Sɛbɛ ŋáà Zaki 'sɛbɛ wè
Zaki
Sɛbɛ wi tìɛdiʔɛ gè
Sɛbɛ ŋáà wi siɛnrɛ ti sɛbɛfɔli wè pe wi ye Zaki, Kulocɛliɛ nɛ́ Zezi Kirisi baakuɔwɔ wi 'puu. Nɛ́ yɛli nɛ́ faʔa wuulo wori dáà we 'cɛ́n dè, Kàfɔli Zezi wi siinyɛni wáà wi 'puu Zaki wè (wéli baa Mat 13.55; Mar 6.3; Gal 1.19; Kor1 15.7). Zerizalɛmi kàʔa tɛ́ngɛfɔlilɔ gboli ni yiɛginiwɛ wáà wi 'puu (wéli baa Kakpi 15.13-21; Gal 2.9). Isirayɛli saaya tùluyo kiɛ nɛ́ siinwuulo peli mɛ́ wi cé wi siɛnrɛ sɛbɛ dè. Saaya tùluyo kiɛ nɛ́ siin nyíì sí mɛ́ wiī nɛ nyu náʔa gè sɛbɛ nī wè, kire sì nyaa faʔa faʔa Isirayɛli saaya tùluyo kiɛ nɛ́ siin yireʔ. Ki 'nyaa bàli bīɛlɛ Zuufulo bèle, nɛ́ bìli pe wè Zuufulo bèleʔ nɛ́ sí tɛ́ngɛ Zezi nɛ̄ wè, peli mɛ́ wi 'ti sɛbɛ nɛ̀ tórigo. Pe yé kɛ́ni tɛ́ngɛfɔlilɔ wuʔɔ bèle kpuʔɔ, a pe sí fɛ̀ nɛ̀ cɛrigɛ duniya tiɛrɛ ti mìɛni nī dè. Zaki wire mɛ́ wè tɛ́ngɛfɔlilɔ peli bīɛlɛ Kulocɛliɛ wuulo bèle kányiʔɛ wuulo bèle.
Nyakungɛngɛ Liʔɛ lɛ̀lɛ nī lè Isirayɛli siɛnnɛ peli pe 'puu Kulocɛliɛ wuulo bèle. Nɛ̀ pínɛ, wi 'siɛnnɛ sɔ̀ngi bèle nɛ̀ taa Birayima wori nɛ̄ dè, nɛ́ wuʔɔgɔ gíì ki cé Zɔbi taa wè. Wi 'juu nɛ̀ pínɛ Arayabi wori nɛ̄ dè.
Zaki wi 'ki juu wi sɛbɛ nī wè nɛ̀ tɛ́ngɛfɔlilɔ yɛri bèle pe- wuʔɔyɔ kpàri yè pe cò. Wi 'ki juu pe mɛ́ nɛ̀ pínɛ pe- puu sícilile, peri pìye cɛ́rigi pé sí de tári peri yɛligi nɛ́ tɛ́ngɛlɛ koligo ní gè. Zaki wi 'juu nɛ̀ lɔrifɔlilɔ yɛri bèle pe fǎri pìye kpóri nɛ́ pe lɔri ní dèʔ. Nɛ̀ pínɛ pe fǎri siɛnnɛ cuɔnri bèleʔ. A wi ń'nɛ̀ juu nɛ̀ lèbaanna nyɔ́gɔ fɔ̀ngɔfɔlilɔ nī bèle.
Zaki Sɛbɛ nī wè, wiī nɛ duniya kele tɔ́nminɔ gèle nɛ́ Kulocɛliɛ siɛnrɛ ní dè. Sɛbɛ wi siɛnrɛ tiī nɛ́ waa nuro nɛ́ Kàsiʔile Sɛbɛ wori ní dè.
Sɛbɛ wi nyùgboliyo yè
Síɛrilɛ (1.1)
Tɛ́ngɛlɛ nɛ́ sícilimɛ (1.2-8)
Fɔ̀ngɔfɔlilɔ nɛ́ lɔrifɔlilɔ wori dè (1.9-11)
Kele gílì ke sî siɛn le kapiile nī lè (1.12-18)
Weri nyuʔɔ wìye nɛ̄, wéri kacɛ̀ngɛlɛ kpínʔini (1.19-27)
Tɛ́ngɛfɔli wiì yɛli bèri siɛnnɛ cuɔnri bèleʔ (2.1-13)
Tɛ́ngɛlɛ nɛ́ kacɛ̀ngɛlɛ (2.14-26)
Tɛ́ngɛfɔli wi 'yɛli wi- wi nyinɛ cò lè macɛ́n (3)
Tɛ́ngɛfɔli tánʔagɛnmɛ bè (4.1–5.6)
Funnyige nɛ́ náarigɛ (5.7-20)