Kirisi wi 'wìi cɛ́rigɛ nɛ̀ sí ki taa wiī larigbuʔɔ nī
2
1 A ki sí yē bɛ̀ yeli yē pínɛnyɛnigɛ nɛ̄ nɛ́ Kirisi ní wè,
kiī nɛ lèbaanna nyɔ́gi yeli nī wè,
nɛ̀ pínɛ a ki yē wìyedɛnigɛ ki 'yeli funyɔ nyígi yè,
a ki yē pínɛnyɛnigɛ yē yeli nɛ́ Kulocɛliɛ Pìle sunʔɔmɔ ní bè,
a ki yē siɛnnɛ nìge yē yeli nī yeli nɛ nyinimɛ tari wè,
2 ye- tí mi fungo ki- nyì fundaanra nɛ̄,
bɛ̀ yeli 'bìɛ wè.
Dɛ́nigɛ ki- puu ye mɛ́ nugo,
funyɔ yi- puu ye mɛ́ nuyɔ,
ye- yeli sɔ̀ngirɔ pínɛ dè.
3 Ye fǎga de yafiɛn kpínʔini nɛ́ yejaʔa sɔ̀ngirɔ níʔ,
bé nɛ́ cɛ ga jo bè míʔɛ caa tɔ̀ni fùnʔ.
Gìi ki 'pɔ́ri gè,
yeri yìye cɛ́rigi;
siɛn wi de bìli tɔ́ri bèle pe 'tóri wire nɛ̄.
4 Siɛn fǎga de wìi nigbe nyuɔmɔ caaʔ.
Gìi ki 'pɔ́ri gè,
siɛn wi de sɔ̀ngí de pínɛ nɛ́ bìli ní bèle.
5 Ye- kire sɔ̀ngirɔ tire yaʔa ti- puu yeli nī,
majo mɛni ti 'puu Zezi Kirisi nī wè.
6 Wire ŋáà wī felinugo nɛ́ Kulocɛliɛ ní wè,
wiì ki tɔ́ri kaalaʔ nɛ ki píle bɛ̀ wire yē nuwɔ nɛ́ Kulocɛliɛ ní wèʔ.
7 Wi cɛ́nì màama kúɔ nɛ̀ sùkulowo kɛnmɛ líɛ,
nɛ̀ wìi kpíʔile nuwɔ nɛ́ siɛnnɛ ní bèle,
nɛ̀ kò siɛn,
kɛnmɛ pi mìɛni felige nɛ̄.
8 Wi 'wìi cɛ́rigɛ nɛ̀ yéri nɛ̀ lúʔu Kulocɛliɛ mɛ́,
nɛ̀ kò ngbóluʔulofɔli fúɔ nɛ̀ pɛ́nì kùu taa baa ki nī,
tiiparigɛ kùu wè.
9 Kire nɛ̄ a Kulocɛliɛ wi sí wi kpúʔɔ feliye yi mìɛni,
nɛ̀ míʔɛ kɛn wi mɛ́,
míʔɛ gáà ki 'tóri míɛyɛ yi mìɛni nɛ̄ yè,
10 gìi ki bé tí Zezi míʔɛ nɛ̄ gè,
yɛgɛ ó yɛgɛ gáà gī baa nyìʔɛnɛ laamɛ nī bè,
nɛ́ gàa gī dàala nɛ̄ lè,
nɛ́ gàa gī dàala táanmɛ gè,
ti- káguro cáan tiri wi gbùʔɔrɔ́.
11 Nɛ̀ pínɛ,
siɛn ó siɛn wi- ki juu wi nyuɔ nī gè,
wi- jo Zezi Kirisi wire wī Kàfɔli wè,
wi- kpuʔɔrɔ taʔa weli Tuu Kulocɛliɛ nɛ̄ wèa.
Tɛ́ngɛfɔlilɔ pe- puu kpìɛnmɛ duniya nī wè
12 Kire nɛ̄,
nɛ siinyɛninɛ yeli bálì ye 'mi dɛ́ni bèle,
bɛ̀ yeli yē ngbóluʔulofɔlilɔ súuri wè,
kiì sí nyaa a mi gbɛ̀nɛ yē baa wè kire lɛ̀lɛ yákuɔ nī wèʔ,
píra ŋáà nī wè,
ye cɛri ki kpínʔini kpuʔɔ de tòrí bà mi wè baa wèʔ.
Yeri baara yeri suɔlɔ wuʔu tìí gè nɛ́ fíɛrɛ ní,
yeri fún de yàʔará.
13 Ki 'nyaa kaala níì ni 'Kulocɛliɛ dɛ́ni wè,
wire wi nɛ̂ ni kpíʔile láa nyɔ́gɔ gè yeli nī,
níɛ̀ ni kpíʔile larigɛ kɛn gè yeli mɛ́.
14 Yeri ki mìɛni kúu ye fǎri kúnʔɔriʔ,
á kire 'laa bèri nyu de kìíʔ,
15 gìi ki bé tí ye- puu dìgire fùn,
cìilile,
ye- puu Kulocɛliɛ pìile,
tiɛlɛ fǎga puu yeli nɛ̄ʔ yirile náà ni wuulo sunʔɔmɔ nī bè,
siɛnkolilo bèle,
siɛncuʔɔlɔ bèle.
Ye- puu yeri càanná bɛ̀ ŋɔgɔlɔ tíɛlɛ pe sunʔɔmɔ nī bè duniya nī wè.
16 Ye- sìi siɛnrɛ cò dè kpuʔɔ,
kire ki bé mi kɛn mi gbɛ̀ yiʔɛ yɛ̀gɛ gè Kirisi pɛnjɛngɛ gè,
nɛ̀ taʔa gíi nɛ̄,
mi fùrɔgɔ gè nɛ́ baara dáà mi 'kúɔ dè tiì yiri waʔanɛʔ.
17 Nɛ̀ sí ki taa,
a ki nɛ́ cɛ́nì nyaa pe bé mi kpúu,
mi sìsiɛn ki- wo bè fàri kakuɔrɔb dáà yeli tɛ́ngɛlɛ niī nɛ kúu Kulocɛliɛ mɛ́ wè nɛ́ ki baara ní dè,
kire 'mi dɛ́ni a mi nɛ ki fundaanra kpínʔini dè nɛ́ yeli ye mìɛni ní bèle.
18 Yeli míɛni bèle,
ye- puu fundaanra nɛ̄,
yeri fundaanra kpínʔini nɛ́ mi ní.
Timote nɛ́ Epafurodiiti pe baara dè
19 A Kàfɔli Zezi 'fɔ̀li wè,
náʔa nɛ́ lɛ̀lɛ láà cɛ̀ri ní m'bé Timote tun wè baa yeli mɛ́,
gìi ki bé tí mi- yeli wori taa dè bè lúʔu,
dí mi sɔ̀ngirɔ ti sí kò tiɛnugo nī mi míɛni wè.
20 Miì siɛn cɛ́nʔ náʔa bɛ̀ wire tíɛlɛʔ,
ŋàa wī yeli woli ni 'kpúʔɔ wi mɛ́ nɛ́ kányiʔɛ ní gèʔ.
21 Ki 'nyaa pe mìɛni nɛ fé pe nyɛ́ni kele kúrugu wī,
nɛ́ Zezi Kirisi wori yaʔa dè.
22 Timote wire wè,
yeli sí nyɛ́nì ki cɛ́n,
wi nyɛ́nì wi tánʔamɛ tánʔa bè,
nɛ̀ wìi kpíʔile bɛ̀ pùɔ sî puu nɛ́ wi tuu ní kɛnmɛ bíì nɛ̄ wè,
nɛ̀ kò nɛ́ mi ní a we 'Kataanna Siɛnrɛ ti baara kúɔ dè.
23 Wire mi nɛ sɔ̀ngí bè tun baa yeli mɛ́,
a mi kɛ́nì kacɛ́nmɛ cɛ́n mi kele nɛ̄ gèle.
24 Mi 'tɛ́ngɛ ki nɛ̄,
nɛ̀ mi sɔ̀ngirɔ taʔa dè Kàfɔli nɛ̄ wè,
náʔanɛ lɛ̀lɛ láà cɛ̀ri ní mi míɛni wè m'bé kɛ́ baa yeli mɛ́.
25 Nɛ̀ sí ki taa,
ki 'kàri fànʔa mi- we siinyɛni Epafurodiiti tórigo wè baa yeli mɛ́,
wire ŋáà wī mi baakuɔnyɛni wè,
á we 'pínɛ nɛ̀ wuʔɔ Kataanna Siɛnrɛ ti jáarigɛ nɛ̄ gè.
Yeli cé wi tórigo náʔa mi mɛ́ a wi pɛ́ni kele kúu mi mɛ́ nɛ mi màakuu nyuʔɔ wè.
26 Ki 'nyaa,
yeli ye mìɛni láa 'kò wi nī,
nɛ̀ pínɛ kiī nɛ wi fùrɔ́ fungo nī gè bɛ̀ ki 'nyaa yeli nyɛ́nì wi yaama wori lúʔu dè.
27 Kányiʔɛ gī,
wi 'tɔ̀ni nɛ̀ puu yaawa nɛ waa bè kùu;
Kulocɛliɛ wi sí nyɛ́nì nyinimɛ taa wi nɛ̄.
Wire yákuɔ sí nɛ̄ bɛ̀ díɛʔ,
wi 'nyinimɛ taa mi míɛni nɛ̄ nɛ̀ pínɛ,
gìi ki bé tí kàa fǎga ní fàri mi fuunmɔ nɛ̄ bèʔ.
28 Mi sí yē nɛ caa bè wi tórigo baa yeli mɛ́ fáari,
ye ní sa wi nyaa,
ye- fundaanra taa,
dí ki sí sɔ̀ngirɔ láʔa dè mi nɛ̄.
29 Ye- wi kpàli nɛ́ fundaanra ní kpuʔɔ Kàfɔli wi míʔɛ nɛ̄ gè,
yeri ki siɛnnɛ felile kpóri bèle de pínɛ.
30 Nɛ̀ taʔa gíi nɛ̄,
Kirisi baara tire kɛnmɛ nɛ̄ bè,
a wi 'wi sìi jáari wè fúɔ nɛ waa bè kùuʔ;
a kire 'ki kɛn kele gílì yeli sǐ cî gbɛ̀ kpíʔile yeli tíimɛ bèle mi mɛ́ wèʔ,
a wi 'ke kúɔ yeli larigɛ nī gè.