Korɛntiyé 1 9

Zezi tundunminɔ pe baara dè nɛ́ gìi ki 'yɛli nɛ́ pe ní gè

1 Je mi yē mìɛmɛ kìɛ ! Mi yē Zezi tundunwɔ nɛ̀ pínɛ ! Je mi 'weli Kàfɔli Zezi nyaa wè ! Baara dáà mi 'kúɔ Kàfɔli mɛ́ wè, yeli túʔu bɛ̀ʔ ki baara ti tɔ̀ni wè ? 2 A ki cɛ yē pàli wè mi nyaʔa Zezi tundunwɔ wè, yeli mɛ́ bèle, mi yē Zezi tundunwɔ. Ki 'nyaa yeli bálì bīɛlɛ pínɛnɛ nɛ́ ní wè, yeli bīɛlɛ mi fìɛ wè, ŋàa wi nyɛ́ni ki tìí mi yē Zezi tundunwɔ wè.

3 Bìli pe nyɛ́ni nyu nɛ tari mi nɛ̄ bèle, siɛnrɛ yē náʔa m'mɛ́ gìi m'bé gbɛ̀ juu bè mìɛ yige wè: 4 Yeli 'jo lé weli sì yɛli bèri líi béri gbunʔ wī lé ? 5 Weli sì yɛliʔ lé bè tɛ́ngɛfɔcuɔ wáà líɛ wi- puu weli cuɔʔ lé, majo mɛni Zezi tundunminɔ bílì pe ki kpínʔini gè, peli nɛ́ Kàfɔli wi siinyɛninɛ ní bèle, nɛ́ ní wè lé ? 6 Nɛ̀ pínɛ, mi nɛ́ Barinabasi ní wè, weli yákuɔ bīɛlɛ lé we 'yɛli bèri baara de weli nyalii caa wè ?

7 Ŋáasiɛn wi bé jo wire sɛ́nì silasiire kúɔ dè nɛ́ silasiire tugoro líɛ dè wire tíimɛ wè ? Nɛ̀ pínɛ, ŋáasiɛn wi bé gbɛ̀ ki juu bé jo a wire gbɛ́nɛ̀ fáli wè, wire nɛ̂ kò wi yasɛnrɛ luʔɔ ki sìngbuɔ nī wè ? Á kire 'laa, ŋáasiɛn wi 'jo wire nìɛ yajuuro nári dè, níɛ̀ kò yajuuro ti nɛ̀yirimɛ sìngbuɔ nī wè ?

8 Dùʔɔ dàa sí mi nɛ nyu dàa dè, siɛnnɛ wori bɛ̀ʔ; á kire 'laa, dùʔɔ ti wè nyu nɛ nɔ̀gí ti nɛ̄ʔ ? 9 Gìi ki 'cɛ́n gè, Fànʔa Siɛnrɛ nī dè, ki 'sɛbɛ baa nɛ́ jo: Muɔ sì yɛli bè jùɔ puɔ nùɔ wi nyuɔ nɛ̄ gèʔ a wiī nɛ yaliire sɛ̀ngí dèʔ. Yeli 'jo nìɛyɛ yire fuunmɔ Kulocɛliɛ wiī nɛ tùʔɔ́ lé ? 10 Á kire bɛ̀ʔ, weli kɛnmɛ nɛ̄ lé wi 'ki juu nɛ̀ gbɛ̀ngɛ ? ʔaan, ki 'sɛbɛ weli kɛnmɛ nɛ̄ bè nɛ́ jo: Tàfaliwɛ wi nɛ̂ wi sɔ̀ngirɔ taʔa dè gìi wire bága taa wire yafalidɛ nī dè, nɛ̀ pínɛ ŋàa wi yaliire sɛ̀ngí dè, wi nɛ̂ wi sɔ̀ngirɔ taʔa dè gìi wire bága taa gè. 11 Bà sí weli kɛn dè yeli mɛ́ dè, a weli 'yeli kɔliyɛrɛ táà taa dè, kire bé nyaa lé weli 'ki líɛ nɛ̀ tórigo wī lé ?

12 Pàli pìyeyɛ nɛ yeli kɔliyɛrɛ tari de nɛ líi, á weli bèle do, weli sì yɛliʔ bè ti taa bè tóri peli nɛ̄ lé ? Nɛ̀ sí ki taa weli sì kire kpíʔileʔ. Weli 'ki mìɛni kpàri nɛ̀ cò, gìi ki bé tí weli fǎga kpíʔile kaalaʔ béri wi yérigi dèʔ.

13 Yeli sì ki cɛ́nʔ lé bìli pe nyɛ́ni Kulocɛliɛ ki kakuʔɔlɔ kúu gèle, Gbùʔɔrɔsaʔa kire nī piyē nɛ pe nyalii tari wè lé ? Nɛ̀ pínɛ, bìli pe nyɛ́ni Kulocɛliɛ kakuɔrɔ kúu dè, pe nìɛ pe liʔɛlɛ tari gèle baa Kulocɛliɛ gbùʔɔrɔdiʔɛ kakuɔrɔ nī dè. 14 Bɛ̀ míɛni ki yē nɛ̀ pínɛ, Kàfɔli wi 'ki juu nɛ̀ gbɛ̀ngɛ bìli mɛ́ pe nyɛ́ni Kataanna Siɛnrɛ jáari dè, peri pe nyalii tari wè Kataanna Siɛnrɛ ti baara koligo nī gè.

15 Nɛ̀ sí ki taa mi wè, mi sì kire káà fáala tɔ́riʔ. Mi sí wè nɛ siɛnrɛ dáà sɛbɛ dèʔ bè jo ye- ki kpíʔile mi mɛ́ wīʔ. Sɛ́ni wàa kire nàgbuʔɔrɔ tiɛlɛ náà suɔ lè mi mɛ́ wè, mi cɛ kùu, kire kaala 'pɔ́ri mi mɛ́. 16 A mi nɛ Kataanna Siɛnrɛ jáari dè, kire sì nyaa mi fali de nìɛ nyíɛnɛ nɛ́ tire níʔ; ki cɛ yē fànʔa kaala mi mɛ́ wī. Á kire 'laa, je yawuʔɔ bé mi taa, a mi wè Kataanna Siɛnrɛ jáari dè wèʔ ! 17 A ki yē mi 'puu nɛ ki baara kúu dè ti ní mi nyɛ́ni wori dè, bɛ̀ m'bé ti sàri taa wè. A mi sí nɛ cɛ́ni ti kúu ti wè mi nyɛ́ni wori yoʔ, ki baara tiī mi nɛ̄ taʔara wī. 18 Mi sàri wire sí wī ŋíi wè ? Wire wī mi de Kataanna Siɛnrɛ jáari dè waʔanɛ. Mi sì kɛ́nì ki caa pe- ki baara ti sàri kɛn wè mi mɛ́ʔ.

19 Ki 'nyaa mi yē mìɛmɛ siɛnnɛ pe mìɛni yiʔɛ mɛ́ gè, nɛ̀ sí ki taa mi 'mìɛ kpíʔile sùkulowo pe mìɛni mɛ́ bèle, gìi ki bé tí mi- gbɛ̀ pàli nìʔɛnɛ yeri bè pɛn Kirisi mɛ́ wè. 20 Mi 'mìɛ kpíʔile bɛ̀ Zuufuwo tíɛlɛ bà mi 'puu nɛ́ Zuufulo ní bèle, gìi ki bé tí mi- Zuufulo taa bèle. Bìli pe 'pìye cáan Misa Fànʔa Siɛnrɛ láara dè, a mi 'mìɛ kpíʔile kire felige siɛn wáà nɛ̀ pínɛ, gìi ki bé tí mi- pe yeri bè pɛn Kirisi mɛ́ wè, nɛ̀ sí ki taa mi wè Fànʔa Siɛnrɛ láara dèʔ. 21 Bìli bīɛlɛ piyè kàa cɛ́n Fànʔa Siɛnrɛ ti wori nī dèʔ, a mi 'mìɛ kpíʔile majo mi sì Fànʔa Siɛnrɛ cɛ́n dè wīʔ; gìi ki bé tí bìli piyè kàa cɛ́n Fànʔa Siɛnrɛ nī dèʔ, mi- pe yeri bè pɛn Kirisi mɛ́ wè. Kiì sí kò majo mi sì Kulocɛliɛ fànʔa siɛnrɛ cɛ́n dè wīʔ. Ki 'nyaa mi cɛ yē Kirisi fànʔa láara gè wī. 22 Bìli bīɛlɛ ŋɔri fùn bèle, a mi 'mìɛ kpíʔile ŋɔrifunfɔli pe mɛ́, gìi ki bé tí mi- ŋɔrifunfɔlilɔ yeri bèle bè pɛn Kirisi mɛ́. Mi 'mìɛ yaʔa nɛ̀ kò feliye yi mìɛni siɛnnɛ pe mìɛni mɛ́ bèle, gìi ki bé tí mi- pàli suɔ kɛnmɛ pi mìɛni feliye nɛ̄. 23 Mi nɛ kire ki mìɛni kpínʔini gè Kataanna Siɛnrɛ tire kɛnmɛ nɛ̄, gìi ki bé tí mi- mi liɛlɛ taa lè ti nī.

24 Yeli sì ki cɛ́n léʔ, kádii bìli pe sî puu baa dàligɛ nɛ̄ gè kàsɛnivɛbilɛ bèle, pe mìɛni pe nàa fé, nɛ̀ sí ki taa wàa nigbe wi nɛ̂ kɛ́nì kàfali taa wè ? Yeli míɛni bèle, yeri fé ye- yeli wuu taa wè. 25 Siɛn ó siɛn ŋáà sí wi nyɛ́ni cáanra cáanri bè ki taa wè, wi nɛ̂ céri fùrɔgɔ ki mìɛni sori gè. Kire siɛnnɛ bálì pe nɛ̂ sí nɛ kire kpínʔini bága kpuʔɔrɔ ndɔ̀ngɔ taa, gàa ki bága cúʔɔ gè. Weli wuʔu kire sì sí je ga cúʔɔ bè nyaa wīʔ. 26 Mi wè, mi nɛ fé, mi sí wè nɛ fé waʔanɛ wī díɛʔ ! Mi wè mi cáanra cáanri dè nɛ mi kaguruyo kpúɔnri yè nɛ wáari waʔanɛ wīʔ. 27 Ki 'nyaa mi nɛ mi céri cɔ̀rí dè kpuʔɔ, nɛ̀ jáa mìɛ nɛ̄, ki fǎa gá nyaa mi ŋáà mi 'Kataanna Siɛnrɛ juu dè pàli mɛ́ bèle, ki- nyaa miì paʔa nɛ̀ yiriʔ.