Siɛn 'yɛli wi- wi nyinɛ cò lè macɛn
3
1 Nɛ siinyɛninɛ,
ye fǎga puu nìʔɛnɛ bèri ki caa bè puu tɛnmɛfɔlilɔ bèleʔ.
Yeli 'ki cɛ́n weli tɛnmɛfɔlilɔ bèle,
weli kàyuʔu ki bága gbɛ̀n bè tóri.
2 Ki 'nyaa we mìɛni bèle,
wiyē nɛ tun kele nìʔɛgɛlɛ nī.
A siɛn ŋíì wè tun nyasiɛnrɛ nī dèʔ,
kire siɛn wi 'nyuɔ nɛ̀ fori,
wi bé wìi cògɛnmɛ cɛ́n.
3 Bà we sî gàrifiile le bèle suɔnyɔ mɛ́ yè nyuɔyɔ nɛ̄ yè bèri yi cɔ̀rí yi de lúru weli nɛ̄ bèle,
kire nɛ̂ ki kɛn weli nàa suɔnyɔ yi cetinnɛ ni mìɛni kàrigí lè yi de waa tiʔɛ gíì nī weli nɛ caa wè.
4 Ye- kɔ́rikpoliyo kɛnmɛ sɔ̀ngi bè:
a yi cɛ yē kpoliyo kɛnmɛ ó kɛnmɛ nɛ̄,
káfaligboliyo yi nàa yi ŋɔrigi.
Kɔ́rifɛwɛ wi nɛ̂ kɔ́ri bìnige tíʔɛ gè nɛ yi kàrigí yi nàa waa wi nyɛ́ni tóridiɛyɛ nī yè.
5 Bɛ̀ ki yē nɛ̀ pínɛ nɛ́ nyinɛ ní lè,
céri tiʔɛ káà gī,
ni wè sáaʔ,
ni sí nɛ nìi tòbiló nɛ kakpoliyo nyu.
Ye- nyaa,
a kàsun ki cɛ yē cíʔɛ,
ki nɛ̂ gbɛ̀nɛ kɔligɔ sórigo.
6 Nyinɛ míɛni lè niī bɛ̀ kàsun tíɛlɛ,
duniya kapiʔile ke mìɛni nyùgo kire gī nyinɛ lè,
á ni sí ní weli céri tiʔɛ káà nɛ weli cetinnɛ ni mìɛni nɔ́ri lè.
Nyinɛ ni nɛ̂ kàsun káà le,
kire ki nɛ̂ siɛn sìi wi mìɛni cúʔɔ wè;
ki 'nyaa lire tíimɛ lè bànguɔ kàsun kiī ni nɛ̄.
7 Siɛn wi 'jáa nɛ nyàʔayɛrɛ ti mìɛni gbún nɛ ti kàrigí,
sínjapigele gèle,
yafulolido dè,
luʔɔ yɛrɛ dè.
A wi sí tɔ̀ni nɛ̀ jáa nɛ ti gbún nɛ ti kàrigí.
8 Gìi sí ki 'nyinɛ lire kúɔ lè,
siɛn sǐ gbɛ̀ jáa bè lire kàrigɛʔ.
Niī sìpiile,
niī nɛ wáa nɛ yiʔi.
Suɔnrɔ díì ti nyɛ́ni siɛn kpúu wè,
tire ti 'ni nyì.
9 Nyinɛ lire ní wiyē nɛ Kàfɔli tòbiló wè,
wire wī Tuufɔli wè.
Nɛ̀ pínɛ lire ní we nàa siɛnnɛ dɛngi bèle,
pe sí yē Kulocɛliɛ wi líɛrɛ.
10 Nyuɔ nugo nī gè diba siɛnrɛ ti nàa nyu,
dɛ́ngɛ siɛnrɛ míɛni ti nàa nyu.
Nɛ siinyɛninɛ,
bà bɛ̀ʔ ki 'yɛli bè puu kire kɛnmɛ nɛ̄ bèʔ.
11 Lawiinunɔ ni nàa latanʔa yigi lé nɛ́ lasorigo ní lé ?
12 Nɛ siinyɛninɛ,
kiǐ gbɛ̀ kpíʔileʔ sàanfiidiige ki- wolivi yasɛnrɛ sɛnʔ.
Nɛ̀ pínɛ ɛrɛzɛn fétirige míɛni kiǐ gbɛ̀ sàanfiidiige yasɛnrɛ sɛnʔ;
lawiile náà ni yasuʔɔgɔ luʔɔ yigi gè,
niǐ gbɛ̀ jáa bè latanʔa yigeʔ.
Sícilimɛ kányiʔɛ wobo bè
13 Ŋáa wī baa yeli nī bèle,
ŋàa wi 'kaala yiʔɛ cɛ́n nɛ́ ní síciliwe wè ?
Siɛn wi- ki tìɛ nɛ́ wi tánʔagɛnjɛ̀nmɛ ní bè wi kakpiʔiligele nī gèle;
wi- ki kpíʔile nɛ́ sícilimɛ ní nɛ́ funnyige ní.
14 Á kire 'laa wè,
a ki yē yejaʔa piʔi nɛ́ nyabiɛnnɛ dī baa yeli funyɔ nī yè,
ye fǎri nàgbuʔɔrɔ kpínʔini nɛ́ tire ní dèʔ béri finɛnɛ de kányiʔɛ tɔ́ngi gèʔ.
15 Kire sícilimɛ báà felibe piì kɔ́n nyìʔɛnɛ nīʔ;
náʔa duniya nī pire 'kɔ́n,
Setɛni sícilimɛ bī.
16 Nɛ́ ki cɛ́n tiʔɛ gíì nī yejaʔa nɛ́ nyabiɛnnɛ yē wè,
kanyaʔamirɛ nɛ́ kacuʔɔrɔ felide ti mìɛni nɛ̂ puu baa ki tiʔɛ nī gè.
17 Nɛ̀ sí ki taa sícilimɛ bíì pi 'kɔ́n naamɛ gè,
kapelile lè,
ki sícilimɛ piī cìilibe.
Nɛ̀ pínɛ piī nɛ́ yanyige ní nɛ ní funnyige ní,
pi nàa ki caa siɛnnɛ peri nyu peri lúru pìye mɛ́.
Piī nɛ nyinimɛ tari kpuʔɔ,
nɛ kacɛ̀ngɛlɛ kpínʔini.
Pi wè siɛnnɛ cuɔnri bèleʔ,
pi wè nɛ́ funyɔ siin níʔ.
18 Bìli pe nyɛ́ni yanyige caa gè,
pe nàa yanyige kakpiʔiligele kúu.
Gìi pe nɛ̂ kɛ́nì taa tɔ̀ni wè,
sínmɛ bī.