Korɛntiyé 2 12

Pɔli wi 'kele kálì nyaa

1 Ki 'yɛli mi de nìɛ nyíɛnɛ, nɛ̀ sí ki taa nyùgo wè ki nɛ̄ʔ. wi 'mi yiʔɛ múgu gè a mi 'kele kálì nyaa.

2 Mi 'siɛn wáà cɛ́n, wuu wáà wī, ki yiʔɛlɛ kiɛ nɛ́ sicɛri wī ŋɔ̀ wè, a Kulocɛliɛ wi 'wi líɛ nɛ̀ yɛ̀gɛ fúɔ taanriwoli nī lè. Wi 'kɛ́ nɛ́ wi céri ní dè wī yo, á kire 'laa Kulocɛliɛ wire wi 'wi yiʔɛ múgu gè a wi 'ki nyaa yo, mi sì cɛ́nʔ; Kulocɛliɛ wire wi 'ki cɛ́n. 3 Mi nyɛ́nì ki siɛn ŋáà cɛ́n wè, dùʔɔ wi céri tire ní wi 'kɛ́ yo, á kire 'laa Kulocɛliɛ wire wi 'wi yiʔɛ múgu gè a wi 'ki nyaa yo, mi sì cɛ́nʔ; Kulocɛliɛ wire wi 'ki cɛ́n. 4 Ki 'nyaa, wi 'kɛ́ mɛ́ gè, nɛ̀ sɛ́nì siɛnrɛ táà lúʔu, tiǐ gbɛ̀ cɛ́n bè juuʔ, nɛ̀ pínɛ siɛn sì yɛli bè ti juuʔ. 5 Kire siɛn ŋáà wire kɛnmɛ nɛ̄ m'béri nàgbuʔɔrɔ kpínʔini dè. Á ki 'yéri mi tíimɛ kɛnmɛ nɛ̄ bè, miǐ de nàgbuʔɔrɔ kpínʔini kire nɛ̄ʔ, macɛn bɛ̀ mi yē ŋɔri fùn wè kire kɔri wire nɛ̄ m'béri nàgbuʔɔrɔ kpínʔini dè. 6 A ki 'tɔ̀ni nɛ̀ nyaa mi yé je de nìɛ nyíɛnɛ wè, siɛn sǐ cî ki juu bé jo mi nyùgo ki wè baaʔ; kányiʔɛ kire mi cî de nyu. Nɛ̀ sí ki taa m'bé nìɛ kpàri bè cò, kire ga buu siɛn fǎga mi le larigɛ káà nīʔ bè tóri kɛnmɛ bíì nɛ̄ siɛnnɛ piyē nɛ mi nyaʔa wèʔ, nɛ́ gàa pe lúru mi nyasiɛnrɛ nī dèʔ.

7 Kele gálì nɛ̄ Kulocɛliɛ wi 'mi yiʔɛ múgu gè, á mi 'ke nyaa gèle, bɛ̀ ke 'nyuɔ kacɛ́nmɛ fùn nɛ́ ní kafɔnnɔ wuʔulo gèle, wi wè caa mi de nìɛ nyíɛnɛ de wìi ke wori nɛ̄ dèʔ. Kire nɛ̄, a wi 'wíige le mi céri nī dè, bɛ̀ Setɛni tundunwɔ tíɛlɛ, ki de mi súnminɔ, gìi ki bé tí mi fǎri nìɛ nyíɛnɛ de wìiʔ.

8 Mi 'Kàfɔli fiɛn wè ki wíige wori nɛ̄ dè nɛ̀ taa tɔliyɔ taanri, wi- ki kɔ́n mi nɛ̄. 9 A wi 'mi yɛ: «Mi tire bé yɛli nɛ́ muɔ ní. Nɛ́ ki cɛ́n mi fànʔa ki nɛ̂ kìi tìɛ, a siɛn ŋíì yē ŋɔri fùn wè.» Kire nɛ̄, ki cɛ́nì mi dɛ́ni mi de nìɛ nyíɛnɛ bɛ̀ mi yē ŋɔri fùn wè, dí fànʔa ki sí tìgi mi kúrugu. 10 Kire kɛnmɛ nɛ̄, a mi yē ŋɔri fùn wè, nɛ́ a pe cɛ́ni mi teri wè, nɛ mi cɔ̀rí wè, nɛ mi wuʔɔ wè, nɛ́ a kagbɛngɛlɛ 'mi taa Kirisi wire kɛnmɛ nɛ̄ bè, m'bé puu fundaanra nɛ̄. Nɛ́ ki cɛ́n a mi gbɛ́nɛ yē ŋɔri fùn wè, kire lɛ̀lɛ nī lè, mi nɛ̂ fànʔa taa.

Pɔli wiì yakaa suɔ Korɛntiyé mɛ́ bèleʔ

11 Mi ŋɛ, mi 'kò kàalafɔli. Yeli ye 'mi ŋɔrigɔ fànʔa a mi 'kò bɛ̀ kire kɛnmɛ nɛ̄ bè. Yeli sí ye cé yɛli bèri mi míɛtanʔa yeri gè, nɛ̀ taʔa gíi nɛ̄, a ki nɛ́ cɛ́nì nyaa mi wè yafiɛn wèʔ, yeli tundunminɔ míɛkpoliyofɔlilɔ piyè tóri mi nɛ̄ʔ. 12 Kele gílì ke ki tìí dí mi yē Zezi tundunwɔ wè yeli sunʔɔmɔ nī bè, ki kele ke 'kpíʔile nɛ̀ tóri yeli sunʔɔmɔ nī bè nɛ́ kpàricogo ní kpuʔɔ. Ki kele ke n'gɛlɛ: fìɛlɛ, nɛ́ kafɔngɔlɔ, nɛ́ kakpoliyo ní yè. 13 Ye- ki juu wêli, gáa ki 'kò gàa yeli sì taaʔ bɛ̀ sɛngɛlɛ tíɛlɛ gèle ? Dùʔɔ bɛ̀ ki 'nyaa mi wè, mi sì yeli fùʔuroʔ nɛ̀ yakaa suɔ yeli mɛ́ wè, kire lé ? A ki yē kire gè, ye- kire kolimɔ wuʔu yaʔa gè mi nɛ̄.

14 Ki tɔliyɔ taanriwoli lire nī nàa lè, mi nɛ gbòborí bè kɛ́ baa yeli tiʔɛ nī gè. Miì sí je ki tugoro taʔa dè yeli nɛ̄ʔ. Kiì nyaa majo yeli kɔliyɛrɛ tire mi nɛ caaʔ; ʔéʔe, yeli tíimɛ mi nɛ caa. Nɛ̀ taʔa gíi nɛ̄, pìile peli bɛ̀ʔ pe 'yɛli bèri wali caa de tɛ́ngi pe siifɔlilɔ mɛ́ bèleʔ, siifɔlilɔ peli pe 'yɛli bèri wi caa pe pìile mɛ́ bèle. 15 Mi wè, ki 'mi dɛ́ni mi de mi wali líi wè bèri nìɛ fùʔuró de nii yeli nī bèle. A mi nɛ kàa taʔala mi dɛ́nigɛ nɛ̄ gè yeli kɔli mɛ́ gè, kire bé ki kɛn lé yeli kàa yige yeli dɛ́nigɛ nī gè mi kɔli mɛ́ gè ?

16 Mi sì mi tugoro taʔa dè yeli nɛ̄ʔ, nɛ̀ ki yaʔa pàli 'ki nyaa majo miì fílige wīʔ, dí mi síciligele kele mi 'kúɔ. 17 Bìli mi 'tórigo baa yeli tiʔɛ nī gè, mi 'yakaa suɔ nɛ̀ lìi yeli mɛ́ lé pe kiyɛ nī yè ? 18 Mi cé Tiiti fiɛn wè nɛ̀ wi tun nɛ́ siinyɛni ní wè. Tiiti wi sɛ́nì yeli fùʔuro nɛ̀ yakaa suɔ yeli mɛ́ lé ? Kire tánʔagɛnnumɔ pire nɛ̄ túʔu bɛ̀ʔ weli 'puu nɛ kele kúu gèle nɛ́ yeli ní ? Kire tánʔagɛnnumɔ pire nɛ̄ bɛ̀ʔ weli nɛ tári lé ?

19 Yeli 'ki séli kiī faʔa, níɛ ki sɔ̀ngí weli nɛ nyu bè tànʔa kɛn wìye mɛ́ yeli yiʔɛ mɛ́ gè. Kire sí bɛ̀ʔ, Kulocɛliɛ wire yiʔɛ mɛ́ weli nɛ weli siɛnrɛ nyu dè, Kirisi fànʔa nɛ̄. Mi siinyɛninɛ, weli nɛ kire gáà ki mìɛni kpínʔini gè, gìi ki bé tí yeli tɛ́ngɛlɛ ni- nìre wáa. 20 Kiī nɛ sànviige wáari mi nɛ̄, a mi kɛ́nì kɛ́ baa yeli tiʔɛ nī gè, mi fǎga sa yeli nyaa kɛnmɛ bíì nɛ̄ mi nɛ ki caa wèʔ, nɛ̀ pínɛ yeli míɛni fǎga mi nyaa kɛnmɛ bíì ní yeli nɛ ki caa mi puu wèʔ. Kiī nɛ sànviige wáari mi nɛ̄, mi fǎga sa kàsii caʔara nyaa baa yeli sunʔɔmɔ nī bèʔ, nyabiɛnnɛʔ, fundanʔanigɛʔ, yejaʔaʔ, míɛcuʔɔgɔ siɛnrɛʔ, pàli kacaajuumɔʔ, nìɛnyiɛnigɛʔ, kanyaʔamirɛʔ. 21 Kiī nɛ sànviige wáari mi nɛ̄, a mi kɛ́nì kɛ́ baa yeli tiʔɛ nī gè, Kulocɛliɛ wi fǎga tí fìɛrɛ ní koli bè tɔ́n mi nɛ̄ yeli kɛnmɛ nɛ̄ bèʔ, mi ní de nyɛni nìʔɛgɛʔ, bɛ̀ ki 'nyaa bìli pe cé kíni nɛ̀ tuu kapiʔile nī gèle, piyè láʔa pe núʔɔmɔ kele nɛ̄ gèleʔ, nɛ́ pe kanuʔɔrɔ ní dèʔ, nɛ́ pe kolimɔ kakpiʔiligele ní gèleʔ dàa pe kúu dè.