Efɛziyé 1

Sɛbɛ ŋáà Pɔli 'tórigo Efɛziyé mɛ́ bèle

Efɛziyé

Síɛrilɛ

1  ŋáà wī Zezi Kirisi tundunwɔ wè nɛ̀ yɛli nɛ́ Kulocɛliɛ nyɛ́ni kaala ní lè, wire wi 'siɛnrɛ dáà sɛbɛ dè nɛ̀ tórigo Kulocɛliɛ wuulo mɛ́ bèle, bàli bīɛlɛ baa Efɛzi kàʔa mɛ́ gè nɛ́ tɛ́ngɛ Zezi nɛ̄ wè. 2 Kulocɛliɛ wè weli Tuu wè, nɛ́ Zezi Kirisi ní wè, pe- nɛ́ yanyige kɛn ye mɛ́.

Kpuʔɔrɔ dáà weli bé gbɛ̀ taa Zezi Kirisi mɛ́ wè

3  ti 'yɛli Kulocɛliɛ nɛ̄, weli Kàfɔli Zezi wi Tuu wè. Wire wi 'kpuʔɔrɔ taʔa weli nɛ̄ kɛnmɛ pi mìɛni feliye nɛ̄, gìi ki 'pìle kɛnmɛ kúɔ bè kele koligo nī gè bɛ̀ wiyē pínɛnɛ nɛ́ Kirisi ní wè. 4 Ki 'nyaa wi cé weli nyíɛnɛ nɛ̀ kɔ̀n nɛ̀ yaʔa we- puu pínɛnɛ nɛ́ Kirisi ní wè nɛ̀ ki yaʔa duniya wiì cé fìɛ faanʔ, we- puu we nyuɔ wire yiʔɛ mɛ́ gè, wé sí puu tiɛlɛ fùn, dɛ́nigɛ nī gè. 5 Kulocɛliɛ wi cé kíni nɛ̀ ki yɛ̀gɛ bè weli líɛ bè weli kpíʔile wi pìile nɛ̀ yɛli nɛ́ gàa Zezi Kirisi wi 'kpíʔile gè. Wi 'kire kpíʔile nɛ̀ yɛli nɛ́ wi nyɛ́ni kaala ní lè, nàa ni 'wi dɛ́ni lè, 6 gìi ki bé tí weli de wi síɛri de kpuʔɔrɔ tari wi nɛ̄ wi kpuʔɔrɔ tire kɛnmɛ nɛ̄ bè weli kɔli mɛ́ gè. Wi Jaa wire fànʔa nɛ̄ wi 'kire kacɛ̀ngɛ kpíʔile gè weli mɛ́ waʔanɛ, wi Jaa ŋáà wi 'wi dɛ́ni kacɛ́nmɛ fùn wè.

7 Wire sìsiɛn fànʔa nɛ̄ gè, a weli 'suɔ nɛ̀ yiri ki nī, a weli kapiʔile ke 'láʔa. Kire 'kpíʔile nɛ̀ yɛli nɛ́ Kulocɛliɛ wi kpuʔɔrɔ ní dè. 8 Wi 'ki kpíʔile weli mɛ́ kpuʔɔ nɛ̀ sícilimɛ nɛ́ kacɛ́nnɛ feliye yi mìɛni kɛn weli mɛ́. 9 Wi 'tí a weli 'wi nyɛ́ni kaala kalarilɛ cɛ́n lè. Wi kacɛ̀ngɛ kire kɛnmɛ nɛ̄ bè, wi cé kíni nɛ̀ ni sɔ̀ngi nɛ̀ yaʔa bága ni kpíʔile Zezi Kirisi wire fànʔa nɛ̄. 10 Ki 'nyaa a ki lɛ̀lɛ ni kɛ́nì nɔ̀ lè, wi bé yɛrɛ ti mìɛni pínɛ bè ti le Kirisi kiyɛ nī, dìi dī baa nī lè, nɛ́ dàa dī náʔa dàala nɛ̄ lè.

11 Nɛ̀ pínɛ Kulocɛliɛ wi cé weli nyíɛnɛ nɛ̀ kɔ̀n nɛ̀ yaʔa we- puu pínɛnɛ nɛ́ Zezi Kirisi ní wè, nɛ̀ yɛli nɛ́ kele gílì wi cé tɔ́nminɔ nɛ̀ yaʔa gèle. Ki 'nyaa wiī nɛ kele ke mìɛni kúu nɛ̀ yɛli nɛ́ wi nyɛ́ni kaala ní lè, 12 gìi ki bé tí weli bálì bīɛlɛ pélile bèle nɛ́ weli sɔ̀ngirɔ taʔa dè Kirisi nɛ̄ wè, we- puu bàli pe nyɛ́ni wi kpuɔmɔ kpóri bè.

13 Nɛ̀ pínɛ Kirisi wire nī yeli míɛni bèle, yeli 'kányiʔɛ ki siɛnrɛ lúʔu dè, dè dàa ti 'suɔlɔ kɛn lè yeli mɛ́ bèle, a yeli 'tɛ́ngɛ wi nɛ̄. A Kulocɛliɛ wi sí wi kɛn lè yeli mɛ́, nɛ̀ tɛ́ngɛ yeli nɛ̄, Pìle nàa wori nɛ̄ wi cé wè. 14 Kulocɛliɛ Pìle lire sí yē weli mɛ́ gìi Kulocɛliɛ wi 'sàri nɛ̀ yaʔa weli kɔrigɔ ki wori nɛ̄ dè, bè weli suɔ bè yige ki nī bè láʔa wè, weli bálì bīɛlɛ wi wuulo bèle, gìi ki bé tí weri wi gbùʔɔrɔ́ wi kpuɔmɔ wori nɛ̄ dè.

Pɔli náarigɛ gè

(Filip 2.9-11)

15 Kire kɛnmɛ nɛ̄ bà mi 'yeli tɛ́ngɛlɛ ni wori lúʔu dè Zezi nī wè, nɛ́ yeli dɛ́nigɛ wori ní dè Kulocɛliɛ wuulo pe mìɛni kɔli mɛ́ gè, 16 mi nɛ̌ fìʔɛʔ bè barigɛ kɛn Kulocɛliɛ mɛ́ wè yeli wori nɛ̄ dèʔ, a mi gbɛ́nɛ̀ yeli wori sɔ̀ngi dè lɛ̀lɛ ó lɛ̀lɛ mi náariyɛ nī yè, 17 gìi ki bé tí we Kàfɔli Zezi wi Kulocɛliɛ wè, wire ŋáà wī kpuɔmɔ Tuu wè, wi- sícilimɛ kɛn lè yeli mɛ́, ni- wi tìɛ yeli nɛ̄ bé sí tí ye- wi cɛ́n. 18 Kulocɛliɛ wi- yeli sìnjilige múgu gè, ye- ki cɛ́n sɔ̀ngirɔ taʔadiʔɛ gíì gī baa Kulocɛliɛ wi kayerile nī lè, yé ki cɛ́n ye pínɛ wi kɔrigɔ ki tiī nìʔɛrɛ nɛ̀ fàri lɔri cɛ̀nrɛ nɛ̄ wi wuulo mɛ́ bèle. 19 Yé sí ki cɛ́n ye pínɛ fànʔa gíì gī wi mɛ́ weli wuʔu gè, weli bálì bīɛlɛ tɛ́ngɛfɔlilɔ bèle; ki fànʔa ki 'kpúʔɔ nɛ̀ fáala. Kire fànʔa kire tíimɛ wi 'tìɛ, nɛ̀ ki kpíʔile nɛ́ ŋɔri ní 20 lɛ̀lɛ níì nī wi 'Kirisi nyɛ́ wè nɛ̀ yige kúbilo nī bèle, nɛ́ tí a wi 'tɛ́ni wi kàliige mɛ́ gè baa nī lè. 21 Wiī ti mìɛni naamɛ: kàfɔligɔ feliye yi mìɛni yè, fànʔa feliye yi mìɛni yè, ŋɔri feliye yi mìɛni yè, nɛ́ kùlofɔligɔ feliye yi mìɛni ní yè. Nɛ̀ fàri míʔɛ ó míʔɛ gáà ki bé gbɛ̀ yeri gè, ki fǎga cɛ yéri náʔa yákuɔ nɛ̄ʔ, nɛ̀ pínɛ duniya ŋáà wi báan nɛ tíin wè. 22 Kulocɛliɛ wi 'kele ke mìɛni tìrige Kirisi wi tɔliyɔ láara yè, nɛ́ sí wi kpíʔile wi- puu Kàfɔli kele ke mìɛni nyùgo nɛ̄ nī lè. 23 Tɛ́ngɛfɔlilɔ gboli lire sí nī wi cetinnɛ lè, lire nī Kirisi wi yē kɛnmɛ pi mìɛni felige nɛ̄, wire ŋáà wi 'duniya wi mìɛni nyì wè.