Eburulo 10

Kirisi wi 'kapiʔile kàsulugo kakuɔrɔ ti mìɛni fori

1  dè, tiī fìɛ yákuɔ wī bè weli nyuɔmɔ tìɛ bè bàa pi 'puu nɛ báan bè. Ti tíimɛ sì puu kányiʔɛ woriʔ. Kire nɛ̄, tiì jáa nɛ̀ siɛn nyuɔ nɛ̀ forigoʔ bè ki yaʔa siɛn- gbɛ̀ sìʔɛrɛ kpɔni bè Kulocɛliɛ gbùʔɔrɔ wèʔ, kakuɔrɔ wenuro dáà tire kɛnmɛ nɛ̄ bèʔ, dàa ti 'puu nɛ kpínʔini yiɛlɛ ó yiɛlɛ láʔala fùn wè. 2 A ki sí yē bàli pe Kulocɛliɛ gbùʔɔrɔ́ wè, a pe yé jáa nɛ̀ kò cìilile pe kakuɔrɔ kɛnmɛ nɛ̄ bè tɔligɔ nigbe péʔ wè, pe kapiʔile nɛ̄ gèle, bà pe cî kakuɔrɔ kɔ̀nnɔ yaʔa lè. Kire kɛnmɛ báà nɛ̄ bè, piyě cî ní ki nyaa peli 'kolimɔ taa kapiile láà nɛ̄ʔ.

3 Ki sí nyaa kakuɔrɔ dáà tire ti 'siɛnnɛ yaʔa bèle pe sɔ̀ngí nɛ taʔa nɛ́ pe kapiʔile ní gèle yiɛlɛ ó yiɛlɛ. 4 Nɛ́ ki cɛ́n nɛ̀piʔɛlɛ nɛ́ síkapɛngɛlɛ sìsiɛn gè, kire káà fáala sǐ cî gbɛ̀ jáa bè kapiʔile láʔa gèleʔ.

5 Kire kɛnmɛ nɛ̄, lɛ̀lɛ líì nī Kirisi wi yé je jíin duniya nī wè, a wi 'ki juu Kulocɛliɛ mɛ́ wè nɛ́ jo:

Kakuɔrɔ yajuuro dè nɛ́ yaliire yakɛnrɛ ní dè,

tire bɛ̀ʔ muɔ nɛ caaʔ:

muɔ 'cetinnɛ kpíʔile mi mɛ́.

6  nɛ́ kapiʔile kàsulugo kakuɔrɔ

tire sì muɔ dɛ́niʔ.

7 Kire nɛ̄ a mi 'ki juu nɛ́ jo: «Ki n'gɛ, mi nyɛ́nì pɛn !»

Ki nyɛ́nì sɛbɛ mi wuʔu nɛ̄ gè

sɛbɛkuruwo nī wè nɛ́ jo:

«Mi nyɛ́nì pɛn bèri muɔ nyɛ́ni kele kpínʔini gèle, Kulocɛliɛ.»

8 Wi séli nɛ ki nyu wī nɛ́ jo: Kakuɔrɔ yajuuro nɛ́ yakɔnrɔ, kakuɔrɔ kaasuʔuro nɛ́ kapiʔile kàsulugo kakuɔrɔ, tire sì muɔ dɛ́niʔ. Nɛ̀ ki yaʔa, kire kakuɔrɔ ti 'puu nɛ kɔ̀ngí nɛ̀ yɛli nɛ́ Fànʔa Siɛnrɛ ní dè. 9 A wi ń'nɛ̀ ki juu nɛ́ jo: Ki n'gɛ, mi nyɛ́nì pɛn bèri muɔ nyɛ́ni kele kpínʔini gèle. Bɛ̀ sí ki yē, wi nyɛ́nì kakuɔrɔ tìɛgɛnmɛ pélibe yérige bè, nɛ́ tìɛgɛnmɛ siinwobo tɛ́ngɛ bè.

10 Kulocɛliɛ nyɛ́ni kaala ni 'puu bè weli wàli bè tɛ́ngɛ wire mɛ́, kire nɛ̄ Zezi wi 'wi céri kɛn dè kakuɔrɔ, tɔligɔ nigbe péʔ.

11 Cɛngɛ ó cɛngɛ, ó kacuɔnriwɔ wi nɛ̂ yéri nɛ̀ wi baara kúɔ dè, liʔɛ wori dè. Wi nìɛ kakuɔrɔ wenuro kúu dè nɛ taʔala, tire dáà tiǐ cî gbɛ̀ jáa bè kapiʔile láʔa gèle púloʔ. 12 Nɛ̀ ki yaʔa bɛ̀ pɛ́nì wìi kɛn wè, kapiʔile kàsulugo kakuɔrɔ wori nɛ̄ dè, tɔligɔ nigbe péʔ wè, wiī tɛ́niwɛ lɛ̀lɛ ó lɛ̀lɛ nī Kulocɛliɛ kàliige mɛ́ gè. 13 Kire tiʔɛ nī wiī nɛ siri fúɔ bè taa Kulocɛliɛ ga wi leguulo kpíʔile bèle wi tɔliyɔ taʔadiʔɛ. 14 Ki sí n'gɛ bàli pe mìɛni wi 'wàli nɛ̀ tɛ́ngɛ wìi mɛ́ wè, a wi 'pe nyuɔ nɛ̀ forigoʔ súuri bɛ̀ wi 'wìi kɛn tɔligɔ nigbe gè.

15 Nɛ́ míɛni niī nɛ ki nyu nɛ láʔala weli mɛ́ nɛ́ jo:

16  ki n'gɛ gàa m'bé kpíʔile nɛ́ pe ní bèle

cɛnyɛ nyáà kàduʔumɛ gè.

Kàfɔli wi 'jo bɛ̀.

M'bé mi Fànʔa Siɛnrɛ nyɔ́gɔ dè pe funyɔ nī yè,

m'bé ti sɛbɛ míɛni pe sícilige nī gè.

17 A wi ń'nɛ̀ jo:

Nɛ́ ki cɛ́n mi sǐ ní sɔ̀ngi bè taaʔ

nɛ́ pe kapiʔile ní gèle nɛ́ pe síciramɛ kele ní gèleʔ.

18 Bà kapiʔile ke 'yaʔa gèle, kapiʔile kàsulugo kakuɔrɔ ti wè nɛ tíin nɛ́ fànʔa níʔ.

WELI TANʔAGƐNMƐ BE TƐNGƐLƐ NI LE NYAKUNGƐNGƐ FƆNGƆ NI GE

(10.19–13.25)

Ki 'yɛli we- puu lèbaanna ní

19 Weli siinyɛninɛ, kire nɛ̄ weli bé gbɛ̀ jíin nī gè káaliyɛ fùn, Zezi Kirisi sìsiɛn kɛnmɛ nɛ̄ bè. 20 Bɛ̀ wi 'wi céri kɛn dè kakuɔrɔ dè, a wi 'kovɔngɔ múgu gè weli mɛ́ gàa ki waa sìi mɛ́ wè, gàa ki 'sùuri gunbɔli fɛ̀ni nī wè. 21 Bɛ̀ kàfɔli kpuɔwɔ yē weli mɛ́ wè, tɛ́niwɛ Kulocɛliɛ saʔa nɛ̄ gè, 22 we- sìʔɛrɛ we kpɔni Kulocɛliɛ nɛ̄ wè nɛ́ funviige ní, nɛ́ tɛ́ngɛjɛ̀nnɛ ní nàa nī káaliyɛ fùn woli lè, nɛ́ funyɔ ní nyàa yī cìiliye yè nɛ́ nyàa yī sɔ̀ngibiire fùn yè, nɛ́ weli céri ní dè dàa 'ti jíge nɛ̀ kúɔ dè nɛ́ laciilige ní gè.

23 We- weli sɔ̀ngirɔ taʔadiʔɛ cò gè kpuʔɔ gàa wuʔu weli 'juu nɛ̀ yige gè, nɛ́ ki cɛ́n Kulocɛliɛ ŋáà wi 'nyafɛnigɛ kpíʔile gè, wi 'yɛli nɛ́ tɛ́ngɛlɛ ní. 24 Ye tí weri sɔ̀ngí we kɛnmɛ taa bèri lèbaanna nyɔ́gi wìye nī, gìi ki bé tí wìyedɛnigɛ- puu weli nī weri kacɛ̀ngɛlɛ kpínʔini gèle. 25 We fǎga weli gbúʔurugolo yaʔa gèle ke- tuuʔ majo bɛ̀ pàli dàli nɛ ki kpínʔini gèʔ. Gìi ki 'pɔ́ri gè weri ŋɔri nyɔ́gi wìye nī, nɛ́ ki cɛ́n bɛ̀ ki yē ŋɔ̀ wè, kiī nɛ nɔ̀gí.

26 Nɛ́ ki cɛ́n a weli 'fàan nɛ waa yiʔɛmɛ nɛ kapiʔile kpínʔini gèle, nɛ̀ ki yaʔa weli nyɛ́nì kányiʔɛ cɛ́n gè nɛ̀ kúɔ wè, kakuɔrɔ ní wè baa cígini bè kapiʔile láʔa gèleʔ. 27 Gìi ki 'kò gè, kire gī: béri Kulocɛliɛ kàyuʔujuuro siri dè nɛ́ fíɛgbuɔrɔ ní, nɛ́ kàsunkpuʔɔ ní gàa ki bé ba wi leguulo sórigo bèle.

28 A ŋìi cé kàduʔu wáa mɛ́ dè, pe nɛ̂ wi kpúu nyinimɛ fùn wī, a wi kakpiʔilile ni 'cɛ́n lè a kinyaafɔlilɔ siin kire ga laa taanri ki 'juu gè. 29 Ye sí ki sɔ̀ngi kɛnmɛ bíì nɛ̄ wire wuʔɔgɔ ki bága pii bè tóri gè, siɛn ŋáà wi 'Kulocɛliɛ Jaa pari wè, nɛ́ ŋàa wi sìsiɛn tɔ́ri gè yanuʔɔgɔ gè gàa ki 'wi cìile gè, a wiī nɛ teri lè nàa ni nyɛ́ni kpuʔɔrɔ kpínʔini weli mɛ́ lè.

30 Nɛ́ ki cɛ́n weli nyɛ́nì ki cɛ́n ŋàa wi 'ki juu nɛ́ jo: Mi mɛ́ ki yē bè mi fuʔɔ tɔ́n gè pe mɛ́, bè ki sàri pe mɛ́ gàa pe 'kpíʔile gè, nɛ́ míɛni: Kàfɔli wi bé kàyuʔu juu wi siɛnnɛ nɛ̄ bèle. 31 Kiī fíɛrɛwuʔu díɛʔ a siɛn 'tuu Kulocɛliɛ wewiiwe kiyɛ nī yè !

32 Ye- sɔ̀ngi ye taa kɛnmɛ bíì nɛ̄ ki yé puu yeli mɛ́ ki sélimɛ nɛ̄ bè, bà yeli yé Kulocɛliɛ kpìɛnmɛ taa bè, a yeli sɔ́migɔ nɛ̀ yéri cáanra nɛ̄ dè dàa ti 'kpúʔɔ dè, nɛ́ wuʔɔniʔɛyɛ taa yè. 33 Lɛ̀gɛlɛ sáamɛ nī pe 'yeli tiʔɛlɛ nɛ̀ yeli wuʔɔ siɛnniʔɛnɛ nyaamɛ nɛ̄ bè. Lɛ̀gɛlɛ kálì nī yeli tíimɛ bīɛlɛ ye 'bìli sáʔa bèle bàli pe 'puu nɛ wuʔɔ kanumɔ nɛ̄ bɛ̀ yeli tíɛlɛ bèle. 34 ʔaan, yeli nyɛ́nì nyinimɛ taa kasuulebele nɛ̄ bèle pe wuʔɔgɔ nī gè, a yeli 'fɔ̀li ki nɛ̄ nɛ́ fundaanra ní lɛ̀lɛ líì nī pe 'yeli yataara suɔ dè yeli mɛ́ dè, nɛ̀ taʔa ki nɛ̄ yeli yé ki cɛ́n yataara táà yē yeli mɛ́ dàa ti 'nyuɔ nɛ̀ tóri dè níɛ̀ mɔgɔ dè.

35 Ki sí n'gɛ ye fǎga yeli sɔ̀ngirɔ taʔadiʔɛ yaʔa gèʔ, nɛ́ ki cɛ́n ki bé ba tɔ̀nikpuɔwɔ kɛn yeli mɛ́. 36 Píra ŋáà nī wè ki 'yɛli ye- lèbaanna le, kire ga buu yeli de waa yiʔɛmɛ yeri Kulocɛliɛ nyɛ́ni kele kpínʔini gèle. Bà yeli bé ki taa gàa nyuɔ wi 'fɛ̀ni gè. 37 Nɛ́ ki cɛ́n:

Ki 'kò cɛ̀ri, cɛ̀ri yákuɔ wī,

dí ŋàa wi bé pɛn wè, wi sí pɛn;

wiì je mɔgɔ baaʔ.

38 A Kulocɛliɛ wi 'ki juu nɛ́ jo:

«Mi siɛnsinwɛ wi bé sìi taa wi tɛ́ngɛlɛ kɛnmɛ nɛ̄ bè.

Nɛ̀ ki yaʔa a wi 'koli nɛ̀ kàduʔu wáa wè, wi kaala niǐ mi dɛ́niʔ.»

39 Ki sí n'gɛ, weli wè bɛ̀ʔ bìli tíɛlɛ pe 'kàduʔu wáa wè nɛ́ cúʔɔ wèʔ. Weli sí yē bàli bīɛlɛ tɛ́ngɛlɛ ní lè, bɛ̀ sí ki yē weli yē suɔlɔ koligo nī gè.