Dɛ́nigɛ gè
13
1 A mi cɛ́ni duniya siɛnrɛ felide táà nyu dè,
nɛ nyìʔɛnɛ tundunminɔ siɛnrɛ nyu nɛ pínɛ wè,
a ki 'nyaa dɛ́nigɛ wè mi fungo nī gèʔ,
mi yē bɛ̀ kányiɛrɛ wòrigbolo tíɛlɛ nɛ tùngú,
á kire 'laa bɛ̀ 'nɛ̀gɛvaligɛ tíɛlɛ nàa ni tùngú lè.
2 A ki sí ní nɛ̀ nyaa Kulocɛliɛ kele ke juʔu kpuʔɔrɔ tiī mi mɛ́ wè,
nɛ̀ pínɛ a kalarigɛlɛ kacɛ́nnɛ niī mi mɛ́ wè,
nɛ́ kacɛ́nnɛ feliye yi mìɛni ní yè,
nɛ̀ pínɛ a tɛ́ngɛlɛ ni mìɛni yē mi mɛ́ fúɔ mi nɛ nyaguruyo yɛ̀gí nɛ sìʔɛrɛ́ wè,
a dɛ́nigɛ wè mi fungo nī gèʔ,
mi wè yafiɛnʔ.
3 A mi cɛ́nì mi kɔliyɛrɛ ti mìɛni liɛlɛ wè,
nɛ̀ cɛ́nì mi céri kɛn dè a pe 'mi sórigo wè,
a dɛ́nigɛ wè mi fungo nī gèʔ,
kire sì je yafiɛn nyuɔ mi nɛ̄ʔ.
4 Dɛ́nigɛ kiī nɛ́ kpàricogo ní,
kiī nɛ kacɛ̀ngɛlɛ kpínʔini.
Dɛ́nigɛ ki wè nɛ́ yejaʔa níʔ.
Nàgbuʔɔrɔ wè dɛ́nigɛ nī gèʔ,
ki wè kìi nyíɛnɛʔ.
5 Dɛ́nigɛ ki wè kaala kúuʔ nàa ni 'nyaa kakolido woli lèʔ,
ki wè kìi yákuɔ nyuɔmɔ caaʔ.
Dɛ́nigɛ ki fungo ki wè yɛ̀gíʔ,
ki wè nɛ kaala cògí nɛ tɛ́ngiʔ.
6 Kapiʔi kiì dɛ́nigɛ dɛ́ni gèʔ,
kányiʔɛ kire ki 'ki dɛ́ni.
7 Dɛ́nigɛ ki nàa ki mìɛni yɛri.
Ki nɛ̂ tɛ́ngɛ ti mìɛni nɛ̄.
Sɔ̀ngirɔ taʔadiʔɛ yē dɛ́nigɛ mɛ́ gè lɛ̀gɛlɛ ke mìɛni nī.
Dɛ́nigɛ ki nìɛ ki mìɛni kpàrí nɛ cògí.
8 Dɛ́nigɛ ki wè kúu nɛ nyaʔaʔ.
Kulocɛliɛ siɛnjuulo pe siɛnrɛ ti bága kúɔ;
Kulocɛliɛ Pìle siɛnrɛ ti juʔu ki bága kúɔ;
kacɛ́nnɛ ni bága kúɔ.
9 Ki 'nyaa weli kacɛ́nnɛ niì foriʔ,
nɛ̀ pínɛ Kulocɛliɛ kele ke juʔu kiì foriʔ.
10 Nɛ̀ sí ki taa gìi ki 'nyuɔ nɛ̀ fori gè,
a kire kɛ́nì nɔ̀ gè,
dàa we 'paʔa nɛ̀ cɛ́n dè,
tire bé tɔ́n.
11 Bɛ̀ mi 'puu pùɔ wè,
mi 'puu nɛ pìire siɛnrɛ nyu,
mi 'puu nɛ́ pìile sɔ̀ngirɔ ní,
mi 'puu nɛ kele tɔ́nminɔ gèle pìile tɔ́nminɔgɛnnɛ nɛ̄.
Bɛ̀ sí mi kɛ́nì liɛ wè,
dàa ti 'puu pìire wori dè,
a mi 'ti yaʔa.
12 Bɛ̀ ki yē ŋɔ̀ wè,
dibale nī weli nɛ wéli,
níɛ ki nyaʔa vúɔnɔvuɔnɔ.
Cɛngɛ káà sí nɛ báan baa,
we bága de wi nyaʔa yiʔɛ nī wī.
Bɛ̀ ki yē ŋɔ̀ wè,
mi 'tàa paʔa nɛ̀ cɛ́n wī;
cɛngɛ káà sí nɛ báan baa,
m'bága kele sɔ́migɔ gèle bè ke cɛ́n majo mɛni Kulocɛliɛ wi 'mi cɛ́n wè.
13 Píra ŋáà nī wè,
yatiɛyɛ taanri nyáà yire yi 'kò,
yi n'yɛ:
tɛ́ngɛlɛ,
sɔ̀ngirɔ taʔadiʔɛ,
nɛ́ dɛ́nigɛ.
Gìi sí ki 'kpúʔɔ ti mìɛni nɛ̄ dè,
dɛ́nigɛ kire gī.