Lɔrifɔlilɔ pe- pìye cò díɛ
5
1 Píra ŋáà nī wè,
ye- dàa lúʔu dè,
yeli bálì bīɛlɛ lɔrifɔlilɔ bèle.
Yeri nyɛni yeri kòkuʔulo wáari,
yawuʔɔ gáà ki bága pa tuu yeli nɛ̄ bèle.
2 Yeli lɔri ti 'fúnʔɔ,
a dɔnwɔ 'yeli bururo káa dè.
3 Yeli tiɛ wè nɛ́ yeli walifiiwe ní wè,
kpɛ̀nimɛ nyɛ́nì ti cúʔɔ.
Kire kpɛ̀nimɛ báà pire pi bága yeli kolimɔ wuʔu juu gè yeli nɛ̄,
bé yeli céri cúʔɔ dè bɛ̀ kàsun tíɛlɛ.
Yeli sí nyɛ́nì lɔri fàa nɛ̀ gbuʔulo cɛnzɛnyɛ nyáà nī yè.
4 Ye- nyaa,
baakuɔlɔ bílì pe 'baara yeli siiye nī yè nɛ̀ yeli yaliire líɛ dè nɛ̀ nyɔ́gɔ dè,
yeli 'cíi pe sàri nɛ̄ wèʔ.
Kire sàri wire kɔngɔ baakuɔlɔ piyē nɛ wáari ki nɔ̀gí Nyìʔɛnɛ Kapiɛngbuɔnnɔ Kàfɔli nɛ̄ wè.
5 Yeli nyɛ́nì yeli sìi kúɔ wè tàanma nī bè duniya nī wè nɛ̀ yeli ladaanma kele kúɔ gèle.
Yeli 'lìi nɛ̀ kpólilo nɛ̀ sùnmɔ le bɛ̀ yajuuro tíɛlɛ níɛ yeli kúujɛngɛ siri gè.
6 Siɛn ŋíì wī sínwɛ wè,
a yeli 'kàyuʔu cáan wi nɛ̄ nɛ̀ wi kpúu.
Wiì cáan nɛ́ yeli níʔ.
Ye- fùrɔgɔ kpàri gè ye cò
7 Kire nɛ̄,
nɛ siinyɛninɛ,
ye- funyɔ nyígi yè fúɔ bè taa Kàfɔli wi ga pɛn.
Ye- tàfaliwɛ kɛnmɛ sɔ̀ngi bè:
wi nɛ̂ fungo nyígi náà nɛ wi siʔi yaliicɛ̀nrɛ ti líɛ lɛ̀lɛ siri lè.
Wi nɛ̂ fungo nyígi ti kúrugu bága pa yaliipelide líɛ dè nɛ́ kàduʔumɛ woria ní dè.
8 Yeli míɛni bèle,
ye funyɔ nyígi yè,
yé yeli nàzɔnnɔ lìri bèle.
Nɛ̀ taʔa gíi nɛ̄,
Kàfɔli wi pɛnjɛngɛ ki 'kò túɔn.
9 Nɛ siinyɛninɛ,
ye fǎri kúnʔɔri yìye nɛ̄ʔ,
gìi ki bé tí kàyuʔu fǎga ga sa juu yeli nɛ̄ wèʔ.
Ye- nyaa,
kàyuʔujuufɔli wiī yériwe wìile nɛ̄ lè.
10 Nɛ siinyɛninɛ,
ye- Kulocɛliɛ siɛnjuuliɛlɛ kɛnmɛ wéli bè ye- puu pe tíɛlɛ bɛ̀ pe cé wuʔɔgɔ kpàri gè nɛ̀ cò gè,
peli bálì pe 'puu nɛ nyu Kàfɔli wi míʔɛ nɛ̄ gè.
11 Ye- ki wéli kìɛ,
bìli bīɛlɛ kpàricogofɔlilɔ bèle,
weli nɛ pe wori nyu dè nɛ́ jo piyē fundaanra nɛ̄.
Kɛnmɛ bíì nɛ̄ Zɔbi wi cé fùrɔgɔ kpàri gè nɛ̀ cò gè,
yeli 'ki wori lúʔu dè nɛ̀ pínɛ gìi Kàfɔli wi cé kɛ́nì kpíʔile wi mɛ́ kúɔmɔ mɛ́ bè yeli 'ki cɛ́nb.
Ki 'nyaa Kàfɔli wi fungo ki 'nyuɔ kpuʔɔ,
nɛ̀ pínɛ wiī nɛ nyinimɛ tari.
Siɛn fǎri kàlíʔ
12 Gìi sí gī kapelile lè nɛ siinyɛninɛ,
ye fǎri kàlíʔ.
Ye fǎri kàlí nyìʔɛnɛ nɛ̄ lèʔ,
ye fǎri kàlí dàala nɛ̄ lèʔ.
Ye fǎri kàlí yakaa fáala nɛ̄ʔ.
A yeli 'jo «ʔaan» wè,
ye- ki yaʔa «ʔaan» wire nɛ̄.
A yeli 'jo «ʔéʔe»,
ye- ki yaʔa «ʔéʔe» wire nɛ̄.
Kire bé tí yeli fǎga tuu Kulocɛliɛ kàyuʔu nī gèʔ.
Siɛnsinwɛ náarigɛ kiī nɛ́ fànʔa ní
13 Fùrɔgɔ yē wàa nɛ̄ yeli nī bèle lé ?
Siɛn wi de Kulocɛliɛ náari.
Wàa yē fundaanra nɛ̄ yeli nī bèle lé ?
Siɛn wi de Kulocɛliɛ gbùʔɔrigɔ ŋúnuyɔ ŋú.
14 Wàa yē yaawa yeli nī bèle lé ?
Siɛn wi- liɛlɛ pálì yeri tɛ́ngɛfɔlilɔ gboli nī lè,
pe sa wi pɔ̀li sùnmɔ ní Kàfɔli wi míʔɛ nɛ̄ gèc,
pé náari wi mɛ́.
15 Kire náarigɛ gáà ki 'kpíʔile nɛ́ tɛ́ngɛlɛ ní lè,
ki bé yaawa puʔɔ wè,
nɛ̀ pínɛ Kàfɔli wi bé wi yɛ̀gɛ.
A ki 'nyaa nɛ̀ pínɛ wi 'kapiʔile kpíʔile wè,
Kulocɛliɛ bé ki yaʔa wi nɛ̄.
16 Kire nɛ̄ yeri yèrí yeli kapiʔile nɛ̄ gèle,
yéri ki nyu de tìí yìye nɛ̄,
yéri náari yìye mɛ́,
gìi ki bé tí ye- puʔɔ.
Siɛn sínwɛ náarigɛ kiī nɛ baara nɛ́ fànʔa ní kpuʔɔ.
17 Elii wi 'puu siɛn nɛ ní bɛ̀ weli tíɛlɛ,
nɛ̀ sí ki taa wi yé náari nɛ́ lèbaanna ní kàsaʔa fǎga tuuʔ.
A kàsaʔa ki 'yéri,
kàsapile sì kɛ́nì tuu dàala nɛ̄ lèʔ,
nɛ̀ pɛ́nì taa yiʔɛlɛ taanri nɛ́ yeye kɔlinid.
18 Kire kàduʔumɛ gè,
a wi ní nɛ̀ náari,
a kàsaʔa ki 'tuu a dàala yaliire ti 'sɛn nɛ̀ nyuɔe.
Bìli pe 'pùunni bèle pe suɔgɛnmɛ bè
19 Nɛ siinyɛninɛ,
a ki 'nyaa yeli nī bèle wàa 'pùunni nɛ̀ líili kányiʔɛ koligo nɛ̄ gè,
á siɛn wáà taa nɛ̀ wi yeri nɛ̀ pɛn wè,
20 ye- ki cɛ́n siɛn ŋíì wi 'kapiigbiʔiliwe yeri wè nɛ̀ yige wi kobuunnigo nī gè,
ki siɛn wi bé kapiigbiʔiliwe wi sìi suɔ wè kùu mɛ́ wè.
Nɛ̀ pínɛ kire bé ki kɛn kapiʔile nìʔɛgɛlɛ bé yáʔa wi nɛ̄f.