Bè yiri kùu nī wè bè sa jíin sìi nī wè
2
1 Ki 'nyaa yeli 'puu kúbilo yeli kakolido nɛ́ yeli kapiʔile kiyɛ nī yè wī.
2 Bɛ̀ yeli 'puu nɛ yeli sìi tári wè kire kɛnmɛ nɛ̄ bè,
duniya ŋáà siɛnnɛ pe tánʔagɛnmɛ nɛ̄ bè.
Yeli 'puu nɛ lúru yebilige wuulo fàanya yi kàfɔli nɛ̄ wè,
kire pìle náà lire ni nyɛ́ni siɛnsinluʔulo pe sìi kàrigí wè ŋɔ̀ wè.
3 Weli we mìɛni bèle,
bɛ̀ weli 'puu nɛ̀ pínɛ pe tíɛlɛ.
Weli 'puu nɛ weli sìi tári wè nɛ weli ladaanma kele kúu gèle.
A gìi cé weli dɛ́ni weli cetinnɛ kɔli mɛ́ gè nɛ́ weli sɔ̀ngirɔ nī dè,
kire weli 'puu nɛ kpínʔini.
A kire sí ki kɛn,
nɛ̀ yɛli nɛ́ weli kɛnmɛ ní bè,
kàyuʔu gáà Kulocɛliɛ wi je ga juu bìli nɛ̄ bèle,
kire ki cé yɛli nɛ́ weli ní nɛ̀ pínɛ.
4 Nɛ̀ sí ki taa Kulocɛliɛ nyinimɛ piī kpuɔbɔ,
weli woli ni 'wi dɛ́ni kpuʔɔ.
5 Kire nɛ̄,
bɛ̀ ki 'nyaa weli cé puu kúbilo weli kakolido ti kɛnmɛ nɛ̄ bè,
a wi 'weli kpíʔile a weli 'wúɔ nɛ̀ kò sìi nɛ̄ nɛ́ Kirisi ní wè.
Kulocɛliɛ kpuʔɔrɔ tire ti 'tí a yeli 'suɔ.
6 Nɛ́ míɛni,
wi 'weli nyɛ́ nɛ̀ yige,
nɛ̀ weli pínɛ nɛ̀ tɛ́ngɛ nɛ́ Zezi Kirisi ní wè baa nyìʔɛnɛkaʔa nī gè.
7 Wi 'kire kpíʔile we- ki cɛ́n yiʔɛlɛ gílì ke báan nɛ tíin gèle,
wire kpuʔɔrɔ dáà wire 'kpíʔile weli mɛ́ Zezi Kirisi kɛnmɛ nɛ̄ bè,
lɔri cɛ̀nrɛ yē baa nìʔɛrɛ ki kpuʔɔrɔ dáà nī dè.
8 Ki 'nyaa Kulocɛliɛ kacɛ̀ngɛ kire nyúmɔ nī yeli nyɛ́nì suɔ,
tɛ́ngɛlɛ kɛnmɛ nɛ̄ bè.
Kiì sí kò majo yeli nī ki 'yɛ̀ʔ,
Kulocɛliɛ yakɛngɛ gī.
9 Kakpiʔiligele bɛ̀ʔ ke 'pɛn nɛ́ kire níʔ,
gìi ki bé tí siɛn fǎri wìi nyíɛnɛʔ.
10 Ki 'nyaa Kulocɛliɛ wi yafaanra dī weli bèle;
wi 'weli faan we- puu pínɛnɛ nɛ́ Zezi Kirisi ní wè wéri kacɛ̀ngɛlɛ kpínʔini.
Kulocɛliɛ wire wi 'ke kpíʔile nɛ̀ yaʔa gìi ki bé tí weri ke kpínʔini.
Tɛ́ngɛfɔlilɔ pe mìɛni 'kò nigbe
11 Ye- sɔ̀ngi ye taa,
faʔa kɛnmɛ nɛ̄ bè,
kùlogolo kálì wuulo bīɛlɛ yeli 'puu;
bìli pe pìye yeri kɛnɛkɛnɛfɔlilɔ bèle,
pe 'puu nɛ yeli tɔ́ri siɛnnɛ bálì tíɛlɛ piyè kɛnɛkɛnɛ wèʔ,
nɛ̀ sí ki taa peli kɛnɛkɛnɛ ŋáà wè,
wire yē siɛn kɔli kakpiʔilile yákuɔ wī.
12 Ki 'nyaa kire lɛ̀lɛ náà nī lè yeli 'puu Kirisi fùn nɛ ní nabɔnminɔ,
yeli sì 'puu nɛ tɔ́ri nɛ nii baa Isirayɛli wuulo nī bèleʔ.
Nɛ̀ pínɛ bɛ̀ Kulocɛliɛ wi cé nyuɔ kún nɛ̀ kɛn tɔliyɔ nìʔɛyɛ wè,
nɛ́ nyuɔ fɛ̀ni wè,
yeli liɛlɛ sì cé puu baa ti nīʔ.
Sɔ̀ngirɔ taʔadiʔɛ sì 'puu yeli mɛ́ʔ,
nɛ̀ pínɛ yeli sì cé Kulocɛliɛ cɛ́n duniya nī wèʔ.
13 Nɛ̀ sí ki taa píra ŋáà nī wè,
bɛ̀ yeli yē Zezi Kirisi wuulo bèle,
yeli bálì ye 'puu liilile bèle,
a yeli 'sìʔɛrɛ nɛ̀ kpɔni Kulocɛliɛ nɛ̄ wè,
Kirisi wire sìsiɛn fànʔa nɛ̄ gè.
14 Nɛ̀ taʔa gíi nɛ̄,
wire wi 'weli kɛn nɛ́ yanyige nía gè,
wire wi 'Zuufulo pínɛ bèle peli nɛ́ bìli pe wè Zuufulo bèleʔ,
a pe 'kò nigbe.
Gungo gíì ki cé pe wáligi bèle nɛ́ leguuro nyɔ́gɔ dè pe sunʔɔmɔ nī bè,
a wi 'ki jaa nɛ̀ yige baa,
kire 'taa bà wi 'wìi kɛn a pe 'wi kpúu wè.
15 Wi 'Misa Fànʔa Siɛnrɛ jáa dè nɛ́ ti kajuudiʔɛlɛ ní gèle,
a kire 'tí a wi 'siɛnfeliye yi siin kpíʔile yè a yi 'kò nigbe nɛ̀ kò siɛnfelige fɔngɔ nɛ́ wire ní,
nɛ̀ yanyige nyɔ́gɔ gè.
16 Wi kùu wire kɛnmɛ nɛ̄ bè tiiparigɛ nɛ̄ gè,
a wi 'pe siin juu bèle nɛ̀ taʔala pìye nɛ̄ peli nɛ́ Kulocɛliɛ ní wè,
a pe 'kò cetinnɛ nigbe,
nɛ̀ leguuro kpúu dè nɛ̀ yige pe sunʔɔmɔ nī bè wire tíimɛ wè.
17 Nɛ̀ pínɛ Zezi Kirisi wi 'pɛn nɛ̀ pɛ́nì yanyige wori jáari dè yeli mɛ́,
yeli bálì ye 'puu liilile bèle,
nɛ́ yeli bálì bīɛlɛ bile túɔn nɛ̀ pínɛ wèb.
18 Ki 'nyaa wire kɛnmɛ nɛ̄ weli we mìɛni bèle,
weli bálì bīɛlɛ Zuufulo bèle nɛ́ bìli pe wè Zuufulo bèleʔ,
a weli 'jáa nɛ̀ jíindiʔɛ taa bè gbɛ̀ nɔ̀ Tuufɔli nɛ̄ wè,
Kulocɛliɛ Pìle lire nigbe nyúmɔ nī bè.
19 Kire kɛnmɛ nɛ̄,
yeli ní wè tíin nabɔnminɔʔ,
bé nɛ́ ga jo yeli yē kayɔbigɔ káà kìiyɛ wuulo wīʔ.
Ki 'nyaa,
yeli nɛ́ Kulocɛliɛ wuulo ní bèle ye 'kò bɛ̀ kùnunɔ wuulo tíɛlɛ wī,
níɛ ní Kulocɛliɛ narigɛ wuulo nɛ̀ pínɛ.
20 Yeli yē faanna saʔa ki kàkpuɔn nɛ̄ wè,
kàkpuɔn ŋáà Zezi tundunminɔ nɛ́ Kulocɛliɛ Siɛnjuulo pe 'túgu wèc;
Zezi Kirisi wè,
wire sí wī saʔa ki kàluulo kàdɛnipelige gèd.
21 Wire fànʔa nɛ̄ saʔa ki mìɛni 'yéri nɛ̀ nyuɔ cɛ̀ngɛ,
nɛ̀ kò gbùʔɔrɔsaʔa wàlidɛngɛgɛ Kàfɔli mɛ́ wè.
22 Yeli míɛni bèle,
wire nī yeli yē faanna nɛ̀ fàri wi nɛ̄,
nɛ̀ kò kòridiʔɛ Kulocɛliɛ mɛ́ wè wi Pìle lire fànʔa nɛ̄ gè.