2
1 Kire nɛ̄ funbinʔɛ gè,
nɛ́ káfinɛrɛ ní dè,
nɛ́ jànvaa funyɔ ní yè,
nɛ́ nyabiɛnnɛ ní lè,
nɛ́ siɛn sànʔaga ní gè,
ye- tire ti mìɛni yaʔa dè.
2 Bɛ̀ yírimɛ láa cî pìfinʔɛ taa gè kɛnmɛ bíì nɛ̄ bè,
ye- Kulocɛliɛ siɛnrɛ láa yaʔa gè ki de yeli taʔa bɛ̀ yírimɛ tíɛlɛ bàa pi 'cìile bè,
kire ga buu yeli de liʔi bè suɔlɔ sɔ́migɔ lè bè taa,
3 a ki yē yeli nyɛ́nì ki laala nɛ̀ ki cɛ́n kɛnmɛ bíì nɛ̄ Kàfɔli wi 'nyuɔ wèa.
Tɛ́ngɛfɔlilɔ piyē Kulocɛliɛ Gbùʔɔrɔsaʔa
4 Kàfɔli wire wī sìndɛnigɛ wowiʔi gáà siɛnnɛ pe 'wáa gè,
nɛ̀ ki yaʔa Kulocɛliɛ wi 'ki nyíɛnɛ nɛ̀ kɔ̀n;
kiī lagbɛnrɛ wuʔu wi mɛ́.
Kire nɛ̄,
bɛ̀ yeli nɛ sìʔɛrɛ́ nɛ kpɔni Kàfɔli nɛ̄ wè,
5 yeli ye mìɛni yē kàdɛniyɛ wowiiye nyáà Kulocɛliɛ wiī nɛ líi nɛ wi Pìle Gbùʔɔrɔsaʔab faanri gè.
Nɛ̀ taʔa ki nɛ̄,
yeli yē wi kacuɔnrilɔ wàlidɛngɛlɛ nɛ kakuɔrɔ yakɔnrɔ kanʔa wi mɛ́,
pìle kɔli mɛ́ gè,
kakuɔrɔ dáà nɛ̄ wi nɛ̂ fɔ̀li dè,
Zezi Kirisi kɛnmɛ nɛ̄ bè.
6 Nɛ́ ki cɛ́n ki nyɛ́nì sɛbɛ Kulocɛliɛ siɛnsɛbɛrɛ nī dè nɛ́ jo:
Ki n'gɛ,
baa Siyɔn kàʔa nī gè,
mi nɛ sìndɛnipelige tɛ́ngi gè
kàluulo nī lè,
gàa ki 'saʔa cò gè
nɛ̀ yérige gè,
sìndɛnigɛ gáà mi 'nyíɛnɛ nɛ̀ kɔ̀n,
lagbɛnrɛ wuʔu gè.
Siɛn ŋáà wi 'tɛ́ngɛ
kire sìndɛnigɛ nɛ̄ gè,
kire gáà gī Kirisi wè,
fìɛrɛ sǐ wi taa púloʔc.
7 Kire nɛ̄,
wiī lagbɛnrɛ wuu yeli mɛ́,
yeli bálì ye 'tɛ́ngɛ wi nɛ̄ bèle.
Nɛ̀ ki yaʔa,
bàli piyè tɛ́ngɛ wi nɛ̄ bèleʔ,
Sìndɛnigɛ gíì saafaanna
pe cé wáa gè,
kire ki kɛ́nì kò saʔa kàluulo
kàdɛnipelige gè,
gàa ki 'saʔa cò gè
nɛ̀ yérige gèd.
8 Nɛ́ míɛni ki 'juu tiʔɛ káà nī nɛ́ jo:
Sìndɛnigɛ káà gī gàa nɛ̄ piyē nɛ
kúrugu gè,
sìndɛnigɛ káà gī gàa nɛ̄ piyē nɛ
láʔala nɛ tun bèlee.
Siɛnnɛ piyē nɛ kúrugu nɛ tun nɛ́ ki cɛ́n piyè lúʔu Kulocɛliɛ siɛnrɛ mɛ́ dèʔ;
kire sí Kulocɛliɛ yé nyíɛnɛ nɛ̀ kɔ̀n pe mɛ́.
9 Nɛ̀ ki yaʔa yeli bèle,
yeli yē siɛnfelige gáà Kulocɛliɛ wi 'nyíɛnɛ nɛ̀ kɔ̀n gè,
nɛ́ ní Kùlofɔli wi kacuɔnrilɔ bèle,
nɛ́ ní kùlo láà wuulo wàlidɛngɛlɛ wi mɛ́,
nɛ́ ní Kulocɛliɛ wi wuulo.
Wi 'yeli yeri nɛ̀ yige yebilige nī gè ye- puu kpìɛnmɛ nī bè bàa pi 'nyuɔ nɛ̀ tóri bè,
kire ga buu yeli de wi kakpoliyo nyu yèf.
10 Faʔa gè yeli sì cé puu wi siɛnfeligeʔ,
nɛ̀ ki yaʔa píra ŋáà nī wè,
yeli yē Kulocɛliɛ wi siɛnfelige.
Faʔa gè Kulocɛliɛ wiì cé nyinimɛ taa yeli nɛ̄ʔ,
píra ŋáà nī wè wi sí nyɛ́nì nyinimɛ taa yeli nɛ̄g.
Tánʔagɛnmɛ báà pi 'nyuɔ bè duniya siɛnnɛ sunʔɔmɔ nī bè
11 Nɛ siinyɛninɛ,
yeli yē nabɔnminɔ tɛ́ninɛ dàala nɛ̄ lè nɛ́ ní nabɔnnyaarilɛ.
Kire nɛ̄ mi nɛ yeli fiɛn wī,
ye- yìye cò céri kanɛdanʔana nɛ̄ gèle gàli ke túngu nɛ́ yeli pìle ní lè.
12 Ye- yeli tánʔagɛnmɛ yaʔa bè pi- nyuɔ sìndɛngɛlɛ sunʔɔmɔ nī bè,
kire ga buu a piyē nɛ tíri yeli nɛ̄ wè nɛ́ jo yeli nɛ kapiʔile kpínʔini wè,
peli tíimɛ bága ba yeli kacɛ̀ngbiʔiligele nyaa gèle béri Kulocɛliɛ 'kpóri wè wi pɛnjɛngɛ nī gè.
13 Bè Kàfɔli kpúʔɔ wè,
yeri fànʔafɔlilɔ pe mìɛni kpóri,
a ki yē kùlofɔli wè,
wire ŋáà mɛ́ kàfɔligɔ ki mìɛni ki yē gè,
14 kire ga laa siɛnkpolilo bèle,
peli bálì wi nyɛ́nì tɛ́ngɛ pe- kàyuʔu nyu kapiigbiʔilile nɛ̄ bèle béri kpuʔɔrɔ tari dè kacɛ̀ngbiʔilile nɛ̄ bèle.
15 Nɛ́ ki cɛ́n Kulocɛliɛ nyɛ́ni kaala nī,
a yeli nɛ kacɛ̀ngɛ kpínʔini gè yeli bé gbɛ̀ lelabiliyɛ yi kanaasinjɛ́nnɛ siɛnrɛ kúɔ dè.
16 Yeri tári siɛnnɛ bálì tíɛlɛ pe yē pìyemɛ bèle,
nɛ̀ sí ki yaʔa yeli fǎga kire kpíʔile tànʔa taadiʔɛ majo yeli bé gbɛ̀ri kapiʔile kpínʔini wīʔ,
bɛ̀ yeli yē Kulocɛliɛ sùkulolo bèle.
17 Yeri kpuʔɔrɔ tari siɛnnɛ pe mìɛni nɛ̄.
Ye- yeli siinyɛninɛ tɛ́ngɛfɔlilɔ woli yaʔa lè ni- kpúʔɔ yeli mɛ́.
Yeri fìʔɛ́ Kulocɛliɛ nɛ̄ wè.
Yeri kpuʔɔrɔ tari kùlofɔli nɛ̄ wè.
18 Yeli bálì bīɛlɛ baakuɔlɔh bèle,
yeri yìye cɛ́rigi yeli kàfɔlilɔ mɛ́ bèle nɛ́ kpuʔɔrɔ ti mìɛni ní dàa ti 'yɛli pe nɛ̄ dè.
Kiì yɛli yeli ki kpíʔile bàli mɛ́ pe funyɔ yi 'nyuɔ nɛ́ nyígi yè yákuɔ wèʔ,
ye- ki kpíʔile míɛni bàli mɛ́ pe funyɔ yi 'gbɛ̀n yè.
19 Nɛ́ ki cɛ́n kire nyɛ́nì nyuɔ Kulocɛliɛ yiʔɛ mɛ́ gè a siɛn nɛ kpàricogo kpínʔini wuʔɔyɔ lɛ̀lɛ nī lè bɛ̀ wi lúru Kulocɛliɛ mɛ́ wè,
nɛ̀ ki yaʔa wiì yakaa kpíʔile gàa ki 'yɛli nɛ́ wuʔɔgɔ ní gèʔ.
20 Nɛ̀ sí ki taa kpuʔɔrɔ díi dī baa a yeli nɛ wuʔɔ bɛ̀ yeli 'kapiile kpíʔile lé ?
A ki sí yē yeli nɛ kacɛ̀ngɛ kpínʔini gè nɛ̀ ki yaʔa yeli nɛ wuʔɔyɔ tari yè níɛ yi kpàri nɛ cògí yè,
kire nyɛ́nì nyuɔ Kulocɛliɛ yiʔɛ mɛ́ gè.
21 Kire wuʔu nɛ̄ Kulocɛliɛ yé yeli yeri,
nɛ́ ki cɛ́n Kirisi míɛni nyɛ́nì wuʔɔ yeli wuʔu nɛ̄ gè.
Wi sí nyɛ́nì koligo tìɛ gè yeli nɛ̄ kire ga buu yeli- taʔa wi tùluyo nɛ̄ yè.
22 Wiì kapiile yafiɛn kpíʔileʔ;
káfinɛrɛ sì kɛ́nì yiri nɛ̀ nyaa wi nyuɔ nī gèʔi.
23 Bà pe 'wi tiʔɛlɛ wè,
wiì cɛ́nì tiʔɛlilɛ núgo lè pe mɛ́ʔ.
Bà pe 'wi wuʔɔ wè,
wiì siɛnpiire juu pe mɛ́ʔ,
a wi 'wìi yaʔa Kulocɛliɛ kiyɛ nī,
ŋàa wiī nɛ kàyuʔu nyu gè nɛ́ sínmɛ ní bè.
24 Wi 'weli kapiʔile tugo gèle wi céri nī dè tiiparigɛ nɛ̄ gè,
kire ga buu weli- kùu kapiile kɔli mɛ́ gè bé sí puu sìi nɛ̄ sínmɛ kɔli mɛ́ gè.
Wi kpúɔnluɔlɔ lire kɛnmɛ nɛ̄ yeli nyɛ́nì puʔɔj.
25 Nɛ́ ki cɛ́n yeli cé puu bɛ̀ sìnbaara tíɛlɛ dàa ti 'pùunni dèk,
nɛ̀ ki yaʔa píra ŋáà nī wè yeli nyɛ́nì koli nɛ̀ pɛn yeli nàʔavɔli kúrugu wè,
ŋàa wi yeli wéli wè.