Korɛntiyé 1 10

Ye- yìye cò yasunro nɛ̄ dè

1 Nɛ siinyɛninɛ, bɛ̀ ki 'juu nɛ́ jo dí weli tobilo pe mìɛni pe 'puu baa kàsadibagɛ láara gè, mi wè caa yeli- puu tire sìnjɛ́n nīʔ. Nɛ̀ pínɛ, pe mìɛni pe cé tánʔa nɛ̀ sùuri kuʔɔjii nī wè. 2 Pe mìɛni pe cé wè nɛ́ ní wè kàsadibagɛ nī gè nɛ́ kuʔɔjii nī wè. 3 Pe mìɛni pe cé sunuro lìi dè dàa Kulocɛliɛ cé kɛn dè, 4 nɛ̀ pínɛ nɛ̀ yagbuɔnugo gbuɔ gè pe mìɛni bèle, Kulocɛliɛ wuʔu gè gàa ki 'puu nɛ yigi sìndɛnigɛ nī gè, sìndɛnigɛ gáà ki cé taʔa pe nɛ̄ bèle. Kire sìndɛnigɛ kire ki 'puu wè. 5 Nɛ̀ sí ki taa pe kpuɔmɔ sì cé Kulocɛliɛ dɛ́ni wèʔ pe kakpiʔiligele keli kɛnmɛ nɛ̄ bè. Kire nɛ̄ pe cé kùu nɛ̀ yɛ́ligɛ nɛ̀ màʔa waama kùlo nī lè.

6 A tire dáà ti 'kò weli mɛ́ fìɛlɛ gìi ki bé tí sɔ̀ngibiire fǎga de yɛ̀gí weli funyɔ nī yè bɛ̀ pe tíɛlɛʔ, sɔ̀ngibiire dáà ti 'puu pe nī bèle. 7 Ye fǎga kò yasunzunminɔ bɛ̀ pe pàli tíɛlɛʔ, majo bɛ̀ ki 'sɛbɛ gè, nɛ́ jo:

Kùlo ni siɛnnɛ pe 'tɛ́ni nɛ̀ lìi, nɛ̀ gbuɔ,

nɛ́ kúɔ nɛ́ yɛ̀ nɛ pe ladaanma pùrɔrɔ pùrɔ́ dè.

8 Ye fǎga de kanuʔɔrɔ kpínʔiniʔ majo bɛ̀ pe pàli cé ki kpíʔile gèʔ. Á siɛnnɛ siramuʔɔyɔ kogunɔ sirakiɛ nɛ́ kogunɔ (23 000) 'pínɛ nɛ̀ kùu cɛnnugo gè. 9 Ye fǎga tí béri Kirisi wi nyuɔ caaʔ, majo bɛ̀ pe pàli cé Kulocɛliɛ nyuɔ caa gè, á wɔ̀burɔ ti 'pe nɔgi nɛ̀ kpúu bèle. 10 Ye fǎri nyu de kúnʔɔriʔ, kire kúnʔɔrilɔ lire pe pàli 'puu nɛ kúnʔɔri, á kùu tundunwɔ wi 'pe cúʔɔ bèle.

11 Ki sí nyaa kire kele gálì ke cé pe taa, a pe 'ti sɛbɛ gìi ki bé tí ki- puu weli mɛ́ tɛnmɛnɛ, weli bálì bīɛlɛ lɛ̀lɛ ni kúɔmɔ nī bè. 12 Kire nɛ̄, ŋìi wi ki sɔ̀ngí wire yē yériwe wè, siɛn wi de ciʔige wi fǎga tuuʔ.

13 Puuwelige káà sì je yeli taaʔ, nɛ̀ yiri gàa ki nɔ̀gí siɛnnɛ nɛ̄ bèleʔ. Kulocɛliɛ wi sí yē baa wi nyayerigele nī gèle. Wiǐ gá tí puuwelige káà yeli taaʔ gìi nɛ̄ yeli sǐ gbɛ̀ jáa gèʔ. Gìi ki 'cɛ́n gè, a puuwelige ki 'pɛn gè, Kulocɛliɛ wi bé yeli yiridiʔɛ kɛn gè, gìi ki bé tí ye gbɛ̀ ki kpàri bè cò.

Tɛ́ngɛfɔlilɔ pe- pìye cò yasunro kaara nɛ̄ dè

14 Kire nɛ̄, nɛ siinyɛninɛ, yeri fé yasunro sungo nɛ̄ gè ! 15 Mi nɛ nyu nɛ́ yeli ní nɛ yeli tɔ́ri bɛ̀ siɛnsicilile tíɛlɛ wī. Ye- mi siɛnrɛ sɔ̀ngi dè wêli.

16 Bà we sî je lìi lè, níɛ̀ barigɛ kɛn Kulocɛliɛ mɛ́ wè yagbuʔɔ ki wori nɛ̄ dè, pínɛnyɛnigɛ gáà sìsiɛn kiī nɛ kanʔa we mɛ́ gè, kire bɛ̀ʔ lé ? Nɛ̀ pínɛ bɛ̀ we sî búru ceri wè nɛ̀ káa wè, pínɛnyɛnigɛ gáà Kirisi céri tiī nɛ kanʔa we mɛ́ dè, kire bɛ̀ʔ lé ? 17 Bà sí búru wiī nigbe wè, wiyē cetinnɛ nigbe wī, nɛ́ sí ní nìʔɛnɛ. Ki 'nyaa we mìɛni wiyē nɛ we liɛlɛ tari lè búru ŋáà nigbe nī wè. 18 Ye- pìile kɛnmɛ sɔ̀ngi bè: bìli pe nyɛ́ni ki kakuɔrɔ kaara káa dè, je pe nɛ̂ puu pínɛnyɛnigɛ nɛ̄ nɛ́ Kulocɛliɛ ní wè wī.

19 Dàa sí mi nɛ nyu dàa dè, tire kɔri wi 'jo gáa wī ? Kire 'jo lé yasungo kaara tiī yakaa wī lé ? Á kire 'laa yasungo gè, kakpuʔɔ gī lé ? 20 ʔéʔe díɛ ! Bà ki 'nyaa yɛrɛ dáà pe sî kɔ̀n kakuɔrɔ dè, gbòdolilo mɛ́ pe sî ti kɔ̀n, Kulocɛliɛ mɛ́ bɛ̀ʔ pe sî ti kɔ̀nʔ. Kire nɛ̄ mi wè caa yeri yìye nyaʔami nɛ́ gbòdolilo ní bèleʔ. 21 Yeli sǐ gbɛ̀ri wi yagbuʔɔ gbun gèʔ, bé sí ní de gbòdolilo yagbuʔɔ gbun gèʔ. Kiǐ gbɛ̀ kpíʔileʔ, yeli de Kàfɔli wi lìile líi lèʔ, bé sí ní de wúu de líi nɛ́ gbòdolilo ní bèleʔ. 22 Dùʔɔ weli sí nɛ ki caa bè Kàfɔli wi yejaʔa yɛ̀gɛ gè wī lé ? Weli fànʔa ki cé kɛ́nì kpúʔɔ nɛ̀ tóri wi wuʔu nɛ̄ gè lé ?

Weri kpuʔɔrɔ tari Kulocɛliɛ nɛ̄

23 Kele ke mìɛni ke bé gbɛ̀ kpíʔile, nɛ̀ sí ki taa ke mìɛni kiyè yɛliʔ. Kele ke mìɛni ke bé gbɛ̀ kpíʔile, nɛ̀ sí ki taa ke mìɛni wè nɛ ŋɔri kanʔa siɛn mɛ́ tɛ́ngɛlɛ nī lèʔ. 24 Siɛn fǎri wi tíimɛ nyuɔmɔ caaʔ, macɛn pàli. 25 Yɛgɛ ó yɛgɛ pe pári cɛ́ni nɛ̄ gè, yeri ki káa, yé fǎri yafiɛn cinʔɛgɛ bè cɛ́n ki wori nī dèʔ. 26 Nɛ̀ taʔa gíi nɛ̄, wire woli nī dàala lè nɛ́ ni yɛrɛ ti mìɛni ní dè. 27 A sìndɛngɛwɛ 'yeli yeri ye sa lìi wè, a yeli 'yéri ki nɛ̄ bè kɛ́ baa wè, a pe sɛ́nì yaliire ó yaliire tɛ́ngɛ yeli yiʔɛ mɛ́ gè, yeri ti líi, yé fǎri yakaa cinʔɛgɛ de yúgoʔ. 28 A ki sí yē siɛn yeli yɛ: «Yasungo kaara dī dàa dè», ye fǎga ti káaʔ; ŋàa wi 'ti juu yeli mɛ́ dè wire kɛnmɛ nɛ̄, nɛ́ yeli funzɔngirɔ tire kɛnmɛ nɛ̄ bè. 29 Funzɔngirɔ dáà wori mi nɛ nyu dè, yeli wori tire bɛ̀ʔ, ŋìi wire funzɔngirɔ mi nɛ̄ pun. Á kire 'laa, bɛ̀ mi yē mìɛmɛ wè, mɛni nɛ̀ síɛ wàa bé ní de kàyuʔu nyu mi nɛ̄ kire kɛnmɛ nɛ̄ ? 30 A mi nɛ Kulocɛliɛ síɛri wè níɛ líi wè, gáa nɛ̄ wàa bé ní gbɛ̀ de mi cɔ̀rí bɛ̀ mi nɛ Kulocɛliɛ síɛri wè níɛ ti líi wè ?

31 Kire nɛ̄, a yeli nɛ líi yo, a yeli nɛ gbun yo, yɛgɛ ó yɛgɛ yeli nɛ kpínʔini gè, yeri ki mìɛni kpínʔini yeri tari Kulocɛliɛ wire nɛ̄. 32 Ye fǎga kpíʔile kaala bé siɛn wáà fáala kɛn wi- tuuʔ, Zuufulo yo, á kire 'laa Girɛki wuulo yo, bé nɛ́ cɛ gá jo wuulo bèleʔ. 33 Bɛ̀ sí mi míɛni mi nɛ ki kpínʔini, mi nɛ mìɛ ŋàʔaná mi kakpiʔiligele ke mìɛni ke- siɛnnɛ pe mìɛni dɛ́ni bèle. Mi wè mi tíimɛ nyuɔmɔ caa wīʔ; gìi mi nɛ caa gè, pàli nìʔɛnɛ woli ni- nyuɔ dí pe sí suɔ.