11
1 Yeri mi tùluyo tɔ́ri yè,
majo bɛ̀ mi míɛni mi nɛ ki kpínʔini nɛ́ Kirisi ní wè.
Nàguɔ nɛ́ cɛliwɛ pe yérigɛnmɛ bè náaridiʔɛ nī gè
2 Mi nɛ yeli síɛri,
bɛ̀ yeli nɛ sɔ̀ngí nɛ tari nɛ́ mi ní lɛ̀gɛlɛ ke mìɛni nī gèle,
nɛ́ mi tɛnmɛgɛlɛ cò gèle gàli mi 'kɛn yeli mɛ́ gèle.
3 Mi nɛ caa ye- ki cɛ́n nàguɔ ó nàguɔ,
Kirisi wire wī wi nyùgo gè.
Nàguɔ wire sí yē cɛliwɛ wi nyùgo.
Kulocɛliɛ wire wī Kirisi wi nyùgo gè.
4 A nàguɔ ŋíì nɛ náari á kire 'laa nɛ Kulocɛliɛ kele nyu,
nɛ́ wi nyùgo tɔ́n gè,
wiī nɛ fìɛrɛ tɔ́ngi Kirisi nɛ̄ wè,
wire ŋáà wī wi nyùgo gè.
5 A cɛliwɛ ŋíì nɛ náari,
á kire 'laa nɛ Kulocɛliɛ kele nyu nɛ́ wi nyùgo yaʔa gè wiì ki tɔ́n gèʔ,
wiī nɛ fìɛrɛ tɔ́ngi wi pɔli nɛ̄ wè,
wire ŋáà wī wi nyùgo gè.
Kire yē majo wi 'wi nzìire kùnu dè wī.
6 A ki sí nyaa cɛliwɛ ŋíì sì wi nyùgo tɔ́n gèʔ,
wi- nzìire celile dè.
A ki sí yē wi 'ki nyaa bè nzìire celile dè,
kiī fìɛrɛwuʔu wè,
wi- nyùgo tɔ́n gè.
7 Nàguɔ wire wè,
wiì yɛli bè wi nyùgo tɔ́n gèʔ,
ki 'nyaa wiī Kulocɛliɛ líɛrɛ nɛ́ ní Kulocɛliɛ wi kpuʔɔrɔ wī;
cɛliwɛ wire sí yē nàguɔ wi kpuʔɔrɔ wī.
8 Nàguɔ wiì cé yiri cɛliwɛ nīʔ,
cɛliwɛ wire wi cé yiri nàguɔ nī wè.
9 Nɛ̀ pínɛ nàguɔ wiì faan cɛliwɛ kɛnmɛ nɛ̄ʔ,
ki 'nyaa cɛliwɛ wire wi 'faan nàguɔ kɛnmɛ nɛ̄.
10 Kire nɛ̄,
nyìʔɛnɛ tundunminɔ peli kɛnmɛ nɛ̄ bè,
cɛliwɛ wi 'yɛli bè wi nyùgo tɔ́n gè,
kire 'ki tìɛ wi 'wìi cɛ́rigɛ wi pɔli mɛ́ wè.
11 Kire gáà ki mìɛni nī gè,
Kàfɔli wire mɛ́ wè,
cɛliwɛ wiǐ gbɛ̀ nyuɔ nàguɔ kàduʔu nɛ̄ʔ.
Nàguɔ míɛni wiǐ gbɛ̀ nyuɔ cɛliwɛ kàduʔu nɛ̄ʔ.
12 Nɛ́ ki cɛ́n cɛliwɛ wi 'yiri nàguɔ nī,
a nàguɔ míɛni wi 'yiri cɛliwɛ nī.
Kele ke mìɛni ke sí kɔ́n Kulocɛliɛ mɛ́.
13 Ye- ki sɔ̀ngi yeli tíimɛ bèle,
ki 'pɔ́ri lé cɛliwɛ de Kulocɛliɛ náari wè bé sí wi nyùgo yaʔa gè wi fǎga ki tɔ́n gèʔ ?
14 We mìɛni 'ki cɛ́n a nàguɔ gbɛ́nɛ̀ wi nzìire yaʔa dè sìtɔnidɔ dè,
ki nɛ̂ puu fìɛrɛwuʔu,
bà bɛ̀ʔ lé ?
15 Nɛ̀ sí ki taa cɛliwɛ nzìitɔnidɔ dè tire yē wi mɛ́ kpuʔɔrɔ wī.
Ki 'nyaa Kulocɛliɛ wi 'wi kɛn nɛ́ nzìire sìtɔnidɔ ní dè ti- de wi nyùgo tɔ́ngi gè.
16 A siɛn ŋíì sí nɛ ki caa bèri kìí nɛ́ dàa ní dè,
weli sì dàli tire nɛ̄ dèʔ,
Kulocɛliɛ tɛ́ngɛfɔlilɔ gbuʔulo kiyè fɔ̀li tire nɛ̄ dèʔ.
Kàfɔli lìile wori dè
17 Dàa sí mi je juu dè,
síɛrigɛ wè baa yeli wuʔuʔ,
nɛ̀ taʔa gíi nɛ̄,
a yeli gbɛ́nɛ̀ yìye pínɛ bèle,
yeli nɛ̌ yìye pínɛ bèri waa yiʔɛmɛ wīʔ,
yeli nìɛ serigi wī.
18 Gìi mi nɛ lúru yeli kɔli mɛ́ gè,
kapelile lè,
a yeli gbɛ́nɛ̀ yìye pínɛ bèle,
yeli nɛ̂ wáligi.
Mi 'tɛ́ngɛ ki nɛ̄ kányiʔɛ bé puu baa ti nī.
19 Ki cɛ́nì yɛli wī wàlimɛ- puu baa yeli sunʔɔmɔ nī bè;
a kire 'kpíʔile gè,
bìli bīɛlɛ yeli nī kányiʔɛ wuulo bèle,
bɛ̀ pe bé cɛ́n.
20 A yeli sí gbɛ́nɛ̀ yìye pínɛ bèle,
ki nɛ̌ nyaa yeli yìye pínɛ bè Kàfɔli lìile lìi wīʔ.
21 Nɛ́ ki cɛ́n lìi lɛ̀lɛ nī lè,
ye mìɛni nigbe nigbe nɛ̂ sɛ́nì yeli sipiʔɛlɛ keli líɛ.
Kire nɛ̂ ki kɛn pàli nɛ̂ kò nɛ́ fungo ní,
á pàli nɛ̂ sí gbuɔ fúɔ nɛ cuulo.
22 Saaya wè baa yeli mɛ́ʔ wī lé,
ye cé kò baa yeri líi baa yéri gbun baa kìɛ ?
Á kire 'laa,
bà mi 'ki nyaa gè,
Kulocɛliɛ gboli lire nɛ̄ yeli nɛ caa bè faʔara wáa dè,
bé sí fìɛrɛ tɔ́n bìli nɛ̄ yakaa wè pe mɛ́ bèleʔ.
Gíi sí cɛ mi 'yɛli bè juu yeli mɛ́ ?
Mi sari yeli míɛtanʔa yeri dàa nɛ̄ dè í ?
ʔéʔe,
miǐ gbɛ̀ri yeli míɛtanʔa yeri tire nɛ̄ dèʔ.
23 Gìi sí mi 'taa Kàfɔli mɛ́ wè,
nɛ́ sí ki siɛnrɛ kɛn dè yeli mɛ́ dè,
tire dī dàa dè:
Kàfɔli Zezi wè,
pìlige gíì nī pe cé wi cò wè,
a wi 'búru líɛ,
24 nɛ̀ barigɛ kɛn Kulocɛliɛ mɛ́,
nɛ́ kúɔ nɛ́ wi kúnminɔ,
nɛ́ jo:
«Mi céri tire dī dàa dè,
ti 'kɛn yeli kɛnmɛ nɛ̄.
Yeri kire gáà kpínʔini gè yeri sɔ̀ngí de tari nɛ́ mi ní.»
25 Bà pe 'lìi nɛ̀ kúɔ wè,
a wi 'ki kanugo kpíʔile gè,
nɛ̀ yagbuʔɔ líɛ gè,
nɛ́ jo:
«Yagbuʔɔ gáà kiī nɛ ki tìí nyakungɛngɛ fɔngɔ gáà Kulocɛliɛ wi 'kpíʔile nɛ́ siɛnnɛ ní bèle bɛ̀ mi sìsiɛn ki 'wo yeli kɛnmɛ nɛ̄ bè.
Yeri ki kpínʔini yeri sɔ̀ngí de tari nɛ́ mi ní lɛ̀gɛlɛ ke mìɛni nī,
a yeli je ki gbuɔ gè.»
26 Ki 'nyaa lɛ̀lɛ ó lɛ̀lɛ yeli ki búru ŋáà káa wè,
nɛ́ yagbuʔɔ gbuɔ gè,
Kàfɔli wi kùu wori tire yeli nɛ jáari,
fúɔ bè taa wi ga pɛn wè.
27 Kire nɛ̄,
a siɛn ŋíì Kàfɔli búru káa wè,
nɛ́ yagbuʔɔ gbuɔ gè nɛ̀ ki yaʔa wiì yɛli nɛ́ ki ní wèʔ,
wi 'wìi le kaala nī Kàfɔli wi céri kɔli mɛ́ gè nɛ́ wi sìsiɛn kɔli mɛ́ gè.
28 Siɛn ó siɛn,
wi- wìi siʔɛ wi wéli,
wí nɛ́ péli wi búru káa wè,
wí sí yagbuʔɔ gbuɔ gè.
29 Á kire 'laa wè,
siɛn ŋáà wi nyɛ́ni búru káa wè níɛ yagbuʔɔ gbun gè,
nɛ̀ sí ki taa wiì ki kɔri cɛ́n wèʔ,
kire siɛn wiī nɛ kàyuʔu kúnminɔ nɛ tari wìi nɛ̄ wī.
30 Kire ki 'tí a yaala pe 'niʔɛ yeli sunʔɔmɔ nī bè,
nɛ́ siɛnmaaminɛ ní bèle,
nɛ̀ pínɛ a kùu wi 'niʔɛ.
31 Nɛ̀ sí ki taa a we 'puu nɛ wìye siʔɛ nɛ wéli wè,
ki kàyuʔu kiì cî de tun we nɛ̄ʔ.
32 Kàfɔli wi sí nɛ weli kàyuʔu nyu gè nɛ weli nii koligo nī,
gìi ki bé tí kàyuʔu ki fǎa ga sa pínɛ bè juu bè cáan weli nɛ̄ nɛ́ duniya wuulo ní bèleʔ.
33 Kire nɛ̄,
nɛ siinyɛninɛ,
a ye 'yìye pínɛ bè Kàfɔli wi suro lìi dè,
ye- yéri ye yìye sige.
34 A ki 'nyaa fungo yē wàa nɛ̄,
siɛn wi- lìi baa kpáa mɛ́;
ye fǎga yìye pínɛ bé sí kàyuʔu kún bè taʔa yìye nɛ̄ʔ.
Dàa ti 'kò sɛnrɛ dè,
a mi kɛ́nì kɛ́ wè,
m'bé sa ti cuɔnri.