Weri fé nɛ́ lèbaanna ní we sa nɔ̀ láʔala nɛ̄ lè
12
1 Ki 'nyaa,
siɛnnɛ sáa weli màʔa nɛ̀ suʔu nɛ́ pe tɛ́ngɛlɛ tìɛ lè weli nɛ̄.
Ki sí n'gɛ,
kele gílì kiyē nɛ weli cògí nɛ yérigi tánʔana nɛ̄ lè,
we- láʔa ke nɛ̄,
we sí wìye yige kapiʔile nī gèle gàli ke nyɛ́ni weli 'puu nɛ cáanri fáari fáari wè,
we sí de kàsɛnigɛ fé gè nɛ́ lèbaanna ní,
gàa ki 'gbòbori nɛ̀ yaʔa weli mɛ́ gè.
2 We- weli yiʔɛ le gè Zezi nī,
ŋàa wi 'tɛ́ngɛlɛ koligo múgu gè níɛ ni forigi lèa.
Wi nyɛ́nì fɔ̀li ki nɛ̄ nɛ̀ kùu tiiparigɛ nɛ̄ gè;
wiì tɔ́ri nɛ́ fìɛrɛ ní dè dàa ti cî ga tɔ́n wi nɛ̄ wèʔ,
kùu ŋáà felige nɛ̄ wèʔ.
Nɛ́ ki cɛ́n wi cé ki nyaa fundaanra dáà dī wire yiʔɛ mɛ́ gè;
píra ŋáà nī wè wiī tɛ́niwɛ Kulocɛliɛ kácunʔɔ kàliige mɛ́ gèb.
3 Zezi wi 'wuʔɔyɔ taa yè wi parifɔlilɔ mɛ́ bèle,
kapiigbiʔilile bèle.
Ye- sɔ̀ngi ki nɛ̄,
gìi ki bé tíi weli fǎga ki yaʔa weli céri ti- kùu cáanra nɛ̄ dè bé kàsɛnigɛ yaʔa gèʔ.
4 Bè yeli yaʔa yeli nɛ tíin nɛ túngu nɛ́ kapiile ní lè,
yeli fìɛ wuʔɔ nɛ̀ nɔ̀ kùu nɛ̄ wèʔ.
5 Yeli 'fìʔɛ wī lé nɛ́ ti ní dàa Kulocɛliɛ yé juu bè lèbaanna nyɔ́gɔ yeli nī bɛ̀ yeli yē wi pìile bèle ?
Wi 'jo:
Mi pùɔ,
fǎga ki nyaa kaciɛlɛ a Kàfɔli nɛ wi pùɔ gbún wè nɛ wi nii kozinʔɛ nī,
fǎga céri yaʔa dè ti- kùu muɔ nɛ̄ʔ lɛ̀lɛ líì nī wi 'juu muɔ nɛ̄ wèʔ.
6 Nɛ́ ki cɛ́n Kàfɔli wiī nɛ wi gbún nɛ wi nii kozinʔɛ nī ŋàa woli ni 'kpúʔɔ wi mɛ́ lè,
nɛ́ míɛni wiī nɛ pe kpúɔn bàli wi tɔ́ri wi pìile bèlec.
7 Kire yē,
bè yeli gbó,
kire kɛnmɛ nɛ̄ yeli nɛ wuʔɔ.
Kulocɛliɛ wiī nɛ yeli nàʔa bɛ̀ yeli yē wi pìile bèle.
Nɛ́ ki cɛ́n pùɔ yē baa lé ŋàa wi tuufɔli sì wi gbó wèʔ ?
8 Majo bɛ̀ tuufɔli cî nɛ wi pìile pe mìɛni gbún bèle,
a wi 'yeli yaʔa wiì yeli gbó wèʔ,
kire 'jo yeli wè wi pìile wīʔ,
yeli yē wàa wiiyɛ wuulo.
9 Tuufɔlilɔ nyɛ́nì taa weli nɛ̄ náʔa dàala nɛ̄ lè,
a pe 'weli gbó a weli nɛ̂ tɔ́ri nɛ́ pe ní.
Bɛ̀ sí ki 'nyaa mmɛ gè,
weli 'yɛli bè wìye cɛ́rigɛ weli Tuu mɛ́ wè,
ŋàa wī nyìʔɛnɛ nī lè,
bè sí sìi taa wè.
10 Weli tobilo pe 'puu nɛ weli gbún bè lɛ̀lɛ láà cɛ̀ri kúɔ wī,
bɛ̀ pe yé ki nyaa a ki 'nyuɔ gè.
Nɛ̀ ki yaʔa Kulocɛliɛ nɛ weli gbún weli nyuɔmɔ kɛnmɛ nɛ̄,
kire ga buu weli- liɛlɛ taa wi tiɛlɛfun wuʔu nɛ̄ gè.
11 Lɛ̀lɛ líì nī wiī nɛ weli gbún nɛ̀ weli nii koligo nī gè,
ki nɛ̂ puu weli mɛ́ funbiɛnrɛ sɛ́ni ki 'puu fundaanra dè.
Nɛ̀ ki yaʔa kire kàduʔumɛ gè,
bàli pe mìɛni wi 'gbó bèle,
peli nɛ̂ ki nyaa ki yé buu cɛ̀ngɛ;
kire nyɛ́nì ki yaʔa a peli 'kò siɛnsinminɛ nɛ yanyige nyɔ́gi pe tɛ́nidiɛyɛ nī yè.
12 Kire nɛ̄ ye- ŋɔri le yeli kiyɛ nī yè nyàa yi 'fùrɔ yè,
nɛ́ yeli kágunyɔ ní yè nyàa yi fún nɛ yàʔará yèd.
13 Ye- yeli tɔliyɔ yaʔa yè yi- koziɛnyɛ líɛ yèe,
kire ga buu tɔligɔ gáà ki sìʔí gè ki fǎga ní kùru bè kɛ́ yiʔɛmɛʔ,
dí ki sí puʔɔ bè puu nɛ́ ŋɔri ní.
14 Yeri ki caa ye puu yanyige nɛ̄ nɛ́ siɛnnɛ pe mìɛni ní,
yeri ki caa ye puu wàlidɛngɛlɛ Kulocɛliɛ mɛ́ wè.
Á kire bɛ̀ʔ gè,
siɛn sǐ gbɛ̀ Kàfɔli nyaa wèʔ.
15 Yeri yìye ciʔige díɛʔ kire ga buu wàa fǎga kàduʔu wáa Kulocɛliɛ kpuʔɔrɔ mɛ́ dèʔ,
wàa fǎga kò tiige nìge tíɛlɛ gàa gī sìsorigo gèʔ,
gàa ki liʔi nɛ cúʔɔmɔ kpínʔini,
nɛ́ sí ní suɔnrɔ ní dè dàa ti siɛnniʔɛnɛ funyɔ córi yèf.
16 Yeri yìye ciʔige kire ga buu siɛn fǎga wìi yaʔa kanuʔɔrɔ kele nī gèleʔ,
kire ga laa bè yakaa fáala núʔɔ gàa gī wàlidɛngɛgɛ Kulocɛliɛ mɛ́ wèʔ,
majo bɛ̀ Ezawu 'ki kpíʔile gè bà wi yé wi luɔfɔlimɔ liɛlɛ pári lè sipiɛlɛ nigbe kɛnmɛ nɛ̄ bè.
17 Yeli nyɛ́nì ki cɛ́n,
kàduʔumɛ gè wi 'puu nɛ ki caa wi tuu wi- diba siɛnrɛ juu dè bè taʔa wire nɛ̄,
nɛ̀ ki yaʔa wi tuu wiì yéri ki nɛ̄ʔ.
A wi 'ki ŋàʔana nɛ́ yéturo ní bè kele yiʔɛ gèle,
kire nɛ́ ki mìɛni kiì nyuɔ wi nɛ̄ʔg.
Yeli nyɛ́nì sìʔɛrɛ nɛ̀ kpɔni Kulocɛliɛ wewiiwe nɛ̄ wè
18 Yeli sì yé sìʔɛrɛ nɛ̀ kpɔni nyagurugo nɛ̄ gèʔ gàa siɛn bé gbɛ̀ cò gèʔ,
bɛ̀ Isirayɛliyé pe yé ki kpíʔile Sinayii nyagurugo nɛ̄ gè.
Kire tiʔɛ nī gè,
kàsunkpuʔɔ yé puu baa,
nɛ́ yebiliwuɔlɔ ní dɛ́ndɛn,
nɛ́ wuɔmɔ ní,
nɛ́ káfalijuulo ní kpuʔɔ.
19 Pe yé kàkpanʔa wíimɛ lúʔu bè,
nɛ́ yékpoli láà ní nàa ni siɛnrɛ nyu dè.
Bà Isirayɛliyé pe cé kire yékpoli juumɔ lúʔu bè,
a pe 'ki náari nɛ́ jo wi fǎga ní juu nɛ́ peli níʔ.
20 Nɛ̀ sí ki taa,
piyè cî gbɛ̀ jáa bè fɔ̀li ki nɛ̄ gàa Kulocɛliɛ 'juu nɛ̀ gbɛ̀ngɛ gèʔ nɛ́ jo:
A ki cɛ́nì nyaa yajuʔu káà 'círi nɛ̀ taa nyagurugo nɛ̄ gè,
pe bé ki wáa bè kpúu nɛ́ kàdari níh.
21 Gìi ki yé kpíʔile gè,
ki cé fíɛrɛ cò Misa nɛ̄ wè,
a wi 'jo:
Mi yé tɔ̀ni nɛ̀ fíɛ kpuʔɔ nɛ fún nɛ yàʔarái.
22 Gìi sí gī baa gè,
yeli bèle,
yeli nyɛ́nì sìʔɛrɛ nɛ̀ kpɔni Siyɔn nyagurugo nɛ̄ gè,
Kulocɛliɛ wewiiwe wi kàkpuʔɔ nɛ̄ gè gàa gī Zerizalɛmi wè baa nyìʔɛnɛ nī lè.
Kire tiʔɛ nī gè,
nyìʔɛnɛ tundunminɔ siramuʔɔyɔ siramuʔɔyɔ yē baa gbuʔulilo fundaanra nɛ̄ dè.
23 Yeli nyɛ́nì sìʔɛrɛ nɛ̀ kpɔni Kulocɛliɛ pìpelile gboli nɛ̄ lè,
bàli míɛyɛ yī sɛbɛyɛ yè nyìʔɛnɛ nī lè.
Yeli nyɛ́nì sìʔɛrɛ nɛ̀ kpɔni Kulocɛliɛ nɛ̄ wè siɛnnɛ pe mìɛni kàyuʔujuufɔli wè,
nɛ́ siɛnsinminɛ nɛ̄ bèle bàli pe 'kùu bèle a Kulocɛliɛ 'pe nyuɔ nɛ̀ forigo wè.
24 Nɛ́ míɛni yeli nyɛ́nì sìʔɛrɛ nɛ̀ kpɔni Zezi nɛ̄ wè,
nyakungɛngɛ fɔngɔ kàsuluwo wè,
nɛ́ wi sìsiɛn ní gè gàa ki 'nyɛri nyɛri gèj,
a kiī nɛ sɔ́migi nɛ nyu nɛ tóri Abɛli wuʔu nɛ̄ gèk.
25 Yeri yìye ciʔige díɛʔ !
Ye fǎga cíiʔ bè lúʔu ŋàa mɛ́ wi nyu nɛ́ yeli ní wèʔ !
Náʔa dàala nɛ̄ lè,
Isirayɛliyé pe yé Kulocɛliɛ nyasiɛnrɛ lúʔu dè dàa ti 'puu nɛ nyu nɛ tìí pe nɛ̄ dè,
a pe 'cíi ti nɛ̄ dè.
Kire nɛ̄ piyè suɔ wuʔɔgɔ mɛ́ gèʔ.
Bɛ̀ sí ki yē a weli 'cíi,
weli sì lúʔuʔ ŋàa mɛ́ wi nyu nɛ weli yɛri wè nɛ̀ ki líɛ baa nyìʔɛnɛ nī lè,
kányiʔɛ nɛ̄,
weli sǐ gbɛ̀ suɔ wuʔɔgɔ mɛ́ gèʔ.
26 Kire lɛ̀lɛ nī lè,
a Kulocɛliɛ yékpoli ni 'dàala cúungo lè,
nɛ̀ ki yaʔa píra ŋáà nī wè,
wi 'nyuɔ fɛ̀ni weli mɛ́ nɛ́ jo:
Ki bé ní kpíʔile cígini,
m'bé dàala cúungo lè;
kire sǐ puu dàala lire yákuɔʔ,
m'bé nyìʔɛnɛ míɛni cúungo lèl.
27 Nyasiɛnkɛniyɛ nyáà yè,
ki bé ní kpíʔile cígini,
kire nɛ̄ ki tìí yɛrɛ dáà ti 'faan dè,
ti mìɛni bé cúungo bè tóri,
kire ga buu dàa tiǐ gbɛ̀ cúungo dèʔ,
tire yákuɔ ti bé kò.