Eburulo 13

We- weli tɛ́ngɛlɛ yaʔa lè ni de baara kúu

1 Mi siinyɛninɛ, yeri waa yiʔɛmɛ wìyedɛnigɛ nī gè súuri. 2 Ye fǎga cíi bè nabɔnminɔ tìrige bèleʔ, bàli pe 'pɛn yeli mɛ́ bèleʔ. Nɛ́ ki cɛ́n pàli yé pe tìrige, piyè yé ki cɛ́n bīɛlɛʔ. 3 Yeri sɔ̀ngí yeri taʔa nɛ́ bàli ní pe yē kasuu nī wè, majo dùʔɔ yeli tíimɛ bīɛlɛ kasuu nī wè nɛ́ pe ní, nɛ́ bàli ní siɛnnɛ piyē nɛ wuʔɔ bèle, majo dùʔɔ yeli míɛni nɛ wuʔɔ wī yeli céri nī dè.

4 Ki 'yɛli siɛnnɛ pe mìɛni de cepɔrigɔ wuʔu kpóri gè; saʔa yasinɛgɛ ki- sí puu núʔɔmɔ fùn. Nɛ́ ki cɛ́n Kulocɛliɛ bé kàyuʔu juu kanuʔɔrɔfɔlilɔ nɛ̄ bèle, nɛ́ bàli ní pe 'cecaafaaligɛ kire ga laa nàjaafaaligɛ kpíʔile gè.

5 Ye fǎga yìye kɛn wali dɛ́nigɛ mɛ́ gèʔ yeli tánʔagɛnmɛ nī bèʔ; gàa yeli nɛ taʔa gè, ye- ki yaʔa ki- yeli yɛli. Nɛ́ ki cɛ́n Kulocɛliɛ 'ki juu nɛ́ jo: Miì je ga muɔ yaʔaʔ, miì je kàduʔu wáa muɔ mɛ́ʔ. 6 Kire nɛ̄ weli bé gbɛ̀ ki juu nɛ́ tɛ́ngɛlɛ nī bé jo:

Kàfɔli wi yē mi sáʔafɔli;

mi wè nɛ fìʔɛ́ yakaa nɛ̄ʔ.

Gáa siɛnnɛ pe bé gbɛ̀ kpíʔile mi nɛ̄ ?

7 Yeri sɔ̀ngí yeri taʔa nɛ́ yeli yiɛgininɛ ní bèle, bàli pe cé Kulocɛliɛ siɛnrɛ juu dè yeli mɛ́ bèle. Ye- sɔ̀ngi pe tánʔagɛnjɛ̀nmɛ wuʔu nɛ̄ gè nɛ́ pe sìi kúɔgɛnmɛ ní bè, yeri ŋàʔaná ye puu pe tíɛlɛ yeli tɛ́ngɛlɛ nī lè. 8 Zezi wiī nuwɔ súuri. Wiì yiʔɛ mbànʔa ŋáà wi 'tóri wèʔ, wiì yiʔɛ pàngɛ gèʔ, wi wè nɛ yiʔi nɛ nyaʔaʔ. 9 Ye fǎga ki yaʔa pe- yeli fáanni bè pùunniʔ nɛ́ tɛnmɛgɛlɛ kálì kiiyɛ níʔ. Gìi ki 'pɔ́ri gè, yeli 'yɛli bè ŋɔri taa yeli funyɔ nī yè Kulocɛliɛ kɛnmɛ nɛ̄ bè; kiì yɛli ki- puu yaliire kajuʔulo wuʔu nɛ̄ʔ. Nɛ́ ki cɛ́n bàli pe 'taʔa ki kajuʔulo nɛ̄ gèle, piyè gbɛ̀nɛ tɔ̀ni taa ke nīʔ.

10  bálì piyē nɛ baara Zuufulo nī gè, peli sì yɛli bè liɛlɛ taaʔ nàa ni 'kɔ́n weli mɛ́ gèʔ, kakuɔrɔ wuʔu gèʔ. 11  gè, wi nɛ̂ jíin nī gè nɛ́ kapiʔile kàsulugo yajuuro sìsiɛn ní gè, nɛ̀ ki yaʔa pe nɛ̂ kɛ́ nɛ́ kaasɛnrɛ ní dè bùguro kàduʔu mɛ́ gè nɛ̀ sɛ́nì ti sórigo baa. 12 Kire nɛ̄ Zezi míɛni wi 'kùu kàʔa kàduʔu mɛ́ gè kire ga buu bè siɛnnɛ wàli bèle bè tɛ́ngɛ Kulocɛliɛ mɛ́ wi tíimɛ sìsiɛn kɛnmɛ nɛ̄ bè. 13 Ki sí n'gɛ ye- puu weri waa wi kúrugu bùguro kàduʔu mɛ́ gè, we sí fɔ̀li ki nɛ̄ peri weli teri bɛ̀ wi tíɛlɛ. 14 Nɛ́ ki cɛ́n náʔa dàala nɛ̄ lè, kòridiʔɛ wè weli mɛ́ gàa ki mɔgi gèʔ, nɛ̀ ki yaʔa weli sɔ̀ngirɔ tiī kàkpuʔɔ nɛ̄ gè gàa ki bága pɛn gè. 15 Kire nɛ̄ weri gbùʔɔrilɔ kakuɔrɔ kanʔa dè Kulocɛliɛ mɛ́ lɛ̀lɛ ó lɛ̀lɛ nī Zezi kɛnmɛ nɛ̄ bè, kire 'jo bèri wi míʔɛ gbùʔɔrɔ́ gè nɛ́ weli nyuɔyɔ ní yè. 16 Ye fǎga fìʔɛ bèri kacɛ̀ngɛ kpínʔiniʔ, bé míɛni de ki liile gàa yeli nɛ taʔa gè. Nɛ́ ki cɛ́n kire kakuɔrɔ yakɔnrɔ dè, ti nyɛ́nì Kulocɛliɛ dɛ́ni.

Siɛnsɛnrɛ dè

17 Yeri lúru yeli yiɛgininɛ mɛ́ bèle, ye sí yìye cɛ́rigɛ pe mɛ́; piyē nɛ yeli wéli nɛ́ ki cɛ́n cɛngɛ káà Kulocɛliɛ bè pe yúgo yeli wuʔu nɛ̄ gè. Yeri kire kpínʔini kire ga buu peri baara kúu dè nɛ́ fundaanra ní, ki fǎga buu nɛ́ kúnʔɔrilɔ níʔ; kire bé sí ki yaʔa yeli sǐ tɔ̀ni taaʔ.

18 Yeri náari weli mɛ́. Weli nyɛ́nì ki cɛ́n weli funyɔ yiī dìgire fùn. Bɛ̀ ki yē gè, weli nɛ ki caa weli tánʔagɛnmɛ pi- nyuɔ kɛnmɛ pi mìɛni nɛ̄. 19 Mi nɛ yeli fiɛn wī, yeri náari mi mɛ́ kire ga buu mi gbɛ̀ koli bé kɛ́ bè sa yeli nyaa fáari.

20 Kulocɛliɛ wire wī yanyige kɛnfɔli wè, nɛ́ wire ŋáà wi 'weli Zezi Kirisi nyɛ́ wè nɛ̀ yige kúbilo nī bèle wi bànguɔ sìsiɛn ki fànʔa nɛ̄ gè, Zezi ŋáà wi yē wi sìnbatogo ki nàʔavɔli kpuɔwɔ wè. 21 Kulocɛliɛ wi- yeli gbòbori bè yaʔa yeli gbɛ̀ jáa bèri kacɛ̀ngɛlɛ ke mìɛni kpínʔini bè wi nyɛ́ni kele fori gèle. Wi- ki kpíʔile weli funyɔ nī yè gàa ki 'wi dɛ́ni gè, Zezi kɛnmɛ nɛ̄ bè. Wire nɛ̄ kpuɔmɔ pi 'yɛli súuri !  !

22 Mi siinyɛninɛ, mi nɛ yeli fiɛn wī, ye- fɔ̀li lèbaanna siɛnrɛ dáà nɛ̄ dè, nɛ́ ki cɛ́n mi nyɛ́nì nyasiɛnkɛniyɛ nyáà cɛ̀ri sɛbɛ yè. 23 Ye- ki cɛ́n, pe 'weli siinyɛni Timote yige wè kasuu nī wè. A wi 'pɛn náʔa mi mɛ́ fáari wè, m'bé kɛ́ nɛ́ wi ní yeli mɛ́ baa.

24 Ye- yeli yiɛgininɛ pe mìɛni síɛri, nɛ́ Kulocɛliɛ wuulo pe mìɛni ní bèle. Weli siinyɛninɛ bálì pe 'kɔ́n Italii kùlo mɛ́ lè, piyē nɛ yeli síɛri míɛni.

25 Kulocɛliɛ ti- puu yeli ye mìɛni nɛ̄.