Kataanna Siɛnrɛ ti kɛnmɛ pi 'yiri kpànʔanɛ
3
1 Kire kɛnmɛ nɛ̄,
mi Pɔli wè,
mi yē náʔa kasuu nī wè Zezi Kirisi wire kɛnmɛ nɛ̄ bè,
bɛ̀ mi nɛ Kataanna Siɛnrɛ jáari dè kùlogolo kálì siɛnnɛ mɛ́ bèle.
2 Mi 'tɛ́ngɛ ki nɛ̄ yeli 'kàa lúʔu ki nī mɛni Kulocɛliɛ wi 'wi kacɛ̀ngɛ tìɛ gè mi nɛ̄ nɛ́ tugoro dáà kɛn dè mi mɛ́ tunduro yeli mɛ́.
3 Ki 'nyaa kaala láà Kulocɛliɛ wi 'tìɛ mi nɛ̄,
mi- wire kalarilɛ cɛ́n lè,
majo bɛ̀ dàa cɛ̀ri tíɛlɛ mi 'sɛbɛ dè.
4 A yeli nɛ ti wéli dè,
yeli bé ki 'nyaa gìi mi 'cɛ́n Kirisi wi kalarilɛ wori nī dè.
5 Lɛ̀gɛlɛ gílì ke 'tóri faʔa gè,
Kulocɛliɛ wiì cé ki kalarigɛlɛ tìɛ gèle siɛnnɛ nɛ̄ bèleʔ.
Bɛ̀ sí ki yē ŋɔ̀ wè,
wi 'ke tìɛ wi tundunminɔ nɛ̄ bèle nɛ́ wi siɛnjuulo ní bèle bàli wi 'wàli nɛ̀ tɛ́ngɛ nɛ̀ pe cáan wi baara nɛ̄ dè wi Pìle lire fànʔa nɛ̄ gè.
6 Ki kalarilɛ n'nɛ:
Kataanna Siɛnrɛ tire fànʔa nɛ̄ gè,
kùlogolo kálì siɛnnɛ piyē nɛ tɔ́ri nɛ nii baa nɛ́ Zuufulo ní bèle yacɛ̀nrɛ dáà Kulocɛliɛ wiī nɛ gbòborí nɛ yɛri wi wuulo mɛ́ bèle.
Peli bálì bèle cetinnɛ nunɔ wuulo bīɛlɛ;
Kataanna Siɛnrɛ ti fànʔa nɛ̄ gè peli liɛlɛ yē baa nɛ̀ pínɛ nyafɛnigɛ gáà Kulocɛliɛ wi 'kpíʔile bɛ̀ wiyē pínɛnɛ nɛ́ Zezi Kirisi ní wè.
7 Nɛ̀ yɛli nɛ́ Kulocɛliɛ wi kpuʔɔrɔ yakɛngɛ ní gè,
wi 'wi fànʔa tìɛ gè nɛ̀ ki kpíʔile mi mɛ́,
a mi 'kò Kataanna Siɛnrɛ ti baakuɔwɔ.
8 Mi ŋáà mi 'cɛ́ri Kulocɛliɛ wuulo pe mìɛni nī bèle,
a wi 'ki kpuʔɔrɔ dáà kpíʔile dè mi mɛ́,
mi sari ki jáari kùlogolo kálì siɛnnɛ mɛ́ bèle bɛ̀ Kirisi wiī nɛ́ lɔri ní siɛn sǐ gbɛ̀ ki cɛ́n bè kúɔ wèʔ.
9 Nɛ̀ pínɛ,
mi 'yɛli bè ti juu bè cìile pe mìɛni mɛ́,
mɛni Kulocɛliɛ wi sî wi kalarilɛ kakpiʔilile fori lè.
Wire ŋáà wi 'yɛrɛ ti mìɛni faan dè,
a wi 'ki kaala náà làrigɛ lè fúɔ nɛ̀ pɛ́nì taa a ki 'mɔgɔ,
10 gìi ki bé tí Kàfɔli wi wuulo gboli lire kɛnmɛ nɛ̄ bè,
kàfɔligɔ feliye yè nɛ́ fànʔafɔligɔ feliye nyáà yī baa nyìʔɛnɛ nī lè,
ti- ki cɛ́n Kulocɛliɛ sícilimɛ koliyo yiī nìʔɛyɛ kátii.
11 A kire 'kpíʔile nɛ̀ yɛli nɛ́ kaala náà Kulocɛliɛ wi cé tíi nɛ̀ yɛ̀gɛ baa faʔa faʔa gè,
nɛ́ kɛ́nì ni kpíʔile we Kàfɔli Zezi Kirisi wire fànʔa nɛ̄ gè.
12 Bɛ̀ weli yē pínɛnɛ nɛ́ Zezi Kirisi ní wè nɛ́ tɛ́ngɛ wi nɛ̄ wè,
fíɛrɛ wè weli nīʔ,
weli bé gbɛ̀ jáa bè nɔ̀ Kulocɛliɛ nɛ̄ wèa.
13 Kire kɛnmɛ nɛ̄,
ye fǎga ki yaʔa mi wuʔɔyɔ yi de céri kpúu dè yeli nɛ̄ʔ,
bɛ̀ mi nɛ wuʔɔ yeli kɛnmɛ nɛ̄ bè.
Kire ki mìɛni yē bè ki tìɛ kpuɔmɔ bíì nī yeli bága puu bè.
Pɔli náarigɛ nyùgo kire gī Zezi dɛ́nigɛ wori dè
14 Kire kɛnmɛ nɛ̄ mi nɛ káguro cáanri Tuufɔli wi yiʔɛ mɛ́ gè.
15 Wire wī nyìʔɛnɛ nariyɛ nɛ́ dàala nariyɛ yi mìɛni Tuu wèb.
16 Mi nɛ wi náari nɛ̀ yɛli nɛ́ wi kpuɔmɔ ní bè bɛ̀ pi 'niʔɛ bè,
gìi ki bé tí wi Pìle lire fànʔa nɛ̄ gè,
wi- ŋɔri kɛn yeli mɛ́ yeli funyɔ nī yè.
17 Tɛ́ngɛlɛ fànʔa nɛ̄ gè,
Kirisi wi- tɛ́nidiʔɛ kɔ̀n yeli funyɔ nī yè,
ye- sɔ́migɔ ye yéri ye nìre wáa dɛ́nigɛ nī gè,
18 gìi ki bé tí yeli gbɛ̀ jáa bè ki cɛ́n bè fàri Kulocɛliɛ wuulo pe mìɛni nɛ̄ bèle mɛni Kirisi dɛ́nigɛ ki 'kpúʔɔc gè,
nɛ́ tɔni gè,
nɛ́ kpàʔala gè,
nɛ́ ní sícuugo gè.
19 Kire dɛ́nigɛ gáà gè,
ki 'kpúʔɔ nɛ̀ fáala kiǐ gbɛ̀ cɛ́n bè kúɔʔ,
dí yeli sí nyì Kulocɛliɛ kɛnmɛ pi mìɛni nɛ̄ bè.
20 Kulocɛliɛ ŋáà wi bé gbɛ̀ kele ke mìɛni kpíʔile gèle,
bè cɛ tóri bè fáala gìi weli bé gbɛ̀ náari wi mɛ́ gè,
nɛ́ gìi weli bé gbɛ̀ sɔ̀ngi gè,
nɛ̀ yɛli nɛ́ fànʔa gáà ki nyɛ́ni baara weli nī bèle,
21 kpuʔɔrɔ ti 'yɛli Kulocɛliɛ nɛ̄ wè súuri lɛ̀gɛlɛ ke mìɛni nī tɛ́ngɛfɔlilɔ gboli nī lè lire náà nī pínɛnyɛnigɛ nɛ̄ nɛ́ Zezi Kirisi ní wè !
Ki- taa ki puu bɛ̀ !