Piɛri 1 3

1 Yeli bèle cɛlilɛ bèle, kire kanumɔ nɛ̄ bè, yeri yìye cɛ́rigi yeli pɔlilɔ mɛ́ bèle, kire ga buu a pàli cɛ́nì cíi, piyè tɛ́ngɛ Kulocɛliɛ siɛnrɛ nɛ̄ dèʔ, pe- gbɛ̀ fɔ̀li bè tɛ́ngɛ pe cɛlilɛ tánʔagɛnmɛ pire kɛnmɛ nɛ̄ bè, siɛnrɛ fùn, 2 a pe 'ki nyaa yeli tánʔagɛnmɛ piī cìilibe nɛ́ ní fíɛrɛ ní Kulocɛliɛ kɔli mɛ́ gè.

3 Ye fǎga de céri cɛ̀nmɛ pire yákuɔ caaʔ, majo gàa gī bè nzìire tíin dè lagbɛnrɛ nɛ̄, á kire 'laa bèri tiɛ yɛrɛ nii dè, á kire bɛ̀ʔ lagbɛnrɛ burudo. 4 ʔéʔe, yeri fungo cɛ̀nmɛ pire caa, bàa piǐ gbɛ̀ cúʔɔ bèʔ, bàa pi yē funjɛ̀ngɛ nɛ́ funnyige gè. Tire dáà dī lagbɛnrɛ wori dè Kulocɛliɛ yiʔɛ mɛ́ gè. 5 Kire cɛ̀nmɛ báà pire pi 'puu faʔa faʔa cɛlilɛ mɛ́ bèle, bàli pe 'puu wàlidɛngɛlɛ Kulocɛliɛ mɛ́ wè nɛ́ pe sɔ̀ngirɔ taʔa dè wi nɛ̄ wè. Pe yé pìye cɛ́rigɛ pe pɔlilɔ mɛ́ bèle, 6 bɛ̀ tíɛlɛ wè, wire ŋáà wi yé ki kpíʔile gàa yé juu gè, bà wi kɛ́nì wi yeri «mi kàfɔli». Yeli nyɛ́nì kò wi pìile a yeli nɛ kacɛ̀ngɛ kpínʔini gè, fíɛrɛ fùnʔ.

7 Yeli labɔlilɔ bèle, kire kanumɔ nɛ̄ yeri pínɛ de tári nɛ́ yeli cɛlilɛ ní bèle nɛ́ funduuyo ní; yeli 'ki cɛ́n cɛliwɛ fànʔa ki 'cɛ́ri nàguɔ wuʔu nɛ̄ gè. Yeri yeli cɛlilɛ kpóri bèle, nɛ́ ki cɛ́n pe bága wúɔ bè bànguɔ sìi taa wè kɔrigɔ nɛ́ yeli ní, Kulocɛliɛ kpuʔɔrɔ kɛnmɛ nɛ̄ bè. Yeri ki kpínʔini bɛ̀, kire ga buu yakaa fǎga yeli náariyɛ yérige yèʔ.

Tɛ́ngɛfɔlilɔ pe bé gbɛ̀ wuʔɔyɔ taa pe sínnɛ kɛnmɛ nɛ̄ bè

8 Bɛ̀ sí ki yē gè, yeri nyu yeri lúru yìye mɛ́, yeli ye mìɛni bèle. Yeri nyinimɛ taʔa yìye nɛ̄ yeli wuʔɔyɔ lɛ̀lɛ nī lè. Ye- wìyedɛnigɛ yaʔa gè ki- yeli nyì nɛ́ nyinidaaguugo ní gè, yeri yìye cɛ́rigi. 9 Ye fǎga kapiʔi tíʔɛ bè kapiʔi fuʔɔ tɔ́n gèʔ. Ye fǎga tiʔɛlilɛ tiʔɛ bè tiʔɛlilɛ fuʔɔ tɔ́n gèʔ. Kire sìndiʔɛ nī gè, yeri diba siɛnrɛ siɛnnugoro kanʔa dè ki siɛnnɛ mɛ́ bèle. Nɛ́ ki cɛ́n kire wuʔu nɛ̄ Kulocɛliɛ 'yeli yeri kire ga buu yeli- diba taa wè yeli tíimɛ bèle. 10 Nɛ́ ki cɛ́n ki 'juu siɛnsɛbɛrɛ nī dè nɛ́ jo:

A ŋìi nɛ caa sìi wi 'wi dɛ́ni wè,

bè yacɛ̀nrɛ nyaa wi sìi cɛnyɛ nī yè,

wi- wi nyinɛ cò lè kapiʔi nɛ̄ gè,

wi- wi nyasɛnyɛ cò yè

káfinɛrɛ siɛnrɛ nɛ̄ dè.

11 Wi- láʔa kapiʔi nɛ̄ gè,

wiri kacɛ̀ngɛ kpínʔini,

wiri yanyige caa gè, wi- ki cìra wi cò.

12 Kàfɔli wi nyapigele kiyē siɛnsinminɛ nɛ̄ bèle,

wi ngbúʔulo kiyē múgugolo bè lúʔu a piyē nɛ náari wi mɛ́ wè.

Nɛ̀ ki yaʔa Kàfɔli wiī nɛ túngu nɛ́ kapiigbiʔilile ní bèle.

13 A yeli nɛ ki caa nɛ́ lèbaanna ní bèri kacɛ̀ngɛ kpínʔini gè, ŋáa wi bé kapiʔi kpíʔile yeli nɛ̄ ? 14 A ki sí cɛ́nì nyaa wuʔɔgɔ 'nɔ̀ yeli nɛ̄ wè, bɛ̀ yeli nɛ kasingele kpínʔini gèle, yeli wuʔu kiī tànʔa. Ye fǎri fìʔɛ́ siɛnnɛ nɛ̄ bèleʔ, yeli funyɔ yi fǎri nyaʔamiʔ. 15 Nɛ̀ ki yaʔa ye- kpúʔɔ wè yeli funyɔ nī yè; wi yē yeli Kàfɔli. Ye- puu gbòboriyaʔala bè siɛnnugoro kɛn dè wàa mɛ́ a wi 'yeli yúgo wè, nɛ́ jo gáa nɛ̄ sɔ̀ngirɔ taʔadiʔɛ gáà kiī yeli mɛ́ wè. 16 Ye sí siɛnnugoro kɛn dè nɛ́ funnyige ní nɛ́ ní. Ki 'yɛli yeli funyɔ yi- kò fìiye Kulocɛliɛ yiʔɛ mɛ́ gè. Bɛ̀ ki bé puu a siɛnnɛ kɛ́nì yeli tánʔagɛnmɛ nyaa bè, bàa pi 'nyuɔ bè bɛ̀ yeli yē pínɛnɛ nɛ́ Zezi Kirisi ní wè, a piyē nɛ yeli míʔɛ córi gè, kire siɛnnɛ bálì bèle, fìɛrɛ ti bé tɔ́n pe nɛ̄. 17 A ki yē Kulocɛliɛ nyɛ́ni kaala lè, ki 'pɔ́ri yeli de wuʔɔ kacɛ̀ngbiʔilige nī gè, sɛ́ni yeli de wuʔɔ kapiigbiʔilige nī gè.

18 Nɛ́ ki cɛ́n Kirisi wire tíimɛ nyɛ́nì wuʔɔ tɔligɔ nigbe péʔ siɛnnɛ pe kapiʔile kɛnmɛ nɛ̄ bè. Wire ŋáà wi 'puu sínwɛ wè, a wi 'kùu siɛnnɛ sìnzinmɛ sìndiʔɛ nī, kire ga buu wi- yeli kɔ́ri bè pɛn Kulocɛliɛ mɛ́ wè. Pe 'wi kpúu céri nɛ̄ dè, a ni sí wi nyɛ́ a wi 'kò sìi nɛ̄. 19 Lire fànʔa ní a wi sɛ́nì Kulocɛliɛ siɛnrɛ juu dè kúbilo mɛ́ bèle kasuu nī wè. 20 Kire kúbilo pe yé puu bàli pe 'sìnluʔumɔ kpíʔile Kulocɛliɛ mɛ́ wè, lɛ̀lɛ líì nī Kulocɛliɛ wi yé fungo nyígi gè á nɛ kpínʔini gè. Kire cé nyaa siɛnnɛ kataanri yákuɔ, bàli pe cé jíin kɔ́rikpuʔɔ nī gè, a kire 'pe suɔ kàsakpiile luʔɔ mɛ́ gè.

21 Luʔɔ gáà ki yé puu fìɛ nɛ kɛnmɛ tìí bè. Batɛmi wi wè nɛ céri núʔɔmɔ láʔala bèʔ, nɛ̀ ki yaʔa wiī nɛ ki tìí siɛn wi 'wìi kɛn nɛ̀ láʔa Kulocɛliɛ mɛ́ nɛ́ funviige ní. Bɛ̀ Zezi Kirisi 'nyɛ́ nɛ̀ yiri wè, batɛmi wi 'kò píra ŋáà nī wè, kaala láà nàa ni ki tìí Kulocɛliɛ nyɛ́nì weli suɔ wè. 22 Zezi Kirisi wire wè, wi 'kɛ́ nī, baa wi yē tɛ́niwɛ Kulocɛliɛ kàliige mɛ́ gè. , nɛ́ kàfɔligɔ feliye, nɛ́ fànʔafɔligɔ feliye ní yè, yire yi mìɛni yē wi fànʔa láara gè.