Filipiyé 4

Pɔli wi 'wi funnyige siɛnrɛ juu dè

1 Kire nɛ̄, nɛ siinyɛninɛ, yeli woli ni 'kpúʔɔ mi mɛ́, nɛ̀ pínɛ yeli láa ki nɛ̂ puu mi nɛ̄, yeli bīɛlɛ mi fundaanra taadiʔɛ gè, nɛ́ ní mi kpuʔɔrɔ ndɔ̀ngɔ gè. Kire nɛ̄ nɛ siinyɛninɛ, ye- gbɛ̀nmɛ le ye- puu pínɛnyɛnigɛ nɛ̄ nɛ́ ní wè.

2 Evodii nɛ́ Sɛntiisi ní wè, mi nɛ pe fiɛn, pe- bìɛ Kàfɔli nī wè. 3 Nɛ̀ pínɛ, muɔ ŋáà wī mi baakuɔnyɛni kányiʔɛ nɛ̄ gè, mi nɛ ki caa muɔ mɛ́ ma cɛlilɛ bálì sáʔa bèle. Pe 'tɔ̀ni nɛ̀ fùrɔ nɛ́ mi ní, nɛ̀ fàri Kilema nɛ̄ wè a we 'wúɔ nɛ̀ jáari dè, nɛ́ mi baakuɔnyɛninɛ bílì sɛnminɛ ní bèle, bìli míɛyɛ yī baa sìi sɛbɛ nī wè.

4 Ye- puu fundaanra nɛ̄ pínɛnyɛnigɛ nī gè nɛ́ Kàfɔli ní wè lɛ̀gɛlɛ ke mìɛni nī. M'bé ní ti juu bè ti fùgu, ye- puu fundaanra nɛ̄. 5 Ye- tí siɛnnɛ pe mìɛni pe- yeli cɛ́n nɛ́ funnyige ní. Kàfɔli wi 'kò túɔn. 6 Ye fǎga de káala yafiɛn nɛ̄ʔ; gìi ki 'pɔ́ri gè, a kaala ó kaala yē baa lè yeri yeli màakuu wori nyu dè yeri tórigi Kulocɛliɛ mɛ́ wè náarigɛ nī, yéri Kulocɛliɛ síɛri wè. 7 Bà Kulocɛliɛ yanyige gè, kire gáà ki 'tóri nɛ̀ fáala siɛnnɛ pe cɛ́nmɛ pi mìɛni felige nɛ̄ bè, ki bé yeli funzɔngirɔ tɛ́ngɛ dè pínɛnyɛnigɛ nī gè nɛ́ Zezi Kirisi ní wè.

8 Dìi ti 'kò sɛnrɛ dè nɛ siinyɛninɛ, a kaala ó kaala yē kányiʔɛ gè, a nìi yē nɛ́ kpuʔɔrɔ ní wè, a gìi ó gìi yē sínmɛ koligo gè, gàa gī cìilige gè, kaala ó kaala náà nī tàanna lè, kaala ó kaala náà nī siɛn bé gbɛ̀ tɔ́ri nɛ́ ni ní lè, nàa ni 'sìɛn lè, nɛ́ kaala náà nī pe bé gbɛ̀ siɛn síɛri ni nɛ̄ lè, ye- yeli sɔ̀ngirɔ yaʔa dè tire nɛ̄. 9 Gìi yeli 'tɛnmɛ nɛ̀ taa mi mɛ́ gè, nɛ́ gìi yeli 'cò mi wori nī dè, gìi yeli 'lúʔu mi mɛ́ gè, nɛ́ gìi yeli 'nyaa mi mɛ́ gè, yeri kire kpínʔini, bɛ̀ yanyige Kulocɛliɛ wi bé puu nɛ́ yeli ní.

Pɔli wi 'Filipi kàʔa wuulo síɛri bèle

10 Mi nɛ fundaanra kpínʔini kpuʔɔ nī wè, bɛ̀ ki 'nyaa píra ŋáà nī wè yeli ń'nɛ̀ jáa nɛ̀ sɔ̀ngi nɛ̀ taa nɛ́ mi ní wè. Kányiʔɛ gī, yeli 'puu nɛ mi wori sɔ̀ngí dè, nɛ̀ sí ki taa ki larigɛ kiì cé puu yeli mɛ́ wīʔ. 11 Mi màakuu nyuɔrɔ tire kɛnmɛ nɛ̄ bɛ̀ʔ mi nɛ kire siɛnrɛ dáà nyu dèʔ. A ki 'yéri kire nɛ̄ gè, mi 'jáa bè gbɛ̀ nìɛ kpàri bè cò nɛ́ yɛgɛ ó yɛgɛ mi 'taa gè. 12 Mi 'mìɛ cò macɛ́n bè gbɛ̀ mi sìi tánʔa wè fuunmɔ nī bè, nɛ̀ mìɛ cò macɛ́n a mi yē lɔrifɔli wè. Nɛ̀ pínɛ mi mìɛ cò macɛ́n kele ke mìɛni nī gèle nɛ́ kɛnmɛ pi mìɛni felige nɛ̄ bè, a mi 'taa nɛ̀ lìi nɛ̀ tín yo, a mi nɛ́ kò nɛ́ fungo ní yo, a mi yē yakaafɔli yo, a mi nɛ́ yē fuunmɔ nī yo. 13 M'bé gbɛ̀ jáa bè kele ke mìɛni kúɔ, nɛ̀ yɛli nɛ́ ŋàa wi nyɛ́ni fànʔa kanʔa gè mi mɛ́ wè. 14 Nɛ̀ sí ki taa yeli 'ki kpíʔile a ki 'yɛli, bɛ̀ yeli yē pínɛnyɛnigɛ nɛ̄ nɛ́ mi ní wè, mi fùrɔgɔ lɛ̀lɛ nī lè.

15 Yeli sí nyɛ́nì ki cɛ́n yeli tíimɛ bèle, yeli Filipi kàʔa wuulo bèle, ti jáarigɛ sélimɛ lɛ̀lɛ nī lè, bɛ̀ mi cé yiri Maseduwani kùlo nī lè, láà sì cé kpuʔɔrɔ kpíʔile mi mɛ́ʔ nɛ̀ yakaa kɛn Siɛnrɛ ti jáarigɛ kɛnmɛ nɛ̄ bèʔ, nɛ̀ yiri yeli yákuɔ nī bèleʔ. 16 Nɛ̀ pínɛ bɛ̀ mi 'puu Tesaloniki kàʔa mɛ́ gè, ki 'tɔliyɔ siin kúɔ bà yeli cé yakaa tórigo mi mɛ́ nɛ̀ mi sáʔa wè. 17 Kiì nyaa majo mi nɛ tire nyu, yeli- mi kɛn nɛ́ yakaa ní wīʔ. Gìi mi nɛ caa gè, kàa de taʔala de waa yeli mɛ́. 18 Ki mìɛni nyɛ́nì nɔ̀ mi nɛ̄, ki 'tɔ̀ni yē nìʔɛgɛ. Gìi ní yeli 'Epafurodiiti tun wè, ki mìɛni 'nɔ̀ náʔa mi nɛ̄. Ti bé gbɛ̀ tɔ́ri bɛ̀ kakuɔrɔ yakɛngɛ tíɛlɛ gàa nùdaanna ni 'Kulocɛliɛ dɛ́ni wè, á wi 'fɔ̀li ti nɛ̄ dè. 19 Kire nɛ̄, mi Kulocɛliɛ wè, wi bé yeli màakuu kele ke mìɛni nyuɔ yeli mɛ́ bè yɛli nɛ́ wi kpuʔɔrɔ ti niʔɛgɛnmɛ ní bè Zezi Kirisi wire fànʔa nɛ̄ gè.

20  ti 'yɛli Kulocɛliɛ nɛ̄, weli Tuu wè, lɛ̀gɛlɛ ke mìɛni nī. .

Síɛrilɛ sɛnnɛ lè

21 Ye- Kulocɛliɛ wuulo pe mìɛni síɛri mi kɛn, bìli bīɛlɛ pínɛnyɛnigɛ nɛ̄ nɛ́ weli ní Zezi nī wè. We siinyɛninɛ bílì bīɛlɛ náʔa nɛ́ mi ní bèle, piyē nɛ yeli síɛri. 22 Kulocɛliɛ wuulo pe mìɛni nɛ yeli síɛri, nɛ̀ fàri bìli bīɛlɛ náʔa Sezari wi kpáa wuulo bèle, ye- pe síɛrilɛ suɔ lè.

23  Zezi wi ti- puu yeli nɛ̄.