Korɛntiyé 1 15

Pɔli Kataanna Siɛnrɛ dáà wi 'taa dè

1 Nɛ siinyɛninɛ, mi nɛ caa bè yeli sɔ̀ngi bè taa dáà mi 'juu yeli mɛ́ dè, á yeli 'ti cò kpuʔɔ wè. 2 Siɛnrɛ dáà mi sɛ́nì jáari yeli mɛ́ dè, a yeli ti cò kpuʔɔ wè, tire fànʔa nɛ̄ yeli bé suɔ. Á kire 'laa wèʔ, yeli 'tɛ́ngɛlɛ niī nyùgo fùn wī.

3 Ki 'nyaa tɛnmɛnɛ náà mi 'taa lè, lire mi 'kɛn yeli mɛ́ kapelile lè. Kire 'jo, nɛ̀ yɛli nɛ́ ní dè, wi 'kùu weli kapiʔile kɛnmɛ nɛ̄. 4 Cígini, nɛ̀ yɛli nɛ́ Kulocɛliɛ siɛnsɛbɛrɛ ní dè, pe 'wi tɔ́n nyɛgɛ nī gè, cɛndaanriwuʔu nɛ̄ gè a wi 'nyɛ́ nɛ̀ yiri. 5 A wi sɛ́nì wìi tìɛ nɛ̄. Kire kàduʔumɛ gè, a wi sɛ́nì wìi tìɛ pìtɛnmɛnɛ kiɛ nɛ́ siin nɛ̄. 6 Bà tire 'tóri dè, a wi sɛ́nì wìi tìɛ siinyɛninɛ pálì nɛ̄; pe cé tóri siɛnnɛ sirasiin dabataan nɛ̄ (500), a peli 'pínɛ nɛ̀ wi nyaa tiɛnugo nī. Pe kpuɔmɔ nɛ tíin sìi nɛ̄, pàli sí nyɛ́nì kùu. 7 Bɛ̀ kire 'kúɔ wè, a wi sɛ́nì wìi tìɛ Zaki nɛ̄, nɛ́ kúɔ nɛ́ wìi tìɛ wi tundunminɔ pe mìɛni nɛ̄ bèle, a pe 'wi nyaa. 8 Kire ki mìɛni kàduʔumɛ gè, a wi 'wìi tìɛ mi míɛni nɛ̄ nɛ̀ pínɛ, mi ŋáà wī majo pùɔ ŋíì wi nɛ̌ fìɛ liɛʔ, á pe nɛ̂ wi sii wè.

9 Ki 'nyaa mi mi 'cɛ́ri pe mìɛni nī bèle, mi ŋáà miì cɛ́nì yɛli peri mi yeri tundunwɔ wèʔ; nɛ̀ taʔa gíi nɛ̄, mi 'puu nɛ wuulo wuʔɔ bèle. 10 Nɛ̀ sí yɛli nɛ́ Kulocɛliɛ wi ní dè mi kɔli mɛ́ gè, a mi 'larigɛ gáà taa gè, gàa nī mi yē gè. Nɛ̀ pínɛ Kulocɛliɛ kpuʔɔrɔ tiì yiri waʔanɛ mi kɔli mɛ́ gèʔ; ki 'nyaa mi 'baara kúɔ kpuʔɔ nɛ̀ tóri pe mìɛni nɛ̄ bèle. Mi sí cɛ wī lé ? ʔéʔe, Kulocɛliɛ kpuʔɔrɔ tire dī mi nɛ̄. 11 A ki nɛ́ cɛ́nì nyaa mi yo, a ki nɛ́ nyaa peli yo, gìi ki 'cɛ́n gè, kire siɛnrɛ tire weli nɛ jáari, á yeli sí tɛ́ngɛlɛ taa ti nī.

Tɛ́ngɛfɔlilɔ pe nyɛ́yirile wori dè

12 Bɛ̀ weli nɛ ki jáari nɛ́ jo wi 'nyɛ́ nɛ̀ yiri kúbilo sunʔɔmɔ nī bè, ki mɛni á pàli ní baa yeli sunʔɔmɔ nī bè nɛ ki nyu nɛ́ jo dí kúbilo nyɛ́yirile wè baa wèʔ ? 13 A ki sí yē kúbilo nyɛ́yirile wè baa wèʔ, Kirisi wiì sí nyɛ́ nɛ̀ yiri wī kìɛʔ. 14 A Kirisi wiì sí nyɛ́ nɛ̀ yiri wèʔ, weli siɛnjaarirɛ tire yē waʔanɛ wī, nɛ̀ pínɛ yeli tɛ́ngɛlɛ niī waʔanɛ wī. 15 A yeli nɛ ki nyu nɛ́ jo kúbilo pe wè kunu nɛ nyɛ́gi nɛ yigi wèʔ, kire 'jo Kulocɛliɛ wiì Kirisi nyɛ́ wè nɛ̀ yige kúbilo nī bèleʔ. Kire tiʔɛ gáà nī gè weli sí yē káfinɛrɛfɔlilɔ wī, bɛ̀ weli nɛ ki nyu nɛ́ jo Kulocɛliɛ wi 'Kirisi nyɛ́ wè wè.

16 A ki yē kúbilo pe wè nɛ kunu nɛ nyɛ́gi wèʔ, Kirisi míɛni wiì koli nɛ̀ nyɛ́ʔ. 17 A Kirisi wiì sí nyɛ́ nɛ̀ yiri wèʔ, yeli tɛ́ngɛlɛ lè, nyùgo wè ni nɛ̄ʔ; yeli kapiʔile kiyē nɛ tíin yeli nɛ̄ wī. 18 Nɛ̀ pínɛ bìli pe 'kùu bèle, nɛ́ sí cé pìye taʔa Kirisi nɛ̄ wè, peli woli ni 'cúʔɔ wī. 19 A ki yē weli 'weli sɔ̀ngirɔ taʔa dè Kirisi nɛ̄ wè sìi ŋáà wire yákuɔ nɛ̄ wè duniya nī wè, weli bīɛlɛ fuunmɔwuulo bèle nɛ̀ tóri siɛnnɛ pe mìɛni nɛ̄ bèle.

20 Nɛ̀ sí ki taa Kirisi wi 'nyɛ́ nɛ̀ yiri kúbilo sunʔɔmɔ nī bè ! Wire wī siɛnpeliwe wè nɛ̀ yiri bàli nī pe bága nyɛ́ yiri bèle. 21 Bɛ̀ ki 'nyaa siɛn wi 'pɛn nɛ́ kùu ní wè duniya nī wè, kúbilo nyɛ́yirile míɛni lè, siɛn wi 'pɛn nɛ́ ni ní. 22 Bɛ̀ ki 'nyaa siɛnnɛ pe mìɛni 'yiri nī níɛ kúu wè, bɛ̀ míɛni pe mìɛni pe bága koli bè puu sìi nɛ̄ nɛ́ Kirisi ní wè. 23 Ki bé sí nyaa wàa ó wàa nɛ́ wi lɛ̀lɛ wī: Kirisi wire wī péliwe wè, kire kàduʔumɛ gè, wi gè, bìli bīɛlɛ Kirisi wuulo bèle, dí peli sí taʔa. 24 Píra ŋáà nī wè, dí duniya kúɔ lɛ̀lɛ ni sí nɔ̀. Kire lɛ̀lɛ nī lè Kirisi wi bé kàfɔligɔ feliye yi mìɛni cúʔɔ yè, nɛ́ fànʔafɔligɔ feliye yi mìɛni ní yè, nɛ́ ŋɔri felide ti mìɛni ní dè, bé sí koli bè kùlofɔligɔ kɛn gè Kulocɛliɛ mɛ́ wè, Tuufɔli wè.

25 Ki 'nyaa Kirisi wire wi 'yɛli bè puu fànʔa nɛ̄ gè fúɔ bè taa wi ga wi leguulo pe mìɛni kùru bè le wi tɔliyɔ láara yè. 26 Leguuwo sɛnwɛ ŋáà sí wi bága cúʔɔ bè yige baa wè, wire wī kùu wè. 27 Nɛ́ ki cɛ́n wi nyɛ́nì yɛrɛ ti mìɛni kùru nɛ̀ le wi tɔliyɔ láara yè. A ki sí juu mmɛ gè nɛ́ jo wi 'yɛrɛ ti mìɛni kùru nɛ̀ le wi tɔliyɔ láara yè, kiī cɛ́ngɛ, Kulocɛliɛ wire ŋáà wi 'tí a ti mìɛni ti 'kùru nɛ̀ le wi láara wè, wire wè baa ti nīʔ. 28 A Kulocɛliɛ wi kɛ́nì yɛrɛ ti mìɛni kɛn wi mɛ́ ti 'puu wi fànʔa láara gè, Jaafɔli wire tíimɛ wè, wi bé wìi cáan Kulocɛliɛ láara wè, wire ŋáà wi 'wi tɛ́ngɛ yɛrɛ 'ti mìɛni fànʔa nɛ̄ gè, dí Kulocɛliɛ wi sí puu yɛrɛ ti mìɛni nyùgo nɛ̄, bè puu siɛnnɛ pe mìɛni nyùgo nɛ̄.

29 Ye sí ki sɔ̀ngi, bìli pe nyɛ́ni pe wè kúbilo kɛnmɛ nɛ̄ bè, gáa pe je ga taa baa ? A ki yē kúbilo pe wè kunu nɛ nyɛ́gi púlo wèʔ, gáa kɛnmɛ sí nɛ̄ pe nyɛ́ni pe batɛmi kpínʔini wè kúbilo kɛnmɛ nɛ̄ bè ? 30 Á weli tíimɛ bèle, gáa kɛnmɛ nɛ̄ weli cî nɛ wìye wáari nɛ yɛri súuri kùu mɛ́ wè ? 31 Cɛngɛ ó cɛngɛ mi nɛ̂ puu kùu kiyɛ nī. Kányiʔɛ nɛ̄ gè siinyɛninɛ, yeli bīɛlɛ mi nàgbuʔɔrɔ ti kɔri wè pínɛnyɛnigɛ nī gè nɛ́ weli Zezi ní wè. 32 Bè ki juu nɛ́ siɛnnɛ sɔ̀ngirɔ ní dè, a ki yē kúbilo pe wè kunu nɛ nyɛ́gi wèʔ, cáanra dáà mi 'cáan nɛ́ nyàʔayɛrɛ ní dè baa Efɛzi kàʔa mɛ́ gè, gáa kire bé nyuɔ mi nɛ̄ ?

Ye- puu weri líi wéri gbun,

nɛ́ ki cɛ́n mbànʔa

we bé kùu wī.

33 Ye fǎri pùrɔrɔ nii ti nīʔ, «nàgoricuʔɔwɔ wiī nɛ tánʔagɛnjɛ̀nmɛ córi bè.» 34 Ye- sícilimɛ le yìye nī, kire ki 'yɛli gè; yé fǎri kapiile kpínʔiniʔ. M'bé tire juu yeli mɛ́, ki 'kò yeli nɛ̄ fìɛrɛ wī, nɛ́ ki cɛ́n yeli nī bèle, pàli sì Kulocɛliɛ cɛ́nʔ.

Nyɛ́yirile cefɔnrɔ dè

35 Wàa bé sí gbɛ̀ ki juu bé jo: «Mɛni kúbilo piyē nɛ nyɛ́gi nɛ síi ? Céri díi felide ti sî koli nɛ̀ yiri pe nɛ̄ ?» 36 Ledogo gī muɔ wè ! Bà muɔ sî yɛrɛ tánʔa dè, a tiì kíni nɛ̀ kùu dèʔ, ti nɛ̌ fìinʔ. 37 Nɛ̀ pínɛ yatanʔara dáà muɔ sî tánʔa dè, fíinge gáà ki cî kɛ́nì yiri gè, kire bɛ̀ʔ muɔ cî tánʔaʔ. Ki 'nyaa yatanʔabiige kire yákuɔ ki cî puu, a ki nɛ́ nyaa wī yo, á kire 'laa yatanʔara táà tìiyɛ yo. 38 Kulocɛliɛ wire sí wi nɛ̂ céri táà kɛn ti mɛ́ a dìi 'wi dɛ́ni dè, yatanʔara ó yatanʔara nɛ́ ti céri felide.

39 Céri táà sì wúɔ nɛ́ tàa níʔ. Ki 'nyaa tàa yē siɛnnɛ céri, tàa yē yajuuro céri, tàa yē sínjinʔɛnɛ céri, tàa yē fúɔlɔ céri. 40 Nyìʔɛnɛ wuulo céri yē baa, dàala wuulo céri yē baa. Nyìʔɛnɛ wuulo céri tire 'kò tìiyɛ nɛ́ sí ní kpuʔɔrɔ ní; dàala wuulo wori míɛni ti 'kò tìiyɛ. 41 Cɛngɛ cɛ̀nrɛ tiī tìiyɛ, yege cɛ̀nrɛ tiī tìiyɛ, ŋɔgɔlɔ cɛ̀nrɛ tiī tìiyɛ; ŋɔgɔlɔ tíimɛ nī gèle, làa cɛ̀nrɛ sì wúɔ nɛ́ làa wori níʔ.

42 Bɛ̀ ki yē nɛ̀ pínɛ nɛ́ kúbilo nyɛ́yirile ní lè. Siɛn wi nɛ̂ kùu pe nɛ̂ sɛ́nì wi tɔ́n yafunʔɔgɔ. Wi nɛ̂ kɛ́nì nyɛ́ nɛ̀ yiri nɛ̂ puu sìnvunʔɔ nī. 43 Pe nɛ̂ wi túgu nɛ̀ tɔ́n yakariwaʔa tíɛlɛ; wi nɛ̂ kɛ́nì nyɛ́ nɛ̀ yiri nɛ̂ puu kpuɔmɔ nī. Pe nɛ̂ wi túgu nɛ̀ tɔ́n ŋɔrifun yɛgɛ tíɛlɛ; wi nɛ̂ kɛ́nì nyɛ́ nɛ̀ yiri nɛ̂ puu nɛ́ ŋɔri ní. 44 Céri cɛnrɛ tire pe nɛ̂ tɔ́n, siɛn wi nɛ̂ kɛ́nì nyɛ́ nɛ̀ yiri nɛ̂ puu nɛ́ céri ní.

Bɛ̀ muɔ 'ki nyaa céri cɛnrɛ yē baa wè, ma ki cɛ́n pìle céri yē baa nɛ̀ pínɛ. 45 Kire nɛ̄ ti 'ki juu nɛ́ jo: Siɛn péliwe wè, Adama wè, wi 'puu sìi yɛgɛ nɛ́ ní céri cɛnrɛ ní; ŋáà wi kɛ́nì pɛn kàduʔumɛ gè, wire yē Pìle, nɛ siɛn kanʔa wi kòrí sìi nɛ̄. 46 Ki 'nyaa péliwe wiì 'puu pìle yɛgɛʔ, céri yɛgɛ ki 'puu; pìle wuu wire kɛ́nì pɛn kàduʔumɛ wī. 47 Siɛn péliwe wi 'yiri dàala nī, nɛ ní puuro; siɛn siinwuu wè, wire 'kɔ́n nī. 48 Bɛ̀ ŋìi wiī puuro dè, bɛ̀ bìli míɛni piyē puuro nɛ̀ pínɛ; ŋìi wi sí yē nyìʔɛnɛ wuu wè, bɛ̀ bìli piyē nyìʔɛnɛ wuulo nɛ̀ pínɛ. 49 Bɛ̀ sí weli yē puuro wuu wi líɛrɛ dè, bɛ̀ míɛni weli bága puu nyìʔɛnɛ wuu wi líɛrɛ bè pínɛ.

50 Nɛ siinyɛninɛ, dàa mi nɛ nyu dè, ti kɔri n'ŋɛ: céri nɛ́ sìsiɛn tiǐ gbɛ̀ kɔrigɔ lìi gèʔ. Fúnʔɔrɔ tiǐ gbɛ̀ sìnvunʔɔrɔ kɔrigɔ lìi gèʔ.

51 Ye- nyaa, m'bé kalarilɛ láà juu yeli mɛ́: we mìɛni wiyě ga kùuʔ, we mìɛni we bé sí ga yiʔɛ kɛnmɛ páà nɛ̄, 52 nyapikolilo nigbe nɛ̄, a kàkpanʔa wíizɛnnɛ ni kɛ́nì wíi lè. Nɛ́ ki cɛ́n kàkpanʔa káà bága wíi, dí kúbilo pe sí nyɛ́ bè yiri; fúnʔɔrɔ sì je puu pe nīʔ, dí weli sí yiʔɛ kɛnmɛ páà nɛ̄. 53 Ki 'nyaa yɛgɛ gáà ki 'fúnʔɔ gè, ki bága kò sìnvunʔɔ nī; yɛgɛ gáà gī yakuugo gè, dí ki sí puu sìnguu nī. 54 Yɛgɛ gáà ki 'fúnʔɔ gè, a ki kɛ́nì kò sìnvunʔɔ nī wè, nɛ̀ pínɛ a yakuugo ki kɛ́nì kò sìnguu nī wè, kire lɛ̀lɛ nī lè siɛnrɛ dáà dī baa sɛbɛrɛ dè, ti bé fori; ti 'jo:

Jáamɛ pi 'kùu líɛ wè nɛ̀ júɔ !

55 Kùu, muɔ jáamɛ piī sé ?

Kùu, muɔ ŋaʔa suɔnrɔ tiī sé ?

56 Ki 'nyaa kùu ŋaʔa suɔnrɔ dè, kapiile lire nī, kapiile ni cɔ̀rimɔ tiɛlɛ lire nī dè. 57 We- sí de tari dè Kulocɛliɛ nɛ̄, wire wi 'jáamɛ kɛn bè weli mɛ́ weli Kàfɔli Zezi wire nyúmɔ nī bè. 58 Kire nɛ̄, nɛ siinyɛninɛ, yeli woli ni 'kpúʔɔ mi mɛ́, ye- gbɛ̀nmɛ le yìye nī, ye fǎri sùnʔɔrɔ́ de láʔalaʔ. Yeri baara yeri waa yiʔɛmɛ súuri mɛ́ wè. Ye- ki cɛ́n yeli fùrɔgɔ ki wè waʔanɛʔ.