Kulocɛliɛ Pìle yakɛnrɛ wori dè
14
1 Kire nɛ̄ ye sí de dɛ́nigɛ kire caa,
yé sí yiʔɛ le yeri Kulocɛliɛ Pìle yakɛnrɛ caa dè.
Kpuʔɔrɔ dáà ti sî ki yaʔa siɛn nàa Kulocɛliɛ kele nyaʔa gèle nɛ nyu wè,
ye cɛri tire caa kpuʔɔ.
2 Siɛn ŋáà wi nyɛ́ni nyu siɛnrɛ táà felide nī dè,
siɛnnɛ mɛ́ bɛ̀ʔ wi ti nyuʔ,
Kulocɛliɛ mɛ́ wi sî nɛ ti nyu.
Ki 'nyaa,
siɛn nɛ̌ ti kɔri cɛ́n wèʔ,
nɛ̀ taʔa gíi nɛ̄,
Kulocɛliɛ Pìle lire fànʔa nɛ̄ wi sî nɛ kalarigɛlɛ siɛnrɛ nyu dè.
3 Siɛn ŋáà wi nyɛ́ni Kulocɛliɛ kele nyaʔa gèle nɛ nyu wè,
siɛnnɛ mɛ́ wi sî nɛ ke nyu.
Wi nàa ti nyu gìi ki bé tí pe- liɛ pe nìre wáa,
nɛ lèbaanna nyɔ́gi pe nī,
nɛ pe funyɔ nyígi yè.
4 Ŋàa wi sî nɛ nyu siɛnrɛ táà felide nī dè,
wi nàa ŋɔri nyɔ́gi wìi tíimɛ nī.
Ŋìi sí wi sî nɛ Kulocɛliɛ kele nyaʔa nɛ nyu gèle,
wire nàa ŋɔri nyɔ́gi tɛ́ngɛfɔlilɔ gboli wuulo nī bèle.
5 Mi nɛ ki caa yeli ye mìɛni ye cɛri nyu siɛnrɛ táà felide nī;
gìi sí ki ń'nɛ̀ pɔ́ri gè,
yeri Kulocɛliɛ kele nyaʔa de nyu.
Ŋàa wi nyɛ́ni Kulocɛliɛ kele nyaʔa nɛ nyu gèle,
wi 'tóri ŋàa nɛ̄ wi nyu siɛnrɛ táà felide nī dè.
Macɛn a ki yē ŋàa wi nyu siɛnrɛ táà felide nī dè,
wiī nɛ ti kɔri nyu wè dí tɛ́ngɛfɔlilɔ gboli ni sí ŋɔri taa wè.
6 Ye sí ki sɔ̀ngi,
nɛ siinyɛninɛ,
a ki 'nyaa mi 'kɛ́ yeli tiʔɛ nī gè,
nɛ́ sɛ́ni nyu siɛnrɛ táà felide nī dè.
A mi wè nyu nɛ́ yeli ní nɛ kele nyu gèle nɛ yigi yeli mɛ́ gèleʔ,
á kire 'laa a mi wè kacɛ́nnɛ siɛnrɛ nyu yeli mɛ́ wèʔ,
nɛ̀ pínɛ a mi wè Kulocɛliɛ kele nyaʔa nɛ nyu yeli mɛ́ wèʔ,
á kire bɛ̀ʔ a mi wè yeli tɛnmɛ wèʔ,
kire bé gáa nyuɔ yeli nɛ̄ ?
7 Kanugo kire gī nɛ́ yakpuɔnrɔ ní dè,
tire dáà ti wè nyu dèʔ,
gìi ki 'maana kúɔ lè,
á kire 'laa gɔri wè:
a ti kpúɔnvɔlilɔ pe wè ti kpúɔn nɛ yigi cìilige wèʔ,
mɛni siɛn bé gbɛ̀ ki cɛ́n bè síɛ gàa maana ni nyu wè,
á kire 'laa gɔri wè ?
8 Nɛ̀ pínɛ,
a kàkpanʔa ki wè nɛ wíi nɛ siɛnrɛ yigi dè cìilige wèʔ,
mɛni siɛn bága ki cɛ́n bé sí wìi gbòbori kapiɛnnɛ nɛ̄ lè ?
9 Bɛ̀ ki yē nɛ̀ pínɛ nɛ́ siɛnjuuro ní dè.
A yeli wè siɛnrɛ nyu dè cìilide wèʔ,
mɛni pe bága ki cɛ́n gàa yeli nɛ nyu gè ?
Je yeli béri nyu de cáanri waʔanɛ wī.
10 Siɛnrɛ felide tiī nìʔɛrɛ duniya nī wè,
tàa sí wè baa kɔri fùnʔ.
11 A ki yē mi sì siɛnrɛ táà kɔri cɛ́n wèʔ,
ŋàa wi nyɛ́ni ki siɛnrɛ nyu dè,
wire bé mi nyaa kùlo láà wuu tíɛlɛ.
Mi míɛni wè,
ŋàa wi nyɛ́ni ki siɛnrɛ nyu dè,
m'bé wi nyaa kùlo láà wuu tíɛlɛ.
12 Kire nɛ̄,
bɛ̀ yeli nɛ ŋàʔaná bè Kulocɛliɛ Pìle ni yakɛnrɛ taa dè,
yeri ki caa kpuʔɔ dìi ti bé tɛ́ngɛfɔlilɔ gboli kɛn lè ni- de waa yiʔɛmɛ wè.
13 Kire nɛ̄,
siɛn ŋíì wi nyɛ́ni nyu siɛnrɛ táà felide nī dè,
wiri náari gìi ki bé tí wi gbɛ̀ri ti kɔri nyu wè.
14 Nɛ́ ki cɛ́n a mi nɛ Kulocɛliɛ náari wè siɛnrɛ táà felide nī wè,
mi pìle lire tɔ̀ni nɛ náari yo,
nɛ̀ sí ki taa mi sìnjilige ki wè ki tɔ̀ni tari wèʔ.
15 Gíi sí mi 'yɛli bè kpíʔile ?
M'béri náari nɛ́ mi pìle ní lè,
bé sí de náari de pínɛ nɛ́ mi sìnjilige ní gè.
M'béri ŋú nɛ́ mi pìle ní lè,
bèri ŋú de pínɛ nɛ́ mi sìnjilige ní gè.
16 Á kire 'laa wè,
a muɔ nɛ Kulocɛliɛ gbùʔɔrɔ́ wè nɛ́ muɔ pìle ní lè,
á ki nyaa ŋàa wī bile nɛ lúru wè,
wiì yakaa cɛ́n wèʔ,
gíi wire bága cɛ́n bé sí «ki- taa buu bɛ̀» suɔ wè,
a muɔ kɛ́nì barigɛ kɛn nɛ̀ kúɔ Kulocɛliɛ mɛ́ wè ?
Nɛ́ ki cɛ́n gìi muɔ 'juu gè,
wiì tàa cɛ́n ti nīʔ.
17 Muɔ yē nɛ barigɛ kanʔa Kulocɛliɛ mɛ́ wè,
kiī cɛ̀ngɛ;
ŋàa sí wī bile muɔ táanni wè,
wire wè ki tɔ̀ni tari wèʔ.
18 Mi nɛ barigɛ kanʔa Kulocɛliɛ mɛ́ wè,
nɛ́ ki cɛ́n mi nɛ nyu siɛnrɛ táà felide nī dè nɛ̀ tóri ye mìɛni nɛ̄.
19 Nɛ̀ sí ki taa tɛ́ngɛfɔlilɔ gboli nī lè,
ki 'pɔ́ri mi- juu cɛ̀ri nɛ́ mi sícilige ní gè,
sɛ́ni mi- juu nìʔɛgɛ siɛnrɛ táà felide nī dè.
20 Nɛ siinyɛninɛ,
ye fǎri kele gálì ke wori tɔ́nminɔ dè bɛ̀ pìile tíɛlɛʔ.
Ye- puu pìile tíɛlɛ,
piyè kapiʔi cɛ́nʔ.
Gìi sí ki 'funzɔngirɔ kúɔ dè,
ye- puu liɛlɛ.
21 Fànʔa Siɛnrɛ nī dè,
ki 'sɛbɛ baa nɛ́ jo:
Siɛnrɛ táà tiiyɛ nī
m'bága de nyu
nɛ́ kùlo náà ni siɛnnɛ ní bèle.
Nɛ̀ pínɛ siɛnnɛ pálì piyeyɛ
pe bága de nyu nɛ́ pe ní;
kire nɛ́ ki mìɛni ní
piyě mi siɛnrɛ lúʔu dèʔa.
Kàfɔli wi 'jo bɛ̀.
22 A kire sí kpíʔile gè,
siɛnrɛ felide táà ti bé puu fìɛ sìndɛngɛlɛ mɛ́ bèle,
tiǐ sí puu fìɛ tɛ́ngɛfɔlilɔ mɛ́ bèleʔ.
Nɛ̀ pínɛ,
Kulocɛliɛ kanyaajuʔulo kiyě juu sìndɛngɛlɛ mɛ́ wīʔ;
tɛ́ngɛfɔlilɔ mɛ́ ke bé juu.
23 A ki 'nyaa tɛ́ngɛfɔlilɔ gboli ni mìɛni ni 'nìi pínɛ lè,
á pe mìɛni nɛ nyu siɛnrɛ táà felide nī dè,
a siɛnwarilɛ pálì sɛ́nì yiri baa bèle,
á kire 'laa a sìndɛngɛlɛ pálì sɛ́nì yiri baa bèle,
piyě ki nyaaʔ lé bè jo kàalafɔlilɔ bīɛlɛ lé ?
24 A ki sí yē ye mìɛni nɛ Kulocɛliɛ kele nyaʔa gèle nɛ nyu wè,
a sìndɛngɛwɛ wáà pɛ́nì jíin wè,
á kire 'laa a siɛnwariwɛ wáà pɛ́nì yiri wè,
je yeli ye mìɛni siɛnjuuro ti bé wi taa fungo nī gè,
ye mìɛni bé wi kolimɔ tìɛ bè wi nɛ̄.
25 Dàa dī baa wi fungo nī gè làridɛ dè,
ti bé yiri kpànʔanɛ.
Bɛ̀ wi bé tuu bè yiʔɛ cúbulo gè,
bé sí ki juu wi nyuɔ nī gè dí Kulocɛliɛ wi tɔ̀ni yē yeli sunʔɔmɔ nī bè.
Kele keri gbòborí de kpínʔini tɛ́ngɛfɔlilɔ gbuʔulo nī gèle
26 Nɛ̀ siinyɛninɛ,
gíi sí we bé juu ?
Ki 'nyaa lɛ̀lɛ ó lɛ̀lɛ a yeli gbɛ́nɛ̀ yìye pínɛ bèle,
ŋúnugo nɛ̂ puu wàa mɛ́,
tɛnmɛnɛ nɛ̂ puu wàa mɛ́,
Kulocɛliɛ nìɛ kele kálì tìí wàa nɛ̄,
siɛnrɛ felide táà nɛ̂ puu wàa mɛ́,
siɛnrɛ kɔri juuro nɛ̂ puu wàa mɛ́.
Tire dáà ti mìɛni ti 'yɛli ti- puu bèri ŋɔri nyɔ́gi yeli nī wī.
27 A ki yē wàa nɛ nyu siɛnrɛ táà felide nī wè,
ki 'yɛli pàli siin á kire 'laa siɛnnɛ taanri,
ki fǎga tóri kire nɛ̄ʔ,
peri ti kɔri nyu wè;
peri nyu péri pìye kanʔa.
28 A ki sí yē siɛnrɛ ti kɔri juufɔli wè baa wèʔ,
siɛn wi- pìiri gboli nī lè,
wiri nyu baa wi fungo nī gè nɛ́ Kulocɛliɛ ní wè.
29 Kulocɛliɛ siɛnjuulo siin,
á kire 'laa taanri peli peri nyu,
dí sɛnminɛ pe sí de siɛnrɛ siʔɛ dè.
30 A ki sí nyaa wàa wìiyɛ yē baa tɛ́niwɛ gboli nī lè,
á Kulocɛliɛ wi 'kaala láà tìɛ wi nɛ̄ wè,
siɛn ŋáà wi 'kíni nɛ̀ puu nɛ nyu wè,
siɛn wi- pìiri.
31 Ki 'nyaa ye mìɛni nigbe nigbe bèle,
yeli bé gbɛ̀ri Kulocɛliɛ kele nyaʔa gèle de nyu,
gìi ki bé tí pe mìɛni pe- tɛnmɛnɛ taa dí ye mìɛni nàzɔnnɔ pe sí lìri.
32 Ye sí ki cɛ́n,
bìli pe Kulocɛliɛ kele nyaʔa gèle nɛ nyu wè,
pe 'yɛli pe- jáa pìye nɛ̄ a pe nyu wè.
33 Nɛ́ ki cɛ́n Kulocɛliɛ wi wè nɛ kanyaʔamirɛ kpínʔiniʔ,
macɛn yanyige.
Nɛ̀ yɛli nɛ́ kɛnmɛ bíì ní kele kiyē nɛ kpínʔini tɛ́ngɛfɔlilɔ gbuʔulo ke mìɛni nī gèle,
34 cɛlilɛ pe- puu pìirile a pe gbɛ́nɛ yē gboli nī lèb.
Nɛ̀ taʔa gíi nɛ̄,
ki larigɛ kiì kɛn pe mɛ́ peri nyuʔ.
Gìi ki 'pɔ́ri gè,
pe pìye cɛ́rigɛ majo mɛni Misa Fànʔa Siɛnrɛ ti 'ki juu nɛ̀ pínɛ wèc.
35 A ki sí nyaa pe caa bè tɛnmɛnɛ taa kaala láà nī wè,
peri pe pɔlilɔ yúgo bèle kpáaya mɛ́.
Á kire 'laa wè,
kiī fìɛrɛwuʔu cɛliwɛ de nyu tɛ́ngɛfɔlilɔ gboli sunʔɔmɔ nī bè.
36 Yeli tiʔɛ nī lé Kulocɛliɛ siɛnrɛ ti 'kɔ́n ?
Á kire bɛ̀ʔ,
yeli yákuɔlɔ bīɛlɛ lé ye 'ti taa ?
37 A siɛn nɛ wìi sɔ̀ngí wire yē Kulocɛliɛ siɛnjuuwo wè,
á kire 'laa nɛ wìi sɔ̀ngí wire 'wìi yaʔa Kulocɛliɛ Pìle ni wire kàrigí wè,
ki siɛn wi- ki cɛ́n dàa mi nɛ sɛbɛ dè,
Kàfɔli wire kajuudiɛlɛ nī.
38 A ŋìi sì tire cɛ́n dèʔ,
pe fǎga de wi tɔ́riʔ.