Kulocɛliɛ Pìle kpuʔɔrɔ yakɛnrɛ dè
12
1 Nɛ siinyɛninɛ,
gìi ki 'Kulocɛliɛ Pìle kele kɛnmɛ kúɔ bè,
mi wè caa ye- puu ti sìnjɛ́nmɛ nīʔ.
2 Yeli 'ki cɛ́n bà yeli 'puu nɛ tíin sìndɛngɛlɛ bèle,
yeli cé yìye yaʔa yasunro mɛ́ dè tire dáà ti wè nyu dèʔ ti yeli pùunní.
3 Kire nɛ̄ mi je ki juu yeli mɛ́,
siɛn ŋáà wī nɛ́ Kulocɛliɛ Pìle ní lè,
wi nɛ̌ ki juuʔ bé jo:
«Zezi wè,
dɛ́ngɛ yē wi nɛ̄ʔ.»
Nɛ̀ pínɛ siɛn sǐ gbɛ̀ ki juuʔ bé jo:
«Zezi wire wī Kàfɔli wè !»
ga laa Kulocɛliɛ Pìle ni wè ki siɛn nī wèʔ.
4 Yakɛnrɛ ti felide tiī nìʔɛrɛ;
Pìle nigbe sí ni nyɛ́ni ti kanʔa.
5 Nɛ̀ pínɛ baakuɔgoliyo yiī nìʔɛyɛ,
nɛ̀ sí ki yaʔa Kàfɔli nigbe mɛ́ we ti kúu.
6 Kele ke kpíʔilegɛnmɛ pi feliye yiī nìʔɛyɛ,
Kulocɛliɛ nigbe sí wi nyɛ́ni ke mìɛni kúu nɛ́ siɛnnɛ pe mìɛni ní bèle.
7 Kulocɛliɛ Pìle ni nɛ̂ sí nɛ ni kakpiʔiligele kúu gèle nɛ́ siɛn ó siɛn ní,
siɛnnɛ pe mìɛni nyuɔmɔ kɛnmɛ nɛ̄.
8 Ni nɛ̂ sícilimɛ siɛnrɛ kɛn dè wàa mɛ́,
níɛ̀ kacɛ́nnɛ siɛnrɛ kɛn wàa wìiyɛ mɛ́.
Pìle nunɔ lire sí nī.
9 Pìle nunɔ ni nɛ̂ tɛ́ngɛlɛ kɛn wàa mɛ́,
níɛ̀ sí kpuʔɔrɔ kɛn wàa wìiyɛ mɛ́ wiri yaala pori.
10 Kulocɛliɛ Pìle nunɔ ni nɛ̂ kpuʔɔrɔ kɛn wàa mɛ́ wiri kakpoliyo kpínʔini,
níɛ̀ kpuʔɔrɔ kɛn wàa wìiyɛ mɛ́ wiri Kulocɛliɛ kele nyu gèle.
Ni nɛ̂ sícilige kɛn gè wàa mɛ́ wiri ki cɛ́ngi gìi gī Kulocɛliɛ Pìle wuʔu gè,
nɛ́ gìi ki wè Kulocɛliɛ Pìle wuʔu gèʔ.
Ni nɛ̂ kpuʔɔrɔ kɛn wàa mɛ́ wiri nyu siɛnrɛ felide táà nī.
Ni nɛ̂ wàa kɛn wi nìɛ Kulocɛliɛ Pìle siɛnrɛ ti kɔri nyu wè siɛnnɛ mɛ́ bèle.
11 Tire dáà ti mìɛni dè,
Kulocɛliɛ Pìle nunɔ lire ni nyɛ́ni ti kpínʔini,
níɛ ti liile pe mìɛni nigbe nigbe nɛ̄ bèle,
a gìi 'wi dɛ́ni.
Cetinnɛ nigbe yaliiye nìʔɛyɛ
12 Kiī cɛ́ngɛ,
cetinnɛ niī nigbe nɛ́ sí ní yaliiye ní yè nìʔɛyɛ.
Bɛ̀ yaliiye yiī nìʔɛyɛ nɛ́ sí ní cetinnɛ nigbe nɛ̄ lè,
bɛ̀ Kirisi wi yē nɛ̀ pínɛ kire kɛnmɛ nɛ̄ bè.
13 Ki 'nyaa weli we mìɛni bèle Kulocɛliɛ Pìle ni 'weli batɛmi kpíʔile wè nɛ̀ we pínɛ a we 'kò cetinnɛ nigbe:
Zuufulo yo,
Girɛki wuulo yo,
sùkulolo yo,
bìli bīɛlɛ pìyemɛ yo.
Nɛ̀ pínɛ Kulocɛliɛ Pìle lire nigbe nī we mìɛni we 'taa nɛ̀ gbuɔ.
14 Yaliige nigbe bɛ̀ʔ cetinnɛ lèʔ,
cetinnɛ ni yaliiye yiī nìʔɛyɛ wī.
15 A ki yē tɔligɔ cé jo:
«Bɛ̀ ki 'nyaa kɔli bɛ̀ʔ mi wèʔ,
kire nɛ̄ cetinnɛ tiʔɛ káà bɛ̀ʔ mi wèʔ»,
kire bé ki kɛn ki fǎga puu cetinnɛ ni yaliige káàʔ lé ?
16 A ki sí ń'nɛ̀ nyaa ngbóli 'jo:
«Bɛ̀ ki 'nyaa mi wè nyapile lèʔ,
cetinnɛ tiʔɛ káà bɛ̀ʔ mi wèʔ»,
kire bé ki kɛn ni fǎga puu cetinnɛ ni yaliige káàʔ lé ?
17 A ki yē cetinnɛ ni mìɛni ni 'puu nyapile lè,
mɛni siɛn wi cî de lúru de síi ?
A ki sí ń'nɛ̀ nyaa cetinnɛ ni mìɛni ni 'puu ngbúʔulo gèle,
mɛni wi cî de nùgo suu gè de síi ?
18 Ki sí n'gɛ,
Kulocɛliɛ wi 'yaliiye le yè cetinnɛ nɛ̄ lè,
yi mìɛni nigbe nigbe yè nɛ̀ yɛli nɛ́ wi nyɛ́ni kaala ní lè.
19 A ki yē ti mìɛni ti 'puu yaliige nigbe gè,
cetinnɛ lire sî puu sé ?
20 Kire nɛ̄ yaliiye yiī nìʔɛyɛ,
á cetinnɛ ni sí yē nigbe.
21 Nyapile niǐ gbɛ̀ kɔli yɛ gèʔ:
«Mi màakuu wè muɔ nɛ̄ʔ.»
Nɛ̀ pínɛ nyùgo kiǐ gbɛ̀ tɔliyɔ yɛ yèʔ:
«Mi màakuu wè yeli nɛ̄ʔ.»
22 Gìi ki 'cɛ́n gè,
céri tiɛyɛ nyíì ní we wè tɔ́ri kpuʔɔ wèʔ,
kire tiʔɛlɛ ke kanyuɔnɔ niī kpuɔlɔ.
23 Céri tiɛyɛ nyíì we wè tɔ́ri yèʔ,
we sí nɛ ki tiʔɛlɛ sɔ́migi gèle nɛ ke gbòbori.
Nyìi sí yī fìɛrɛ tiɛyɛ yè,
we nàa ki tiʔɛlɛ gbùʔɔrɔ́ gèle.
24 Tiɛyɛ nyíì yi 'wè fìɛrɛ tiɛyɛ yèʔ,
yire màakuu wè ki kpuʔɔrɔ dáà nɛ̄ dèʔ.
Nɛ̀ sí ki taa Kulocɛliɛ wi 'cetinnɛ faan lè nɛ̀ kpuʔɔrɔ taʔa tiɛyɛ nyíì nɛ̄ we wè tɔ́ri yèʔ.
25 Wi 'kire kpíʔile gìi ki bé tí wàlimɛ fǎga puu cetinnɛ nī lèʔ.
Gìi ki 'pɔ́ri gè,
yaliiye yi mìɛni yi de tɔ́ri nɛ́ yìi ní.
26 A yaliige káà nigbe yē nɛ wuʔɔ wè,
yaliiye nyíì yi mìɛni yiri pínɛ de wuʔɔ nɛ́ ki ní.
A pe 'kpuʔɔrɔ taʔa kàa nigbe nɛ̄ wè,
yaliiye nyíì yi mìɛni yiri fundaanra kpínʔini nɛ́ ki ní.
27 Yeli sí bīɛlɛ Kirisi wi cetinnɛ lè,
ye mìɛni nigbe nigbe yē wi yaliiye yáà.
28 Bìli Kulocɛliɛ wi 'tɛ́ngɛ tɛ́ngɛfɔlilɔ gbuʔulo nī gèle,
pe m'bɛlɛ:
pélile bèle,
Zezi tundunminɔ,
bìli pe taʔa bèle,
Kulocɛliɛ siɛnjuulo,
nɛ̀ yɛ̀ nɛ̀ tɛnmɛfɔlilɔ taʔa,
nɛ̀ kakpoliyo kpíʔilefɔlilɔ taʔa,
nɛ̀ yaabuʔɔlɔ kpuʔɔrɔ kɛn pàli mɛ́,
nɛ̀ sáʔafɔlilɔ taʔa,
nɛ̀ yiɛgininɛ taʔa,
nɛ̀ kpuʔɔrɔ kɛn pàli mɛ́ pe gbɛ̀nɛ nyu siɛnrɛ felide táà nī.
29 Yeli 'ki nyaa lé pe mìɛni yē Zezi tundunminɔ lé ?
Pe mìɛni yē Kulocɛliɛ siɛnjuulo lé ?
Pe mìɛni nɛ siɛnnɛ tɛnmɛ lé ?
Pe mìɛni nɛ kakpoliyo kpínʔini lé ?
30 Pe mìɛni pe 'kpuʔɔrɔ taa nɛ yaala pori lé ?
Pe mìɛni nɛ nyu siɛnrɛ felide táà nī lé ?
Pe mìɛni nɛ Kulocɛliɛ Pìle siɛnrɛ ti kɔri cɛ́ngi wè nɛ nyu lé ?
31 Yeri ki caa ye yakɛnrɛ kpolido tire taa.
M'bé sí kɛnmɛ páà tìɛ yeli nɛ̄,
kire kɛnmɛ pi ní nɛ̀ nyuɔ nɛ̀ tóri.