Galasiyé 4

1 Ye- sí ki wéli, a kɔrigɔ ki lìifɔli wiī nɛ tíin pùɔ wè, wàlimɛ wè pe sunʔɔmɔ nī wi nɛ́ sùkulowo ní wèʔ, nɛ̀ sí ki yaʔa wiī kɔrigɔ yɛrɛ ti mìɛni kàfɔli. 2 Ki 'nyaa pe nɛ̂ wi yaʔa nɛ́ pìcobilo pálì ní, wi nɛ̂ puu peli fànʔa láara gè, fúɔ bè taa lɛ̀lɛ níì wi tuu wi 'tìɛ lè. 3 Bà sí weli 'puu kire felige, bà pìire 'puu nɛ tíin weli nī bèle. Weli 'puu duniya kaliʔɛlɛ màama nī bè, nɛ ní ti sùkulolo. 4 Bà lɛ̀lɛ ni sí kɛ́nì pɛ́nì nyì nɛ̀ fori lè, a Kulocɛliɛ wi 'wi Jaa tórigo wè a cɛliwɛ pɛ́nì wi sii, wi ní láara dè, 5 gìi ki bé tí bìli bīɛlɛ Fànʔa Siɛnrɛ láara dè, wi- pe suɔ wi yige dí weli sí pìile míʔɛ taa bè buu Kulocɛliɛ pìile.

6 Bɛ̀ sí weli yē wi pìile bèle, a Kulocɛliɛ wi 'wi Jaa wi tìrige lè weli funyɔ nī yè, a Pìle ni pɛ́ni ki nyu nɛ yigi níɛ̀ wáa: «Aba, Tuufɔli !» 7 Kire nɛ̄ muɔ ní wè tíin sùkulowoʔ, muɔ yē pùɔ larigɛ nī. Bɛ̀ sí muɔ yē pùɔ wè, muɔ yē kɔrigɔ ki líifɔli wáà nɛ̀ pínɛ Kulocɛliɛ wire fànʔa nɛ̄ gè.

Galasiyé tánʔagɛnmɛ piī nɛ Pɔli fùrɔ́ wè fungo nī gè

8 Nɛ̀ ki yaʔa faʔa gè, bà yeli sì yé fìɛ Kulocɛliɛ cɛ́n wèʔ, ki 'puu yeli mɛ́ kadalilɛ yeli nɛ sùkulomɔ kúu yasunro táà mɛ́ nɛ̀ ki yaʔa ti wè Kulocɛliɛ peri ti kpóriʔ. 9 Bɛ̀ sí yeli 'Kulocɛliɛ cɛ́n wè píra ŋáà nī wè, á kire 'laa bɛ̀ yeli wuʔu ki kɛ́nì jíin Kulocɛliɛ nī wè, ki mɛni á ye ní nɛ̀ je koli bàa de sùkulomɔ kúu kaliʔɛlɛ yɛrɛ táà mɛ́ cígini, kanyuɔnɔfun yɛrɛ táà ? 10 Yeli náa cɛnyɛ wéli yè nɛ ciʔige, nɛ yege wéli gè nɛ ciʔige, nɛ lɛ̀gɛlɛ wéli gèle nɛ ciʔige, nɛ yiʔɛlɛ wéli gèle nɛ ciʔige! 11 Yeli tánʔagɛnmɛ piī nɛ fíɛrɛ cògí mi nɛ̄, ki ga nyaa mi nìɛ fùrɔ nɛ̀ wáa waʔanɛ yeli sunʔɔmɔ nī bè wī wè.

Pɔli wi 'Galasiyé fiɛn bèle nɛ́ jo pe- puu wire tíɛlɛ

12 Mi nɛ yeli fiɛn mi siinyɛninɛ, ye- puu mi tíɛlɛ nɛ́ ki cɛ́n mi míɛni 'kò bɛ̀ yeli tíɛlɛ. Yeli sì kaala kpíʔile mi nɛ̄ʔ. 13 Yeli tíimɛ 'ki cɛ́n mi 'puu yaawa nɛ́ sɛ́nì juu dè yeli mɛ́ tabelige nɛ̄ gè. 14 Bà mi 'puu yaawa nɛ́ ní wélibiɛnwɛ wè, yeli sì puu nɛ nyígi mi nɛ̄ʔ, nɛ tíɛnrɛ sùlugú nɛ wáariʔ. Mi wuʔu ki yé tɔ̀ni nɛ̀ puu yeli nɛ̄ gbɛ̀ligɛ. Ki 'nyaa yeli yé mi cò bɛ̀ tíɛlɛ wī, á kire 'laa bɛ̀ Zezi tíɛlɛ wè.

15 Yeli fundaanliɛrɛ tiʔɛ ki sí yē sé píra ŋáà nī wè ? M'bé gbɛ̀ ki juu bé jo a ki yé cɛ́nì nyaa pe 'jo yeli- yeli nyapigele kɔ̀n gèle bè mi kɛn gèle, yeli cî ki kpíʔile. 16 Ki bé sí ní gbɛ̀ nyaa píra ŋáà nī wè lé mi 'kò yeli leguuwo wī lé, a mi nɛ kányiʔɛ nyu gè yeli mɛ́ gè ?

17 Bìli pe yeli fáanni bèle, piyē nɛ ŋàʔaná ki koligo nī gè yeli kɔli mɛ́ gè, kiì sí kò majo yeli nyuɔmɔ pe 'caaʔ ! Ki 'nyaa piyē nɛ ki caa bè yeli wàli bè láʔa mi nɛ̄ wī, dí yeli sí de ŋàʔaná de pe nyɛni kele kúu wī. 18 Kiī cɛ̀ngɛ, a yeli nɛ ŋàʔaná bèri kacɛ̀ngɛ koligo tári lɛ̀gɛlɛ ke mìɛni nī wè, ki fǎga sí nyaa yeli de kire kpínʔini mi kárilɛ lɛ̀lɛ yákuɔ nī baa yeli mɛ́ bèleʔ. 19 Mi pìile, yeli fùrɔgɔ kiī náʔa mi nī cígini bɛ̀ cesiiwe tíɛlɛ, fúɔ bè taa yeli pa kò bɛ̀ Kirisi tíɛlɛ wè. 20 Ki láa yē mi nɛ̄ bè puu baa nɛ́ yeli ní lɛ̀lɛ náà nī lè, dí mi sí mi juugɛnmɛ yiʔɛ bè; yeli wuʔu ki 'tɔ̀ni nɛ mi fùrɔ́ fungo nī gè.

Agari nɛ́ Sara siɛnrɛ dī náʔa gè

21 Ye- ki juu mi- lúʔu wêli. Yeli 'jo yeli nɛ ki caa ti de yeli kàrigí, gìi sí Fànʔa Siɛnrɛ tiī nɛ nyu dè yeli wè ti lúru lé ? 22 Kiī cɛ́ngɛ, bɛ̀ ti 'ki juu gè.

Ti 'jo pìile pe 'puu siin. Wàa nigbe 'puu sùkulocuɔ wi wuu, ŋìi ní wè mìɛmɛ cuɔ wire wuu. 23 Ki 'nyaa sùkulocuɔ wi pùɔ wire cé sii nɛ̀ yɛli nɛ́ siɛnnɛ siigɛnmɛ ní bè; cɛliwɛ ŋáà wī wìimɛ wè, a wire 'wi pùɔ sii wè nɛ̀ yɛli nɛ́ bɛ̀ Kulocɛliɛ cé nyuɔ fɛ̀ni nɛ́ siɛnrɛ díì juu dè. 24 Cɛlilɛ bálì pe siin bèle, katɔnmininɔ láà felige nī. Ki 'nyaa pe siin piyē nɛ nyakungɛngɛ tiɛyɛ siin tìí. Sùkulocuɔ wè, wire nɛ Kulocɛliɛ ki kɛnmɛ tìí bè, gàa Kulocɛliɛ wi cé kpíʔile nyagurugo nɛ̄ gè. Wire pìile pe 'sii sùkulomɔ nī. 25 Ki 'nyaa Agari wire wī Sinayii nyagurugo gè baa Arabuulo kùlo nī lè. kàʔa gáà sí gī baa píra ŋáà nī wè, ki kɛnmɛ pi 'wúɔ nɛ̀ yɛli nɛ́ Agari wori ní dè. Nɛ̀ taʔa ki nɛ̄ ki kàʔa ki tɔ̀ni yē baa sùkulomɔ nī nɛ́ ki siɛnnɛ ní bèle. 26 Nɛ̀ sí ki taa kàʔa gíì gī baa naamɛ wuʔu gè, ki wè sùkulomɔ nīʔ, kire yē kìimɛ. Kire sí gī weli yàa wè. 27 Kulocɛliɛ siɛnsɛbɛrɛ ti 'ki juu nɛ̀ pínɛ nɛ́ jo:

Puu fundaanra nɛ̄, sìndigicuɔ,

muɔ ŋáà miɛ̀ sii nɛ̀ nyaa wèʔ,

nɛ́ miɛ̀ cesiʔi fùrɔgɔ cɛ́n gèʔ.

Te tíʔɛ mari muguri !

Nɛ̀ taʔa gíi nɛ̄, cɛliwɛ ŋíì pe 'yaʔa wè,

wi pìile pe 'niʔɛ cɛliwɛ ŋíì ní labɔli wi kòrí wè, wi pìile nɛ̄ bèle.

28 Yeli bèle, mi siinyɛninɛ, yeli yē píra ŋáà nī wè Kulocɛliɛ nyafɛnigɛ siɛnrɛ ti pìile bɛ̀ tíɛlɛ wè. 29 Ye- sí ki cɛ́n, pùɔ ŋíì pe yé sii faʔa faʔa gè nɛ̀ yɛli nɛ́ céri kɛnmɛ ní bè, bà ki pùɔ wi 'puu nɛ pùɔ ŋíì wuʔɔ wè, ŋàa pe 'sii fànʔa nɛ̄ gè, ki nugo kire ki waa nɛ tíin pàngɛ gè.

30 Gíi sí ki 'juu baa Kulocɛliɛ siɛnsɛbɛrɛ nī dè ? Tiì jo lé: -Sùkulocuɔ cìra wè nɛ́ wi jaa ní wè, nɛ́ ki cɛ́n sùkulocuɔ ŋáà wi jaa wiǐ gbɛ̀ kɔrigɔ lìi gè nɛ́ cɛliwɛ ŋáà wī wìimɛ wè, wi jaa ní wèʔ. 31 Kire kɛnmɛ nɛ̄, mi siinyɛninɛ, weli wè sùkulocuɔ wi pìileʔ, cɛliwɛ ŋáà wī wìimɛ wè, wire pìile weli yē.