Korɛntiyé 1 7

Pɔli wi 'siɛnrɛ juu cepɔrigɔ wori nɛ̄ dè

1 Píra ŋáà nī wè, gìi ki 'yeli sɛbɛ wi siɛnrɛ kúɔ dè, ŋàa yeli 'tórigo mi mɛ́ wè, m'bé jo ki 'pɔ́ri nàguɔ mɛ́ wi fǎga nɔ̀ cɛliwɛ nɛ̄ʔ. 2 Bà sí we wè nɛ kanuʔɔrɔ caa dèʔ, ki 'pɔ́ri nàguɔ ó nàguɔ wi- puu nɛ́ wi cuɔ wire ní, cɛliwɛ ó cɛliwɛ wi- puu nɛ́ wi tíimɛ pɔli ní. 3 Gìi nàguɔ wi 'yɛli bèri kanʔa wi cuɔ mɛ́ wè, wiri ki kanʔa wi mɛ́; cɛliwɛ míɛni wè, wiri ki felige kpínʔini gè wi pɔli mɛ́ wè. 4 Cɛliwɛ wiǐ gbɛ̀ri kàfɔligɔ tári wi cetinnɛ nɛ̄ lèʔ, fúɔ macɛn wi pɔli wire; bà ki yē nɛ̀ pínɛ, nàguɔ wiǐ gbɛ̀ri kàfɔligɔ tári wi cetinnɛ nɛ̄ lèʔ, fúɔ macɛn wi cuɔ wire. 5 Ye fǎri cìʔí yìye nɛ̄ʔ, fúɔ macɛn a ki 'nyaa ye 'bìɛ ti nɛ̄ wī bè lɛ̀lɛ láà kúɔ, bé sí taa bè yìye kɛn náarigɛ mɛ́ gè. Kire kàduʔumɛ gè ye- koli ye pínɛ ye puu, gìi ki bé tí Setɛni wi fǎga ki larigɛ taa gè bè yeli le puuwelige nīʔ, bà yeli sǐ gbɛ̀ jáa bè yìye kpàri bè cò wèʔ. 6 Dàa mi nɛ nyu dàa dè, mi ye fiɛn wī, cɔ̀rimɔ wori bɛ̀ʔ. 7 Mi nɛ ki caa siɛnnɛ pe mìɛni pe cé puu mi tíɛlɛ. Gìi sí ki 'cɛ́n gè, we mìɛni nigbe nigbe we 'we liʔɛlɛ taa gèle Kulocɛliɛ mɛ́; wi nɛ̂ wàa kɛn nɛ́ yakaa ní, níɛ̀ wàa kɛn nɛ́ yakaa kiiyɛ níʔ.

8 A mi sí jo: bìli piyè cepɔrigɔ kpíʔile gèʔ, nɛ́ lakicɛlilɛ ní bèle, ki 'pɔ́ri pe cé pìye yaʔa pe- kò mi tíɛlɛ. 9 A ki sí yē kpàricogo wè pe nī wèʔ, pe- cepɔrigɔ kpíʔile gè. A kire 'laa wè, ki 'pɔ́ri siɛn wi- cepɔrigɔ kpíʔile gè, sɛ́ni wiri yaʔala ki láa nɛ̄ gè.

10 Bìli sí pe 'cepɔrigɔ kpíʔile gè, m'bé ki juu bè gbɛ̀ngɛ; mi cɛ bɛ̀ʔ, wire kajuulo nī: cɛliwɛ wi fǎga yiri wi nàgaʔa nī gèʔ. 11 A ki sí nyaa wi 'wi pɔli cíi wè, wi- sí kò nàguɔ fùn, á kire 'laa wi- koli wi sa bìɛ nɛ́ wi pɔli ní wè. Nàguɔ míɛni wi fǎga wi cuɔ yaʔa wèʔ.

12 Sɛnminɛ bèle, n'dɛ dàa m'bé juu mi tíimɛ wè, Kàfɔli wire bɛ̀ʔ wi 'jo bɛ̀ʔ: A cɛliwɛ wáà yē tɛ́ngɛfɔli wáa mɛ́, á ki sí nyaa ki cuɔ wi wè tɛ́ngɛfɔli wèʔ, a wiī ki mɛ́ bè tɛ́ni ki nàgaʔa nɛ̄ gè, nàguɔ wi fǎga wi yaʔaʔ. 13 Nɛ̀ pínɛ a cɛliwɛ wáà yē tɛ́ngɛfɔli, nɛ́ sí ní nàgaʔa nɛ̄ wè, a ki 'nyaa nàguɔ wi wè tɛ́ngɛfɔli wèʔ, nɛ́ sí nɛ ki caa bè kò nɛ́ siinyɛjuɔ ní wè, cɛliwɛ wi fǎga wi cíiʔ. 14 Ki 'nyaa a labɔli wi wè tɛ́ngɛfɔli wèʔ, wi nɛ̂ sìʔɛrɛ nɛ̀ kpɔni Kulocɛliɛ nɛ̄ wè wi cuɔ wire nyúmɔ nī bè. Nɛ̀ pínɛ cɛliwɛ ŋíì wi wè tɛ́ngɛfɔli wèʔ, wi nɛ̂ sìʔɛrɛ nɛ̀ kpɔni Kulocɛliɛ nɛ̄ wè siinyɛni wire nyúmɔ nī bè. Á kire 'laa wè, yeli pìile pe bé puu fuɔnrɔ nī, nɛ̀ sí ki taa pe 'kò Kulocɛliɛ wuulo.

15 A ŋìi wè tɛ́ngɛfɔliʔ nɛ́ sí jo wi bé yiri nàgaʔa nī gè, ye- wi yaʔa wiri waa. A kiī kire felige gè, siinyɛni ŋáà wī tɛ́ngɛfɔli wè, nàguɔ yo, cɛliwɛ yo, wi 'kò wìimɛ, cɔ̀rimɔ wè wi nɛ̄ kire tiɛlɛ nī lèʔ. Nɛ̀ taʔa gíi nɛ̄, Kulocɛliɛ wi 'yeli líɛ ye puu yanyige nɛ̄ wī. 16 Á kire 'laa, muɔ cɛliwɛ wè, gíi muɔ 'cɛ́n tire nī, a ki yē muɔ ma bága muɔ pɔli kɛn wè wi- suɔ wè ? Nɛ̀ pínɛ, muɔ nàguɔ wè, gíi muɔ 'cɛ́n tire nī, a ki yē muɔ bága muɔ cuɔ kɛn wè wi- suɔ wè ?

Ma puu kɛnmɛ bíì nɛ̄ Kulocɛliɛ wi 'muɔ yeri wè

17 Nɛ̀ kire tiɛlɛ lire yige baa wè, siɛn ó siɛn wi- puu wi yɛli nɛ́ gìi ní wi 'kɛn wi mɛ́ wi liɛlɛ lè, nɛ̀ pínɛ siɛn ó siɛn wiri tári de yɛligi mɛni wi 'kíni nɛ̀ puu á Kulocɛliɛ wi 'wi yeri wè. Dàa tire mi nɛ nyu nɛ tìí ke mìɛni nɛ̄ gèle. 18 A ŋìi 'puu kɛnɛkɛnɛwɛ lɛ̀lɛ níì nī Kulocɛliɛ wi 'wi yeri wè, siɛn wi fǎga de wi kɛnɛkɛnɛ làrigí wèʔ. A ŋìi sì cé kɛnɛkɛnɛ kpíʔile wè lɛ̀lɛ níì nī Kulocɛliɛ wi 'wi yeri wè, siɛn wi fǎga jo wi bé kɛnɛkɛnɛ kpíʔileʔ. 19  wi wè yafiɛnʔ, nɛ̀ pínɛ bè puu ma fǎga kɛnɛkɛnɛ wèʔ, kire wè yakaaʔ; gìi ki 'pɔ́ri gè, mari Kulocɛliɛ kajuʔulo tári gèle. 20 Siɛn ó siɛn, bɛ̀ wiī kɛnmɛ bíì nɛ̄ á Kulocɛliɛ wi 'wi yeri wè, wi- kò kire kɛnmɛ nɛ̄ bè.

21 Muɔ 'puu sùkulowo á Kulocɛliɛ wi 'muɔ yeri lé ? Ma fǎri muɔ sùkulomɔ wuʔu kire yáaʔ. A ki sí yē ki bé gbɛ̀ kpíʔile dí muɔ kò mìɛmɛ wè, ki 'pɔ́ri ma ki kpíʔile. 22 Ki 'nyaa muɔ siɛn ŋáà ma 'puu sùkulowo wè, á Kulocɛliɛ wi 'muɔ yeri nɛ̀ pɛn Kàfɔli mɛ́ wè, muɔ 'kò mìɛmɛ Kàfɔli wuu. Nɛ̀ pínɛ, muɔ siɛn ŋáà wī mìɛmɛ wè, á Kulocɛliɛ wi 'muɔ yeri wè, muɔ 'kò sùkulowo wī. 23 Kulocɛliɛ wi 'yeli suɔ lagbɛnrɛ nɛ̄ wī, ye fǎga kò siɛnnɛ sùkuloloʔ. 24 Siinyɛninɛ, felige gíì nɛ̄ siɛn ó siɛn cé puu á Kulocɛliɛ wi 'wi yeri wè, siɛn wi- kò kire kɛnmɛ nɛ̄ bè Kulocɛliɛ yiʔɛ mɛ́ gè.

Ma 'pɔri yo miɛ̀ pɔri yoʔ kò baa muɔ kɛnmɛ nɛ̄ bè

25 Gìi sí ki 'sinborilo wori kúɔ dè bàli piyè nàguɔlɔ kele cɛ́n wèʔ, wi kajuulo wè mi mɛ́ kire tiɛlɛ nɛ̄ lèʔ. M'bé sí mi sɔ̀ngirɔ kɛn dè bè yɛli nɛ́ bɛ̀ Kàfɔli wi 'nyinimɛ taa mi nɛ̄ wè, nɛ́ mi kpíʔile mi yē tɛ́ngɛmɛ siɛn wè. 26 Kire nɛ̄, mi nɛ sɔ̀ngí ki 'pɔ́ri siɛn wi- kò kɛnmɛ bíì nɛ̄ wi yē wè, nɛ́ ki cɛ́n lɛ̀lɛ náà nī we yē lè, niī gbɛ̀lilɛ. 27 A ki yē muɔ yē cɛliwɛfɔli, ma fǎga jo muɔ bé wi yaʔaʔ. A muɔ wè cɛliwɛfɔli wèʔ, ma fǎga de ki caa bè cɛliwɛ líɛʔ. 28 A ki sí yē muɔ 'cɛliwɛ pɔri wè, kapiʔi bɛ̀ʔ kire gèʔ. Nɛ̀ pínɛ sinboriwo ŋáà wiì nàguɔlɔ kele cɛ́n wèʔ, a wi 'tɛ́ni nàgaʔa nɛ̄, kapiʔi bɛ̀ʔ kire gèʔ. Peli bálì sí pe 'cepɔrigɔ kpíʔile gè, ki fùrɔgɔ kiī kpuʔɔ díɛ ! Kire tiɛlɛ lire mɛ́ mi nɛ caa bè yeli suɔ.

29 A mi sí jo, nɛ siinyɛninɛ, lɛ̀lɛ niì ń'nɛ̀ kò sáaʔ. Bɛ̀ ki yē gè, bìli bīɛlɛ cɛlilɛfɔlilɔ bèle, pe- puu majo cɛlilɛ wè pe mɛ́ʔ. 30 Bìli pe nyɛni bèle, ki- puu majo pe wè nyɛni wīʔ. Bìli sí pe tíʔɛ bèle, ki- puu majo pe wè tíʔɛʔ; bìli pe yɛrɛ taʔa nɛ suu bèle, pe- puu majo yakaa wè pe mɛ́ʔ. 31 Bìli pe 'dànʔami duniya nī wè, ki- puu majo piyè yakaa taaʔ, nɛ́ ki cɛ́n duniya ŋáà wi tòrí wī.

32 Mi sí wè nɛ caa ye- yeli sɔ̀ngirɔ yaʔa dè ti de curuguʔ. Siɛn ŋíì wī sìnbɔri nī wè, Kàfɔli wi kele keli nɛ̄ kire siɛn wi nàa sɔ̀ngí; gìi wire 'yɛli bèri kpínʔini dí ki sí Kàfɔli dɛ́ni wè. 33 Nɛ̀ sí ki taa ŋàa wi 'cɛliwɛ líɛ wè, duniya kele mɛ́ wire sɔ̀ngirɔ ti nàa waa, gìi wire 'yɛli bèri kpínʔini dí ki sí wire cuɔ dɛ́ni wè. 34 Kire nɛ̄ wi sɔ̀ngirɔ ti nɛ̂ puu kàbiɛmiɛ. Bɛ̀ sí ki yē kire kɛnmɛ nɛ̄ bè, cɛliwɛ ŋáà wi wè nàgaʔa nɛ̄ gèʔ, nɛ́ ŋàa ní wiì nàguɔlɔ kele cɛ́n wèʔ, peli nàa sɔ̀ngí Kàfɔli wire kele nɛ̄ gèle, gìi ki bé tí peli cetinnɛ lè nɛ́ peli funzɔngirɔ ti- puu cɛ̀nrɛ bè puu Kàfɔli wire wori. Cɛliwɛ ŋíì sí wī nàgaʔa nɛ̄ gè, wire sɔ̀ngirɔ ti nàa waa duniya kele kúrugu, gìi wire 'yɛli bèri kpínʔini dí ki sí wire pɔli dɛ́ni wè.

35 Mi nɛ tire dáà nyu dè yeli nyuɔmɔ nɛ̄ wī, kiì nyaa majo mi je yeli le cɔ̀rimɔ nī wīʔ. Mi sí nɛ ki caa ye- ki cɛ́n gìi ki 'pɔ́ri gè, yé sí yìye kɛn ye láʔa Kàfɔli baara mɛ́ dè, yakaa fǎri yeli píle de yiʔi de máriʔ.

36 A siɛn ŋíì sí ki nyaa wire kɔni wi láa kiī wire nɛ̄ kpuʔɔ nɛ̀ tóri wè, wire sǐ gbɛ̀ ki kpàri bè cò wè, wi- cepɔrigɔ kpíʔile gè, kapiʔi bɛ̀ʔ kire gèʔ. 37 Ki siɛn wi bé gbɛ̀ ki yɛ̀gɛ wi fungo nī gè bè kò wi fǎga cepɔrigɔ kpíʔile gèʔ, nɛ̀ pínɛ wire fǎga sínɛ nɛ́ wire kɔni ní wèʔ. A wi 'kire nyíɛnɛ nɛ̀ kɔ̀n wi fungo nī gè, wàa bɛ̀ʔ wi 'wi cɔ̀ri wèʔ, nɛ̀ pínɛ a wi 'jáa nɛ̀ wìi cò wè, kiī cɛ̀ngɛ. 38 Kire nɛ̄, ye- ki cɛ́n, siɛn ŋíì wi 'wi kɔni pɔri wè, wi 'ki kpíʔile a ki 'yɛli, nɛ̀ pínɛ ŋìi wi 'kò sìnbɔri nī wè, kire ń'nɛ̀ pɔ́ri ti mìɛni nɛ̄.

39 Bè labɔli yaʔa wè wiri tíin sìi nɛ̄ wè, a ki nɛ́ mɔgɔ felige ó felige, wire nàgaʔa tɛ́nigɛ nɛ̄ cɛliwɛ wi yē. A nàguɔ wi sí kùu wè, wi 'kò wìimɛ. A ki 'wi dɛ́ni wi bé gbɛ̀ kò nàguɔ wáà mɛ́ ŋìi wi 'wi dɛ́ni wè. Ki- sí nyaa nàguɔ wi- puu tɛ́ngɛfɔli. 40 A wi sí kò baa wi kɛnmɛ nɛ̄ bè, mi nɛ sɔ̀ngí kire yanyige kire bé kpúʔɔ wi mɛ́ bè tóri. Mi 'tɛ́ngɛ ki nɛ̄, mi míɛni wè, niī mi mɛ́ nɛ̀ pínɛ.