɛni 'kò nubilo Kirisi Zezi nī wè wī. 29 A ki sí yē yeli yē Kirisi wuulo bèle, yeli yē cesiʔi tùlugo wuulo nɛ̀ pínɛ, nɛ ní kɔrigɔ ki líifɔlilɔ nɛ̀ yɛli nɛ́ Kulocɛliɛ nyakungɛngɛ siɛnrɛ ní dè.