Korɛntiyé 1 6

Tɛ́ngɛfɔlilɔ piyē nɛ pìye yeri sìndɛngɛlɛ kàyuʔujuudiɛyɛ nī

1 Yeli nī bèle, a siɛnrɛ gbɛ́nɛ̀ jíin yeli nɛ́ wàa sunʔɔmɔ nī bè, mɛni nɛ̀ síɛ siɛn wi nɛ̂ kɛ́ nɛ́ kàyuʔu ní gè sìndɛngɛlɛ mɛ́, níɛ̀ tɛ́ngɛfɔlilɔ peli yaʔa baa wè ? 2 Yeli sì cɛ́nʔ lé tɛ́ngɛfɔlilɔ peli pe bága duniya wi kàyuʔu juu gè lé ? A ki sí yē yeli ye je ga duniya wi kàyuʔu juu gè, á kayirigele kàyuʔujuʔu kire sí yeli jáa lé ? 3 Yeli sì ki cɛ́nʔ lé weli we bága pe kàyuʔu juu gè lé, bé nɛ́ cɛ ga jo duniya ŋáà wi kele gèle ? 4 A ki sí nyaa bà kàyuʔu sî yɛ̀ baa yeli mɛ́ bèle, bàli bīɛlɛ pe liɛlɛ wè baa nī lèʔ, peli mɛ́ yeli nɛ̂ ki siɛnrɛ kɛn dè lé pe- kàyuʔu juu gè ? 5 Ki 'kò yeli nɛ̄ fìɛrɛ, a ki yē siɛn sì gbɛ̀nɛ jáa nɛ̀ taa baa yeli nī bèleʔ, ŋàa wi 'kaala yiʔɛ cɛ́n, bè gbɛ̀ kàyuʔu ki siɛnrɛ ceri dè siinyɛninɛ pe sunʔɔmɔ nī bè. 6 Ki cɛ́nì nyaa fúɔ tɛ́ngɛfɔli wáà nɛ̂ wi tɛ́ngɛfɔnyɛni yeri wè kàyuʔujuudiʔɛ nī sìndɛngɛlɛ mɛ́.

7 Ki cɛ́nì jáa nɛ̀ láʔa yeli nɛ̄ wī, bɛ̀ ki 'nyaa yeli nɛ yìye yeri kàyuuyo juudiɛyɛ nī yè. Gáa nɛ̄ yeli sǐ cɛ gbɛ̀ jáa bè yeli tànʔa káà yaʔa cɛ̀ri wè ? Yeli yē mɛni wī, yeli cɛ wè caa yeli yalaa fáala pùunni wèʔ ? 8 Gìi cɛ yeli nɛ kpínʔini gè, yeli nɛ kolimɔ kpínʔini, nɛ̀ pínɛ yeli nɛ pàli yɛrɛ fùʔuró nɛ suu, á ki ń'nɛ̀ nyaa yeli siinyɛninɛ nɛ̄ yeli nɛ kire kpínʔini !

Siɛnkolilo piyè je ga Kulocɛliɛ taa wèʔ

9 Yeli sì ki cɛ́n siɛnkolilo piyè je ga kɔrigɔ lìi gèʔ lé ? Ye fǎga cɛri yìye fáanni tire nɛ̄ dèʔ: bàli pe cɛlilɛ caa fáala fáala bèle, nɛ́ yasunzunminɔ ní bèle, nɛ́ ceyuulo bèle, nɛ́ nàguɔlɔ bálì pe sî nɛ sìnɛ́ nɛ́ nàguɔlɔ pálì ní bèle, 10 nɛ́ kàyuulo ní bèle, nɛ́ nyabiɛnnɛfɔlilɔ ní bèle, nɛ́ sungbuɔlɔ ní bèle, nɛ́ siɛnjuucuʔɔrɔfɔlilɔ ní bèle, nɛ́ bìli pe sî yɛgɛ nùʔɔrɔ nɛ̀ suɔ siɛn mɛ́ wè, piyè je ga Kulocɛliɛ Kùlofɔligɔ kɔrigɔ lìi gèʔ. 11 Kire kɛnmɛ báà pire nɛ̄ yeli pálì cé puu. Nɛ̀ sí ki taa tire 'jíge nɛ̀ láʔa yeli nɛ̄, a yeli 'cìile Kulocɛliɛ yiʔɛ mɛ́ gè nɛ̀ kò kolimɔ fùn Zezi wi míʔɛ kire fànʔa nɛ̄ gè, nɛ́ weli Kulocɛliɛ wi lire fànʔa nɛ̄ gè nɛ̀ pínɛ.

Yeri kpuʔɔrɔ tari Kulocɛliɛ nɛ̄ nɛ́ yeli cetinnɛ ní lè

12 Yeli nɛ̂ ki juu níɛ̀ jo: «Siɛn bé gbɛ̀ri kele ke mìɛni kpínʔini.» Nɛ̀ sí ki taa kele ke mìɛni wè kanyuɔnɔ wuʔuloʔ. Yeli bé gbɛ̀ tire juu bé jo: «Siɛn bé gbɛ̀ri kele ke mìɛni kpínʔini.» Miǐ sí mìɛ yaʔa bè kò yakaa sùkulowoʔ. 13 Yaliire tire 'kpíʔile liyɛ kɛnmɛ nɛ̄, a liyɛ yi 'kpíʔile yaliire kɛnmɛ nɛ̄. Nɛ̀ sí ki taa Kulocɛliɛ wire wi bága tire dáà ti mìɛni cúʔɔ dè. Kire nɛ̄ siɛn wi cetinnɛ lè, wiì yɛli bèri kanuʔɔrɔ kele kúu nɛ́ ni níʔ. Cetinnɛ niī wire woli wī, nɛ̀ pínɛ wire wī cetinnɛ ni Kàfɔli wè. 14 Bɛ̀ sí Kulocɛliɛ wi 'Kàfɔli nyɛ́ wè nɛ̀ yige kùu nī wè, weli míɛni bèle, wi bága weli nyɛ́ bè yige nɛ́ wi fànʔa ní gè. 15 Yeli sì ki cɛ́n lé yeli cetinnɛ niī wi yaliiye wī lé ? Mi sí ga Kirisi wi yaliiye líɛ yè mi yi kpíʔile nàjaacuɔ yaliiye lé ? Kulocɛliɛ- we suɔ kire mɛ́. 16 A kire 'laa, yeli sì cɛ́n léʔ siɛn ŋíì wi 'sínɛ nɛ́ nàjaacuɔ ní wè, wi 'kò cetinnɛ nigbe nɛ́ wi ní wī lé ? Nɛ́ ki cɛ́n ti 'ki juu nɛ́ jo «pe siin pe bé kò cetinnɛ nigbe.» 17 Nɛ̀ sí ki taa a siɛn ŋíì 'wìi taʔa Kàfɔli nɛ̄ wè, wi pìle ni nɛ̂ pínɛ nɛ̀ kò nigbe nɛ́ Kàfɔli ní wè.

18 Yeri fé kanuʔɔrɔ nɛ̄ dè. Kapiile ó kapiile náà siɛn sî kpíʔile lè, lire nɛ̌ nɔ̀ cetinnɛ nɛ̄ lèʔ. A siɛn ŋíì sí nɛ kanuʔɔrɔ kúu dè, wiī nɛ kapiile kpínʔini wi tíimɛ cetinnɛ nɛ̄ lè wī. 19 Á kire 'laa, yeli sì ki cɛ́n lé yeli cetinnɛ niī ni wī lé ? Yeli 'ni taa Kulocɛliɛ mɛ́ wè; yeli wè yìye wuulo wī díɛʔ. 20 Nɛ̀ taʔa gíi nɛ̄, Kulocɛliɛ wi 'yeli suɔ lagbɛnrɛ nɛ̄ wī. Kire nɛ̄, ye sí de wè nɛ́ yeli cetinnɛ ní lè.