4
1 Kire nɛ̄,
bɛ̀ Kirisi wi 'wuʔɔ wi céri nī dè,
kire sɔ̀nginuro ti- puu yeli mɛ́ bè yeli gbòbori bè yaʔa cáanra wuʔu nɛ̄ gè.
Nɛ̀ taʔa gíi nɛ̄,
ŋàa wi 'wuʔɔ wi céri nī dè,
wi 'kúɔ nɛ́ kapiile ní lè.
2 Bɛ̀ sí ki yē gè,
yeli sìisɛnwɛ nī wè dàala nɛ̄ lè,
yeli 'yɛli bè Kulocɛliɛ wi nyɛ́ni kaala fori lè;
kire wè bèri siɛnnɛ kanɛdanʔana kpínʔini wīʔ.
3 Yeli nyɛ́nì lɛ̀lɛ sáamɛ líɛ nɛ sìndɛngɛlɛ nyɛ́ni kele kpínʔini gèle,
nɛ kanyaʔamirɛ kpínʔini dè yeli sìi nī wè,
nɛ́ céri kanɛdanʔana ní gèle,
nɛ́ sungbuɔdinre ní dè,
nɛ́ kò nɛ waa kakolido kpíʔilediɛyɛ ní yè,
nɛ́ sungbuɔdiɛyɛ ní yè,
níɛ tètii kele kpínʔini gèle yasunro tiɛyɛ nī yè.
4 Píra ŋáà nī wè,
kire siɛnnɛ bálì bèle,
ki nɛ̂ puu pe mɛ́ funwuɔrɔ a pe 'ki nyaa yeli wè nɛ ŋàʔaná nɛ jiin pe kanuʔɔniʔɛrɛ nī dèʔ.
Kire nɛ̄ pe nìɛ yeli teri.
5 Nɛ̀ ki yaʔa Kulocɛliɛ bága pe yúgo nɛ́ ti ní,
wire ŋáà wi 'gbòbori nɛ̀ yaʔa bè kàyuʔu juu gè siɛnwiile nɛ̄ bèle nɛ́ kúbilo ní bèle.
6 Kire kɛnmɛ nɛ̄ Kataanna Siɛnrɛ ti yé juu siɛnnɛ bálì mɛ́ bèle sɛ́ni pe 'kùu wè.
A ki cɛ́nì nyaa siɛnnɛ pe 'kàyuʔu juu pe nɛ̄ céri kɔli mɛ́ gè,
pe bé kò sìi nɛ̄ Kulocɛliɛ yiʔɛ mɛ́ gè wi Pìle kɛnmɛ nɛ̄ bè.
7 Yɛrɛ ti mìɛni kúɔlɛlɛ niī nɛ sìʔɛrɛ́ nɛ nɔ̀gí.
Kire kɛnmɛ nɛ̄,
yeri yìye ciʔige,
ye- puu nyɛminɛ kire ga buu yeli gbɛ̀ri náari.
8 Tire dáà ti mìɛni nī dè,
ye- yìye dɛ́ni kpuʔɔ,
nɛ́ ki cɛ́n dɛ́nigɛ kiī nɛ kapiiniʔɛgɛlɛ kúua.
9 Ye- fɔ̀li yeri yeli siinyɛninɛ tìrigí bèle yeli saaya nī yè,
kúnʔɔrilɔ fùn.
10 Kulocɛliɛ nyɛ́nì liʔɛlɛ kɛn yeli mɛ́,
siɛn ó siɛn nɛ́ wi liɛlɛ.
Kire nɛ̄ siɛn ó siɛn wi 'yɛli bèri baara nɛ́ wi liɛlɛ ní lè bèri bìli pe màakuu nyuʔɔ wè,
kire ga buu yakɛnyɛ nyáà yeli 'taa Kulocɛliɛ mɛ́ wè,
nyàa feliye yi 'niʔɛ yè,
ye- yi cò cɛ̀ngɛ.
11 A ŋìi yē nɛ Kulocɛliɛ kele nyu gèle tɛ́ngɛfɔlilɔ gboli nī lè,
wi de ki kpínʔini bèri Kulocɛliɛ siɛnrɛ nyu dè de cìilé.
A ŋìi liɛlɛ yē bèri kele kúu gèle,
wiri ke kúu nɛ́ ŋɔri dáà ní Kulocɛliɛ wi 'kɛn wi mɛ́ dè.
Ki 'yɛli ti mìɛni de kpínʔini bè kpuʔɔrɔ taʔa Kulocɛliɛ nɛ̄,
Zezi Kirisi wire kɛnmɛ nɛ̄,
wire ŋáà nɛ̄ kpuʔɔrɔ ti 'yɛli nɛ́ fànʔa ní gè lɛ̀lɛ ó lɛ̀lɛ nī lè.
Ki- taa ki puu bɛ̀ !
Yeri fundaanra kpínʔini a yeli nɛ wuʔɔ Kirisi wuʔu nɛ̄ gè
12 Nɛ siinyɛninɛ,
kiì yɛli ki- puu funwuɔrɔ yeli mɛ́ʔ bà puuwelige kiī yeli nɛ̄ lɛ̀lɛ náà nī lè gàa ki yē kàsunkpuʔɔ tíɛlɛ gèʔ,
majo kaala láà nī nàa niì yɛli lèʔ.
13 Gìi ki 'yɛli gè,
yeri fundaanra kpínʔini bɛ̀ yeli nɛ liɛlɛ líi Kirisi wuʔɔgɔ nī gè;
kire yē yeli bága de muguri kpuʔɔ lɛ̀lɛ líì nī Kirisi kɛ́nì wi kpuɔmɔ tìɛ bè.
14 A siɛnnɛ piyē nɛ yeli teri wè bɛ̀ yeli yē Kirisi wuulo bèle,
yeli wuʔu kiī tànʔa,
nɛ́ ki cɛ́n Kulocɛliɛ Pìle lè,
nɛ́ wi kpuɔmɔ ní bè,
lire yē tɛ́ninɛ yeli nī.
15 Kire nɛ̄,
siɛn sì yɛli bèri wuʔɔ yeli sunʔɔmɔ nī bè siɛnkpuʔu kɛnmɛ nɛ̄ʔ,
á kire bɛ̀ʔ kàyuugo kɛnmɛ nɛ̄ʔ,
kire ga laa kapiigbiʔilige kɛnmɛ nɛ̄ʔ,
kire ga laa ŋàa wi wìi nyɔ́gi wàa kele nī gèleʔ.
16 Nɛ̀ ki yaʔa a siɛn wáà nɛ wuʔɔ bɛ̀ wi yē Kirisi wuu wè,
wi fǎga dè fìɛrɛ taʔaʔ.
Wi cɛri Kulocɛliɛ kpóri wī,
bɛ̀ 'Kirisi míʔɛ kiī wire nɛ̄ gè.
17 Gìi sí gī baa gè,
kàyuʔujuu lɛ̀lɛ niī nɛ nɔ̀gí;
Kulocɛliɛ narigɛ wuulo peli nɛ̄ ki 'séli.
A ki sí nyaa ki 'séli weli nɛ̄ gè,
gíi sí ki bága puu bìli wuʔu gè bàli pe 'cíi piyè tɛ́ngɛ Kulocɛliɛ wi Kataanna Siɛnrɛ nɛ̄ dèʔ ?
18 Kulocɛliɛ siɛnsɛbɛrɛ ti 'ki juu tiʔɛ káà nī nɛ́ jo:
A ki sí yē siɛnsinminɛ peli suɔgɛnmɛ pi 'gbɛ̀n bè,
gíi sí ki bága nɔ̀ bàli nɛ̄ pe wè fìʔɛ́ Kulocɛliɛ nɛ̄ wèʔ,
nɛ́ kapiigbiʔilile ní bèleb ?
19 Kire nɛ̄,
a ki yē pàli nɛ wuʔɔ nɛ̀ yɛli nɛ́ Kulocɛliɛ nyɛ́ni kaala ní lè,
pe- pìye gbòbori pe yaʔa duniya Faanfɔli wire kiyɛ nī yè,
wire ŋáà wi 'yɛli nɛ́ tɛ́ngɛlɛ ní lè,
peri waa yiʔɛmɛ peri kacɛ̀ngɛ kpínʔini gè.