Yasungo kaara wori dè
8
1 Gìi ki 'yasungo kaara wori kúɔ dè,
we mìɛni we 'kàa cɛ́n ti nī.
Kacɛ́nnɛ niī nɛ nàgbuʔɔrɔ nyɔ́gi siɛn nī,
nɛ̀ sí ki taa wìyedɛnigɛ ki nɛ̂ ŋɔri nyɔ́gɔ siɛn wi tɛ́ngɛlɛ nī lè.
2 A siɛn nɛ wìi sɔ̀ngí wire 'yakaa cɛ́n wè,
wiī nɛ tíin wiī fìɛ cɛ́n nɛ̀ nɔ̀ baa wi 'yɛli bè nɔ̀ wèʔ.
3 A Kulocɛliɛ sí siɛn ŋíì dɛ́ni wè,
Kulocɛliɛ wi nɛ̂ kire siɛn cɛ́n wè.
4 Gìi sí ki 'yasunro kaara wori kúɔ dè,
weli 'ki cɛ́n yakaa wè bile duniya nī wè peri ki sunguʔ.
Nɛ̀ pínɛ yasunro ti wè yafiɛnʔ,
nɛ̀ yiri Kulocɛliɛ wire nigbe nīʔ.
5 A ki nɛ́ cɛ́nì nyaa pàli mɛ́ bèle yɛrɛ táà yē baa nyìʔɛnɛ nī lè pe ti ye kulocɛlɛlɛ yo,
tàa ní náʔa dàala nɛ̄ lè,
ti sí tɔ̀ni yē nìʔɛrɛ,
nɛ́ kàfɔlilɔ ní nìʔɛbɛlɛ.
6 Weli mɛ́ bèle,
Kulocɛliɛ wiī nigbe,
wire wī Tuufɔli wè.
Wire nī yɛrɛ ti mìɛni ti 'kɔ́n,
nɛ̀ pínɛ weli yē bile wire kɛnmɛ nɛ̄ wī.
Kàfɔli wiī nigbe nɛ̀ pínɛ,
wire wī Zezi Kirisi wè.
Wire nī yɛrɛ ti mìɛni ti 'yiri,
wire fànʔa nɛ̄ weli yē sìi nɛ̄.
7 Kire kacɛ́nnɛ náà ni wè siɛnnɛ pe mìɛni mɛ́ʔ.
Pàli cɛ yē baa,
fúɔ nɛ̀ pɛ́nì nɔ̀ ŋɔ̀ wè,
bɛ̀ peli 'dàli yasunro nɛ̄ dè,
pe nìɛ yasunro kaara káa dè níɛ̀ nɛ ki sɔ̀ngí yasunro mɛ́ pe 'ki kaara kpúu dè.
Bɛ̀ sí pe tɛ́ngɛlɛ ni 'cɛ́ri lè,
pe nɛ̂ ki nyaa peli 'núʔɔ Kulocɛliɛ yiʔɛ mɛ́ gè.
8 Yaliire bɛ̀ʔ ti nyɛ́ni we sìʔɛrɛ́ nɛ kpɔni Kulocɛliɛ nɛ̄ wèʔ,
nɛ̀ pínɛ bè kòri ti sìnlii nī wè,
kire wè kàa yigi weli nīʔ.
A weli sí ń'nɛ̀ ti lìi dè,
kire wè kàa tari we nɛ̄ʔ.
9 Ye sí de yìye ciʔige,
ye fǎga tí bɛ̀ yeli yē yìyemɛ wè,
yeli ga wàa kɛn wi- tuu bìli fànʔa ki 'cɛ́ri gèʔ.
10 Á kire 'laa wè,
muɔ ŋáà ma 'kaala yiʔɛ cɛ́n wè,
a wàa 'muɔ nyaa yasungo saʔa nī tɛ́niwɛ muɔ nɛ líi wè,
wire ŋáà tɛ́ngɛlɛ ni 'cɛ́ri lè,
wiǐ ki nyaaʔ wire béri yasunro kaara káa dè lé ?
11 Kire tiʔɛ gáà nī gè,
ŋàa tɛ́ngɛlɛ ni 'cɛ́ri lè,
muɔ kacɛ́nnɛ ni bé wi kɛn wi- pùunni.
Nɛ̀ sí ki taa Kirisi wi 'kùu ki siinyɛni ŋáà wi kɛnmɛ nɛ̄.
12 A yeli sí nɛ kire kapiile kpínʔini lè yeli siinyɛninɛ nɛ̄ bèle,
nɛ pe funyɔ córi yè bɛ̀ pe funzɔngirɔ ti fànʔa ki 'cɛ́ri gè,
ye- ki cɛ́n Kirisi wire nɛ̄ yeli nɛ kapiile kpínʔini lè.
13 Kire nɛ̄,
a yaliire díì bé gbɛ̀ kpíʔile kaala bé mi siinyɛni wáà kɛn wi- kúrugo bè tuu wè,
mi sì ní ga tíi bé kaara káaʔ,
kire ga buu mi fǎga mi siinyɛni kɛn wè wi- kúrugo bè tuuʔ.