Galasiyé 6

Tɛ́ngɛfɔlilɔ pe 'yɛli peri pìye sári

1 Mi siinyɛninɛ, a pe 'siɛn cò kaala láà fáala nī, yeli bálì ye nyɛ́ni tári kodanʔara nī dè, ye- juu siɛn ní wè funnyige siɛnrɛ nī, ye wi yɛ̀gɛ. Má sí mìɛ cò muɔ tíimɛ wè, ma fǎga tuu puuwelige kaala láà nīʔ.

2 Yeri yìye tugoro turu dè; a yeli nɛ kire kpínʔini yeli bé kajuulo fori lè. 3 A siɛn sí nɛ wìi sɔ̀ngí wire yē yakaa, nɛ̀ ki yaʔa wi sí wè yafiɛn wèʔ, wire wi 'wìi fáanni. 4 Siɛn ó siɛn, wiri wi tíimɛ kakpiʔiligele tɔ́nminɔ gèle wi wéli, a siɛn wi bé nɛ́ de wìi tòbiló, wiri wìi tòbiló wi tíimɛ tánʔagɛnmɛ nɛ̄. Siɛn wiǐ ní de wìi tɔ́nminɔ nɛ́ wàa níʔ. 5 Kányiʔɛ nɛ̄ we mìɛni nigbe nigbe bága sa yéri nɛ́ we tugoro ní wī.

Yatanʔara díì siɛn 'tánʔa tire wi bága líɛ

6 Siɛn ŋíì pe nyɛ́ni tɛnmɛ Kulocɛliɛ siɛnrɛ nɛ̄ dè, siɛn míɛni wiri wi tɛnmɛfɔli kanʔa wè wi kɔliyɛrɛ ti mìɛni nɛ̄. 7 Siɛn fǎga pùunni tiɛlɛ náà nī lèʔ, pe wè Kulocɛliɛ tíʔɛʔ. Yɛgɛ gíì siɛn 'tánʔa, kire wi bága taa. 8 Ye- sí ki cɛ́n, a muɔ siɛn nɛ céri kanɛdanʔana kúu gèle, gìi muɔ bága taa céri nī dè, fúnʔɔrɔ dī. A ŋìi sí nɛ kanɛdanʔana kúu, gìi wi bága pa taa Pìle kɔli mɛ́ gè, bànguɔ sìi wī. 9 Ye- sí tí weri kacɛ̀ngɛ kpínʔini, we fǎga jo we 'fùrɔʔ. Nɛ̀ taʔa gíi nɛ̄, a ki lɛ̀lɛ ni kɛ́nì pɛ́nì nɔ̀ lè, we bé ki tɔ̀ni taa wè, a we 'laa wiyè fùrɔ nɛ̀ láʔa bèleʔ. 10 Kire nɛ̄, bɛ̀ ki larigɛ yē we nɛ̄ bèle, ye- puu weri kacɛ̀ngɛ kpínʔini siɛnnɛ pe mìɛni nɛ̄. We cɛri kacɛ̀ngɛ kpínʔini gè kpuʔɔ we siinyɛninɛ tɛ́ngɛfɔlilɔ nɛ̄ bèle.

Pɔli wi 'wi fungo siɛnsɛnrɛ juu dè Galasiyé mɛ́ bèle

11 Yeli wè sɛbɛrɛ dáà nyaʔa dèʔ kpolido dè lé ? Mi 'mi ti sɛbɛ nɛ́ mi tíimɛ kɔli ní nɛ̀ tórigo yeli mɛ́.

12 Siɛnnɛ bílì pe 'ki caa peli míʔɛ ki- puu tànʔa siɛnnɛ mɛ́ bèle, peli pe nyɛ́ni yeli cɔ̀rí ye kɛnɛkɛnɛ kpíʔile wè. Kire sɔ̀ngirɔ tiī pe nī pe kanɛdanʔana kɛnmɛ nɛ̄ wī, gìi ki bé tí siɛnnɛ pe fǎri peli túngu kùu jáarigɛ wori nɛ̄ dèʔ. 13 Ki 'nyaa bìli tíimɛ pe nyɛ́ni kpínʔini wè, peli tíimɛ wè nɛ tári nɛ̄ dèʔ. Gìi yákuɔ pe 'caa gè, ye- kɛnɛkɛnɛ kpíʔile wè dí peli sí míʔɛ taa yeli kɛnɛkɛnɛ wi kpíʔilige nī gè. 14 A ki 'yéri mi nɛ̄ wè, nìɛnyiɛnigɛ káà wè mi nīʔ, nɛ̀ yiri we Zezi Kirisi wire kùu wire nīʔ. Wire tiiparigɛ kɛnmɛ nɛ̄ bè, a duniya wi 'kóri mi kɛnmɛ nɛ̄; mi míɛni wè, pe 'mi kóri nɛ̀ láʔa duniya kele nɛ̄ gèle.

15 Kire kɛnmɛ nɛ̄, gìi wuʔu ki 'kpúʔɔ gè bɛ̀ʔ, sìnkɛnɛkɛnɛ wori míɛni bɛ̀ʔ; gìi woli ni 'kpúʔɔ lè, ma yiʔɛ ma kò siɛnfɔnwɔ. 16 Bìli pe nyɛ́ni tánʔana náà tári lè, Kulocɛliɛ wi- wi yanyige yaʔa gè pe nɛ̄, nɛ̀ pínɛ wi- nyinimɛ taa pe nɛ̄, kire 'jo Kulocɛliɛ wi- ki kpíʔile wi tíimɛ wuulo mɛ́ bèle.

17 Bà ki 'láʔa píra ŋáà nī wè, siɛn fǎga ní laamɛ piɛn mi nīʔ. Nɛ̀ taʔa gíi nɛ̄, mi tíimɛ wè, nɔmidiʔɛlɛ yē náʔa mi céri nɛ̄ dè Zezi kɛnmɛ nɛ̄ bè.

18 Mi siinyɛninɛ, we Kàfɔli Zezi Kirisi wi kpuʔɔrɔ ti- puu ye nɛ̄. .