Siɛn fǎga wìi taʔa duniya yɛrɛ nɛ̄ dèʔ
4
1 Gáa ki cî pɛn nɛ́ kàsii ní wè ?
Gáa ki sî pɛn nɛ́ cáanra ní dè yeli sunʔɔmɔ nī bè ?
Yeli kanɛdanʔana keli nī túʔu bɛ̀ʔ ti kɔ́ngi níɛ túngu nɛ́ yeli cetinnɛ ni mìɛni ní lè ?
2 Yakaa láa nɛ̂ puu yeli nɛ̄,
yeli nɛ̌ sí ki taaʔ.
Yeli nɛ siɛnnɛ kpúu,
nyabiɛnnɛ yē yeli nī nɛ̀ pínɛ,
nɛ̀ sí ki taa yeli wè gbɛ̀nɛ yakaa tariʔ.
Yeli nɛ cáanri,
nɛ kàsii túngu,
yeli wè yakaa tariʔ,
nɛ̀ taʔa gíi nɛ̄,
bɛ̀ yeli wè nɛ ki náari Kulocɛliɛ mɛ́ wèʔ.
3 Yeli nɛ náari,
yeli sí wè yafiɛn taʔaʔ.
Nɛ̀ taʔa gíi nɛ̄,
yeli náarigɛnnɛ niì nyuɔʔ.
Yeli cî nɛ náari,
a yeli 'ki taa wè bé sí de yeli kanɛdanʔana kpínʔini gèle nɛ́ ki ní nī wī.
4 Yeli yē bɛ̀ ceyuulo tíɛlɛa.
Yeli sì ki cɛ́n lé a siɛn nàgoriro cò nɛ́ duniya yɛrɛ ní dè,
ki siɛn wiī Kulocɛliɛ leguuwo wī lé ?
A siɛn ŋíì sí nàgoriro cò nɛ́ duniya ní wè,
kire siɛn wiī leguuro nɛ̄ nɛ́ Kulocɛliɛ ní wè wī.
5 Dùʔɔ yeli sí nɛ sɔ̀ngí Kulocɛliɛ siɛnsɛbɛrɛ ti 'ki juu nyùgo fùn wī,
nɛ́ jo:
Pìle náà Kulocɛliɛ wi 'le weli nī bèle,
ni 'wi dɛ́ni kacɛ́nmɛ fùnb.
6 Kulocɛliɛ wi sí weli kɛn nɛ́ kpuʔɔrɔ táà ní;
tire 'kpúʔɔ nɛ̀ tóri.
Kire nɛ̄ Kulocɛliɛ Siɛnsɛbɛrɛ ti 'ki juu nɛ́ jo:
Bìli pe pìye nyíɛnɛ bèle,
Kulocɛliɛ wiī nɛ túngu nɛ́ pe ní.
Bìli sí pe pìye cɛ́rigi bèle,
Kulocɛliɛ wi nɛ̂ wi kpuʔɔrɔ kɛn dè pe mɛ́c.
7 Kire nɛ̄,
yeri yìye cɛ́rigi Kulocɛliɛ mɛ́ wè,
yé sí yéri ye gbòdolilo kàfɔli sige wè yeri cáanri,
bɛ̀ wi bé fɛ̀ bè líili yeli nɛ̄.
8 Yeri sìʔɛrɛ́ yeri kpɔni Kulocɛliɛ nɛ̄ wè,
bɛ̀ wi béri sìʔɛrɛ́ de kpɔni yeli nɛ̄.
Ye- yeli kiyɛ jíge yè ye mùnu ye- yige kapiʔile nī gèle,
yeli kapiigbiʔilile bèle.
Yeli jànvaafɔlilɔ bèle,
ye- yeli funyɔ cìile yè.
9 Ye- yeli fuunmɔ wuʔu cɛ́n gè yéri ki yáa,
yeri nyɛni.
Ye- yeli kátaanra yaʔa dè ti- yiʔɛ ti- puu fuunmɔ,
dí yeli fundaanra ti sí yiʔɛ bè puu funbiɛnrɛ.
10 Yeri yìye cɛ́rigi Kàfɔli wi yiʔɛ mɛ́ gè,
bɛ̀ wi bé yeli kpúʔɔ.
Siɛn fǎri wi siɛnnyɛni sànʔáʔ
11 Nɛ siinyɛninɛ,
ye fǎri yìye sànʔáʔ.
A siɛn ŋíì nɛ wi siɛnnyɛni sànʔá wè,
á kire 'laa nɛ kàyuʔu nyu wi siɛnnyɛni nɛ̄ wè,
siɛn wiī nɛ Kulocɛliɛ Fànʔa Siɛnrɛ sànʔá dè wī,
nɛ̀ pínɛ wiī nɛ kàyuʔu nyu Fànʔa Siɛnrɛ nɛ̄ dè wī.
A muɔ siɛn sí nɛ kàyuʔu nyu Fànʔa Siɛnrɛ nɛ̄ dè,
kire 'ki tìɛ muɔ wè nɛ ti tári wīʔ;
muɔ 'kò nɛ ti kàyuʔu nyu wī.
12 Kulocɛliɛ wire nigbe wi 'fànʔa siɛnrɛ ti kɛnfɔli wè,
nɛ́ ní kàyuʔujuufɔli wè.
Wire wi bé gbɛ̀ siɛn suɔ,
nɛ̀ pínɛ wire wi bé gbɛ̀ siɛn woli cúʔɔ.
Muɔ wè do,
muɔ yē ŋáa,
nɛ́ kɛ́ni kàyuʔu nyu muɔ siɛnnyɛni nɛ̄ wè ?
Kiì yɛli siɛn de wìi nyíɛnɛʔ
13 Píra ŋáà nī wè ye- dàa lúʔu dè,
yeli bálì ye sî jo:
«Pàngɛ gè á kire 'laa mbànʔa,
weli bé kɛ́ kàʔa gáà mɛ́ gè,
we bé sa yiɛlɛ nigbe kúɔ baa bè jaʔa wáa bè wali taa.»
14 Yeli sì sí ki cɛ́nʔ gàa ki bága yeli taa mbànʔa gèʔ.
Ki 'nyaa yeli yē bɛ̀ nàwirile tíɛlɛ:
ni nɛ̂ yɛ̀ nɛ̀ lɛ̀lɛ cɛ̀ri kúɔ,
náà koli nɛ̀ cɛrigɛ.
15 Sɛ́ni ye 'tire juu dè,
ye- jo:
«A Kàfɔli wi 'fɔ̀li,
a sìi yē baa wè,
we bé gàa nɛ́ gàa kpíʔile.»
16 Nɛ̀ sí ki taa bà ki yē ŋɔ̀ wè,
yeli nɛ yìye nyíɛnɛ,
nɛ nàgbuʔɔrɔ kpínʔini.
Kire nìɛnyiɛnigɛ gáà gè,
kiì nyuɔʔ.
17 A siɛn ŋíì 'kacɛ̀ngɛ kpíʔile macɛ́n,
nɛ́ sí kò wi wè ki kpínʔini gèʔ,
kapiile nī lire lè.