Filipiyé 3

Bè puu sínwɛ wè ma mìɛ taʔa Kirisi nɛ̄

1 Kire gáà ki mìɛni nī gè, mi siinyɛninɛ, yeri fundaanra kpínʔini wire kɛnmɛ nɛ̄ bè. Ki wè mi mɛ́ yafiɛnʔ bè koli bè siɛnnuro sɛbɛ dè bè tórigo yeli mɛ́ bèleʔ, kire cɛ ki 'pɔ́ri yeli mɛ́.

2 Ye- yìye cò bìli nɛ̄ pe nyɛ́ni siɛnnɛ fáanni nɛ pùunní bèle, piyē muɔ 'jo pɔ̀nminɔ bīɛlɛ. Ye- yìye cò ki baakuɔsipiile bálì nɛ̄ bèle bàli pe sî jo siɛn 'yɛli wi- kɛnɛkɛnɛ kpíʔile wè bé nɛ́ suɔlɔ taa lè. 3 Ki 'nyaa weli bīɛlɛ wuulo bèle, kányiʔɛ wuulo bèle. Nɛ́ ki cɛ́n weli we nyɛ́ni Kulocɛliɛ gbùʔɔrɔ́ wè nɛ́ ní lè, níɛ weli fundaanra kpínʔini dè bɛ̀ weli yē pínɛnɛ nɛ́ Zezi ní wè. Weli sì weli sɔ̀ngirɔ taʔa dè céri kakpiʔiligele nɛ̄ʔ. 4 A ki 'yéri weri wìye nyíɛnɛ wè, m'bé gbɛ̀ mi sɔ̀ngirɔ taʔa dè céri kele nɛ̄ gèle. A ki yē wàa nɛ sɔ̀ngí wire bé gbɛ̀ wi sɔ̀ngirɔ taʔa dè céri kele nɛ̄ gèle, mi wè, mi sí nyɛ́nì pe mìɛni jáa: 5 pe 'mi kɛnɛkɛnɛ kpíʔile wè mi ní nɛ tíin pùɔ cɛnyɛ kataanriwuʔu nɛ̄ gè, siimɛ wuu wī mi wè, nɛ ní Bɛnzamɛ saʔa tùlugo wuu, mi siivɔlilɔ bèle, bīɛlɛ, kire 'jo Eburuwo wī mi wè tígitigi. Gìi ki wori kúɔ dè, gboli wuu mi 'puu; 6 mi cé cáʔara nɛ tɛ́ngɛfɔlilɔ wuʔɔ bèle. A ki ní nɛ̀ nyaa sínmɛ koligo gè, gìi ki 'fànʔa kajuʔulo kúɔ gèle, dìgire sì 'puu mi nɛ̄ʔ.

7 Nɛ̀ sí ki taa yɛgɛ ó yɛgɛ gáà ki 'puu mi mɛ́ pe- jo tɔ̀ni yɛgɛ gī wè, mi nyɛ́nì tire ti mìɛni nyaa dè nɛ́ ti yaʔa baa, wire kɛnmɛ nɛ̄ bè. 8 Nɛ̀ taʔa gíi nɛ̄, bɛ̀ mi 'Zezi Kirisi wire cɛ́n, wi ní mi Kàfɔli wè, kire 'pɔ́ri m'mɛ́ ti mìɛni nɛ̄ dè; tire ti mìɛni ti 'kò m'mɛ́ tɔ̀nifun yɛrɛ wī. ʔaan, Zezi wire kɛnmɛ nɛ̄ bè ti mìɛni 'kò tɔ̀ni fùn wī, mi nɛ ti nyaʔa bɛ̀ kànyaʔara tíɛlɛ, dí mi sí taa bè Kirisi wire cɛ́n, 9 bè puu pínɛwɛ nɛ́ wi ní. Kiì sí kò majo mi yē sìɛnwɛ nɛ̀ yɛli nɛ́ Fànʔa Siɛnrɛ ní dè wīʔ. ʔéʔe, kire sínmɛ pi 'taa bɛ̀ mi 'tɛ́ngɛ Kirisi nɛ̄ wè; ki sínmɛ báà bè, pire 'taa Kulocɛliɛ mɛ́ tɛ́ngɛlɛ fànʔa nɛ̄ gè. 10 Gìi mi nɛ cìrá gè, kire yē bè Kirisi cɛ́n wè, bé sí ki fànʔa gáà cɛ́n gè bè pínɛ, gàa ki 'wi nyɛ́ nɛ̀ yige kúbilo sunʔɔmɔ nī bè, bè fàri wi nɛ̄ bè wuʔɔgɔ sige gè majo mɛni wi 'wuʔɔ wè, bé sí kò bɛ̀ wi tíɛlɛ fúɔ bè taa bè pa nɔ̀ kùu nɛ̄ wè, 11 dí Kulocɛliɛ sí gá mi míɛni nyɛ́ bè yige kúbilo sunʔɔmɔ nī bè.

Tɛ́ngɛlɛ kàsɛnigɛ gè bè sa nɔ̀ ki láʔala nɛ̄ lè

12 Kiì kò majo mi 'mi kàsɛnigɛ ki tɔ̀ni taa wè nɛ̀ kúɔ wīʔ, bé nɛ́ ga cɛ jo mi 'nyuɔ nɛ̀ fori wīʔ. ʔéʔe, ki 'nyaa mi nɛ ŋàʔaná bè ki taa bè cò wī, bɛ̀ ki 'nyaa Zezi wi 'mi cò wè. 13 Mi siinyɛninɛ, mi wè nɛ ki sɔ̀ngí mi tíimɛ wè nɛ́ jo mi 'ki taa nɛ̀ kúɔ wīʔ. Kaala nigbe sí mi nɛ cìrá: gìi ki 'tóri nɛ̀ kúɔ gè, mi nyɛ́nì kire wáa kàduʔu mɛ́, gìi gī yiʔɛ mɛ́ gè, níɛ kire cìrá. 14 Kire nɛ̄ mi nɛ fé bè sa nɔ̀ láʔala lè, mi nɛ ŋàʔaná bè naamɛ kayerile tɔ̀ni taa wè Kulocɛliɛ wuu wè, ŋàa siɛn bé gbɛ̀ taa Zezi Kirisi nī wè.

15 Weli bálì sí we 'liɛ nɛ̀ láʔa tɛ́ngɛlɛ nī lè, ye- tí we- kire sɔ̀ngirɔ dáà le dè wìye nī. A ki sí yē sɔ̀ngirɔ táà tiiyɛ yē yeli mɛ́ bèle, Kulocɛliɛ wire wi bé yeli yiɛyɛ múgu yè tire kɔli mɛ́ gè. 16 Gìi sí ki 'cɛ́n gè, sunʔɔmɔ bíì nī we 'nɔ̀ wè, ye- tí we- tánʔana pínɛ lè.

17 Mi siinyɛninɛ, ye- puu bɛ̀ mi tíɛlɛ kakpiʔiligele nī gèle, yé sí yeli yiɛyɛ taʔa yè bìli nɛ̄ pe nyɛ́ni tári mɛni weli 'yeli tìɛ wè. 18 Ki 'nyaa pàli nìʔɛnɛ nɛ pe sìi tári wè bɛ̀ Kirisi ki leguulo tíɛlɛ. Mi 'kíni nɛ̀ ki siɛnrɛ dáà juu dè yeli mɛ́ tɔliyɔ nyuɔ, m'bé ní ti juu nɛ́ yéturo ní. 19 Ki kúɔmɔ pi sí nɛ waa nɛ́ pe ní cúʔɔdiʔɛ nī wī, nɛ̀ taʔa gíi nɛ̄, pe liyɛ yire yī pe kulocɛliɛ wè, nɛ̀ pínɛ kele gílì nī piyē nɛ pe kpuɔmɔ caa bè, kiyē fìɛrɛ wuʔulo; duniya yɛrɛ sɔ̀ngirɔ dī pe nī. 20 Weli sí bèle, wuulo bīɛlɛ weli bèle, weli nɛ Suɔfɔli siri wè, kire tiʔɛ nī wi bága kɔ́n, wire wī Zezi Kirisi wè. 21 Wire wi bága weli céri yiʔɛ dè, céri dáà ti 'máama dè, ti- kò nuro nɛ́ kpuɔmɔ céri ní dè, wire wori dè. Kire bé kpíʔile bɛ̀ ki fànʔa kiī wi mɛ́ wi- gbɛ̀ jáa bè yɛrɛ ti mìɛni cáan wi fànʔa láara gè.