Pɔli wi 'juu nɛ̀ tìɛ Korɛnti tɛ́ngɛfɔlilɔ nɛ̄ bèle
13
1 Ki tɔliyɔ taanriwoli lire nī nàa lè bɛ̀ mi nɛ waa baa yeli mɛ́ wè.
Nɛ̀ yɛli nɛ́ bɛ̀ Kulocɛliɛ siɛnsɛbɛrɛ ti 'ki juu dè,
kele ke mìɛni ke 'yɛli ke- cuɔnri kinyaafɔlilɔ siin,
á kire 'laa kinyaafɔlilɔ taanri siɛnjuuro nɛ̄a.
2 Bɛ̀ mi cé kɛ́ taziinwoli nɛ̄ lè,
mi cé kíni nɛ̀ ti juu nɛ̀ kúɔ.
Píra nī wè m'bé ní koli ti juu bɛ̀ mi wè baa wèʔ:
bìli pe cé kíni nɛ̀ tuu kapiʔile nī gèle,
nɛ́ sɛnminɛ pe mìɛni bèle,
a mi 'kɛ́ nàa nɛ̄ lè,
wàa sǐ kò díɛʔ.
3 Yiyè jo lé dí mi 'yɛli bèri mi siɛnrɛ nyu dè ki- cɛ́n Kirisi wire wi 'ti le mi nī lé ?
Wire wè,
wi wè ŋɔri fùn yeli kɔli mɛ́ gèʔ;
wiī nɛ wi fànʔa tìí gè yeli sunʔɔmɔ nī bè.
4 Pe 'tɔ̀ni nɛ̀ wi kóri tiiparigɛ nɛ̄ gè,
wi 'puu ŋɔri fùn.
Nɛ̀ sí ki taa wi sí yē sìi nɛ̄ Kulocɛliɛ fànʔa nɛ̄ gè.
Weli míɛni bèle,
yeli bága weli nyaa weli puu sìi nɛ̄ Kulocɛliɛ wire fànʔa nɛ̄ gè.
5 Ye- yìye siʔɛ ye wéli yeli tíimɛ bèle,
a ki yē yeli nɛ tári tɛ́ngɛlɛ nī lè;
yeri yìye cinʔɛ yeli tíimɛ bèle.
Dùʔɔ yeli sì ki cɛ́nʔ Zezi Kirisi wiī yeli nī lé ?
Masicɛn siʔɛwelile ni 'ki tìɛ tɛ́ngɛlɛ wè baa yeli nīʔ.
6 Mi sí nɛ sɔ̀ngí yeli 'yɛli bè ki cɛ́n,
kádii weli bèle,
siʔɛwelile niì tuu weli nɛ̄ʔ.
7 Weli sí yē nɛ Kulocɛliɛ náari wè,
yeli fǎga kapiʔi káà fáala kpíʔileʔ.
Weli wè caa bè ki tìɛ weli we 'jáa wèʔ.
Gìi weli nɛ caa wè,
yeri kacɛ̀ngɛlɛ kpínʔini,
ale ki nɛ́ cɛ́nì nyaa pe 'jo weli wè yafiɛn wèʔ.
8 Nɛ́ ki cɛ́n,
weli sǐ gbɛ̀ yafiɛn yige Kulocɛliɛ kányiʔɛ nī gèʔ,
nɛ̀ yiri weli de baara kányiʔɛ ki koligo nī gè.
9 A yeli gbɛ́nɛ̀ ŋɔri taa,
á weli ní ŋɔri fùn wè,
weli nɛ̂ puu fundaanra nɛ̄.
Weli náarigɛ ki nyùgo kire gī,
ye- liɛ ye fori tɛ́ngɛlɛ nī lè.
10 Kire kɛnmɛ nɛ̄ mi nɛ mi siɛnrɛ sɛbɛ dè níɛ tíin náʔa liʔi wè.
Mi wè caa bága sa puu siɛngbɛliwɛʔ a mi kɛ́nì kɛ́ baa yeli tiʔɛ nī gèʔ,
nɛ́ ki cɛ́n Kulocɛliɛ wi 'mi tɛ́ngɛ ki larigɛ nī gè bè ŋɔri kɛn yeli tɛ́ngɛlɛ mɛ́ lè,
ki fǎga nyaa mi- yeli tɛ́ngɛlɛ cúʔɔ lèʔ.
Síɛrilɛ sɛnnɛ lè bè siɛnrɛ kúɔ dè
11 Gìi ki 'kò gè nɛ siinyɛninɛ,
ye- puu fundaanra nɛ̄,
yeri kele kúu gèle ye- liɛ ye fori,
yeri nyu yeri ye funyɔ nyígi yè,
ye- bìɛ,
ye- puu yanyige nɛ̄ nɛ́ yìye ní.
Bɛ̀ Kulocɛliɛ wè,
wire ŋáà wī dɛ́nigɛfɔli wè nɛ́ ní yanyigefɔli wè,
wi bé kò nɛ́ yeli ní.
12 Ye- yìye síɛri nɛ́ dɛ́nigɛ ní.
Tɛ́ngɛfɔlilɔ pe mìɛni piyē nɛ yeli síɛri.
13 Kàfɔli Zezi Kirisi wi kpuʔɔrɔ dè,
nɛ́ Kulocɛliɛ dɛ́nigɛ ní gè,
nɛ́ pínɛnyɛnigɛ gáà ki 'kɔn Kulocɛliɛ Pìle mɛ́ lè,
ti- puu nɛ́ ye mìɛni ní.