Weli yē wìyemɛ Zezi nī wè
5
1 Kirisi wi 'weli suɔ we- puu wìyemɛ wī.
Ye- sí yìye cò cɛ̀ngɛ,
ye fǎga ní sa yìye cò bè le sùkulomɔ wuʔɔgɔ nī gèʔ.
2 Ye- nyaa,
mi wè,
mi Pɔli wè,
m'bé ki juu yeli mɛ́,
a yeli 'yeli sɔ̀ngirɔ taʔa dè kɛnɛkɛnɛ nɛ̄ wè,
tɔ̀ni yafiɛn ní wè tíin yeli mɛ́ Kirisi nī wèʔ.
3 M'bé ní koli bè ti fùgu,
siɛn ó siɛn wi 'wìi kpíʔile kɛnɛkɛnɛfɔli wè,
siɛn wi- ki cɛ́n wire 'yɛli bèri Fànʔa Siɛnrɛ ti mìɛni tári de láʔala ti nyɔgɔlɔ nī gèle wī.
4 Yeli bálì ye 'ki caa bè yìye juu bè yige nɛ́ Fànʔa Siɛnrɛ ní dè,
yeli nyɛ́nì yìye wàli nɛ̀ láʔa Kirisi nɛ̄ wè.
Yeli 'pɔ̀li nɛ̀ tuu nɛ̀ yìye wàli nɛ̀ yige Kulocɛliɛ kpuʔɔrɔ nī dè.
5 Weli bèle,
sɔ̀ngirɔ taʔadiʔɛ sí yē weli mɛ́ Kulocɛliɛ nī wè,
a weli 'ki cɛ́n wi bága sa weli juu bè yige.
Kire lɛ̀lɛ lire sí weli nɛ siri Kulocɛliɛ Pìle ni fànʔa nɛ̄ gè nɛ́ tɛ́ngɛlɛ ní.
6 Ki 'nyaa a siɛn yē Zezi Kirisi nī wè,
ma kɛnɛkɛnɛ yo,
miɛ̀ nɛ́ kɛnɛkɛnɛ yoʔ,
kire kàa wuʔu sì kpúʔɔʔ.
Gìi wuʔu ki 'kpúʔɔ gè,
ma puu nɛ́ tɛ́ngɛlɛ ní,
tɛ́ngɛlɛ náà ni nyɛ́ni ki tìí siɛnnɛ pe 'muɔ dɛ́ni wè,
muɔ kakpiʔiligele nī gèle.
7 Yeli cé séli nɛ tári cɛ̀ngɛ Kirisi koligo nī gè.
Ŋáasiɛn sí wi kɛ́nì yeli cɔ̀ri nɛ̀ láʔa kányiʔɛ nɛ̄ gè,
bà yeli 'puu nɛ lúru kányiʔɛ mɛ́ gè ?
8 Ki jànvaa juulo náà ní pe 'yeli fáanni bèle niì kɔ́n Kulocɛliɛ mɛ́ʔ.
9 Pe 'kàsiile wáari níɛ̀ jo:
«Sìnvari cɛ̀ri ti nyɛ́ni ŋɔ̀mi luʔɔ ki mìɛni yɛ̀gí.»
10 A ki 'yéri mi nɛ̄ wè,
we Kàfɔli wire fànʔa nɛ̄ gè,
mi 'tɛ́ngɛ yeli nɛ̄ nɛ̀ taʔa ki nɛ̄ sɔ̀ngirɔ táà wè yeli nī tiiyɛʔ.
Siɛn ó siɛn sí wi nyɛ́ni yeli sɔ̀ngirɔ nyaʔami dè,
siɛn wiǐ ga sa fɔ̀n wi kàyuʔu nī gèʔ,
siɛn wi ga nɛ́ yē felige ó feligeʔ.
11 Mi wè,
mi siinyɛninɛ,
a ki yē mi 'puu nɛ kɛnɛkɛnɛ wori jáari dè nɛ́ jo kɛnɛkɛnɛ wi bé gbɛ̀ siɛn suɔ wèa,
gáa sí nɛ̄ pe tíin nɛ mi túngu ?
Kirisi kórilo wori dáà mi nɛ jáari dè,
tire cî sí ní siɛn biɛn léb ?
12 Siɛnnɛ bílì pe nyɛ́ni yeli sɔ̀ngirɔ nyaʔami dè,
pe- sí pe nàguɔmɔ ceri bè pe- láʔa sɛni kìɛc !
Ye- dɛ́nigɛ yaʔa ki- puu yeli sunʔɔmɔ nī
13 Yeli bèle,
mi siinyɛninɛ,
Kulocɛliɛ wi 'yeli líɛ ye- puu yìyemɛ wī;
ye fǎga sí ki yaʔa bɛ̀ yeli yē yìye mɛ́ bèle,
kire 'kpíʔile kaala dí yeli de céri kanɛdanʔana kúuʔ.
Gìi ki 'pɔ́ri gè,
yeri màama kúu yìye mɛ́ yeli dɛ́nigɛ kire kɛnmɛ nɛ̄ bè.
14 Nɛ̀ taʔa gíi nɛ̄,
Fànʔa Siɛnrɛ ti nyùgbuʔɔ kire ki 'juu náʔa siɛntiʔɛ gáà nī gè,
nɛ́ jo:
-Muɔ siɛnnyɛni woli yaʔa lè ni- muɔ dɛ́ni kɛnmɛ bíì nɛ̄ muɔ 'mìɛ dɛ́ni wèd.
15 A ki sí yē yeli nɛ yìye nɔgi nɛ káa bèle,
ye- sí yìye cò díɛ!
Yeli tíimɛ fǎa ga yìye káa bè yìye cúʔɔʔ.
Ye- tí we- ki yaʔa Kulocɛliɛ Pìle lire de we kàrigí
16 M'bé sí ki juu yeli mɛ́,
yeri tári ye ki yaʔa Kulocɛliɛ Pìle lire de yeli sìi kàrigí wè,
bà yeli sǐ de céri kanɛdanʔana kúuʔ.
17 Ki 'nyaa céri kanɛdanʔana kiyē nɛ túngu nɛ́ Kulocɛliɛ Pìle ní lè,
á Kulocɛliɛ Pìle míɛni ní lè nɛ túngu nɛ́ céri kanɛdanʔana ní gèle.
Kire tiʔɛ gáà nī gè ti tiɛyɛ siin yiī nɛ túngu nɛ́ yìi ní.
Kire nɛ̄ yeli sì ní gbɛ̀ri yeli nyɛ́ni kele kúuʔ.
18 A ki tɔ̀ni yē Kulocɛliɛ Pìle lire ni nyɛ́ni yeli tìí wè,
yeli sǐ buu Fànʔa Siɛnrɛ màama nī bèʔ.
19 Céri kanɛdanʔana ke wè làrimɛ nīʔ,
n'gɛlɛ:
kanuʔɔrɔ kele gèle,
núʔɔmɔ kele,
fìɛrɛfun kele,
20 yasunzunro,
dìɛmɛ,
leguuro,
kàsii,
nyabiɛnnɛ,
funyɛrigɛ,
yejaʔa,
kàkiɛrɛ,
nɛ́ wàlimɛ kakpiʔiligele,
21 nìge kele,
sungbuɔdinre,
cègbuʔɔ,
nɛ̀ fàri kele gílì míɛ gīɛlɛ ke waa nugolo nɛ́ tire dáà ní dè.
M'bé ki juu bè yeli sɔ̀mi,
majo bɛ̀ mi 'kíni nɛ̀ ki juu nɛ̀ kúɔ gè,
siɛnnɛ bílì pe 'dàli nɛ kele gálì kúu gèle,
pe wàa sì je sa Kulocɛliɛ Kùlofɔligɔ taa gèʔ.
22 Kulocɛliɛ Pìle yasɛngɛ ki kàtogo yɛrɛ ti sí n'dɛ:
siɛnnɛ nìge,
fundaanra,
yanyige,
kpàricogo,
kacɛ̀ngɛ,
funjɛ̀ngɛ,
ma puu tɛ́ngɛlɛ siɛn,
23 funnyige,
ma jáa mìɛ nɛ̄.
Fànʔa kajuudiʔɛlɛ kiyè kele gálì cíi gèleʔ.
24 Siɛnnɛ bílì bīɛlɛ Zezi Kirisi wuulo bèle,
pe 'céri pínɛ dè nɛ̀ ti kóri tiiparigɛ nɛ̄ gè nɛ́ ti kanɛdanʔana kele ní gèle,
nɛ̀ fàri céri nìge kakpiʔiligele nɛ̄ gèle.
25 A ki yē Kulocɛliɛ Pìle lire ni nyɛ́ni weli sìi kàrigí wè,
we sí de Pìle ni tánʔamɛ tári.
26 Ye fǎga tí weri wìye kpóriʔ,
de wìye nyuɔyɔ caaʔ,
bèri nyabiɛnnɛ kpínʔini wìye nɛ̄ʔ.