Zaki 1

Sɛbɛ ŋáà Zaki 'sɛbɛ wè

Zaki

Síɛrilɛ

1 Mi Zaki wè, Kulocɛliɛ nɛ́ Kàfɔli Zezi baakuɔwɔ wè, mi nɛ yeli síɛri. Yeli mɛ́ mi nɛ sɛbɛ ŋáà tórigi wè, yeli bálì ye 'cɛrigɛ nɛ̀ màʔa duniya nī wè, saaya tùluyo kiɛ nɛ́ siin yè.

Tɛ́ngɛlɛ lè nɛ́ sícilige ní gè

2 Nɛ siinyɛninɛ, ye- ki yaʔa ki- puu yeli mɛ́ fundaanra kpuʔɔ a kafurɔgɔlɔ feliye 'yeli taa wè. 3 Ye- ki cɛ́n a kafurɔgɔlɔ ke 'yeli tɛ́ngɛlɛ siʔɛ lè nɛ̀ wéli lè, lèbaanna bé jíin yeli nī. 4 Ki sí yɛli yeli- lèbaanna le fúɔ bè sa nɔ̀ láʔala nɛ̄ lè, dí yeli sí nyuɔ bè fori bé sí puu tiɛlɛfun kele ke mìɛni nī; a kire 'kpíʔile gè, yakaa sǐ yeli laaʔ.

5 A sícilimɛ 'yeli wáà laa, siɛn wi- pi náari Kulocɛliɛ mɛ́ wè; wiī nɛ siɛnnɛ pe mìɛni kanʔa nɛ́ funviige ní, wi wè siɛn cɔ̀rí kire nɛ̄ gèʔ. Siɛn wi bé ki taa. 6 Siɛn wi sí náarigɛ kpíʔile gè wi fǎri káalaʔ, wi- ki kpíʔile nɛ́ tɛ́ngɛlɛ ní. Á kire 'laa siɛn ŋíì wi nyɛ́ni káala wè, wi kɛnmɛ piī bɛ̀ kuʔɔjii luʔɔ tíɛlɛ gáà káfaligɛ ki cî nɛ yɛ̀gí nɛ wáari gè, nɛ ki fílagi nɛ mári gè. 7 Ki siɛn wi fǎri ki sɔ̀ngí wire bé yakaa taa Kàfɔli mɛ́ wèʔ. 8 Kakaaliyɛfɔli wī kire siɛn wè, wiī nɛ yiʔi wi kakpiʔiligele ke mìɛni nī gèle.

Fuunmɔfɔli nɛ́ lɔrifɔli wori dè

9 Siinyɛni ŋíì wī fuunmɔfɔli wè, wi- puu fundaanra nɛ̄, nɛ̀ taʔa gíi nɛ̄, Kulocɛliɛ nyɛ́nì wi kpúʔɔ. 10 Ŋìi sí wī lɔrifɔli wè, wiri fundaanra kpínʔini bà Kulocɛliɛ wi 'wi tìrige wè. Nɛ̀ taʔa gíi nɛ̄, wi bága pa kúɔ bɛ̀ nyàʔa fiɛnrɛ tíɛlɛ. 11 Nɛ́ ki cɛ́n a cɛngɛ ki gbɛ́nɛ̀ yiri nɛ wáari níɛ sórigi wè, ki nɛ̂ nyàʔa sórigo gè nɛ̀ ki fiɛnrɛ fɛ́ni dè; ti nɛ̂ tuu, ki cɛ̀nrɛ ti nɛ̂ kúɔ. Bà ki yē nɛ̀ pínɛ, lɔrifɔli wi bága kúɔ bé wi kakuʔɔlɔ yaʔa gèle.

Kagbɛngɛlɛ gèle nɛ́ puuwelige ní gè

12 Siɛn ŋíì wi 'fùrɔgɔ sori gè, wi wuʔu kiī tànʔa. Nɛ̀ taʔa gíi nɛ̄, a wi kɛ́nì fùrɔgɔ kpàri gè nɛ̀ cò nɛ̀ kúɔ wè, wi bé kpuʔɔrɔ ndɔ̀ngɔ taa gè bànguɔ sìi wuʔu gè, gàa nɛ̄ Kulocɛliɛ wi 'nyuɔ fɛ̀ni nɛ́ jo wire bága ki kɛn bìli mɛ́ wire 'pe dɛ́ni bèle.

13 A puuwelige 'siɛn taa, siɛn wi fǎga jo Kulocɛliɛ wi nyɛ́ni wire pun nɛ wéliʔ. Kulocɛliɛ wi wè yakaa gbɛ̀ wi puu bè wéli wi- kapiile kpíʔileʔ, wi míɛni wi wè nɛ siɛn pun nɛ wéli wi- kapiile kpíʔileʔ. 14 Gìi ki 'cɛ́n gè, siɛn ó siɛn wi tíimɛ kanɛdaanna lire ni sî wi puu nɛ̀ wéli bè wi le kapiile nī. Siɛn wi nɛ̂ fàan nɛ wi kanɛdaanna kúu lè, ni nɛ̂ wi pùunni. 15 A kanɛdaanna ni pɛ́nì liɛ baa siɛn wi fungo nī gè, ni nɛ̂ kapiile sii. A kapiile ni pɛ́nì luʔɔri lè, ni nɛ̂ pɛn nɛ́ kùu ní.

16 Mi siinyɛninɛ yeli bálì ye 'mi dɛ́ni bèle, ye fǎga tí siɛn- yeli fáanni bè yeli pùunniʔ. 17 Yakɛnjɛ̀nrɛ ti mìɛni dè, nɛ́ gìi pe sî kɛn siɛn mɛ́ á ki nɛ̂ puu nɛ̀ nyuɔ nɛ̀ fori gè, tire nɛ kɔ́ngi naamɛ kpìɛnmɛcaan yɛrɛ ti yigefɔli wi tiʔɛ nī. Wire wè, wi wè nɛ yiʔi púloʔ, wuɔmɔ fáala wè jíin wi tiʔɛ nī gèʔ. 18 Wire mɛ́ ki 'yɛ̀ á wi 'weli faan nɛ̀ yige nɛ́ wi kányiʔɛ siɛnrɛ tire fànʔa ní gè, gìi ki bé tí we- puu pélile bèle wi yafaanra felide ti mìɛni nī dè.

Te siɛnrɛ lúru dè mári ti kpínʔini

19 Nɛ siinyɛninɛ yeli bálì ye 'mi dɛ́ni bèle, yeli 'yɛli bè dàa cɛ́n dè: siɛn ó siɛn wi- puu sícaʔawa wiri lúru, wí sí nyígi juulo kɔli mɛ́ gè, wi- puu wi fungo ki fǎri yɛ̀gí fáari fáariʔ. 20 Nɛ̀ taʔa gíi nɛ̄, siɛn funyɛrigɛ ki wè kaala kúu ni- puu sínnɛ Kulocɛliɛ yiʔɛ mɛ́ gèʔ. 21 Kire nɛ̄, ye- láʔa kanuʔɔrɔ felide ti mìɛni nɛ̄ dè, nɛ́ sìpiire felide ti mìɛni ní dè, yé sí yìye cɛ́rigɛ ye- Kulocɛliɛ siɛnrɛ cò dè dàa wi 'le yeli nī bèle, ti bé gbɛ̀ yeli sìi suɔ wè.

22 Yeri tári Kulocɛliɛ siɛnrɛ nɛ̄ dè, ye fǎga kò de ti lúru yákuɔʔ, béri yìye fáanni yeli tíimɛ bèleʔ. 23 Nɛ̀ taʔa gíi nɛ̄, a siɛn nɛ Kulocɛliɛ siɛnrɛ lúru dè nɛ́ sí kò wi wè ti tári dèʔ, kire siɛn wiī majo bɛ̀ siɛn cî wi yiʔɛ wéli gè dibale nī wè. 24 A wi kɛ́nì wìi wéli nɛ̀ kúɔ wè, wi nɛ̂ láʔa nɛ̀ kɛ́, cɛ̀ri 'sìʔɛrɛ níɛ̀ fìʔɛ mɛni wi yiʔɛ ki yē gè.

25 Siɛn ŋíì sí wi 'yiʔɛ le nɛ tɛnmɛ dè, dàa ti 'nyuɔ nɛ̀ fori dè níɛ̀ siɛn kɛn wi nɛ̂ puu wìimɛ wè, a siɛn wiì fìʔɛ nɛ́ siɛnrɛ díì ní wi 'lúʔu dèʔ, a wi 'lèbaanna le nɛ ti tári dè, kire siɛn wi bé fundaanra taa wi kakpiʔiligele nī gèle.

26 A siɛn ŋíì nɛ sɔ̀ngí wire nɛ Kulocɛliɛ koligo gbùʔɔrɔ́ gè, nɛ̀ sí ki taa wiì jáaʔ wi nyinɛ nɛ̄ lèʔ, siɛn wiī nɛ wìi fáanni wī, kire siɛn wi Kulocɛliɛ kodanʔara ti wè yafiɛnʔ. 27 Kulocɛliɛ kodanʔara dáà Tuufɔli Kulocɛliɛ wiī nɛ tɔ́ri cìilide dè, ti wè núʔɔrɔ dèʔ, ti n'dɛ: mari círile nɛ́ lakicɛlilɛ sári bèle pe fùrɔgɔ lɛ̀lɛ nī lè, má sí mìɛ cò duniya kanuʔɔrɔ nɛ̄ dè.