Sɛbɛ péliwe ŋáà Piɛri 'sɛbɛ wè
Piɛri péliwe
Síɛrilɛ lè
1
1 Mi Piɛri wè,
Zezi Kirisi tundunwɔ wè,
mi nyɛ́nì sɛbɛ ŋáà tórigo wè yeli mɛ́ yeli bálì Kulocɛliɛ 'nyíɛnɛ nɛ̀ kɔ̀n bèle,
yeli bálì bīɛlɛ tɛ́ninɛ tiɛyɛ yáà nī nɛ́ ní nabɔnminɔ bèle,
baa Pɔnti tɛ́nimɛ nī bè,
nɛ́ Galasi tɛ́nimɛ ní bè,
nɛ́ Kapadɔsi tɛ́nimɛ,
nɛ́ Azii tɛ́nimɛ,
nɛ́ Biitinii tɛ́nimɛ nī bèa.
2 Weli Tuu Kulocɛliɛ wi 'yeli nyíɛnɛ nɛ̀ kɔ̀n nɛ̀ yɛli nɛ́ wi kele gálì ní wi yé tɛ́ngɛ nɛ̀ yaʔa faʔa gèb.
Nɛ́ míɛni Kulocɛliɛ Pìle ni nyɛ́nì yeli wàli nɛ̀ tɛ́ngɛ yeli de lúru Zezi Kirisi mɛ́ wè dí wi sìsiɛn ki nyɛrinyɛrilɛ ni- yeli cìilec.
Kulocɛliɛ wi- kpuʔɔrɔ nɛ́ yanyige kɛn gè yeli mɛ́ nìʔɛgɛ.
Weli nɛ Kulocɛliɛ gbùʔɔrɔ́ wè suɔlɔ wuʔu nɛ̄ gè
3 Weri Kulocɛliɛ gbùʔɔrɔ́ wè,
weli Kàfɔli Zezi Kirisi wi Tuu wè !
Wi nyinimɛ pi 'kpúʔɔ weli kɔli mɛ́ gè,
a wi 'sìi fɔnwɔ kɛn wè weli mɛ́ Zezi Kirisi wi nyɛ́yirile kɛnmɛ nɛ̄ bè kúbilo sunʔɔmɔ nī bè.
Kire sìi nī wè,
weli nyɛ́nì sɔ̀ngirɔ taʔadiʔɛ kányiʔɛ taa,
sɔ̀ngirɔ taʔadiʔɛ wiʔid
4 gáà ki yē kɔrigɔ gáà wi nyɛ́nì gbòbori nɛ̀ yaʔa weli mɛ́ gè.
Kire kɔrigɔ kiǐ gbɛ̀ cúʔɔ bè nyaaʔ,
nɛ́ míɛni kiǐ gbɛ̀ núʔɔ gèʔ;
ki cɛ̀nmɛ piǐ gbɛ̀ kúɔ bè nyaaʔ.
Kire kɔrigɔ kiī baa tɛ́ngɛgɛ yeli mɛ́ nyìʔɛnɛ nī lè.
5 Kulocɛliɛ nɛ yeli wéli nɛ́ wi fànʔa ní gè bɛ̀ yeli 'tɛ́ngɛ wi nɛ̄ wè,
kire ga buu yeli gbɛ̀ suɔlɔ taa lè nàa wi 'gbòbori nɛ̀ yaʔa lè bè ba ni tìɛ làzɛnnɛ nī lè.
6 Ki sí n'gɛ gàa nɛ̄ yeli nɛ fundaanra kpínʔini dè,
a ki sí cɛ́nì nyaa yeli 'yɛli bè funbiɛnrɛ taa lɛ̀lɛ náà cɛ̀ri nī lè kagbɛnyɛ feliye nìʔɛyɛ nɛ̄ yè.
7 Pe nɛ̂ tiɛ le wè kàsun nī gè bè wi nyɛgɛ wi- cìile,
nɛ̀ ki yaʔa tiɛ wè,
wiī yakaa gáà ki bé gbɛ̀ cúʔɔ gè.
Bɛ̀ míɛni ki yē yeli tɛ́ngɛlɛ mɛ́ lè,
nàa nī lagbɛnrɛ yɛgɛ nɛ̀ tóri tiɛ nɛ̄ wè.
Lire míɛni 'yɛli bè siʔɛwelige taa bè ki cɛ́n a ki yē ni 'nyuɔ lè.
A ni 'sɔ́migɔ nɛ̀ nìre wáa lè,
yeli bága gbùʔɔrilɔ nɛ́ kpuɔmɔ nɛ́ kpuʔɔrɔ taa a Zezi Kirisi kɛ́nì wìi tìɛ wè.
8 Yeli sì fìɛ Zezi nyaa wèʔ,
nɛ̀ ki yaʔa wi 'yeli dɛ́ni.
Yeli wè nɛ wi nyaʔa píra ŋáà nī wèʔ,
nɛ̀ ki yaʔa yeli 'tɛ́ngɛ wi nɛ̄.
Kire kɛnmɛ nɛ̄ fundaangbuɔrɔ ti 'yeli nyì,
fundaanra dáà ti kpuɔmɔ pi 'niʔɛ bè,
nɛ̀ pínɛ ti 'kpúʔɔ nɛ̀ tóri fúɔ tiǐ cɛ gbɛ̀ juu nyuɔ nīʔ.
9 Nɛ́ ki cɛ́n yeli nyɛ́nì yeli tɛ́ngɛlɛ tɔ̀ni taa wè,
ŋàa wī suɔlɔ lè.
10 Kire suɔlɔ náà wuʔu nɛ̄ gè,
Kulocɛliɛ siɛnjuulo pe yé caala sɔ́migɔ nɛ̀ kpíʔile,
a pe 'suɔlɔ wuʔu juu gè.
Nɛ́ míɛni pe yé juu kpuʔɔrɔ wori nɛ̄ dè dàa Kulocɛliɛ bága kɛn yeli mɛ́ dè.
11 Pe 'puu nɛ ki caa bè ki cɛ́n lɛ̀lɛ líì nī nɛ́ kele gílì ní ke bága kpíʔile gèle,
nɛ̀ yɛli nɛ́ gàa ní Kirisi Pìle ni cé tìɛ pe nɛ̄ wè.
Nɛ́ ki cɛ́n Kirisi Pìle ni cé puu pe nī nɛ ki nyu nɛ yɛri wuʔɔyɔ nyáà Kirisi wi bé ba taa yè,
nɛ́ kpuɔmɔ báà wi bága taa kire kàduʔumɛ gè.
12 Kulocɛliɛ 'puu nɛ ki tìí pe nɛ̄ nɛ́ jo kire siɛnrɛ dáà dè tiì puu peli woriʔ,
fúɔ yeli wori.
Píra ŋáà nī wè,
bàli pe Kataanna Siɛnrɛ nyu dè yeli mɛ́ wè,
pe 'ki kele gálì juu gèle nɛ̀ kúɔ yeli mɛ́ Kulocɛliɛ Pìle ni fànʔa nɛ̄ gè,
nàa Kulocɛliɛ 'tìrige a ni 'kɔ́n nyìʔɛnɛ nī lè.
Kele kálì gīɛlɛ nyìʔɛnɛ tundunminɔ tíimɛ pe caa bè ke cɛ́n.
Tɛ́ngɛfɔlilɔ piyē wàlidɛngɛlɛ Kulocɛliɛ mɛ́
13 Kire nɛ̄ ye- yeli sɔ̀ngirɔ gbòbori dè ye yaʔa,
ye sí kò nyɛminɛ.
Ye- yeli sɔ̀ngirɔ taʔa dè kpuʔɔrɔ nɛ̄ dè dàa ti bága kɛn yeli mɛ́ dè a Zezi Kirisi kɛ́nì wìi tìɛ wè.
14 Majo bɛ̀ pìile tíɛlɛ bàli pe lúru bèle,
ye fǎga ní ki yaʔa céri kanɛdanʔana keri yeli kàrigíʔ,
gàli ke 'puu yeli nɛ̄ faʔa gè,
lɛ̀lɛ níì nī yeli sì cé fìɛ Kataanna Siɛnrɛ cɛ́n dèʔ.
15 Gìi sí gī baa gè,
yeli míɛni 'yɛli bè kò tiɛlɛ fùn yeli tánʔagɛnmɛ pi mìɛni nī bè,
nɛ̀ yɛli nɛ́ Kulocɛliɛ wi tiɛlɛfun kɛnmɛ ní bè,
wire ŋáà wi 'yeli yeri wè.
16 Nɛ́ ki cɛ́n ki nyɛ́nì sɛbɛ nɛ́ jo:
Yeli 'yɛli bè puu tiɛlɛ fùn,
nɛ́ ki cɛ́n mi yē tiɛlɛ fùne.
17 Yeli nɛ Kulocɛliɛ náari wè níɛ wi yeri yeli Tuu,
wire ŋáà wiī nɛ siɛn ó siɛn kàyuʔu nyu gè;
wi wè wàa yigi wàa nīʔ.
Kire nɛ̄,
lɛ̀lɛ náà ni 'kò yeli mɛ́ dàala nɛ̄ lè,
yeri yeli sìi tári wè yeri ki tìí yeli nɛ fìʔɛ́ Kulocɛliɛ nɛ̄ wè.
18 Yeli sìi tánʔagɛnmɛ báà yeli taa yeli tobilo mɛ́ bèle,
pire yé puu tɔ̀ni fùn.
Nɛ̀ sí ki yaʔa yeli nyɛ́nì ki cɛ́n,
Kulocɛliɛ 'yeli fùgu nɛ̀ suɔ lagbɛnrɛ nɛ̄ tire ti mìɛni mɛ́.
Kire sì cé kpíʔile nɛ̀ yɛli nɛ́ yɛrɛ dáà ní ti bé gbɛ̀ cúʔɔ dèʔ,
majo wali kire ga laa tiɛʔ.
19 Wi 'yeli suɔ lagbɛnrɛ nɛ̄ nɛ́ Kirisi sìsiɛn ní wī,
wire ŋáà wi 'puu bɛ̀ kakuɔrɔ sìnbapile tíɛlɛ lè,
cìiliwe nɛ́ ní kpɔlidiɛlɛ fùnf.
20 Bè ki yaʔa duniya wiì cé fìɛ faan wèʔ,
Kulocɛliɛ cé wi nyíɛnɛ nɛ̀ kɔ̀n kire baara nɛ̄ dè.
Làzɛnnɛ náà nī lè,
a wi 'ki yaʔa yeli 'wi cɛ́n yeli nyuɔmɔ wuʔu nɛ̄ gè.
21 Kirisi wire wi 'ki yaʔa a yeli 'tɛ́ngɛ Kulocɛliɛ nɛ̄ wè,
wire ŋáà wi 'Kirisi nyɛ́ wè nɛ̀ yige kúbilo nī bèle nɛ́ kpuɔmɔ kɛn bè wi mɛ́ wè,
kire ga buu yeri yeli tɛ́ngɛlɛ nɛ́ yeli sɔ̀ngirɔ tari dè Kulocɛliɛ nɛ̄ wè.
22 Yeli nyɛ́nì yeli funyɔ cìile yè bà yeli 'kányiʔɛ siɛnrɛ lúʔu dè,
kire ga buu ye- yìye sɔ́migɔ yè dɛ́ni kányiʔɛ ní,
bɛ̀ yeli yē tɛ́ngɛfɔlilɔ narigɛ gè.
Kire nɛ̄ ye mìɛni nigbe nigbe ye- yìye dɛ́ni kpuʔɔ,
nɛ́ yeli funjiiliye yi mìɛni ní.
23 Nɛ́ ki cɛ́n yeli nyɛ́nì sìi fɔnwɔ taa wè,
sìi ŋáà wi 'kɔ́n yatanʔara mɛ́ dè dàa tiǐ gbɛ̀ cúʔɔ dèʔ,
wi wè bɛ̀ yatanʔara tíɛlɛ dàa ti córi dèʔ.
Yeli 'kire sìi taa wè Kulocɛliɛ siɛnrɛ kɛnmɛ nɛ̄ bè,
dàa dī wiire níɛ mɔgi súuri dè.
24 Nɛ́ ki cɛ́n ki nyɛ́nì sɛbɛ nɛ́ jo:
Lewiile pe mìɛni yē bɛ̀ nyàʔa tíɛlɛ,
pe cɛ̀nmɛ pi mìɛni yē bɛ̀ nyàʔa fiɛnrɛ tíɛlɛ;
nyàʔa ki nɛ̂ waʔa,
ki fiɛnrɛ ti nɛ̂ tuu.
25 Nɛ̀ ki yaʔa Kàfɔli wi siɛnrɛ tire nɛ mɔgi súurig.
Kire siɛnrɛ tire dī Kataanna Siɛnrɛ dè dàa pe 'juu yeli mɛ́ dè.