Weli tobilo pe tɛ́ngɛlɛ nɛ́ pe lèbaanna wuʔu gè
11
1 Tɛ́ngɛlɛ ni kɔri wire yē:
bè tɛ́ngɛ ki nɛ̄ gìi nɛ̄ muɔ nyɛ́nì muɔ sɔ̀ngirɔ taʔa dè,
muɔ bé ki taa,
bè ki cɛ́n gàa muɔ wè nɛ nyaʔa gèʔ,
kiī kányiʔɛ.
2 Kulocɛliɛ wi 'faʔa wuulo pe tɛ́ngɛlɛ cɛ̀nmɛ wori juu dè.
3 Tɛ́ngɛlɛ kɛnmɛ nɛ̄ bè,
weli 'ki cɛ́n duniya wi mìɛni nyɛ́nì faan Kulocɛliɛ siɛnrɛ ti fànʔa nɛ̄ gèa.
Dàa weli nɛ nyaʔa dè,
tire sì kɔ́n nyapile yanyaʔa mɛ́ʔ.
4 Tɛ́ngɛlɛ kɛnmɛ nɛ̄ bè,
a Abɛli 'kakuɔrɔ yakɔnrɔ kɛn dè Kulocɛliɛ mɛ́ wè dàa ti 'nyuɔ nɛ̀ tóri Kayɛn wori nɛ̄ dè.
Wi tɛ́ngɛlɛ lire kɛnmɛ nɛ̄ bè a Kulocɛliɛ 'ki juu nɛ́ jo wi nyɛ́nì sín,
nɛ̀ wi míɛtanʔa yeri gè wi yakɔnrɔ kɛnmɛ nɛ̄ bè.
Abɛli wi 'kùub,
nɛ̀ ki yaʔa wi kakpiʔiligele kiyē nɛ nyu nɛ tíin wi tɛ́ngɛlɛ kɛnmɛ nɛ̄ bè.
5 Tɛ́ngɛlɛ kɛnmɛ nɛ̄ bè,
Kulocɛliɛ wi 'Enɔki líɛ nɛ̀ yɛ̀gɛ naamɛ,
wiì tóri kùu mɛ́ wèʔ;
piyè cé ń'nɛ̀ wi nyaaʔ nɛ́ ki cɛ́n Kulocɛliɛ cé wi líɛc.
Ki 'nyaa sɛ́ni Kulocɛliɛ wi- wi líɛ wè,
Kulocɛliɛ cé wi míɛtanʔa yeri gè nɛ́ jo wire 'fɔ̀li wi nɛ̄.
6 A tɛ́ngɛlɛ sí wè siɛn ŋíì mɛ́ wèʔ,
Kulocɛliɛ sǐ gbɛ̀ fɔ̀li wi nɛ̄ʔ.
A siɛn je sìʔɛrɛ bè kpɔni Kulocɛliɛ nɛ̄ wè,
wi 'yɛli bè tɛ́ngɛ ki nɛ̄ Kulocɛliɛ wiī baa,
dí wiī nɛ tɔ̀ni kanʔa wi caavɔlilɔ mɛ́ bèle.
7 Tɛ́ngɛlɛ kɛnmɛ nɛ̄ bè,
a Nɔwe 'kɔ́rikpuʔɔ kpíʔile gè nɛ̀ wi narigɛ suɔ gè.
Wi yé Kulocɛliɛ kajuuyaʔala sɔ́migɔ lè nɛ̀ lúʔu,
kele wuʔu nɛ̄ gè gàli ke cî kpíʔile gèle,
gàli siɛn sì cé fìɛ nyaa wèʔd.
Wi tɛ́ngɛlɛ kɛnmɛ nɛ̄ bè,
a Nɔwe 'kàyuʔu juu duniya siɛnnɛ nɛ̄ bèle,
a Kulocɛliɛ sí wi tɔ́ri siɛnsinwɛ.
8 Tɛ́ngɛlɛ kɛnmɛ nɛ̄ bè,
a Birayima 'lúʔu Kulocɛliɛ mɛ́ bà wi 'wi yeri wè nɛ́ wi yɛ wiri waa kùlo láà mɛ́ nàa wire bé kɛn wi mɛ́ kɔrigɔ gè.
A wi sí kɛ́,
nɛ̀ ki yaʔa wiì cɛ́nì ki cɛ́n sé wi 'puu nɛ waaʔ.
9 Tɛ́ngɛlɛ kɛnmɛ nɛ̄ bè,
Birayima yé kò nabɔnwɔ nɛ sɛ́ni tɛ̀ní nɛ mári kùlo nī lè nàa nyuɔ Kulocɛliɛ yé fɛ̀ni wi mɛ́ lè.
Wi 'puu nɛ sùɔ́n fɛ̀ni saaya nī yè,
bɛ̀ Siaga nɛ́ Yakuba míɛni yé kɛ́nì ki kpíʔile,
bàli pe 'puu nyafɛnigɛ ki kɔriliile bèle nɛ́ Birayima ní wèe.
10 Nɛ́ ki cɛ́n Birayima 'puu nɛ kàkpuʔɔ siri gè gàa kàkpuɔnnɔ pe 'le nɛ̀ lìri bèle,
gàa Kulocɛliɛ wire tíimɛ yé gbòbori nɛ́ ki sɔ́migɔ nɛ̀ faan gèf.
11 Tɛ́ngɛlɛ kɛnmɛ nɛ̄ bè,
bè Sara yaʔa sìndigicuɔ wè,
a wi 'jáa nɛ̀ ŋɔri taa nɛ̀ siig,
nɛ̀ ki yaʔa Birayima yé liɛ nɛ̀ tóri.
Nɛ́ ki cɛ́n wi yé ki nyaa siɛn bé gbɛ̀ tɛ́ngɛ wi nɛ̄ ŋàa wi 'nyafɛnigɛ kpíʔile gè.
12 Birayima yé liɛ nɛ̀ tóri kɛnmɛ bíì nɛ̄ bè a wi 'kò majo wi 'kùu wī.
Kire nɛ́ ki mìɛni,
kire nàguɔ ŋáà nigbe wè,
wi siimɛ pi yé puu nìʔɛbɛ bɛ̀ nyìʔɛnɛ ŋɔgɔlɔ tíɛlɛ gèle,
nɛ́ bɛ̀ kuʔɔjii gògoyo dàrimiʔɛ tíɛlɛ gè gàa siɛn sì cî gbɛ̀ tɔ́ri gèʔh.
13 Siɛnnɛ bálì pe mìɛni 'kò tɛ́ngɛlɛ nī lè fúɔ nɛ̀ pɛ́nì kùu.
Piyè ki taaʔ dàa nyuɔ pe yé fɛ̀ni pe mɛ́ dèʔ;
pe 'ti nyaa nɛ̀ ti cò liilige.
Pe yé ki cɛ́n peli yē nabɔnminɔ nɛ́ ní siɛnnyaarilɛ dàala nɛ̄ lèi.
14 Bàli pe nyu mmɛ gè,
piyē nɛ ki fíligi nɛ tìí dí piyē nɛ kùlo caa nàa nī peli tíimɛ woli lè.
15 A ki sí yē pe sɔ̀ngirɔ ti yé kò pe kɔ́ndiʔɛ nɛ̄ gè gàa nī pe 'yiri gè,
pe cî lɛ̀lɛ taa bè ní koli baa.
16 Gìi sí gī baa gè,
gàa pe 'puu nɛ caa gè,
pe 'puu nɛ kùlo láà caa nàa ni 'sɔ́migɔ nɛ̀ nyuɔ baa nyìʔɛnɛ nī lè.
Kire nɛ̄ ki wè fìɛrɛʔ Kulocɛliɛ mɛ́ peri wire yeri pe Kulocɛliɛ wèʔ,
nɛ́ ki cɛ́n wi nyɛ́nì kàkpuʔɔ káà gbòbori pe mɛ́.
17 Tɛ́ngɛlɛ kɛnmɛ nɛ̄ bè,
a Birayima 'kɛ́ bè sa Siaga kɛn wè kakuɔrɔ yakɔngɔ,
bà Kulocɛliɛ yé wi 'siʔɛ nɛ̀ wéli wèj.
Birayima,
wire ŋáà mɛ́ nyafɛnigɛ ki yé kpíʔile gè,
wi jaa wire nigbe wī wi yé kɛn.
18 Kulocɛliɛ cé ki 'juu wi mɛ́ nɛ́ jo:
«Siaga nī muɔ bé siimɛ taa bèk.»
19 Nɛ̀ ki yaʔa Birayima yé ki sɔ̀ngi nɛ̀ tɛ́ngɛ ki nɛ̄ dí Kulocɛliɛ wi bé gbɛ̀ jáa bè wi nyɛ́ yige kúbilo nī bèle.
Kire nɛ̄ we bé gbɛ̀ ki juu bé jo kire ki nyɛ́nì kpíʔile.
20 Tɛ́ngɛlɛ kɛnmɛ nɛ̄ bè,
a Siaga wi 'diba siɛnrɛ juu dè nɛ̀ taʔa Yakuba nɛ́ Ezawu nɛ̄ wè gàa ki bé pe mbànʔa wuʔu tìɛ gèl.
21 Tɛ́ngɛlɛ kɛnmɛ nɛ̄ bè,
bà Yakuba kùu lɛ̀lɛ ni 'nɔ̀ lè,
a wi 'diba siɛnrɛ juu dè nɛ̀ taʔa Yusufu jaala siin nɛ̄ bèle,
nɛ́ káguro cáan dè nɛ̀ Kulocɛliɛ gbùʔɔrɔ,
nɛ́ kpògo nyùgo tíʔɛ gè nɛ̀ wìi kpɔnim.
22 Tɛ́ngɛlɛ kɛnmɛ nɛ̄ bè,
bà Yusufu kùulɛlɛ ni 'nɔ̀ lè,
a wi 'ki juu nɛ́ jo Isirayɛli siimɛ pi bága yiri Ezipiti kùlo nī lè,
a wi 'ki juu nɛ̀ gbɛ̀ngɛ pe mɛ́ pe ga wire kácere kɔ̀n dè pe kɛ́ nɛ́ ti nín.
23 Tɛ́ngɛlɛ kɛnmɛ nɛ̄ bè,
a Misa siivɔlilɔ pe 'wi làrigɛ wi pìfinʔɛ lɛ̀lɛ nī lè,
nɛ̀ taa yeye taanri.
Nɛ́ ki cɛ́n pe yé nàgabile nyaa lè cɛ̀nnɛ;
piyè 'puu nɛ fìʔɛ́ kùlofɔli wi kajuulo nɛ̄ lèʔo.
24 Tɛ́ngɛlɛ kɛnmɛ nɛ̄ bè,
bà Misa pɛ́nì liɛ wè,
a wi 'cíi nɛ́ jo pe fǎga de wire yeri Farawɔn póri jaaʔp.
25 Kire yé pɔ́ri wi mɛ́ peri wi wuʔɔ nɛ́ Kulocɛliɛ siɛnnɛ ní bèle sɛ́ni wire 'puu kapiʔile tàanma nī bè tire dáà dī tiī nɛ tóri fáari fáari dè.
26 Wi yé ki nyaa a wire nɛ wuʔɔ Kulocɛliɛ Siɛnnyiɛnɛgɔnwɔ wi kɛnmɛ nɛ̄ bè,
tɔ̀nikpuɔwɔ yé puu kire nī nɛ̀ tóri Ezipiti kùlo lɔri nɛ̄ dè,
nɛ́ ki cɛ́n wi 'puu nɛ tɔ̀ni wéli wè nɛ nyaʔa wè,
ŋàa wi bága taa wè.
27 Tɛ́ngɛlɛ kɛnmɛ nɛ̄ bè,
a Misa 'yiri Ezipiti kùlo nī lè;
wiì cɛ́nì fíɛ kùlofɔli funyɛrigɛ nɛ̄ gèʔ.
A wi 'lèbaanna le majo wire cî gbɛ̀ wi nyaa wī ŋàa siɛn sǐ gbɛ̀ nyaa wèʔq.
28 Tɛ́ngɛlɛ kɛnmɛ nɛ̄ bè,
a wi 'Torimakiyaʔa kakuɔrɔ kúɔ dè nɛ́ ti sìsiɛn kurugo gè wìʔile nɛ̄ gèle,
kire ga buu kùu tundunwɔ wi fǎga Isirayɛliyé jaapelile kpúu bèleʔr.
29 Tɛ́ngɛlɛ kɛnmɛ nɛ̄ bè,
a Isirayɛli siɛnnɛ pe 'jíin nɛ̀ Nyàʔanivɛgɛ Tiire kuʔɔjii luʔɔ jeli gè dàawaʔala nɛ̄ lè,
nɛ̀ ki yaʔa lɛ̀lɛ líì nī Ezipitiyé pe 'puu nɛ caa bè luʔɔ jeli gè,
a luʔɔ ki 'pe mìɛni lìis !
30 Tɛ́ngɛlɛ kɛnmɛ nɛ̄ bè,
a Zeriko kàʔa gunbiiye yi 'tuu,
bà Isirayɛliyé pe 'puu nɛ kàʔa mári gè nɛ̀ pɛ́nì taa cɛnyɛ kɔlisiint.
31 Tɛ́ngɛlɛ kɛnmɛ nɛ̄ bè,
a Arayabi wè,
nàjaacuɔ wè,
piyè wi kpúuʔ nɛ́ sìnluʔulo ní bèleʔ,
nɛ́ ki cɛ́n wi yé tundunminɔ kpàli bèle nɛ́ funjɛ̀ngɛ ní,
siɛnnɛ bálì pe yé pɛn bè ba kàʔa tɛ́nimɛ saanri bè bè wéli làrimɛ nīu bè.
32 Nɛ́ gáa cígini gàa m'bé ní juu gè ?
Lɛ̀lɛ ni 'mi koligo bè juu bàli wuʔu nɛ̄ gè:
Zedeyɔn,
Baraki,
Samisɔn,
Zefite,
Dawuda,
Samiyɛli nɛ́ Kulocɛliɛ siɛnjuulo ní bèlev.
33 Tɛ́ngɛlɛ kɛnmɛ nɛ̄ bè,
a pe 'kùlofɔliyɔ jáa yè,
nɛ́ kele kpíʔile gèle nɛ̀ yɛli nɛ́ sínmɛ ní.
A pe 'ki taa gàa nyuɔ Kulocɛliɛ yé fɛ̀ni gè,
nɛ̀ jàriyɛ nyuɔyɔ tɔ́n yèw,
34 nɛ̀ ŋɔri kàsunyɔ fígi yèx.
A pe 'suɔ kapiɛngbuɔn ŋuʔɔnɔ mɛ́ gèle,
nɛ́ koli nɛ̀ ŋɔri taa yaama kàduʔumɛ gè.
A pe 'pìye tìɛ kapiɛngbuɔn sànbalilɛ,
nɛ́ kùlogolo kálì kapiɛngbuɔn tòyo ŋɔrigɔ yè nɛ̀ sìʔɛrɛy.
35 Tɛ́ngɛlɛ kɛnmɛ nɛ̄ bè,
a cɛlilɛ pálì 'pe wuulo nyaa a pe 'nyɛ́ nɛ̀ yiri kúbilo nī bèlez.
Nɛ̀ ki yaʔa pe yé pàli kpúɔn nɛ̀ túnʔɔnɔ,
kire nɛ́ ki mìɛni ní a pe 'cíi,
piyè fɔ̀li siɛn- peli suɔʔ kire ga buu peli gbɛ̀ nyɛ́ bè yiri bè sa sìi taa wè ŋàa wi 'nyuɔ nɛ̀ tóri wè.
36 Siɛnnɛ pe 'puu nɛ pàli tíʔɛ,
níɛ pe kpúɔn nɛ́ sápigele ní.
Pe yé pàli puɔ nɛ́ nyùʔɔdiriye ní nɛ́ pe wáa kasuu nīa.
37 Pe yé pàli wáa cígini nɛ́ kàdari ní,
a pe 'bìli celile kperiye siin siin,
a pe 'pàli kpúu kapiɛngbuɔn ŋɔsii ní wè.
Pàli 'puu siɛnnyaaridorilo,
nɛ́ bururo ní dàa ti yé kpíʔile nɛ́ sìnbasɛnyɛ ní yè nɛ́ síkasɛnyɛ ní yè.
Pe yé yɛrɛ ti mìɛni suɔ pe mɛ́,
nɛ̀ pe máama,
nɛ̀ pe fùrɔb.
38 Duniya ŋáà wiì cé yɛli bè tɛ́ngɛfɔlilɔ bálì taa bèleʔ.
Pe 'puu nɛ nyaari nɛ mári waama kùlogolo nɛ́ nyaguruyo nī yè,
pe 'puu nɛ sùɔ́n nyaguruwiiye nī yè nɛ́ dàala kàwiiye nī yè.
39 Kire siɛnnɛ bálì bèle,
a Kulocɛliɛ 'pe míɛtanʔa yeri gè pe tɛ́ngɛlɛ lire kɛnmɛ nɛ̄ bè.
Nɛ̀ ki yaʔa piyè ki taaʔ gàa nyuɔ Kulocɛliɛ yé fɛ̀ni pe mɛ́ gèʔ.
40 Gìi sí gī baa gè,
Kulocɛliɛ yé ki gbòbori nɛ̀ yaʔa weli mɛ́ yacɛ̀ngɛ gáà ki 'nyuɔ nɛ̀ tóri gè,
kire ga buu peli nɛ́ weli ní bèle,
we sa pínɛ we- nyuɔ bè fori.