Wali cáanra dè Zerizalɛmi tɛ́ngɛfɔlilɔ mɛ́ bèle
16
1 Gìi ki 'wali cáanra kúɔ dè,
wali ŋáà wi 'yɛli bè tórigo tɛ́ngɛfɔlilɔ mɛ́ bèle Zerizalɛmi kàʔa mɛ́ gè,
gìi mi 'juu nɛ̀ gbɛ̀ngɛ Galasi kùlo tɛ́ngɛfɔlilɔ gbuʔulo mɛ́ gèle,
yeli míɛni bèle,
ye- kire kpíʔile.
2 Cégboli ni cɛnbelige ó cɛnbelige,
siɛn ó siɛn wi- wi wali gbòbori wè,
nyuɔ gíì wi bé gbɛ̀ kɛn wè;
ki fǎga nyaa mi ga sa yiri kúɔʔ,
dí ye nɛ́ de wali cáanri wèʔ.
3 A mi kɛ́nì kɛ́ baa yeli mɛ́ wè,
bìli yeli 'nyaa pe bé gbɛ̀ tunduro kúɔ dè,
bɛ̀ m'bé sɛbɛlɛ kpíʔile kɛn pe mɛ́,
pe- kɛ́ nɛ́ yeli kpuʔɔrɔ ní dè Zerizalɛmi kàʔa mɛ́ gè.
4 A ki sɛ́nì nyaa mi tíimɛ mi 'yɛli bè kɛ́ baa wè,
bɛ̀ pe bé pínɛ nɛ́ mi ní.
Pɔli nɛ sɔ̀ngí bè kɛ́ tánʔana nɛ̄
5 A mi kɛ́ni tòrí Maseduwani tiʔɛ nī gè,
m'bé kɛ́ baa yeli mɛ́.
M'bé sí ga tóri baa cúɔʔ.
6 Dùʔɔ m'bága sa lɛ̀lɛ láà kúɔ baa nɛ́ yeli ní bè pínɛ,
á kire 'laa dùʔɔ m'bága kɛ́ wiire lɛ̀lɛ nī,
yé sí ga mi sáʔa mi de waa mi koligo nī gè.
7 Mi wè caaʔ nàa nɛ̄ lè we wìye nyaa yériye nɛ̄ bé taʔa fali wīʔ.
A kiī Kàfɔli nyɛ́ni kaala lè,
mi cɛ́ni caa bè sa lɛ̀lɛ láà kúɔ baa nɛ́ yeli ní wī.
8 Bɛ̀ ki sí yē ŋɔ̀ wè,
m'bé kò náʔa Efɛzi kàʔa mɛ́ gè fúɔ bè Pantɛkɔti lɛ̀lɛ nɔ̀ lè náʔa.
9 Ki 'nyaa Kulocɛliɛ wi 'kɔ̀ri káà múgu mi mɛ́ kpuʔɔ mi de mi baara kúu dè ti- puu nɛ́ pìle ní,
nɛ̀ pínɛ bìli pe túngu nɛ́ mi ní bèle,
piyē nìʔɛnɛ.
10 A Timote wi 'kɛ́ baa yeli mɛ́ wè,
ye- wi cò cɛ̀ngɛ,
ye fǎga tí wiri fìʔɛ́ʔ,
nɛ́ ki cɛ́n Kàfɔli baara tire wiī nɛ kúu bɛ̀ mi tíɛlɛ.
11 Siɛn fǎga jùɔn wi nīʔ.
Ye- wi sáʔa wi- koli wi pɛn náʔa mi mɛ́ yanyige nɛ̄.
Mi nɛ́ we siinyɛninɛ ní bèle,
weli nɛ wi siri náʔa.
12 We siinyɛni Apolɔsi wire wè,
mi 'wi fiɛn nɛ̀ pɛ́nì fùrɔ wi- kɛ́ baa yeli mɛ́ wire nɛ́ siinyɛninɛ ní bèle;
kári láa sí wè wi nɛ̄ púloʔ bɛ̀ ki yē ŋɔ̀ wèʔ.
Wi bága kɛ́,
a wi kɛ́nì ki larigɛ taa gè.
Siɛnsɛnrɛ dè
13 Ye- puu nyɛminɛ,
ye- yɛ̀ ye yéri tɛ́ngɛlɛ nī lè,
ye- yìye kpíʔile nàguɔlɔ díɛ!
Ye- gbɛ̀nmɛ le.
14 Ye- tí yeli kakpiʔiligele ke mìɛni ke- puu nɛ́ dɛ́nigɛ ní.
15 Yeli 'ki cɛ́n Sitefanasi wè nɛ́ wi saʔa wuulo ní bèle,
peli bīɛlɛ Akayi tɛ́nimɛ tɛ́ngɛfɔpelile bèle.
Nɛ̀ pínɛ pe 'pìye kɛn nɛ Kulocɛliɛ wuulo pe kele nyuʔɔ gèle.
Kire nɛ̄,
mi ye fiɛn wī nɛ siinyɛninɛ,
16 yeri yìye cɛ́rigi kire siɛnnɛ pe felile mɛ́ bèle,
nɛ́ bìli pe nyɛ́ni pínɛ nɛ baara gbɛ̀ngɛ nɛ́ pe ní bèle.
17 Kiī mi mɛ́ fundaanra bɛ̀ Sitefanasi,
nɛ́ Fɔritunatusi,
nɛ́ Akayikusi piyē náʔa nɛ́ mi ní bèle;
pe 'yeli larigɛ tɔ́n gè bɛ̀ yeli wè bile wèʔ.
18 Pe 'tɔ̀ni nɛ̀ mi fungo nyígi gè,
nɛ́ yeli woyo ní yè nɛ̀ pínɛ.
Kire nɛ̄,
yeri ki kpuʔɔrɔ tari dè ki siɛnnɛ pe felile nɛ̄ bèle.
19 Azii tɛ́nimɛ tɛ́ngɛfɔlilɔ gbuʔulo kiyē nɛ yeli síɛri.
Akiilasi nɛ́ Pirisika ní wè,
nɛ̀ fàri tɛ́ngɛfɔlilɔ gboli náà nī baa pe saʔa mɛ́ gè,
piyē nɛ yeli síɛri kpuʔɔ Kàfɔli wi pínɛnyɛnigɛ nī gè.
20 Siinyɛninɛ pe mìɛni piyē nɛ yeli síɛri.
Ye- síɛrilɛ kɛn lè baa yìye mɛ́,
ye yìye síɛri nɛ́ dɛ́nigɛ ní gè,
tɛ́ngɛlɛ dɛ́nigɛ gè.
21 Mi Pɔli,
mi mi 'síɛrilɛ náà ni siɛnrɛ sɛbɛ dè nɛ́ mi kɔli ní.
22 A Kàfɔli wiì siɛn ŋíì dɛ́ni wèʔ,
dɛ́ngɛ de cáan nɛ́ kire siɛn ní wè.
Maranata !
Kàfɔli te báan !