Ye fǎri siɛnnɛ cuɔnri bèleʔ
2
1 Nɛ siinyɛninɛ,
yeli bálì bīɛlɛ tɛ́ngɛlɛ nī lè Kàfɔli Zezi Kirisi nī wè,
wire ŋáà wī kpuɔmɔ nī bè,
ye fǎga tí béri siɛnnɛ cuɔnri bèleʔ.
2 Ye- ki sɔ̀ngi wêli,
a siɛn wáà sɛ́nì yiri baa yeli gboli mɛ́ lè nɛ́ tiɛ fìʔiwe ní kabiɛlɛ nɛ̄ lè,
nɛ́ burujɛ̀nrɛ le wè,
á fɔ̀ngɔfɔli míɛni sɛ́nì yiri,
nɛ́ burujɛnminidɛ ní.
3 Ŋàa wi 'burujɛ̀nrɛ le dè,
a yeli 'wire wéli nɛ̀ kpuʔɔrɔ taʔa wi nɛ̄,
nɛ́ wi yɛ:
«Pa tɛ́ni náʔa tiɛcɛ̀ngɛ gáà kire nī.»
Nɛ́ sí fɔ̀ngɔfɔli wire yɛ:
«Muɔ wè,
yéri baa mmɛ gè»,
á kire 'laa,
«tɛ́ni dàala nɛ̄ náʔa gɛ,
mi tɔliyɔ táanni yè.»
4 A yeli 'kire kpíʔile gè,
yeli wè siɛnnɛ cuɔnri bèle wī lé ?
Yeli nɛ siɛnnɛ cuɔnri bèle nɛ́ sɔ̀ngirɔ táà ní dàa tiì yɛli dèʔ.
5 Mi siinyɛninɛ yeli bálì ye 'mi dɛ́ni bèle,
ye- lúʔu m'mɛ́:
bàli bīɛlɛ fɔ̀ngɔfɔlilɔ bèle duniya nyaamɛ nɛ̄ bè,
je Kulocɛliɛ wire wi 'pe nyíɛnɛ nɛ̀ kɔ̀n pe- puu lɔrifɔlilɔ tɛ́ngɛlɛ nī lè;
pe bága Kulocɛliɛ Kùlofɔligɔ kɔrigɔ lìi gè,
Kulocɛliɛ wi cé nyuɔ fɛ̀ni ki wori nɛ̄ dè bìli mɛ́ wire 'pe dɛ́ni bèle.
6 Nɛ̀ sí ki taa,
yeli 'fɔ̀ngɔfɔli máama wè.
Lɔrifɔlilɔ peli sí bīɛlɛ pe nyɛ́ni yeli wuʔɔ,
níɛ yeli cògí nɛ waa kàyuʔujuusaaya mɛ́ yè,
bà bɛ̀ʔ lé ?
7 Míɛcɛ̀ngɛ gáà gī yeli nɛ̄ gè,
peli túʔu bɛ̀ʔ pe nyɛ́ni ki faʔa ?
8 Kányiʔɛ gī,
kùlofɔligɔ Fànʔa Siɛnrɛ dáà dī baa Kulocɛliɛ siɛnsɛbɛrɛ nī dè,
ti 'jo:
Muɔ siɛnnyɛni woli yaʔa lè ni- muɔ dɛ́ni kɛnmɛ bíì nɛ̄ muɔ 'mìɛ dɛ́ni wèa,
a yeli 'ni kpíʔile nɛ̀ fori wè,
kire ki 'yɛli gè.
9 A yeli sí nɛ siɛnnɛ cuɔnri bèle,
kapiile nī kire gè,
Fànʔa Siɛnrɛ ti kàyuʔu ki 'tuu yeli nɛ̄ bà ki 'nyaa yeli yē lúʔubiɛnnɛ bèle ti yiʔɛ mɛ́ gè.
10 Ki 'nyaa a siɛn 'Fànʔa Siɛnrɛ ti mìɛni tánʔa nɛ̀ fori dè,
nɛ́ pɛ́nì tuu kajuudiɛlɛ láà nigbe nī lè,
wi 'tuu Fànʔa Siɛnrɛ ti mìɛni nī dè wī.
11 Nɛ́ ki cɛ́n ŋàa wi 'ki juu nɛ́ jo:
Fǎga ceyuugo kpíʔileʔb wè,
wi 'ki juu nɛ̀ pínɛ nɛ́ jo:
Fǎga siɛn kpúuʔc.
A muɔ cɛ wè ceyuugo kpínʔiniʔ,
nɛ́ sí nɛ siɛnnɛ kpúu wè,
muɔ yē siɛnluʔubiɛnwɛ Fànʔa Siɛnrɛ ti yiʔɛ mɛ́ gè wī.
12 Ye- yeli juugɛnmɛ nɛ́ yeli kakpiʔiligele yaʔa gèle ke- puu ti 'yɛli nɛ́ Fànʔa Siɛnrɛ ní dè dàa ti sî siɛn kɛn wi nɛ̂ puu wìimɛ wè,
ye ki cɛ́n tire ti bága yeli kàyuʔu juu gè.
13 Á kire 'laa wè,
kàyuʔujuujɛngɛ gè,
siɛn ŋíì wiì puu nɛ nyinimɛ tari wèʔ,
Kulocɛliɛ wiǐ ga nyinimɛ taa ki siɛn nɛ̄ wèʔ.
Nɛ̀ sí ki taa nyinimɛ pi ŋɔri ti 'tóri kàyuʔu nɛ̄ gè.
Tɛ́ngɛlɛ náà nī kakpiʔiligele fùn wè niī kùulo wī
14 Nɛ siinyɛninɛ,
ki 'gáa kúɔ,
a siɛn 'jo tɛ́ngɛlɛ yē wire mɛ́ wè,
nɛ̀ sí ki taa wi kakpiʔiligele ke wè ki tìí wèʔ ?
Kire tɛ́ngɛlɛ náà ni bé gbɛ̀ wi suɔ lé ?
15 A ki yē burulere ti 'fɔ̀n siinyɛni wáà mɛ́ wè,
nàguɔ á kire 'laa cɛliwɛ wè,
nɛ̀ pínɛ siliire ti wè nɛ tari pe nɛ̄ cɛnyɛ yi mìɛni nīʔ,
16 a yeli wáà 'pe yɛ:
«Yeri waa yanyige nɛ̄,
ye sa yɛrɛ le ye yìye fúugo,
ye lìi ye tín.»
Yeli sì sí yafiɛn kɛn pe mɛ́ʔ gìi ki bé pe woli nyuɔ lèʔ.
Kire bé gáa nyuɔ ?
17 Bɛ̀ tɛ́ngɛlɛ ni yē kire kɛnmɛ nɛ̄,
a kakpiʔiligele wè ni nī lèʔ,
niī kùulo wī.
18 Wàa bé gbɛ̀ taa bè muɔ yɛ:
«Tɛ́ngɛlɛ yē muɔ mɛ́,
mi wè kakpiʔiligele sí yē m'mɛ́.
Muɔ tɛ́ngɛlɛ tìɛ lè mi nɛ̄ wêli kakpiʔiligele fùn wè,
mi wè,
m'bé tɛ́ngɛlɛ tìɛ lè muɔ nɛ̄ mi kakpiʔiligele nī gèle.»
19 Muɔ 'tɛ́ngɛ ki nɛ̄ Kulocɛliɛ wiī nigbe,
kire yē cɛ̀ngɛ;
gbòdolilo míɛni pe 'tɛ́ngɛ kire nɛ̄ nɛ̀ pínɛ,
nɛ́ sí nɛ fún nɛ yàʔará fíɛrɛ nɛ̄ dè.
20 Muɔ sí nɛ caa bè ki cɛ́n lé siɛn leyiʔɛgɛ muɔ,
dí tɛ́ngɛlɛ lè kakpiʔiligele fùn wè,
lire yē wíra wī ?
21 Weli tuuliʔɛ Birayima wè,
kakpiʔiligele mɛ́ túʔu bɛ̀ʔ ki 'taa á Kulocɛliɛ wi 'wi tɔ́ri siɛnsinwɛ wè lé ?
Ki 'nyaa wi cé wi jaa Siaga líɛ wè nɛ̀ taʔa gbùʔɔrɔdiʔɛ yafanʔa nɛ̄ gè bè wi kɔ̀n kakuɔrɔ.
22 Muɔ sì ki nyaa wè léʔ,
tɛ́ngɛlɛ ni 'pínɛ nɛ̀ baara nɛ́ wi kakpiʔiligele ní gèle,
a kakpiʔiligele ke sí tɛ́ngɛlɛ kɛn lè a ni 'nyuɔ nɛ̀ fori.
23 Kire nɛ̄ Kulocɛliɛ siɛnsɛbɛrɛ ti nyɛ́nì fori,
dàa ti 'ki juu nɛ́ jo:
Birayima wi cé tɛ́ngɛ Kulocɛliɛ nɛ̄ wè,
a Kulocɛliɛ wi 'wi tɔ́ri siɛnsinwɛd.
Nɛ̀ pínɛ a Kulocɛliɛ wi 'jo wiī wire nàgorie.
24 Yeli sì ki nyaa wè lé,
siɛn wiī nɛ tɔ́ri siɛnsinwɛ wi kakpiʔiligele keli kɛnmɛ nɛ̄,
tɛ́ngɛlɛ lire yákuɔ bɛ̀ʔ.
25 Bɛ̀ ki 'kpíʔile nɛ̀ pínɛ nàjaacuɔ Arayabi wori dè:
wi kakpiʔiligele keli bɛ̀ʔ lé ke cé tí a Kulocɛliɛ wi 'wi tɔ́ri siɛnsinwɛ wè lé bà wi cé Isirayɛli tundunminɔ tìrige bèle,
nɛ́ kúɔ nɛ́ pe tìɛ a pe 'tóri koligo káà kiiyɛ nī gèf ?
26 Kiī cɛ́ngɛ,
a pìle ni 'laa cetinnɛ nī lèʔ,
cetinnɛ ni 'kùu wī.
Kanugo kire gī,
tɛ́ngɛlɛ lè,
a kakpiʔiligele 'laa ni nī wè,
niī kùulo wī.