Filipiyé 1

Sɛbɛ ŋáà Pɔli 'tórigo Filipiyé mɛ́ bèle

Filipiyé

Síɛrilɛ

1 Mi wè nɛ́ Timote ní wè, Zezi sùkulolo bèle, weli nɛ Kulocɛliɛ wuulo pe mìɛni síɛri bàli bīɛlɛ pínɛnyɛnigɛ nɛ̄ nɛ́ Zezi Kirisi ní wè baa Filipi kàʔa mɛ́ gè, peli nɛ́ yiɛgininɛ ní bèle, nɛ̀ fàri bèle. 2 Weli Tuu Kulocɛliɛ wè nɛ́ Zezi Kirisi ní wè, pe- nɛ́ yanyige kɛn yeli mɛ́.

Pɔli wi 'Kulocɛliɛ náari wè tɛ́ngɛfɔlilɔ mɛ́ bèle

3 A mi gbɛ́nɛ̀ sɔ̀ngi nɛ̀ taa nɛ́ yeli ní lɛ̀lɛ ó lɛ̀lɛ wè, mi nìɛ mi Kulocɛliɛ síɛri wè. 4 Lɛ̀lɛ ó lɛ̀lɛ, a mi gbɛ́nɛ náari yeli ye mìɛni kɛnmɛ nɛ̄ bè, ki nɛ̂ puu mi mɛ́ fundaanra, 5 yeli pínɛnyɛnigɛ kire kɛnmɛ nɛ̄ bè ti jáarigɛ nɛ̄ gè, nɛ̀ ki líɛ cɛnbelige nɛ̄ gè nɛ̀ pɛ́nì nɔ̀ ŋɔ̀ wè. 6 Mi 'tɛ́ngɛ ki nɛ̄ nɛ̀ ki cɛ́n Kulocɛliɛ ŋáà wi 'kacɛ̀nnɛ náà séli lè nɛ ni kpínʔini nɛ́ yeli ní bèle, wi bé ni kúɔ bè sa láʔa fúɔ nɛ̄ gè.

7 Sɔ̀ngirɔ dáà dī mi nī yeli ye mìɛni kɔli mɛ́ gè bɛ̀ ki 'yɛli bè puu. Nɛ̀ taʔa gíi nɛ̄, yeli woli niī mi nàzɔn nɛ̄ wè, nɛ́ ki cɛ́n yeli ye mìɛni liɛlɛ yē baa dáà mi 'taa Kulocɛliɛ mɛ́ wè gìi ki 'mi kasuulere kúɔ dè nɛ́ a mi gbɛ́nɛ nyu nɛ kanʔa Kataanna Siɛnrɛ mɛ́ dè nɛ ti nyu nɛ láʔala wè. 8 Kulocɛliɛ wire wi 'ki cɛ́n nɛ́ mi ní, yeli ye mìɛni woli niī mi fungo nī gè kpuʔɔ gìi ki 'Zezi dɛ́nigɛ wuʔu kúɔ gè.

9 Mi náarigɛ kire sí gī gàa gè: yeli dɛ́nigɛ ki- puu kàa de taʔala de waa ki nɛ̄ súuri kacɛ́nnɛ nī lè nɛ́ laaduumɔ sɔ̀ngirɔ ní dè. 10 Ye- ki cɛ́n gìi ki 'nyuɔ nɛ̀ yɛli gè. Kire ki bé tí ye- puu cìilile, dìgire fùn Kirisi cɛngɛ gè. 11 Bɛ̀ yeli bé nyì sínmɛ kakpiʔiligele nɛ̄ gèle Zezi Kirisi wire fànʔa nɛ̄ gè, bèri kpuʔɔrɔ tari Kulocɛliɛ nɛ̄ wè, wi míʔɛ ki sí de gbùʔɔrɔ́.

Kirisi wire wī sìi wè

12 Mi siinyɛninɛ, mi nɛ ki caa ye- ki cɛ́n gìi ki 'mi taa gè, kire ki mìɛni nyɛ́nì kpíʔile nɛ̀ kɛn dè a ti 'kɛ́ yiʔɛ mɛ́ wī. 13 Fúɔ a kire 'ki kɛn náʔa kumadan nī gè nɛ́ siɛnnɛ sɛnminɛ ní bèle, a pe mìɛni 'ki cɛ́n dí wire kɛnmɛ nɛ̄ pe 'mi le náʔa kasuu nī wè. 14 Nɛ̀ pínɛ we siinyɛninɛ pálì nìʔɛnɛ wi koligo wuulo bèle, bà peli 'mi nyaa kasuu nī wè, a ki 'nàzorido nyɔ́gɔ pe nī kpuʔɔ pe Kulocɛliɛ siɛnrɛ nyu dè.

15 Nɛ̀ sí ki taa pàli 'tɔ̀ni nɛ Kataanna Siɛnrɛ jáari dè yejaʔa nɛ́ kàsii sɔ̀ngirɔ ní, pàli sí nɛ ti jáari nɛ́ sɔ̀ngijɛnrɛ ní. 16 Peli bálì bèle, piyē nɛ ki kpínʔini nɛ́ wìyedɛnigɛ ní, nɛ̀ taʔa gíi nɛ̄, pe 'ki cɛ́n mi yē náʔa gè bèri Kataanna Siɛnrɛ ti kányiʔɛ nyu gè dè tìí siɛnnɛ nɛ̄ bèle. 17 Bìli pe nyɛ́ni Kirisi wori nyu dè nɛ́ yejaʔa sɔ̀ngirɔ ní dè, peli sɔ̀ngirɔ ti wè cɛ̀nrɛʔ, peli nɛ ki caa bè kàa fàri mi fùrɔgɔ nɛ̄ gè wī, bà mi yē náʔa kasuu nī wè.

18 Kire bé sí gáa cúʔɔ ? A ki nɛ́ cɛ yē sɔ̀ngibiire ní pe ki kpínʔini yo, á kire 'laa kányiʔɛ ní pe ki kpínʔini yo, gìi mi 'cɛ́n gè, Kirisi Kataanna wori tiī nɛ jáari, tire ní mi nɛ mi fundaanra kpínʔini dè. M'bé ní cɛ yiʔɛ le de fundaanra kpínʔini wī. 19 Nɛ̀ taʔa gíi nɛ̄, mi 'ki cɛ́n kire gáà ki mìɛni kiī nɛ waa mi suɔdiʔɛ nī wī, yeli náarigɛ fànʔa nɛ̄ gè nɛ́ bɛ̀ Zezi lire nɛ mi sári wè.

20 Nɛ̀ yɛli nɛ́ gìi ní mi nɛ siri gè, nɛ́ mi sɔ̀ngirɔ ti taʔadiʔɛ ní gè, fìɛrɛ sì je ga tɔ́n mi nɛ̄ʔ mi de nyùgo kùrú de niiʔ. Bɛ̀ ki yē ŋɔ̀ wè m'béri Kirisi gbùʔɔrɔ́ wè mi sìi nī wè fíɛrɛ fùn, majo bɛ̀ mi kíni nɛ ki kpínʔini súuri gè, a mi yē sìi nɛ̄ yo, ale ki nɛ́ cɛ́nì nyaa mi 'yɛli bè kùu yo. 21 Ki 'nyaa mi sìi wi nyùgo ki mìɛni kire gī Kirisi wè; kùu wire wè, yataʔa gī. 22 Nɛ̀ sí ki taa a ki yē bè puu sìi nɛ̄ wè m'bé gbɛ̀ de kaala kúu ni- puu nɛ́ pìle ní wè, mi sì ń'nɛ̀ ki cɛ́n gìi mi 'yɛli bè nyíɛnɛ gɔ̀n gèʔ. 23 Katiɛyɛ siin yi nyɛ́nì mi píle: ki láa yē mi nɛ̄ bè kɛ́ bè sa puu nɛ́ Kirisi ní wè, kire ki 'pɔ́ri nɛ̀ fáala ti mìɛni nɛ̄ dè; 24 nɛ̀ sí ki taa yeli kɛnmɛ nɛ̄ bè, ki 'pɔ́ri mi- kò bile sìi nɛ̄. 25 Kire gè, mi 'tɛ́ngɛ ki nɛ̄ káaliyɛ wè ti nīʔ, m'bé kò bile bè puu nɛ́ yeli ye mìɛni ní bèle, gìi ki bé tí yeri waa yiʔɛmɛ tɛ́ngɛlɛ nī lè ye fundaanra taa. 26 A kire 'kpíʔile gè, yeli bé gbɛ̀ de nàgbuʔɔrɔ kpínʔini mi kɛnmɛ nɛ̄ bè pínɛnyɛnigɛ nɛ̄ gè nɛ́ Zezi Kirisi ní wè, a mi kɛ́nì koli nɛ̀ kɛ́ baa yeli tiʔɛ nī gè.

Ye- funyɔ pínɛ yè tɛ́ngɛlɛ cáanra nī dè

27 Gìi ki 'pɔ́ri gè, yeri yeli sìi tári wè yeri yɛligi nɛ́ ní dè, gìi ki bé tí a mi kɛ́nì kɛ́ bè sa nyaa yeli nɛ̄ bèle, á kire 'laa a mi nɛ́ cɛ wè baa yo, mi de yeli wori lúru dè, ki- nyaa yeli 'gbɛ̀nmɛ le nɛ̀ yeli sɔ̀ngirɔ pínɛ dè nɛ cáanri Kataanna Siɛnrɛ ti wuʔu nɛ̄ gè nɛ́ fungo ní gè nigbe, Kataanna Siɛnrɛ dáà nɛ̄ tɛ́ngɛlɛ ni yē lè. 28 Ye fǎga tí bé ki yaʔa bìli pe túngu nɛ́ yeli ní bèle, pe- céri kpúu yeli nɛ̄ púloʔ. Yeli lèbaanna lire nɛ ki tìí piyē nɛ waa cúʔɔgɔli mɛ́ wī, yeli bèle, yeli nɛ waa suɔgɔli mɛ́ wī; Kulocɛliɛ mɛ́ kire 'yɛ̀. 29 Ki 'nyaa Kulocɛliɛ wi 'kire taʔa dè yeli nɛ̄ Kirisi wire kɛnmɛ nɛ̄ bè, kire sì sí jo ye- tɛ́ngɛ wi nɛ̄ yákuɔ wī díɛʔ ! Yeli bèri wuʔɔ de pínɛ wi kɛnmɛ nɛ̄ bè wī. 30 Kire cáanra tire yeli 'mi nyaa mi nɛ cáanri dè, níɛ tíin nɛ ki lúru dí mi nɛ ki cáanra cáanri dè nɛ tíin wè.