Pìile bèle nɛ́ pe siivɔlilɔ wori dè
6
1 Pìile,
yeri lúru yeli siivɔlilɔ nɛ̄ bèle bɛ̀ Kàfɔli wi ki caa gè,
nɛ̀ taʔa gíi nɛ̄,
kire ki 'yɛli gè.
2 Te muɔ tuu nɛ́ muɔ yàa kpóri wè.
Kire gī kajuudiɛlɛ pélile náà nɛ̄ nyafɛnigɛ siɛnrɛ sí juu nɛ̀ taʔa baa wè,
nyafɛnigɛ ki siɛnrɛ tire dī dàa dè:
3 Muɔ bé yanyige taa,
nɛ̀ pínɛ muɔ bé sìi taa bile duniya nī wèa.
4 Yeli bèle tuufɔlilɔ míɛni bèle,
ye fǎri yeli pìile pe funyɔ córi yèʔ.
Gìi ki 'pɔ́ri gè,
yeri pe gbún yeri nyu de tìí pe nɛ̄ nɛ̀ yɛli nɛ́ Kàfɔli wi koligo ní gè.
Sùkulolo kɛnmɛ bè nɛ́ pe kàfɔlilɔ ní bèle
5 Yeli bèle sùkulolo bèleb,
yeri lúru yeli kàfɔlilɔ nɛ̄ bèle náʔa dàala nɛ̄ lè,
yeri pe fìʔɛ́ yeri pe kpóri,
ye puu nɛ́ funviige ní majo Kirisi mɛ́ yeli nɛ ki kpínʔini.
6 Ye fǎga de ki kpínʔini pe nyapigele nyaamɛ nɛ̄ʔ,
ki- pe dɛ́niʔ.
Gìi ki 'pɔ́ri gè,
ye- puu bɛ̀ Kirisi sùkulolo tíɛlɛ,
yeri Kulocɛliɛ nyɛ́ni kaala kúu lè nɛ́ yeli fungo ki mìɛni ní gè.
7 Yeri baara nɛ́ yeli fungo ki mìɛni ní,
ki- puu majo Kàfɔli wire mɛ́ yeli nɛ ti kúu,
ki fǎga nyaa siɛnnɛ mɛ́ʔ.
8 Nɛ̀ taʔa gíi nɛ̄,
ye- ki cɛ́n a siɛn ó siɛn nɛ kacɛ̀ngɛ kpínʔini,
kire sàri wire siɛn wi bága taa Kàfɔli mɛ́ wè;
a siɛn wi nɛ́ yē sùkulowo yo,
à kire bɛ à wi yē wìimɛ wè.
9 Yeli míɛni bèle,
sùkulolo pe kàfɔlilɔ bèle,
yeri ki felige kpínʔini gè pe mɛ́.
Ye fǎga ki gbɛ̀n bè tóri nɛ́ pe níʔ de pe fígiriʔ.
Ye- ki cɛ́n,
peli nɛ́ yeli ní bèle,
ye Kàfɔli wiī baa nyìʔɛnɛ nī.
Wi sí wè nɛ ki cuɔnriʔ díɛʔ !
Tɛ́ngɛfɔlilɔ pe kapiɛngbuɔn yɛrɛ dè
10 Dìi ti 'kò sɛnrɛ dè,
ye- ŋɔri le yìye nī bɛ̀ ki 'nyaa yeli yē pínɛnyɛnigɛ nɛ̄ nɛ́ Kàfɔli ní wè;
wi fànʔa kiī kpuʔɔ.
11 Ye- Kulocɛliɛ kapiɛngbuɔn yɛrɛ ti mìɛni le yìye nɛ̄,
gìi ki bé tí yeli gbɛ̀ yéri bè cefinnɛ wáa bè gbòdolilo kàfɔli sìnjiligele kakpiʔiligele sige gèle.
12 Ki 'nyaa,
cáanra dáà nɛ̄ we yē dè,
céri kàsii bɛ̀ʔ.
Ki 'nyaa kàfɔligɔ feliye yè nɛ́ fànʔafɔligɔ feliye yè,
dàa dī duniya yebilige wuulo wori dè,
Setɛni yapiire dè baa nyìʔɛnɛ tiɛyɛ nī yè,
tire ní wiyē nɛ túngu.
13 Kire nɛ̄,
ye- Kulocɛliɛ kapiɛngbuɔn yɛrɛ líɛ dè ye le yìye nɛ̄,
gìi ki bé tí yeli gbɛ̀ jáa bè yéri bè cefinnɛ wáa bè cɛnbiʔi sige gè,
ki- puu majo yeli nyɛ́ni kɛnmɛ pi mìɛni kpíʔile nɛ̀ ŋɔri taa nɛ̀ yéri.
14 Ye- sí yɛ̀ ye yéri:
ye- kányiʔɛ puɔ gè yìye nɛ̄ bɛ̀ jàdigi màʔana tíɛlɛ sɛ̀nnɛ nī gèle,
yé sí sínmɛ le bè yìye nɛ̄ bɛ̀ timɔzigeyɛgɛ tíɛlɛ gàa pe sî le sìndinge nɛ̄ gè.
15 Ye- tɔriyɔ le ye puu gbòboriyaʔala Kataanna Siɛnrɛ ti jáarigɛ kɛnmɛ nɛ̄ bè yanyige wori dè.
16 Kire gáà ki mìɛni nī gè,
ye- tɛ́ngɛlɛ cò lè ni- puu timɔzigeyɛgɛ.
Lire ni bé tí yeli gbɛ̀ jáa bè Sìpiiwe wi kàsun ŋaaya yi mìɛni fígi yè.
17 Nɛ̀ pínɛ,
suɔlɔ náà yeli 'taa Kulocɛliɛ mɛ́ wè,
ye- ni tɔ́n timɔri ndɔ̀ngɔ,
yé sí Kulocɛliɛ Pìle ŋɔsii le wè yìye kúrugu,
kire kɔri wi 'jo Kulocɛliɛ siɛnrɛ dè.
18 Yeri náariyɛ feliye yi mìɛni kpínʔini yeri Kulocɛliɛ fiɛn wè kele ke mìɛni nī,
Kulocɛliɛ Pìle lire fànʔa nɛ̄ gè.
Ye- puu nyɛminɛ yeri ciʔige cɛ̀ngɛ,
yeri Kulocɛliɛ náari wè wi wuulo pe mìɛni mɛ́.
19 Yeri náari mi míɛni mɛ́,
gìi ki bé tí a mi 'mi nyuɔ múgu gè lɛ̀lɛ ó lɛ̀lɛ wè,
ki 'nyaa mi gbɛ̀ jáa de Kataanna Siɛnrɛ ti kalarigɛlɛ nyu gèle de láʔala nɛ́ nàzorido ní.
20 Kire kɛnmɛ nɛ̄ mi yē tundunwɔ nɛ́ ní puɔwɔ nɛ̀gɛjɔliyɔ nī yè.
Ye sí de náari m'mɛ́ gìi ki bé tí mi de Kataanna Siɛnrɛ jáari dè nɛ́ nàzorido ní majo mɛni mi 'yɛli bèri ki nyu gè.
Síɛrilɛ sɛnnɛ lè
21 We siinyɛni Tisiiki wè,
wire ŋáà wi 'weli dɛ́ni wè nɛ́ ní baakuɔwɔ ŋáà nɛ̄ siɛn bé gbɛ̀ tɛ́ngɛ Kàfɔli nī wè,
wire bé sa ti mìɛni yiʔɛ juu bè tìɛ yeli nɛ̄,
ye- ki cɛ́n gìi gī náʔa mi nɛ̄ gè.
22 Mi 'kɔ̀rirɔ nɛ̀ wi tun baa yeli mɛ́ wī,
gìi ki bé tí ye- kàa cɛ́n weli wori nī dè,
wí sí yeli nàzɔnnɔ tɛ́ngɛ bèle.